“Kɔma Dela Kan’an Ze’ele Na’ayenɛ Zen’an Na”

BAABULE la yeti kɔma dela “kan’an” la “bo’olom” n ze’ele Yehowa zɛ’an na. (Ym. 127:3) Dɔɣereba n nɔŋɛ Yehowa geele ba kɔma ti ba dela bo’olum n ze’ele a zɛ’an na.

Bala zuo la, ba tiregeri mɛ bɔ’ɔra ba kɔma yelese’a n pakɛ ba, ti ba ta’an tara imma’asum la pupeelum. Ba me soŋeri la ba kɔma ti ba ta’an ana tapilapi la Yehowa.

Ge nimbaalega yele la dela, dɔɣereba basɛba ka geele ba kɔma ti ba dela kã’a n ze’ele Naayinɛ zɛ’an na. (Isa. 49:15; 2 Tim. 3:1-3) Dɔɣereba basɛba me kɔ’ɔn bɔta la ba uge ba kɔma soŋa ge la kpe’em bo ba mɛ. Bala la, to sɔsɛ ya soke ana wa yele: Bem yɛla n basɛ ti la kpe’em bo dɔɣereba ti ba uge ba kɔma soŋa? Yehowa boti dɔɣereba bisera ba kɔma la wani? Dɔɣereba wan eŋɛ la wani uge ba kɔma soŋa ti ba ta tara pupeelum beere sa’am?

YELESE’A N BASƐ TI LA KPE’EM

Ho yidoma la nɛreba basɛba ta’an pɛregera hɔ. Tisi sise’esi poan, nɛra san tara kɔma zo’e zo’e, ba bo’ori en la gilema paa. Bala ta’an basɛ ti nɛra la a pɔɣa bɔta ti ba dɔɣɛ kɔma zo’e zo’e ge puɣum kan nyaŋɛ bisa ba. Ba ni eŋɛ bala ti ba yidoma, la ba kpɛ’ɛsi puurɛ pee.
Ho ta’an ti’isa ho beere sa’am yele. Tisi sise’esi poan, dipɔ’ɔsegɔ la bã’asi zuo, kɔma ka yaɣesi ge kiira. Bala zuo la, nɛreba ni bɔta la ba dɔɣɛ kɔma zo’e zo’e lan wan eŋɛ se’em ti basɛba san puɣum ki, basɛba wan vo’e ta dɛna bunkureba. Nɛreba basɛba me ti’isɛ ti ba san dɔɣɛ kɔma zo’e zo’e, kɔma la wan ta bisera ba, ba san ta kuregɛ. Sɛla n ni basɛ ti ba ti’isa bala la dela, daanse’ere ba tiŋa la gɔmɛt la ka biseri bunkureba.
A dɔɣɛ makɛ titɔ ka zo’e. Tisi ase’a poan, la ni kpe’em bo nɛra, la a pɔɣa mɛ ti ba nyɛ titɔ se’a n wan ta’an gu dɔɣum. Basɛba me tari titɔ la ge ba ti’isɛ ti titɔ la wan daam ba. Nɛreba basɛba me ka tari laɣehɔ n wan nyaŋɛ da titɔ la, se’ere n sɔi la ba eŋɛ la ligeri.a

YEHOWA BOTI DƆƔEREBA BISERA BA KƆMA LA WANI?

Deodoma n naɛ taaba bɔna park dɛ’ɛna. Sɔ la ma’ɛ la amea kɛlesa a bipugela ge ti a tɔɣera. Ti ma la me naɛ la a budibila la dɛ’ɛna. — Nyɛta nɛŋa bɔ’ɔra bia woo

Bɔ’ɔra ho kɔma yelese’a n pakɛ ba. Yehowa boti la dɔɣereba tiregɛ tuna ta’an diisa ba kɔma, bɔ’ɔra ba lɔɣeyɛɛtɔ la zɛ’an ti ba wan ga’arɛ ta paɛ se’em ma’a ti kɔma la wan ta’an bisa bamea. Yehowa me boti la dɔɣereba pa’ala ba kɔma. Bala la, Kristakɔma ni ka tari ba kɔma keŋɛ ta basɛ boarding sukuu poan ti ba zamesa. Ge ba ni bɔta la ba kɔma la bɔna yire ge kena sukuu ta zo’e kura. Ba me ni soŋɛ kɔma la mɛ ti ba zamesɛ tuuma n wan soŋɛ ba beere sa’am. Dɔɣereba me ni nyɛta la nɛŋa bɔ’ɔra bia woo. Bala ni basɛ ti kɔma la baŋɛ ti ba dɔɣereba nɔŋɛ ba ge ti dabeem ka tara ba. Ge Yehowa ka eeri ti dɔɣereba dɛna buntateba ge ta’an bisera ba kɔma. Makerɛ, Yehowa n yuun loe nɛresɛba ti ba bisera a Dayua la, yuun daɣɛ buntateba ge ba yuun tiregɛ tuna mɛ ta’an bisera en.—Mt. 13:55, 56; Lu. 2:24.

