Avril

Eyin mí na mọaleyi sọn agbasa po ohùn Jesu tọn po mẹ, mí dona do yise hia to ofligọ lọ mẹ. (Efe. 1:7) Mẹhe Jesu dlẹnalọdo taidi “lẹngbọ devo lẹ” ma dona do mahẹ to akla po ovẹn lọ po mẹ to Tenu-Núdùdù Oklunọ tọn he nọ yin bibasi to whemẹwhemẹ lọ whenu, podọ yé ma nọ wàmọ. (Joh. 10:16) Etomọṣo, yé nọ mọaleyi sọn agbasa po ohùn Jesu Klisti tọn po mẹ. Yé nọ wàmọ gbọn yise didohia to avọ́sinsan ofligọ tọn etọn mẹ dali. (Joh. 6:53) To vogbingbọn mẹ, mẹhe dona do mahẹ to akla lọ po ovẹn lọ po mẹ lẹ nọ dohia dọ yé ko yin hinhẹn biọ alẹnu yọyọ lọ mẹ bo do todido lọ nado dugán to Ahọluduta olọn tọn mẹ. Enẹwutu vlavo mí to mẹyiamisisadode lẹ kavi lẹngbọ devo lẹ mẹ, mí dona nọ do yise hia bo gbọnmọ dali mọ ogbẹ̀ madopodo. w24.12 12 huk. 14; 13 huk. 16

To Tenu-Núdùdù Oklunọ tọn whenu, Jesu yí akla madotọ́n na apọsteli etọn lẹ bo dọna yé dọ e nọtena agbasa emitọn. Enẹgodo, e yí ovẹn na yé bo dọ dọ e nọtena ‘ohùn alẹnu lọ tọn.’ (Malku 14:22-25; Luku 22:20; 1 Kọl. 11:24) Alẹnu yọyọ lọ gando “owhé Islaeli [gbigbọmẹ] tọn” go, he na dugán “to Ahọluduta Jiwheyẹwhe tọn mẹ.” (Heb. 8:6, 10; 9:15) To Tenu-Núdùdù Oklunọ tọn whenu, Jesu na ayidonugo “lẹngbọpa pẹvi” lọ. Pipli pẹvi enẹ bẹjẹeji po apọsteli nugbonọ etọn he to finẹ hẹ ẹ to abò lọ mẹ lẹ po. Yewlẹ wẹ mẹhe na mọ otẹn de yí to olọn mẹ to pọmẹ hẹ Jesu. w24.12 11 huk. 9-10

Jesu yin didehia bo yin wiwle, yè zun in, kọnmasin dego, gblewhẹdo e bo tlẹ sayana ẹn. Awhànfuntọ lẹ plan ẹn yì fie e na yin hùhù te bo whè e do yatin de go. Dile e yí nugbonọ-yinyin do to akọndona awufiẹsa sinsinyẹn ehe lẹpo, Mẹdevo de tin he tlẹ sọ sè vivẹ́ hugan. Jehovah Jiwheyẹwhe wẹ. E hẹnalọdotena huhlọn madodogbó etọn bo ma dademẹ. Etẹwutu? To hogbe dopo mẹ, owanyi wẹ. Avọ́sinsan Jesu tọn wẹ yin kunnudenu he klohugan he do lehe Jehovah yiwanna we sọ hia. E yì jẹ obá lọ mẹ nado doakọnna awufiẹsa sinsinyẹn he mayọnjlẹ de nado whlẹn we sọn ylando po okú po si. (1 Joh. 4:9, 10) Mọwẹ, e jlo na gọalọna dopodopo mítọn nado hoavùn sọta ylando bo dudeji! w24.08 6 huk. 13-14

Mí gán mọnukunnujẹ obá he mẹ Jehovah yiwanna mí jẹ mẹ dogọ, eyin mí lẹnnupọndo avọ́sinsan he e biọ to e si nado wleawuna ofligọ lọ ji. Satani sọalọakọ́n dọ devizọnwatọ Jiwheyẹwhe tọn depope ma na hẹn nugbonọ-yinyin etọn na Ewọ go to whenue e vẹawu taun nado wàmọ. Nado dohia dọ lalo wẹ whẹsadokọnamẹ enẹ, Jehovah dike bọ Jesu jiya whẹpo do kú. (Jobu 2:1-5) Jehovah to pinpọn bọ sinsẹ̀nnọ nukundiọsọmẹtọ lẹ ṣàn Jesu kò, bọ awhànfuntọ lẹ hò e bo whè e do pòtin go. Enẹgodo, Jehovah to mimọ bọ Visunnu vivẹ́ etọn yin jijodo nado kú okú awufiẹsa tọn de. (Mat. 27:28-31, 39) Jehovah do huhlọn nado doalọtena ninọmẹ lọ. (Mat. 27:42, 43) Amọ́ eyin Jiwheyẹwhe dademẹ, ofligọ depope ma na ko yin súsú, podọ todido de ma na ko tin na mí. Enẹwutu, Jehovah dike bọ Visunnu etọn doakọnna yajiji kakajẹ whenue e gbọ gbigbọ godo tọn etọn. w25.01 22 huk. 7

Nisan 16​tọ owhe 33 W.M. wẹ. Devi Jesu tọn lẹ to awubla sinsinyẹn mẹ bosọ to budi taun. Awe to yé mẹ tọ́n sọn Jelusalẹm bo dedo Emausi. Jonọ de dọnsẹpọ yé bo jẹ zọnlinzin hẹ yé ji. Devi lọ lẹ jẹ nuhe hẹn yé jẹflumẹ gando nuhe jọ do Jesu go lẹ dọna ẹn ji. To whenẹnu, jonọ lọ bẹ hodọdopọ he yé ma gán wọn pọ́n gbede de jẹeji hẹ yé. “E bẹjẹeji sọn Mose po Yẹwhegán lẹ po ji” bo basi zẹẹmẹ nuhewutu Mẹsia lọ dona jiya bo kú tọn na yé. To whenue sunnu atọ̀n lọ lẹ wá Emausi, jonọ lọ de ede hia yé—Jesu he fọnsọnku lọ wẹ! (Luku 24:13-35) Whlasusu wẹ Jesu sọawuhia devi etọn lẹ to azán 40 godo tọn he e yizan to aigba ji lẹ gblamẹ. To ojlẹ enẹ gblamẹ, awubla sinsinyẹn po obu hodotọ Jesu tọn lẹ tọn po diọzun ayajẹ po jidide po, podọ yé wleawuna adọgbigbo nado lá wẹndagbe Ahọluduta lọ tọn bosọ plọnnumẹ gandego. w24.10 12 huk. 1-3

