Kandai Sọlomọni tọn ehe do nuhe gán jọ do sinsẹ̀n-basitọ Jehovah tọn depope go hia. E gán jai jẹ ylando sinsinyẹn mẹ bọ to enẹgodo e na ṣí na ẹn dọ ajiji mẹ wẹ nulọ lẹpo jọ te. Kavi e gán dọ dọ “emi ma donukun etọn.” Podọ, eyin e lẹnnupọndo nuhe jọ lọ ji ganji, e yọnbasi dọ ni mọdọ emi ko ze afọdide nulú tọn delẹ he plan ẹn jẹ ylanwiwa kọ̀n. Afọdide ehelẹ gán ko bẹ gbẹdido ylankan lẹ, ayidedai mawé, kavi nọtẹn he ma sọgbe lẹ yìyì hẹn, vlavo nukun-sọ-nukun kavi to Intẹnẹt ji. E gán ko sọ doalọtena dẹ̀hiho, Biblu hihia, opli lẹ kavi kunnudegbe yìyì. To popolẹpo mẹ, e ma na ko jai jẹ ylando mẹ to ajiji mẹ, kẹdẹdile dẹpẹ he hó owe Howhinwhẹn lẹ tọn dọ lọ ma jai jẹ ylando mẹ to ajiji mẹ do. Etẹwẹ yin nuplọnmẹ lọ? Gbọnvona dọ mí dona dapana ylando, mí sọ dona nọ họ̀nna afọdide he nọ planmẹ jẹ e kọ̀n lẹ. Sọlomọni zinnudo nuagokun ehe ji whenue e ko dọho gando nuhe jọ lọ go godo.—Mat. 5:29, 30. w24.07 16 huk. 10-11

Etẹwẹ adọkunnu ehe yin? Azọ́n owẹ̀n Ahọluduta lọ tọn lilá tọn he nọ whlẹn ogbẹ̀ gán lọ wẹ. (2 Kọl. 4:1) Etẹwẹ núzinzan okọ́ tọn lọ lẹ yin? Yé nọtena devizọnwatọ Jiwheyẹwhe tọn he nọ hẹn wẹndagbe lọ yì mẹdevo lẹ dè lẹ. To ojlẹ Paulu tọn mẹ, ajọwatọ lẹ nọ yí okòzẹ́n lẹ zan nado hẹn nuhọakuẹ delẹ sọn fide jẹ fide, taidi núdùdù, ovẹn po akuẹ po. Mọdopolọ, Jehovah ko ze wẹndagbe họakuẹ lọ do alọmẹ na mí. Po alọgọ Jehovah tọn po, mí gán mọ huhlọn he mí do hudo etọn nado lá owẹ̀n mítọn po nugbonọ-yinyin po. To whedelẹnu, mí gán dibu dọ mẹlẹ na gbẹ́ mí dai to lizọnyizọn lọ mẹ. Nawẹ mí gán duto avùnnukundiọsọmẹnu enẹ ji gbọn? Lẹnnupọndo odẹ̀ he apọsteli lẹ hò ji whenue yè degbena yé ma nado dọyẹwheho. Kakati nado joawuna obu, yé biọ dọ Jehovah ni gọalọna yé nado to hodọ po adọgbigbo lẹpo po. Jehovah na gblọndo na odẹ̀ yetọn to afọdopolọji. (Owalọ 4:18, 29, 31) Eyin obu gbẹtọ tọn nọ yinuwado ji we to whedelẹnu, mí dona nọ biọ dọ Jehovah ni gọalọna mí nado yí owanyi na gbẹtọ lẹ do duto obu gbẹtọ tọn ji. w24.04 16 huk. 8-9

Owanyi he mí do na Jehovah nọ whàn mí nado klan yinkọ etọn do wiwe. Mí nọ jlo na yí adà de wà nado klọ masin he Satani gbọn lalo ylankan lẹ dali kọ̀n do oyín etọn go sẹ̀. (Jen. 3:1-5; Jobu 2:4; Joh. 8:44) To lizọnyizọn mítọn mẹ, mí nọ to jejeji nado yiavùnlọna Jiwheyẹwhe mítọn bo nọ dọ nugbo lọ gando ewọ go na mẹhe jlo na dotoai lẹpo. Mí nọ jlo dọ mẹlẹpo ni yọnẹn dọ jẹhẹnu titengbe etọn wẹ owanyi, podọ aliho gandudu tọn etọn yin dodo bosọ sọgbe, bọ Ahọluduta etọn na doalọtena yajiji lẹpo to madẹnmẹ bosọ hẹn jijọho po ayajẹ po wá na whẹndo gbẹtọvi tọn. (Salm. 37:10, 11, 29; 1 Joh. 4:8) Eyin mí yiavùnlọna yinkọ dagbe Jehovah tọn to lizọnyizọn mítọn mẹ, mí nọ klan oyín etọn do wiwe. Homẹ mítọn sọ nọ hùn, na mí to nuhe mí dona wà lọ wà taidi Kunnudetọ Jehovah tọn lẹ wutu. w24.05 18 huk. 12