Sokese’a Ti Sɛba N Kaali La Sɔkera

Sankani ti tisi la wan ta yeti ‘Suma’asum la fai bɔŋa’ boi?

“Sokese’a Ti Sɛba N Kaali La Sɔkera” n boi November 2025 Pigera Zontua poan la yuun yeti la kan yue Yehowa wan dekɛ a “potɛn’ɛrɛ” eŋɛ “ila pia la” n de gɔmɛtdoma woo la suuren. A “potɛn’ɛrɛ” la dela ba dekɛ ba kpe’eŋo, la ba paŋa bo “bonsilimasio n de bonmɔlega” la. Bunsilimasio wa dela United Nations la. Eŋa mea nɔɔ n de ‘goo duŋa la wɔ̃nɛ’ la. (Lil. 13:​14, 15; 17:​3, 16, 17) Bala pooren, “ila pia la,” la bunsilimasio la ti ba bo en paŋa la wan sa’am pumpɔreŋɔ pu’usegɔ za’a tingole wa zɛ’an woo. Sankani ti tisi la wan ta yeti ‘Suma’asum la fai bɔŋa’a boi? Ba wan yele bala ge ti Yehowa nyaa sa’am pumpɔreŋɔ pu’usegɔ? Bii Yehowa wan sa’am pumpɔreŋɔ pu’usegɔ ge ti ba nyaa yele bala?—1 Tes. 5:3.

To ka mi sansɛka wana mɔpi ti tisi la wan ta yeti ‘Suma’asum la fai bɔŋa’ boi. Yezu yuun ka’am a podɔleba sugumnɔɔrɛ zo’e zo’e ti ba ‘kɔ’ɔn pigera.’ Bala la, to san mina yɛla woo n wan ta tum se’em nima nima, la yele kan pakɛ ti to kɔ’ɔn pigera. (Mt. 24:42; 25:13; 26:41) Basɛ ya ti to nyaa ma’ɛ tomea geele Naayinɛ n yuun basɛ ti tuntuna Paul gulesɛ gɔnseko bo Tesalonikadoma la.

Paul yuun yeti: “Nɛreba han ne ta yɛta yeti, Daaŋɔ ka boe, sɛla woo bo la soŋa soŋa. Ba han ne ta yɛta wana, bilam bilam te ba ne ta nyɛ sagaŋɔ ba zen’en. Ba kan nyaŋɛ le’ehɛ de poan.” (1 Tes. 5:​2, 3) To gɔnɔ la yuun yeti, Paul n tɔɣɛ sɛla wa pa’alɛ ti tisi la san ta yeti ‘Suma’asum la fai bɔŋa’ boi, la kan yue ge ti mɛlesekãtɛ la pɔsɛ. Mɛlesekãtɛ la me san pɔsɛ, sankaŋa ti ba wan sa’am Babilon Kãtɛ la n de pumpɔreŋɔ pu’usegɔ la. To me yuun le yeti tisi la san ta yeti ‘Suma’asum la fai bɔŋa’ boi mɛ, la wan pa’alɛ ti mɛlesekãtɛ la yeti la pɔsɛ mɛ.

Ge to ma’ɛ la tomea malum geele yele wa ge baŋɛ ti to wan ta’an pa’alɛ de vuurɛ sore deyima me poan. La ta’an dɛna ti pumpɔreŋɔ pu’usegɔ sa’aŋɔ pooren ti tisi la wan ta yeti ‘Suma’asum la fai bɔŋa’ boi mɛ. Beni n sɔi ti la wan ta’an ta dɛna bala? To geele ya yele ana wa bisɛ.

Pumpɔreŋɔ pu’usegɔ n ta’asɛ zaberɛ se’em. Baabule la yeti, ba “daa nyɛ . . . nɛresɛba woo te ba ko teŋa wa zuo ziim” la Babilon Kãtɛ la poan. (Lil. 17:​1, 5; 18:24) Asaala zi’irego poan za’a, pumpɔreŋɔ pu’usegɔ kɔ’ɔn soŋera la nɛreba ti ba zabera. Saŋa zo’e zo’e, bamam n ta’aseri gbiregere ti nɛreba ba’ɛ kuura taaba. Bala pa’alɛ ti, pumpɔreŋɔ pu’usegɔ ta’asɛ la zaberɛ ge daɣɛ suma’asum. Bala la, la ta’an dɛna ti Babilon Kãtɛ la sa’aŋɔ pooren ti tisi la wan ta yeti ‘Suma’asum la fai bɔŋa’ nyaa boi. Ge to kan ta’an yeti la wan kɔ’ɔn eŋɛ la bala.

