Omopainia Ning’o?

“Omopainia” n’omonto ogotuka chinsemo chinyia na koigora enchera abanto bande baraete. Nabo toratebe ng’a Yeso nigo arenge omopainia, ase engencho ekero atometwe ase ense nigo achete obokoreri bw’okorua obogima bwaye na koigora enchera erio abanto banyare gotoorigwa. (Matayo 20:28) Rero, aborokigwa baye nigo bakomwegia ase ogotumia chingaki chiabo chinyinge buna ekonyarekana ‘kobakora abande aborokigwa.’ (Matayo 28:19, 20) Abande basoire ase obokoreri bokorokwa obopainia.

Omopainia n’omorandia bwe chingaki chionsi. Birori ba Yehova bonsi n’abarandia b’amang’ana amaya. Korende abande barobeiri obogima bwabo erio banyore chingaki gotumeka buna abapainia b’achachi, ase okorandia chinsa 70 kera omotienyi. Erio goikerania okogania oko abange babo nigo bagochora gokora emeremo y’echingaki chinke. Abande nabo barachorwe koba abapainia ba beene ase chingongo chire n’okogania okonene kwa abarandia b’Oboruoti, na gotumia chinsa 130 gose goetania ase obokoreri kera omontienyi. Abapainia nigo bamenyete obogima botaganetie binto binge, bare nokwegena ng’a Yehova nabamentere ebinto biganeirie ase obogima bwabo. (Matayo 6:31-33; 1 Timotheo 6:6-8) Ase baria chingaki chiabo chikobatanga koba abapainia b’achachi nabo bakoba abapania abakonyi onye bakonyara, komenta obokoreri ase okorandia chinsa 30 gose 50 ase omotienyi.

Omopainia nigo agosegetwa n’obwanchani bwaye ase Nyasae n’abanto. Buna Yeso, ntomanyete buya rero ng’a abanto abange mbare nokogania gw’okomanya amange a kemoika. (Mariko 6:34) Korende ntobwate amang’ana amaya arabakonye bono iga, na kobaa ogosemeria ogoting’u kw’engaki ere bosio. ‘Obwanchani bw’omwamate’ nigo bokomosegeta omopainia korwa chingaki, nechinguru chiaye kobakonya abande ase enchera ya kemoika. (Matayo 22:39; 1 Abatesaloniki 2:8) Ase ogokora igo, okwegena kwaye nigo kogokong’igwa, na komoika Nyasae ang’e, na konyora omogoko omonge.​—Ogokora 20:35.

• Omopainia ning’o?

• Ninki gekobasegeta abande koba abapainia be chingaki chionsi?