Baabule naresum yele: “Se’em han ka beha a mɛŋa nɛreba, yele [yele] woo sɛba n boe a yire poan la, a zagahe sera pa’alegɔ la te to gorɛ la mɛ. A ete be’em gana se’em n ka nam Krista.”—1 Tim. 5:8.

Yelemɛŋɛrɛ la dela, dɔɣereba san ta kuregɛ, ba wan ɛɛra soŋerɛ. Yehowa me bɔkɛ bala mɛ. Bala la, yele deyima ti kɔma wan eŋɛ pa’alɛ ti ba na’asɛ ba dɔɣereba dela, ba bisɛ ba wan eŋɛ se’em ta’an bisera ba dɔɣereba ba san ta kuregɛ. (Yɛh. 20:12; 1 Tim. 5:4) Ge Yehowa puurɛ wan pee dɔɣereba san ti’isa bamam n wan uge ba kɔma se’em ge daɣɛ ba ti’isa ba kɔma n wan ta bisa ba se’em.—2 Ko. 12:14.

Pa’ala ho kɔma Yehowa yɛla. Dɔɣereba n de Kristakɔma nari ti ba soŋɛ ba kɔma ti ba nɔŋɛ Yehowa ge me ta’an pu’usa en soŋa soŋa. Yehowa zɛ’an, sɛla ka boi ti dɔɣereba wan ta’an pa’alɛ ba kɔma gana ba pa’alɛ ba eŋa yɛla.—Tɛɛ. 6:6, 7.

Baabule naresum yele: “Kan’ana [ya kɔma] wo sɛba n dole Na’ayenɛ sore la ge pa’ala ba sɛla n nare ba eta.”—Ep. 6:4.

YEHOWA BOTI LA A SOŊƐ YA TI YA UGE YA KƆMA SOŊA

Nɛra la a pɔɣa n sɔseri. Ba lakɛ la Baabule biŋe teebule n ze ba nɛŋan. — Te’ele sɔsɛ ya yan wan dɔɣɛ kɔma makɛ se’em

Te’ele maasum. Ya san ti’isa la ya ta dɔɣɛ kɔma, ma’ɛ yamea geele bisɛ ya bɔŋa n ani se’em. Ya wan ta’an uge kɔma zo’e zo’e? Ya wan ta’an diisa ba, bɔ’ɔra ba lɔɣeyɛɛtɔ ge me tari ba keŋɛ sukuu? Kɔma bisega daɣɛ naana. La wan dekɛ ya saŋa, ya paŋa la ya ligeri. Ya san kan ta’an bisa kɔma zo’e zo’e, ya yi sɔsɛ bisɛ ya wan dɔɣɛ makɛ se’em ge ta’an bisa bia woo soŋa wuu Yehowa n boti se’em la. Ge yelemɛŋɛrɛ la dela, yɛla ta’an kan tum wuu ya maasum se’em la. Yehowa me bɔkɛ bala. (Pa. 9:11) Ge kɔ’ɔn mina ti ya san tiregɛ ti ya uge ya kɔma soŋa, Yehowa wan kã bo ya.

Baabule naresum yɛla: “Ninmɔ’ɔredaana potɛn’ɛra tare en yɛ’a la kekeko poan, ge kaanbe kaanbedaana yeere la nɔŋɔ poan.”—Mag. 21:5.

“Ya mi te se’em ya poan han bɔta te a mɛ yikantɛ n wan eŋɛ se’em n wana: Yia, a wan zin’ire tɛn’ɛhɛ behɛ nya a tare lɔgɔseto woo te a wan dekɛ mɛ yikantɛ la.”—Lu. 14:28.

Basɛ ti Yehowa yele pakɛ yamam la ya kɔma. Ya san tara kɔma, tiregɛ ya zamesɛ bia woo ti a ta’an nɔŋɛ Yehowa. Ya san ni keŋɛ tansugere zamesegɔ, soŋɛ ya kɔma la ti ba ana bãalam ge kɛlesa soŋa soŋa. Tiregɛ ya ita Deodoma Pu’usegɔ bakwai woo. Pa’ala ya kɔma ba wan mɔɔla yelesoma la se’em. Da dekɛ ya kɔma bo ba keendoma bii ya yire nɛreba ti ba bisera ba. La dela yamam zugbere tuunɛ ti ya bisera ya kɔma. La dela ya tiregɛ paa ta’an nyɛta nɛŋa soŋera ya kɔma ti ba nɔŋɛ Yehowa. La daɣɛ daayinɛ tuunɛ. Ge bisɛ ya puurɛ n wan pee se’em ya san nyɛ ti ya kɔma pu’usa Yehowa la pupeelum.

Baabule naresum yele: “Sɛla ka boi n basɛ ti mam puurɛ ba’ɛ pee gana wana: ti n wum ti n kɔma la kelum bɔna yelemɛŋɛrɛ la poan mɛ.”—3 Yo. 4.b

Dekɛ yamea delum Yehowa. Ya san ti’isa la ya ta dɔɣɛ kɔma bii ya puɣum tara la kɔma, kɔ’ɔn sakɛ ti Yehowa n pa’alɛ ya sɛla la n pakɛ gana ya tiŋa malema bii nɛreba n boti ya eŋɛ sɛla.