Tisi la san ta yeti ‘Suma’asum la fai bɔŋa’ nyaa boi, bem n wan ta eŋɛ pooren? Paul yuun yeti: ‘Ba han ta yɛta wana, bilam bilam te ba wan nyɛ sagaŋɔ.’ (1 Tes. 5:3) To makɛ yeti, pumpɔreŋɔ pu’usegɔ wan kelum bɔna ge ti tisi la ta yeti ‘suma’asum la fai bɔŋa’ nyaa boi’. Bala wan pa’alɛ ti saŋa wan tole ge ti tisi la sa’am pumpɔreŋɔ pu’usegɔ, ti pooren ti tisi la mea nyaa nyɛ sa’aŋɔ. Bala la, tisi la sa’aŋɔ kan dɛna bilam bilam. Ge to le makɛ yeti, tisi la wan ta sa’am pumpɔreŋɔ pu’usegɔ ba’asɛ ge nyaa yeti ‘suma’asum la fai bɔŋa’ boi mɛ. Bilam bilam ti tisi la nyaa wan nyɛ sa’aŋɔ, wuu Paul n yele se’em la. Bala la, sa’aŋɔ la wan di’e ba.

Yele ana san ta tum tuuma, la wan ana Yehowa nɛreba la wani? Paul yuun yeti, “han de’a yamam n sɔɔnrɔ, yamam ka tone likatooma. Bala, daanse’ere daarɛ te to Daana lɛbera na la kan ta’an din’i ya wo nayiga n ne wa’ana te la din’i nɛreba se’em la.” (1 Tes. 5:4) Geele yele wa bisɛ: Tisi la san sa’am pumpɔreŋɔ pu’usegɔ ge nyaa yeti ‘suma’asum la fai bɔŋa’ boi mɛ, Yehowa nɛreba wan baŋɛ ti tisi la sa’aŋɔ pɔ̃ri mɛ. Ge san dɛna tisi la nɔɔrɛ, bamam wan ti’isa ti ba nyaa boi la fai ti sa’aŋɔ kan paɛ ba. Bala n sɔi ti sa’aŋɔ la wan di’e ba.

Ton mi sɛla dela la kan yue “ila pia la” wan dekɛ ba paŋa bo bunsilimasio la ti a sa’am pumpɔreŋɔ pu’usegɔ. Sankaŋa ti mɛlesekãtɛ la wan pɔsɛ. To me mi ti tisi la wan ta yeti ‘suma’asum la fai bɔŋa’ nyaa boi mɛ. Sankani ti ba wan ta yele bala? To zamesɛ baŋɛ la yɛla ayi. Yia, ba ta’an yeti ‘suma’asum la fai bɔŋa’ nyaa boi mɛ ge nyaa sa’am pumpɔrenɔ pu’usegɔ. N yi’i, la ta’an dɛna ti tisi la wan ta sa’am pumpɔreŋɔ puʼusegɔ la ba’asɛ ge nyaa yeti, ‘suma’asum la fai bɔŋa’ boi mɛ. La wan nara ti to gura ge bisɛ yɛla n wan keŋɛ se’em. Saŋa zo’e zo’e la, Baabule yetɔɣebiŋ’a san ni tuna tuuma, bii ba san tum tuuma ba’asɛ ti to ni bɔkɛ a soŋa.—Dekɛ makɛ Yon 12:16.

Nananawa, sɛla yele n pakɛ paa dela to tara yelemɛŋɛrɛ bɔ’ɔra Yehowa ge daɣɛ sansɛka ti tisi la wan ta yeti ‘suma’asum la fai bɔŋa’ boi mɛ. Bala la, “bahɛ ya te to maahom ya mɛ ge tara to mɛhe soŋa soŋa” gura sankaŋa, la ka pakɛ la yɛla n wan ta tum se’em.—1 Tes. 5:6.