Tara Zoolum Bɔ’ɔra Naayinɛ Wuu Obadia La

Obadia n yuun biseri Naba Ahab n tari putoo la yire. Naba wa yuun basɛ ti Israeldoma la pu’usa la Baal. Ge Obadia yuun tari la zoolum bɔ’ɔra Naayinɛ ‘a bunbilimen sa.’ (1 Na. 18:​1-13) Se’em ma’a ti Pɔɣenaba Yesebel bo nɔɔrɛ ti ba ku Yehowa nɔdɛ’ɛseba la za’a la, Obadia yuun mi ti la nari ti a tara sukpe’ene ta’an eŋɛ sɛla. La yuun dela dɛŋa ti Obadia suɣɛ nɔdɛ’ɛsa ayima. Hali la bala za’a, a yuun suɣɛ la nɔdɛ’ɛseba kɔbega ge me bɔ’ɔra ba dia se’em ma’a ti kom bɔna la. La yuun daɣɛ naana ti Obadia suɣɛ Naayinɛ nɔdɛ’ɛseba la, sɛla n sɔi la pumpɔreŋɔ nɔdɛ’ɛseba la n yuun tuni bɔ’ɔra Ahab la Yesebel la ta’an nyɛ ba.—1 Na. 18:19.

To wan ta’an zamesɛ la bem Obadia zɛ’an? La boi bim ti a yuun zoti la dabeem la Ahab n wan eŋɛ sɛla ge a yuun zoti la Naayinɛ gana. Bala yuun basɛ ti a ta’an nyɛ la sukpe’ene te’ele nɔdɛ’ɛseba la. Tomam me ta’an tara zoolum bɔ’ɔra Naayinɛ ba san dekɛ nu’o paɣelɛ to tuuma la zuo. Zoolum buna wa wan kpemese to giila ti to soŋera to mabiisi n ŋmiberi yaarɛ poan la.