Dile ojlẹ to yìyì, mí gán whẹ́n mẹho to jọwamọ-liho, amọ́ mẹdepope ma nọ whèwhín to gbigbọ-liho domọ poun. Di apajlẹ, mẹmẹsunnu po mẹmẹyọnnu Kọlinti tọn lẹ po kẹalọyi wẹndagbe lọ bo yí baptẹm bosọ mọ gbigbọ wiwe yí, podọ yé mọaleyi sọn nuplọnmẹ apọsteli Paulu lọsu tọn mẹ. (Owalọ 18:8-11) Ṣogan, owhe delẹ to baptẹm yetọn godo, susu yetọn ma ko whèwhín to gbigbọ-liho janwẹ. (1 Kọl. 3:2) Nado whèwhín to gbigbọ-liho, jẹnukọn whẹ́, mí dona wleawuna ojlo lọ nado lẹzun mẹhe whèwhín. E na vẹawuna mẹhe ‘yiwanna wunvi’ bo nọ jlo nado to ovivu yin zọnmii to gbigbọ-liho lẹ nado yinukọn. (Howh. 1:22) Mí ma na jlo nado taidi mẹhe ko whẹ́n pete to agbasa-liho, amọ́ bo gbẹ́ nọ ganjẹ mẹjitọ yetọn lẹ go nado nọ basi nudide lẹ na yé. Kakatimọ, mílọsu nọ jlo na didá azọngban lọ nado whèwhín to gbigbọ-liho. Eyin a to vivẹnudo nado whèwhín, nọ hodẹ̀ dọ Jehovah ni na we ‘ojlo lọ po huhlọn lọ po nado yinuwa.’—Flp. 2:13. w24.04 4 huk. 9-10

Na nuhe dù aliho he mẹ Jehovah nọ dawhẹna gbẹtọvi lẹ te, ewọ gbọn homẹdagbe dali dọ linlẹn etọn lẹ na mí. (Ezek. 33:11) Jehovah ma nọ zọ̀n plaplaji do và gbẹtọvi lẹ sudo kakadoi. Lẹblanu etọn siso, podọ ewọ nọ do jẹhẹnu enẹ hia whedepopenu he e yọnbasi. Etẹwẹ mí yọnẹn gando mẹhe ma na yin finfọnsọnku lẹ go? Apajlẹ kleun delẹ poun janwẹ Biblu na mí. Jesu dohia dọ Juda Iskaliọti ma na yin finfọnsọnku. (Malku 14:21; sọ pọ́n Johanu 17:12 po adà nupinplọn tọn etọn po to flansegbe mẹ.) Juda yọnẹn ganji bo desọn ojlo mẹ nado yinuwa jẹagọdo Jehovah Jiwheyẹwhe po Visunnu Etọn po. (Pọ́n Malku 3:29 po adà nupinplọn tọn etọn lẹ po to flansegbe mẹ.) Mọdopolọ, Jesu dọ dọ delẹ to sinsẹ̀ngán he jẹagọdo e lẹ mẹ na kú matin todido fọnsọnku tọn. (Mat. 23:33; pọ́n Johanu 19:11 po adà nupinplọn tọn etọn po to flansegbe mẹ do hogbe lọ “dawe lọ” ji.) Podọ, apọsteli Paulu na avase dọ atẹṣitọ he ma lẹnvọjọ lẹ ma na yin finfọnsọnku.—Heb. 6:4-8; 10:29. w24.05 4 huk. 10-11

Eyin mí hẹn haṣinṣan pẹkipẹki de go hẹ Jehovah, Satani ma sọgan hẹn awugble tẹgbẹ tọn de wá mí ji. (1 Joh. 3:8) To aihọn yọyọ lọ mẹ, enẹ wẹ to owhe fọtọ́n lọ whenu, Jehovah na gbẹ́ zindonukọn nado to hihọ́-basina họntọn nugbonọ etọn lẹ sọn nuhe gán hẹn haṣinṣan yetọn hẹ ewọ gble lẹ si podọ sọn okú si. (Osọ. 21:4) Nado dọ hójọhó, gbégbò daho de wẹ e yin nado yin jonọ de to gòhọ Jehovah tọn mẹ, enẹ wẹ nado to họntọn vivẹ́ etọn yin zọnmii. (Ezek. 37:27) Nawẹ mí dona nọ yinuwa gbọn eyin mí jlo na zindonukọn nado to jonọ etọn lẹ yin? Eyin mẹde basi oylọna we wá owhé etọn gbè, a na jlo na yọ́n nuhe e to nukundo sọn asi we lẹ. Mọdopolọ, ayihaawe ma tin dọ mí jlo na yọ́n nuhe Jehovah nọ biọ to mẹhe jlo na to jonọ yin zọnmii lẹ si. Owanyi mítọn na Jehovah nọ whàn mí nado wà nuhe go mí pé lẹpo “nado hẹn homẹ etọn hùn to gigọ́ mẹ.” (Kol. 1:10) Mí dona nọ tindo sisi sisosiso na ewọ bosọ nọ flin mẹhe ewọ yin to whelẹponu. Sisi sisosiso mọnkọ na gọalọna mí ma nado yinuwa to aliho de mẹ he na gbleawuna ẹn. Matin ayihaawe, ojlo mítọn wẹ “nado nọ yí whiwhẹ do zinzọnlin” hẹ Jiwheyẹwhe mítọn.—Mika 6:8. w24.06 4 huk. 8-9

