Birori ba Yehova Mbanto ki?

Birori ba Yehova mbarenga omanyete? Abande baito nabo torabe abaamate bao, abakori emeremo bamino, gose mogosoma ekerasi ekemo. Gose ebe ng’a twagotebirie igoro y’Ebibilia. Ase igo intwe mbarabi, naende nase ki togosanga okwegena gwaito na abanto bonsi?

Intwe n’abanto buna onde bwensi. Gati yaito nigo tore abanto bare n’obong’aini, ching’uru n’obonene ao ao. Abande baito nigo twarwete ase chidini, na abande titwegenete Nyasae. Konyora totaraba Birori ba Yehova, twensi nigo twairete chingaki goitona amorokererio y’Ebibilia. (Ogokora 17:11) Na ekero twancheranete naria tware kweorokereria, togachora kera omonto kobwaye komosasima Yehova Nyasae.

Ekero tokwegera Ebibilia nigo tokonyora amaya. Buna monto onde bwensi, ntobwate emechando n’oboremeru. Korende ekero tokobwatia ebirengo bi’Ebibilia ase obogima bwaito bwa kera rituko, nigo tokorora ogonchoreria ase obogima bwaito. (Zaburi 128:1, 2) Eye nesababu eyemo ekogera togosanga nabande ebinto ebiya twegeire korwa ase Ebibilia.

Nigo tomenyete koreng’ana n’ebirengo bia Nyasae. Ebirengo ebi, buna bikorokigwa ase Ebibilia, nigo bigotokonya koba n’obogima obuya na kobasika abanto bande, na koba ne chimbwa buna ogokorera ekeene na koba n’obwororo. Nigo bigochangera gotokora koba abanto bengencho ase ekenyoro, na gotobeka omokia tobe n’obomo ase chinka na gotaba abakayayu. Ntoisanegete ng’a “Nyasae tari nogwanchereria,” intwe n’abana abamo b’ense engima, tore nobosibore korwa ase siasa na totabwati obogesaku. Titori buna chidini chinde, nonya tore buna abanto bande.​—Ogokora 4:13; 10:34, 35.

• Inaki Birori ba Yehova banga abanto bande?

• Imbwa ki Birori ba Yehova b’egeire korwa ase Ebibilia?