Inaki Emeremo Yaito y’Okorandia-Oboruoti Egokorwa?

Egeka egeke konyora atarakwa, Yeso nigo atebete iga: “Amang’ana aya amaya ay’oboruoti narandigwe ase ense yonsi koba kirori ase ebisaku bionsi; erio omoerio ochiche.” (Matayo 24:14) Korende emeremo y’okorandia ense yonsi inaki eraikeranigwe? Ase okobwatia enchera Yeso aorogetie ekero arenge ase ense.​—Luka 8:1.

Nigo togotema kobaranderia abanto ase chinyomba chiabo. Yeso nigo abaegeretie aborokigwa baye barandie amang’ana amaya enyomba ase enyomba. (Matayo 10:11-13; Ogokora 5:42; 20:20) Abarandia abwo beritang’ani, nigo babageretwe chinsemo gete barandie. (Matayo 10:5, 6; 2 Abakorinto 10:13) Narero boigo, okorandia gwaito nigo korobeirie buya, na kera ekeombe ki’omosangererekano bw’Egekristo nigo oire orogongo ase bakorandia. Omoroberio oyio nigo ogotokonya goikerania ogochika kwa Yeso ng’a “toranderie abanto, na tobe birori.”​—Ogokora 10:42.

Nigo tokobeka omokia kogenda ase abanto bagotoka. Yeso nigo atobekerete ekiorokererio ase okobaranderia abanto kera ase, buna ase engegu y’enyancha gose ase egesima. (Mariko 4:1; Yohana 4:5-15) Naintwe boigo nigo togokwana na abanto igoro y’Ebibilia ande onsi ase bagotoka​—ebe ne chibara, chichiro, ase abanto bagotimokera, gose goetera esimi. Ekero twanyorire ribaga, nigo tokobaranderia abaamate baito, abakori emeremo baminto, abana togosoma nabwo esukuru, n’abanto baminto. Okobwaterana ase omokia oyo, yagerire chimilioni chi’abanto abange ense engima koigwa igoro ‘yokoraria kw’ogotoreka.’​—Zaburi 96:2.

Norengererie igoro ya monto onde oratake gosanga nere amang’ana amaya y’Oboruoti bwa Nyasae, na komoorokia engencho y’amang’ana ayio amaya ase obogima bwaye bore bosio? Tibwegimeria amang’ana amaya. Sanga nabande bwango buna ekonyarekana!

• ‘Mang’ana ki amaya’ aganeirie korandigwa?

• Inaki Birori ba Yehova bakwegia Yeso ase okorandia?