Jehovah biọ dọ Ablaham ni yí visunnu etọn titi Isaki do sanvọ́. E họnwun dọ Ablaham na ko mọdọ azọ́ndenamẹ ehe sọgan hẹn awufiẹsa mayọnjlẹ wá na ẹn. Etomọṣo, e wleawufo nado setonu. Amọ́, Jiwheyẹwhe hẹnalọdotena ẹn to ogàn godo tọn mẹ. Ṣogan, apajlẹ ehe plọn nugbo titengbe de mẹhe tindo yise lẹpo, enẹ wẹ yindọ Jehovah na desọn ojlo mẹ bo ze Visunnu yiwanna etọn jo taidi avọ́sinsan de. Jehovah yiwanna gbẹtọvi lẹ taun. (Jen. 22:1-18) To owhe kanweko lẹ godo, Osẹ́n he yin nina akọta Islaeli tọn biọ dọ avọ́sinsan susu ni nọ yin bibasi na ovẹsè ylando omẹ Jiwheyẹwhe tọn lẹ tọn. (Lev. 4:27-29; 17:11) Oyẹ̀ avọ́sinsan he klohugan de tọn wẹ avọ́sinsan ehelẹ yin, ehe na whlẹn gbẹtọvi lẹ sọn ylando si mlẹnmlẹn. To gbọdo glọ, yẹwhegán Jiwheyẹwhe tọn lẹ basi zẹẹmẹ dọ kúnkan dopagbe lọ he wá yin Visunnu vonọtaun Jiwheyẹwhe tọn de, dona jiya bo yin hùhù nado whlẹn gbẹtọvi lẹ sọn ylando po okú po si, kakajẹ hiẹ lọsu ji!—Isa. 53:1-12. w24.08 4 huk. 7-8

Whenue a to Biblu hia, hẹn ẹn diun dọ a nọ dín aliho lẹ nado yí nuhe a hia lọ do yizan mẹ. Dile a to adà Ohó Jiwheyẹwhe tọn de hia, nọ kanse dewe dọ, ‘Nawẹ n’gán yí nudọnamẹ ehe do yizan mẹ todin kavi to sọgodo he to yakẹ de gbọn?’ Di apajlẹ, mí ni dọ dọ a hia 1 Tẹsalonikanu lẹ 5:17, 18 to Biblu hihia towe whenu. To whenue a ko hia wefọ awe ehelẹ godo, a gán nọte bo lẹnnupọndo whla nẹmu he a nọ hodẹ̀ gọna lehe odẹ̀ towe lẹ nọ siso do ji. Humọ a gán sọ lẹnnupọndo nuhe go a sọgan nọ dopẹ́ gando lẹ ji. Vlavo a magbe dọ a na nọ dopẹna Jehovah na onú tangan atọ̀n delẹ. Eyin nukunwhiwhe kleun de wẹ a tlẹ yí do lẹnnupọn domọ, a na lẹzun sisètọ podọ basitọ Ohó Jiwheyẹwhe tọn jẹ obá de mẹ. Pọ́n lehe a na mọaleyi do eyin a nọ wàmọ to azán lẹpo ji po adà Biblu tọn devo he a hia lẹ po! Mọwẹ, a na whèwhín taidi basitọ Ohó Jiwheyẹwhe tọn de. w24.09 4-5 huk. 9-10

Jehovah dá mí po nugopipe vonọtaun de po. Dile etlẹ yindọ e nọ vivi na mí eyin yè nanú mí, ayajẹ he mí nọ mọyi tlẹ sọ nọ sù hugan whenue mí nanú mẹdevo lẹ. E nọ wà dagbe na mí whenue mí penugo nado gọalọna yisenọ hatọ mítọn lẹ. Podọ, homẹ mítọn nọ hùn eyin yé do pinpẹn-nutọn-yinyọnẹn hia. Amọ́ vlavo mẹhe mí nanú lọ dohia dọ emi yọ́n pinpẹn etọn kavi lala, homẹ mítọn gán hùn dọ mí wà nuhe sọgbe lọ. Ma wọn gbede blo dọ “Jehovah penugo nado na we susu hugan” nudepope he a namẹ. (2 Otàn. 25:9) Nado dọ hójọhó, mí ma gán nanúmẹ sọ Jehovah! Podọ, nudepope ma gán hẹn ayajẹ wá na mí hugan dọ Jehovah lọsu ni suahọ mí. Enẹwutu, mì gbọ mí ni magbe nado to apajlẹ alọtútlú tọn Otọ́ olọn mẹ tọn mítọn tọn hodo zọnmii. w24.09 31 huk. 20-21

Lẹblanunọ podọ awuvẹmẹtọ wẹ Jehovah. (Salm. 103:13; Isa. 49:15) Onú mítọn nọ biọlanmẹna ẹn; podọ whenue mí yin awugblena e nọ sè vivẹ́. (Zek. 2:8) E nọ hẹn ẹn bọawuna mí nado dọnsẹpọ ewọ taidi Họntọn de. (Salm. 25:14; Owalọ 17:27) E sọ yin whiwhẹnọ; “e nọ fẹ̀ yìdo nado pọ́n olọn po aigba po, bo nọ ze agbátọnọ ṣite sọn kọ́gudu mẹ.” (Salm. 113:6, 7) Po ehe lẹpo po, nawẹ mẹde gán nọma pagigona Jiwheyẹwhe daho mítọn gbọn? Mí nọ pagigona Jehovah na mí jlo dọ mẹdevo lẹ ni yọ́n ewọ wutu. Mẹsusu ma yọ́n nugbo lọ gando Jehovah go. Etẹwutu? Na Satani ko tọ́nnukunna ayiha yetọn gbọn lalo ylankan lẹ hinhẹn gbayipe gando Ewọ go dali wutu. (2 Kọl. 4:4) Satani ko hẹn mẹlẹ kudeji dọ Jehovah nọ víhlọ̀n, ma nọ homẹtọnpọn bosọ yin adọ̀ suhugan yajiji he to aihọn lọ mẹ lẹ tọn. Amọ́, mí yọ́n nugbo lọ gando Jiwheyẹwhe mítọn go! Mí tindo dotẹnmẹ lọ nado vọ́ nuhe yin didọ gandego lẹ jlado bo gbọnmọ dali hẹn gigo wá na ẹn.—Isa. 43:10. w25.01 3-4 huk. 6-7

