ERESENI 20
Inaki Ekeombe kia Abagaka Bakoraa Birori ba Yehova Ense Engima Kegokora Emeremo?
Ekeombe keria kiare koraa nyuma y’ogokwa kwa Yeso
Gosoma rirube korwa ase ekeombe ekio
Nyuma y’ogokwa kwa Yeso, ekeombe egeke kia ‘abatomwa na abagaka barenge Yerusalemu,’ nabwo baare korua oborai na nigo baare konacha igoro ya amang’ana y’engencho ase Abakristo bonsi abaakwa amaguta. (Ogokora 15:2) Ekero baare konacha egento ase ekerengererio ekemo, nase engencho baare kobwatia amariko na korau n’omoika o Nyasae. (Ogokora 15:25) Enchera eyio nero ekobwatigwa rero.
Nyasae nigo akobatumia gokora ogwancha kwaye. Abakristo abaakwa amaguta bagotumeka ase Ekeombe kia Abagaka Bakoraa Birori ba Yehova, nigo banchete mono ring’ana ria Nyasae naende bare ne chisemi ase okonacha buna emeremo yaito egwenerete gokorwa na koiraneria amaborio igoro y’Ebibilia. Nigo bakoumerana kera egwiki korigereria igoro y’okogania kw’Abakristo bamwabo ense engima. Buna yaarenge nyuma y’ogokwa kwa Yeso, ogochika kwa Bibilia nigo kware koruegwa goetera amarube gose abateneneri baare gotaara na abande. Ase enchera eyio abanto ba Nyasae nigo baare gokonywa korengereria na gokora ase obomo. (Ogokora 16:4, 5) Ekeombe kia Abagaka Bakoraa Birori ba Yehova ense engima nigo getenenerete okorosigwa kw’endagera ya kemoika, na kobabeka bonsi omoyo barore egesi y’okorandia koba ey’engencho mono, na gotenenera okobekwa kwa abasacha ase emeremo y’oborai.
Nigo bakobwatia oborai bw’omoika o Nyasae. Ekeombe kia Abagaka Bakoraa Birori ba Yehova nigo bakorigia oborai bw’Omonene o igoro na ense, Yehova amo n’omotwe bw’ekeombe ki’omosangererekano Yeso. (1 Abakorinto 11:3; Abaefeso 5:23) Abagaka abwo tibarikwerora koba abanene ase abanto ba Nyasae. Barabwo, amo na Abakristo bonsi baakire amaguta, nigo bagendererete “gotunyana Emanwa y’Eng’ondi [Yeso] kera aase akogenda.” (Okomaanoka 14:4) Ekeombe kia Abagaka Bakoraa Birori ba Yehova nigo bagoaka ng’a mbuya mono ekero tokobasabera na gosabera egasi yabo.
Mbarabi baarenge ase ekeombe kia abatomwa na abagaka baarenge Yerusalemu nyuma ya Yeso gokwa?
Inaki Ekeombe kia Abagaka Bakoraa Birori ba Yehova rero bakorigia oborai bwa Nyasae?