ERESENI 3

Inaki Ekeene ki’Ebibilia Giatuboretwe?

Ekeombe ki’abanto bakoegera Ebibilia ase emiaka ya 1870 — Aborokigwa b’Ebibilia emiaka ya 1870

Omonto ogosoma engaseti ya Mnara wa Mlinzi entang’ani — Engaseti entang’ani ya *Mnara wa Mlinzi*, 1879

Omokungu ‘orogetie amangaseti a Mnara wa Mlinzi na Amkeni! — *Mnara wa Mlinzi* rero

Ebibilia nigo yabanete ng’a nyuma yogokwa kwa Yeso, aborokia b’oborimo mbasoe gati gati y’Abakristo ba kare na goonchorana ekeene gi’Ebibilia. (Ogokora 20:29, 30) Nayio agakoreka ekero chingaki chiaigete. Nigo baburukanetie amorokererio a Yeso amo naye chidini chi’oborimo, ekagera Obokristo bw’oborimo bogachaka. (2 Timotheo 4:3, 4) Inaki torabe n’obomaene ng’a rero ntobwate okomanya okuya mono igoro yaria Ebibilia ekorokereria?

Engaki egaika Yehova akamaanora ekeene. Akarwa obobani ng’a ‘engaki y’omoerio, okomanya gw’ekeene nkomenteke.’ (Danieli 12:4) Ase omwaka o 1870 ekeombe egeke kia abanto baare korigia ekeene bakarora ng’a amorokererio ye chikanisa chinyinge tarenge ay’amariko amachenu. Ase igo, bagachaka korigia komanya amorokererio y’Ebibilia a kare, na Yehova akabasesenia n’okomaya okoronge kwa amariko amachenu.

Abanto baare korigia ekeene bakaringoria Ebibilia. Aborokigwa abwo b’Ebibilia barenge n’omokia, baare abatang’ani baito, enchera babwate y’okweorokereria nero tobwate rero. Nigo baare gokwanera Ebibilia etopiki ase etopiki. Na ekero baare koumera ensemo y’Ebibilia enkong’u, nigo baare korigereria ebibungo binde biamariko kobakonya. Nekero omoerio banyorire richibu rikobwatana n’amariko amachenu, nigo baarenge korika inse. Ase ogotiga Ebibilia y’ebasirie ase enchera eyio, nigo baasioretie ekeene igoro y’erieta ria Nyasae n’oboruoti, ogwancha kwaye ase mwanyabanto n’ense, igoro ya abakure na ogosemeria gw’okobokigwa. Okorigarigia okwo kwabo gokabasibora korwa ase okwegena na amorokererio y’oborimo.—Yohana 8:31, 32.

Goika omwaka o 1879 Aborokigwa b’Ebibilia, bakarora ng’a engaki yaikire y’okoraria ekeene ense yonsi. Ase omwaka oyio, bagachaka korosia engaseti eye togendererete korosia goika rero, Mnara wa Mlinzi Unaotangaza Ufalme wa Yehova. Rero nigo togosanga ekeene ki’Ebibilia na abanto ase chinse 240 na ase emenwa goetania 750. Ngaki ende teiyo okomanya gw’ekeene kore okonge buna rero!

Ninki kiaberete ekeene gi’Ebibilia, nyuma y’ogokwa kwa Kristo?
Ninki giatokonyire gw’asioria ekeene korwa ase ring’ana ria Nyasae?