To owhe kanweko tintan whenu, mẹhe to adà Satani tọn mẹ lẹ dolalo susu gando azọ́njiawu he Visunnu pipé Jiwheyẹwhe tọn wà lẹ go. Di apajlẹ, nukọntọ sinsẹ̀n tọn lẹ dọ dọ “ogán aovi lẹ tọn” wẹ nọ na huhlọn Jesu nado yàn aovi lẹ jẹgbonu. (Malku 3:22) Whenue Jesu to whẹnukọn, nukọntọ sinsẹ̀n tọn lẹ sawhẹdokọna ẹn dọ e zánnu bo gbidikọna gbẹtọgun lẹ nado biọ dọ ewọ ni yin hùhù. (Mat. 27:20) To nukọn mẹ, dile hodotọ Klisti tọn lẹ to wẹndagbe lọ lá, nukundiọsọmẹtọ yetọn lẹ ‘fọnadán bo yinuwado omẹ lọ lẹ ji to aliho agọ̀ mẹ’ nado diọnukunsọ Klistiani enẹlẹ. (Owalọ 14:2, 19) Atọ̀họ̀-Nuhihọ́ lọ Tọn 1^er décembre 1998 tọn basi zẹẹmẹ dọmọ: “Gbọnvona dọ Ju nukundiọsọmẹtọ lẹ lọsu gbẹ́ wẹndagbe lọ dai, yé sọ jẹ whẹsadokọnamẹ lẹ hẹn gbayipe ji bo nọ tẹnpọn nado fọ́n nuvẹun Kosi lẹ tọn dote sọta Klistiani lẹ.” To egbehe, Satani gbẹ́ to “aigba fininọ lẹpo klọ.” w24.04 11 huk. 15-16

Sọgodo madopodo mẹde tọn ma nọ sinai do ojlẹ he mẹ mẹlọ kú te ji gba. Whẹdatọ pipé de wẹ Jehovah, e nọ basi nudide he sọgbe bosọ yin dodo lẹ. (Salm. 33:4, 5) Mí gán kudeji dọ “Whẹdatọ aigba lẹpo tọn” na wà nuhe jlọ. E sọ sọgbe hẹ lẹnpọn dagbe nado wá tadona kọ̀n dọ sọgodo madopodo mẹde tọn ma sinai do fihe e nọgbẹ̀ te ji. E ma sọgan wá linlẹn mẹ gbede dọ Jehovah na dawhẹna gbẹtọ livi susu lẹ taidi “gbọgbọẹ lẹ,” na yé nọ nọ̀ fie yé ma do dotẹnmẹ lọ te nado kẹalọyi owẹ̀n Ahọluduta lọ tọn poun wutu. (Mat. 25:46) Whẹdatọ dodo aigba lẹpo tọn tlẹ sọ nọ hò omẹ ehelẹ tọn pọ́n tlala hugan lehe mí gán wà do. Mí ma yọ́n lehe Jehovah na deanana nujijọ lẹ do to nukunbibia daho lọ whenu. Vlavo delẹ to omẹ ehelẹ mẹ na do dotẹnmẹ lọ nado plọnnu gando Jehovah go, do yise hia to ewọ mẹ, bosọ de nado nọ adà etọn mẹ whenue ewọ na klan ede do wiwe to nukun akọta lẹpo tọn mẹ.—Ezek. 38:16. w24.05 12 huk. 14-15

Omẹ Jehovah tọn lẹ nọ yiwanna nado gọalọna ode awetọ. (2 Kọl. 8:4) Etomọṣo to whedelẹnu, e nọ biọ adọgbigbo nado wàmọ. Di apajlẹ, eyin awhàn fọ́n, mẹho agun tọn lẹ nọ yọnẹn dọ mẹmẹsunnu po mẹmẹyọnnu yetọn lẹ po do hudo tuli, godonọnamẹ podọ vlavo alọgọ delẹ tọn to gbigbọ-liho kavi to agbasa-liho. Na mẹho lẹ yiwanna lẹngbọ lẹ wutu, yé nọ ze ogbẹ̀ yetọn do owù mẹ nado wleawu nuhe sin hudo yé do lẹ tọn na yé. To ninọmẹ mọnkọ lẹ mẹ, nujọnu wẹ e yin nado hẹn pọninọ go. Nọ kọngbedopọ hẹ anademẹ he wá sọn alahọ mẹ lẹ. (Heb. 13:17) Mẹho lẹ dona nọ gbadopọnna anademẹ he gando lehe yè na wleawudaina nugbajẹmẹji lẹ do go sọn ojlẹ de mẹ jẹ devo mẹ gọna nuhe yè dona wà eyin onú mọnkọ de jọ. (1 Kọl. 14:33, 40) Yin adọgbotọ, amọ́ to aṣeji. (Howh. 22:3) Nọ yinuwa po nuyọnẹn po. Ma nọ ze dewe do owù he ma yin dandan tọn lẹ mẹ blo. Nọ dejido Jehovah go. E gán gọalọna we nado nọgodona mẹmẹsunnu towe lẹ po kọdetọn dagbe po. w24.07 4 huk. 8; 5 huk. 11

Ahọlu Davidi yọ́n Jehovah ganji bosọ nọ ganjẹ Ewọ go. Whenue kẹntọ etọn lẹ, ehe bẹ Ahọlu Sauli hẹn to ogbé etọn yàn, Davidi biọ alọgọ Jehovah tọn to odẹ̀ mẹ. To whenue Jiwheyẹwhe ko na gblọndo na odẹ̀ etọn bo ko sọ whlẹn ẹn godo, Davidi dọmọ: “Jehovah togbẹ̀!” (Salm. 18:46) Po hogbe ehelẹ po, Davidi ma to alọkẹyi poun dọ Jiwheyẹwhe tin gba. Owe alọdlẹndonu tọn de dọ dọ Davidi to jidide etọn dohia to Jehovah mẹ “taidi Jiwheyẹwhe ogbẹ̀nọ de he nọ yinuwa do omẹ etọn lẹ tamẹ to whepoponu.” Na nugbo tọn, Davidi yọnẹn sọn numimọ mẹdetiti tọn etọn mẹ dọ Jiwheyẹwhe togbẹ̀, podọ nujikudo enẹ nọ vọ́ gbemima etọn hẹn sinyẹn nado to Jehovah sẹ̀n bosọ nọ pà ewọ. (Salm. 18:28, 29, 49) Eyin mí kudeji dọ Jehovah wẹ Jiwheyẹwhe ogbẹ̀nọ lọ, enẹ gán gọalọna mí nado nọ sẹ̀n ewọ po zohunhun po. Mí na mọ huhlọn nado doakọnna whlepọn lẹ, bo nasọ yin whinwhàn nado zindonukọn bo to nuhe go mí pé lẹpo wà to sinsẹ̀nzọn etọn mẹ. Humọ, mí nasọ magbe nado tẹdo Jehovah go. w24.06 20-21 huk. 3-4

Etẹwẹ mí gán plọn sọn hogbe apọsteli Paulu tọn lẹ hlan Tẹsalonikanu lẹ mẹ? Eyin mí sè nude he gbọnvona nuhe mí ko plọn sọn Biblu mẹ, kavi eyin mí sè yèdọ-yèdọ he hẹnmẹ jọsi de, mí dona yí zinzin zan. To Union soviétique hohowhenu tọn, e ko jọ pọ́n bọ kẹntọ mítọn lẹ hẹn wekanhlanmẹ de gbayipe bo dolalo dọ tatọ́-tẹnnọ wẹ e wá sọn. Wekanhlanmẹ lọ na tuli mẹmẹsunnu delẹ nado do titobasinanu de ai na yede dovo. Wekanhlanmẹ lọ na ede taidi nuhe sọgbe. Amọ́ mẹmẹsunnu nugbonọ lẹ ma yin yẹdoklọ. Yé mọdọ nudọnamẹ he to wekanhlanmẹ lọ mẹ lẹ ma sọgbe hẹ nuhe ko yin pinplọn yé lẹ. To egbehe, kẹntọ nugbo lọ tọn lẹ nọ yí nuyizan nuyọnẹn wintinwintin tọn egbezangbe tọn lẹ zan to whedelẹnu nado hẹn mí biọ bẹwlu mẹ bosọ klan mí. Kakati nado “yawu hẹn lẹnpọn dagbe [mítọn] bu,” sọwhiwhe yíyí do gbadopọnna eyin vlavo nuhe mí sè kavi hia lẹ sọgbe hẹ nugbo he mí ko plọn lẹ gán basi hihọ́na mí.—2 Tẹs. 2:2; 1 Joh. 4:1. w24.07 12 huk. 14-15

Nudide titengbe hugan he mẹde gán basi wẹ nudide lọ nado klan ede do wiwe na Jehovah bo lẹzun hagbẹ whẹndo he bẹ sinsẹ̀n-basitọ Etọn lẹ hẹn tọn. Jehovah jlo dọ mẹlẹpo ni wàmọ. Etẹwutu? E jlo dọ yé ni jihọntọn hẹ emi bo nọgbẹ̀ kakadoi. (Deut. 30:19, 20; Gal. 6:7, 8) Amọ́, Jehovah ma nọ hẹn mẹde gánnugánnu nado sẹ̀n ewọ. E nọ na dotẹnmẹ mẹdopodopo nado basi dide nuhe e na wà tọn. Etẹwẹ lo, eyin Klistiani de he ko yí baptẹm gbà osẹ́n Jiwheyẹwhe tọn bo waylando sinsinyẹn de? Eyin e ma lẹnvọjọ, e dona yin didesẹ sọn agun mẹ. (1 Kọl. 5:13) Amọ́, etlẹ yin to whenẹnu, Jehovah nọ yí jejejininọ do donukun dọ ylanwatọ lọ na lẹkọwa Emi dè. Na nugbo tọn whẹwhinwhẹ́n titengbe de niyẹn he wutu e wleawuna ofligọ lọ, enẹ wẹ nado hẹn jonamẹ yọnbasi na ylandonọ he lẹnvọjọ lẹ. Jiwheyẹwhe owanyinọ mítọn nọ yí zohunhun do basi oylọna ylandonọ lẹ bo nọ dotuhomẹna yé nado lẹnvọjọ.—Zek. 1:3; Lom. 2:4; Jak. 4:8. w24.08 14 huk. 1-2

To whenue apọsteli Johanu kàn wekanhlanmẹ etọn atọ̀ntọ, mẹdelẹ to nuplọnmẹ lalo lẹ hẹn gbayipe bosọ to kinklan hẹnwa. Amọ́, mẹdevo lẹ to “zọnlinzin zọnmii to nugbo lọ mẹ.” Yé setonuna Jehovah bo nọ to “zọnlinzin . . . sọgbe hẹ gbedide etọn lẹ.” (2 Joh. 4, 6) Gbọnvona dọ Klistiani nugbonọ ehelẹ hẹn homẹ Johanu tọn hùn, yé sọ hẹn homẹ Jehovah lọsu tọn hùn ga. (Howh. 27:11) Etẹwẹ yin nuplọnmẹ lọ na mí? Nugbonọ-yinyin nọ hẹn ayajẹ wá. (1 Joh. 5:3) Di apajlẹ, mí nọ tindo ayajẹ to yinyọnẹn mẹ dọ mí hẹn homẹ Jehovah tọn hùn. Homẹ etọn nọ hùn eyin e mọdọ mí gbẹ́ mẹtẹnpọn aihọn lọ tọn lẹ dai bo kẹalọyi nugbo lọ. Mẹdevo lẹ nọ jaya ga to olọn mẹ. (Luku 15:10) Mílọsu gán nọ jaya dile mí mọdọ ode awetọ mítọn to nugbonọ yin zọnmii. (2 Tẹs. 1:4) Podọ whenue titonu ehe na wá vivọnu, mí na tindo pekọ to yinyọnẹn mẹ dọ mí do nugbonọ-yinyin mítọn na Jehovah hia etlẹ yin to aihọn he ji Satani dugán do de mẹ. w24.11 12 huk. 17-18

Ojlẹ nẹmu wẹ a dona pọ́n mẹlọ na whẹpo do dọna ẹn dọ emi yiwanna ẹn? Eyin a yawu dọnsẹpọ mẹlọ, a gán taidi mẹhe ma nọ whesọ. (Howh. 29:20) To alọ devo mẹ, eyin e sọ dẹn gbau, a gán taidi mẹhe nọ whleawu nado basi nudide, titengbe eyin mẹlọ ko doayi ojlo towe go. (Yẹwh. 11:4) Whẹpo a nido dọnsẹpọ mẹde, flindọ e ma biọ dọ a ni do nujikudo dọ emi na wlealọ hẹ mẹlọ. Amọ́, a dona kudeji dọ emi ko wleawufo nado wlealọ, podọ mẹlọ gán yin mẹhe jẹ hẹ we. Amọ́ etẹwẹ lo eyin a doayi e go dọ nú towe nọ jẹ mẹde tọn ji? Eyin a ma do numọtolanmẹ dopolọ, tẹnpọn bo do e hia hezeheze to nuyiwa towe lẹ mẹ. E ma na yin ohia homẹdagbe tọn eyin a nọ hẹn mẹlọ lẹndọ e yọnbasi dọ mì ni biọ họntọn mẹ to whenuena e ma ka to mọ na we.—Efe. 4:25. w24.05 23 huk. 9-10

Mẹhe yin yiyiamisisadode nugbonugbo bosọ yin nugbonọ lẹ kẹdẹ wẹ Jesu na ‘yí’ kavi kẹalọyi do Ahọluduta olọn tọn mẹ. Mẹyiamisisadode depope he ma gbọṣi aṣeji to gbigbọ-liho ma na yin bibẹpli dopọ hẹ ‘mẹdide lẹ.’ (Mat. 24:31) To linlẹn he gbloada mẹ, omẹ Jiwheyẹwhe tọn lẹpo, mahopọnna todido he yé tindo dona nọ pọ́n hogbe Jesu tọn lẹ hlan taidi avase de nado gbọṣi nukle bosọ yin nugbonọ. Mí ko wá yọ́n Jehovah ganji, enẹwutu mí nọ dejido whẹdida etọn go. Mí ma nọ hanú eyin Jehovah basi dide nado yiamisisadode nugbonọ delẹ to owhe agọe tọn lẹ mẹ. Mí nọ flin nuhe Jesu dọ to apajlẹ etọn mẹ gando pakanọ he bẹ azọ́n to gànhiho 11​tọ mẹ to vẹngle mẹ lọ lẹ go. (Mat. 20:1-16) Mẹhe yin oylọ basina nado wazọ́n to vẹngle lọ mẹ to nukọn mẹ to azán lọ ji lẹ yí azọ́nkuẹ dopolọ hẹ mẹhe bẹjẹeji jẹnukọnna yé lẹ. Mọdopolọ, mahopọnna whedepopenu he mẹyiamisisadode lẹ yin dide, yé na mọ ahọsumẹ olọn tọn yí eyin yè dawhẹna yé taidi nugbonọ. w24.09 24 huk. 15-17

Jesu ze apajlẹ pipé dai na mí gando lehe mí gán pehẹ mawadodo do go. Lẹnnupọndo nuyiwa mawadodo tọn he e pehẹ sọn whẹndo etọn po mẹdevo lẹ po dè ji. Hagbẹ whẹndo tọn etọn mayisenọ lẹ dọ dọ e hùnalẹ̀, nukọntọ sinsẹ̀n tọn lẹ sawhẹdokọna ẹn dọ e nọ kọnawudopọ hẹ aovi lẹ, podọ awhànfuntọ Lomunu lẹ ṣàn ẹn kò, hò e bo wá hù i to godo mẹ. (Malku 3:21, 22; 14:55; 15:16-20, 35-37) Amọ́, Jesu doakọnna mawadodo ehe lẹpo bo ma tlẹ yiahọsu gbede. Etẹwẹ mí gán plọn sọn apajlẹ etọn mẹ? (1 Pita 2:21-23) Jesu ze apajlẹ pipé dai na mí nado hodo whenue mí pehẹ nuyiwa mawadodo tọn. E yọ́n whenue e na gbọṣi abọẹ podọ whenue e na dọho. (Mat. 26:62-64) E ma gblọnho gando onú agọ̀ he yin didọ dego lẹpo go. (Mat. 11:19) Eyin e biọ dọ ni dọho, e ma nọ zùn homẹkẹndomẹtọ etọn lẹ kavi sìn-adán na yé. w24.11 4-5 huk. 9-10

Mí ni dọ dọ a na nunina vonọtaun he yọ́npọ́n bosọ yọ́n-na-yizan de mẹhe a yiwanna de. Lehe a na jẹflumẹ do sọ eyin mẹlọ ze e do númẹ poun bo ma tlẹ sọ lẹnnupọndeji! To alọ devo mẹ, ayihaawe ma tin dọ homẹ towe na hùn taun eyin mẹlọ yí nuhe a na ẹn lọ zan to aliho dagbe mẹ bosọ dohia dọ emi yọ́n pinpẹn etọn. Etẹwẹ yin nuagokun lọ? Jehovah ze Visunnu etọn jo do ota mítọn mẹ. Lehe homẹ Jehovah tọn dona nọ hùn do sọ whenue mí do pinpẹn nutọn hia na nunina họakuẹ enẹ, podọ na owanyi etọn he whàn ẹn nado wleawu ofligọ lọ tọn! (Joh. 3:16; Lom. 5:7, 8) Amọ́ dile ojlẹ to yìyì, mí gán jẹ nukunpẹvi yí do pọ́n nunina ofligọ lọ tọn ji. Mọwiwà na taidi dọ mí ze nunina Jiwheyẹwhe tọn do númẹ wẹ nkọ. Homẹ mítọn hùn do nunina lọ go, amọ́ mí ze e whlá. Ma nado dike enẹ ni jọ, mí dona nọ hẹn pinpẹn nutọn mítọn na nuhe Jiwheyẹwhe po Klisti po wà na mí jẹ yọyọ whẹwhẹ. w25.01 26 huk. 1-2

Mẹmẹsunnu de he pegan taidi mẹho agun tọn ma nọ yin mẹyọyọ to yise mẹ. Dile etlẹ yindọ e ma biọ dọ a ni ko yí baptẹm na owhe susu, a gbẹ́ do hudo whenu tọn nado lẹzun Klistiani he whèwhín de. Whẹpo a nido yin pipà taidi mẹho agun tọn, a dona dohia dọ taidi Jesu a yin whiwhẹnọ bo nọ yí ayajẹ do nọtepọn Jehovah nado mọ azọ́ndenamẹ depope yí. (Mat. 20:23; Flp. 2:5-8) A gán dohia dọ emi yin nugbonọ eyin a nọ tẹdo Jehovah po nujinọtedo dodo tọn etọn lẹ po go bo nọ hodo anademẹ he titobasinanu etọn nọ na lẹ. Owe-wiwe lẹ dọ madoadúdẹji dọ nugopọntọ lẹ dona yin mẹhe pegan nado plọnmẹ. Be ehe zẹẹmẹdo dọ a dona yin hodọtọ ayidego tọn de wẹ ya? Paali. Mẹho agun tọn susu wẹ pegan taun, ṣogan bo ma yin hodọtọ dagbe hugan lẹ bosọ nọ plọnmẹ po kọdetọn dagbe po to lizọnyizọn lọ mẹ, podọ to dlapọn lẹngbọhọtọ tọn lẹ whenu. w24.11 23-24 huk. 14-15

Eyin a tọ́n jẹ wefọ Biblu tọn he mẹ a ma mọnukunnujẹ ganji de ji, nọ basi dodinnanu. Enẹgodo, to azán lọ blebu gblamẹ, lẹnayihamẹpọn do nuhe a mọ gọna nuhe e plọn we gando Jehovah, Visunnu etọn po owanyi he yé tindo na we po go ji. (Salm. 119:97, Odò.) Ma gbọjọ blo eyin a ma nọ mọ nuyọyọ de kavi nuhe whànmẹ de to whedepopenu he a sinai nado hia Biblu kavi basi dodinnanu. To linlẹn de mẹ, a taidi mẹhe to sika dín de. E nọ fahomẹ na gànhiho susu kavi azán susu lẹ nado mọ etlẹ yin sika vude poun. Etomọṣo, e nọ sinyẹnlin, na sika kẹnnẹ-kẹnnẹ depope he e mọ nọ họakuẹ to nukun etọn mẹ. Lehe nugbo Biblu tọn depope he yin mimọ họakuẹ humọ do sọ! (Howh. 8:10) Enẹwutu, fahomẹ bo tẹdo tito Biblu hihia tọn towe go.—Salm. 1:2. w25.01 24-25 huk. 14-15

Jehovah nọ donukun dọ mí ni wleawufo nado jona mẹhe gbleawuna mí lẹ. (Salm. 86:5; Luku 17:4; Efe. 4:32) Nuhe mẹde dọ kavi wà gán gbleawuna mí sinsinyẹn, titengbe eyin mẹlọ yin họntọn vivẹ́ kavi hagbẹ whẹndo tọn de. (Salm. 55:12-14) To whedelẹnu, awufiẹsa he mí nọ jiya etọn to numọtolanmẹ-liho gán yin yiyijlẹdo mẹhe yè sọ́ ohí de tọn go. (Howh. 12:18) Mí gán tẹnpọn nado duto numọtolanmẹ awugble tọn mítọn lẹ ji kavi dovọ́na yé. Amọ́, mọwiwà gán taidi dọ yè sọ́ ohí mí bọ mí jo ohí lọ do apà lọ mẹ wẹ nkọ. Mọdopolọ, mí ma gán donukun dọ numọtolanmẹ awufiẹsa tọn mítọn lẹ ni depò eyin mí dovọ́na yé poun. Whenue mẹde ṣinuwa do mí, nuyiwa mítọn tintan gán yin nado gblehomẹ. Biblu kẹalọyi dọ mí gán gblehomẹ. Etomọṣo, e na mí avase gando dotẹnmẹ nina numọtolanmẹ mọnkọ nado duto mí ji go. (Salm. 4:4; Efe. 4:26) Etẹwutu? Na e ma yá bọ homẹgble ni dekọtọn do nudagbe mẹ. (Jak. 1:20) Flindọ, numọtolanmẹ de poun wẹ homẹgble yin, amọ́ nado gbọṣi homẹgble mẹ yin nudide de. w25.02 15 huk. 4-6

Jesu dohia dọ nulunu wẹ e yin nado bẹ akuẹ pli bo ma yin “adọkunnọ hlan Jiwheyẹwhe.” (Luku 12:16-21) Mẹdepope ma yọ́n nuhe osọ na hẹnwa. (Howh. 23:4, 5; Jak. 4:13-15) Taidi hodotọ Klisti tọn lẹ, mí nọ pehẹ avùnnukundiọsọmẹnu vonọtaun de. Jesu dọ dọ mí dona wleawufo nado “gbẹkọ” nutindo mítọn lẹpo go nado lẹzun devi emitọn lẹ. (Luku 14:33, Odò.) Klistiani owhe kanweko tintan whenu tọn he to Jude lẹ kẹalọyi nuhẹnbu mọnkọ po ayajẹ po. (Heb. 10:34) To egbehe, mẹmẹsunnu susu lẹ wẹ yí hihọ́ he akuẹ nọ hẹnwa do sanvọ́, na yé gbẹ́ nado doalọ to tonudidọ mẹ wutu. (Osọ. 13:16, 17) Etẹwẹ gọalọna yé nado wàmọ? Yé deji mlẹnmlẹn do opagbe Jehovah tọn lọ go dọmọ: “Yẹn ma na jo mì do gbede podọ yẹn ma na gbẹ́ mì dai gbede.” (Heb. 13:5) Mí nọ wà nuhe go mí pé lẹpo nado basi tito dai na nuhudo sọgodo tọn mítọn lẹ, podọ eyin nujijọ madonukun lẹ jọ do mí go, mí nọ dejido godonọnamẹ Jehovah tọn go. w25.03 29 huk. 13-14

Jehovah yọnẹn dọ mí do hudo alọgọ tọn nado whẹ́n bo lẹzun mẹhe whèwhín lẹ. Mẹhe to sinsẹ̀n taidi lẹngbọhọtọ podọ mẹplọntọ to agun mẹ lẹ ko mọ azọ́nplọnmẹ yí nado gọalọna mẹdopodopo nado lẹzun mẹhe “whẹ́n ganji” to gbigbọ-liho bo gbọnmọ dali “whẹ́n pete zun sunnu, jẹ obá ninọmẹ he yin gigọ́-yinyin Klisti tọn kọ̀n.” (Efe. 4:11-13) Jehovah sọ nọ yí gbigbọ wiwe etọn do gọalọna mí nado tindo “ayiha Klisti tọn.” (1 Kọl. 2:14-16) Humọ, owe Wẹndagbe tọn ẹnẹ lẹ yin gbigbọdo sọn Jiwheyẹwhe dè nado dohia mí lehe Jesu lẹnnupọn, dọho bosọ yinuwa do to lizọnyizọn aigba ji tọn etọn whenu. Eyin a nọ hodo apajlẹ aliho he mẹ Jesu nọ lẹnnupọn bosọ nọ yinuwa te tọn, a gán jẹ yanwle towe kọ̀n nado lẹzun Klistiani he whèwhín de. Amọ́, na mí nido lẹzun mẹhe whèwhín, mí sọ dona “yinukọn zẹ̀ nuplọnmẹ dodonu tọn Klisti tọn go,” enẹ wẹ nuplọnmẹ dodonu tọn Klistiani tọn lẹ. w24.04 4-5 huk. 11-12

Egbesọegbesọ wẹ mí dona nọ basi nudide lẹ. Nudide delẹ nọ taidi nuhe bọawu nado basi, taidi dehe gando núdùdù afọnnu tọn kavi whenue mí na yìhọ do go. Na nuhe dù whẹho devo lẹ, e nọ vẹawu taun nado basi nudide. Yé gán yinuwado mẹyiwanna mítọn lẹ, agbasalilo, ayajẹ kavi sinsẹ̀n-bibasi mítọn ji. Mí nọ jlo dọ nudide mítọn lẹ ni hẹn ale wá na míwlẹ po whẹndo mítọn po. Hú popolẹpo, todido mítọn wẹ yindọ nudide mítọn lẹ ni nọ hẹn homẹ Jehovah tọn hùn. (Lom. 12:1, 2) Afọdide titengbe de nado basi nudide dagbe de wẹ nado dindona nudọnamẹ lẹ. Naegbọn ehe do yin nujọnu? Mí ni dọ dọ awutunọ de yì dotowhé na azọ̀n sinsinyẹn de wutu. Be doto lọ na basi nudide gando aliho nukunpedomẹgo tọn de go domọ poun eyin e ma gbeje awutunọ lọ pọ́n kavi kanhose e wẹ ya? E họnwun dọ lala wẹ. Hiẹ lọsu na basi nudide dagbe hugan lẹ eyin a lẹnnupọndo nudọnamẹ he gando ninọmẹ lọ go lẹ ji jẹnukọn. w25.01 14 huk. 1-3

Etẹwẹ mí yọnẹn gando lẹblanu Jehovah tọn go? Nawẹ e ko dohia gbọn dọ emi ma jlo dọ “mẹdepope ni yin vivasudo”? (2 Pita 3:9) Lẹnnupọndo lẹblanu he e ko dohia mẹdelẹ he waylando sinsinyẹn ji. Ahọlu Davidi doalọ to ylando sinsinyẹn delẹ mẹ, ehe bẹ ayọdide po hlọnhuhu po hẹn. Ṣogan, Davidi lẹnvọjọ bọ Jehovah gbọn lẹblanu dali jona ẹn. (2 Sam. 12:1-12) Ahọlu Manasse wà nuhe ylan taun lẹ na suhugan gbẹzan etọn tọn. Amọ́, dile etlẹ yindọ Manasse yì jẹ obá mọnkọ mẹ, Jehovah kẹalọyi lẹnvọjọ etọn bosọ mọ enẹ taidi dodonu de nado do lẹblanu hia ẹ bosọ jona ẹn. (2 Otàn. 33:9-16) Apajlẹ ehelẹ flinnu mí dọ Jehovah nọ do lẹblanu hia whedepopenu he e mọdọ dodonu de tin nado wàmọ. E na fọ́n omẹ mọnkọ lẹ sọnku, na yé kẹalọyi dọ emi waylando he sinyẹn taun lẹ bosọ lẹnvọjọ wutu. w24.05 4 huk. 12