Fɔɔra: 1. Dɔɣereba n naɛ la ba bia zi’a tansugere zamesegɔ poan. Bia la zɛkɛ la nu’o ti a bo lebesego. 2. Deodoma n naɛ taaba keŋɛ na’am mɔɔlegɔ. Sɔ, la a bipugela la n keŋɛ ge ti ma la me naɛ la a kɔma bayi la keŋɛ. — La dela ya tiregɛ ta’an soŋɛ ya kɔma ti ba pu’usa Yehowa

Ya san kɔ’ɛ ya puti’irɛ ti ya dɔɣɛ makɛ, tari ya sakerɛ ti ya san ta kuregɛ, Yehowa wan kelum soŋera ya ti ya nyɛta yelese’a n pakɛ ya. Da basɛ ti nɛra pɛregɛ ya ti ya ti’isa ti ya nari ti ya dɔɣɛ kɔma ti ba beere ta bisera ya. Da ti’isa ti ya san ta kuregɛ, ya kan tara nɛra n wan bisera ya. Yehowa yeti a wan bisera ya. A me san tɔɣɛ sɛla, la ka baseri yoo.—Yos. 23:14.

Baabule naresum yɛla: “Dɔla Na’ayenɛ la ho suunre zan’an, ge da dɔla ho mɛŋa mi’ilom. Ho sɛla woo poan, mina Yenɛ, bala te a wan tɛɛn ho sore woo tontɔɔ.”—Mag. 3:5, 6.

“Mam n de bia tara tara ta korogɛ wa, mam ka tabelɛ nyɛ te Na’ayenɛ bahɛ tontɔɔdoma wa, bii ba kɔma ɛɛra soha dia.”—Ym. 37:25.

“Bahɛ ya te ya ninimɔ’ɛ tɛn’ɛha sɛla woo n de a sɔ’ɔlom la, la a som yɛla, te a wan bo ya wana zan’an pa’ahɛ.”—Mt. 6:33.

Kɔma dela bo’olum ti Yehowa dekɛ bo dɔɣereba. Dɔɣereba san dɔla Yehowa n pa’ali ba se’em ge ugera ba kɔma soŋa, Yehowa puurɛ ni pee mɛ. Dɔɣereba, tara ya sakerɛ ti Yehowa n pa’alɛ ya sɛla la yele n pakɛ gana ya tiŋa malema bii nɛreba n boti ya eŋɛ sɛla la. Bala zuo la, ya wan ma’ɛ yamea ti’isɛ bisɛ ya wan dɔɣɛ ya kɔma ti la makɛ se’em. Ya san eŋɛ bala, la wan soŋɛ ya ti ya ta’an bisera bia woo soŋa ti a puurɛ pee. Ya me wan ta’an soŋɛ ya kɔma la za’a ti ba nɔŋɛ Yehowa. Ya san eŋɛ yele ana za’a, la pa’alɛ ti ya nɔŋɛ ya kɔma ge me geele ba ti ba dela bo’olum n ze’ele Yehowa zɛ’an na.

Ba Puurɛ Pee Mɛ La Ban Kɔ’ɛ Ba Puti’irɛ Se’em La

Dɔɣereba n boi tinse’esi ti nɔŋɔ ba’ɛ bɔna ni fabela ti ba san ka dɔɣɛ kɔma zo’e zo’e, la wan ta wuŋɛ ba beere sa’am. Bala dela yelemɛŋɛrɛ yoi? Bisɛ buraasi n ze’ele tisi wa basɛba poan n tɔɣɛ de yele se’em.

Nɛreba yuun pɛregɛ ya mɛ ti ya dɔɣɛ kɔma zo’e zo’e?

“Ɛɛ, hali basɛba yuun dela mabiisi. Mabia ayima la a pɔɣa yuun soke tomam ti, ‘Beni n sɔi ti ya tara budibila ayima ma’a? Africa kalam, ho san tara budibila ayina, la ani wuu ho puɣum ka tara budibila. Ho me san tara budibito bayi, la ana wuu ho tari la ayina ma’a.’ Hali ton yuun dɔɣɛ pugela pa’asɛ la, ba yuun kelum daana to mɛ.”—Jeremias

Yan ka dɔɣɛ kɔma zo’e la, basɛ ti yɛla kpe’em bo ya me yoi?

“La daɣɛ bala la fii me. Ton ka dɔɣɛ zo’e la zuo, mam la n pɔɣa nyaŋɛ uge to kɔma la za’a mɛ soŋa. Sɛla n gani za’a dela to nyaŋɛ soŋɛ ba mɛ ti ba pu’usa Yehowa. Mam dɔɣereba yuun dɔɣɛ la kɔma zo’e zo’e. Bala yuun basɛ ti la kpe’em bo ba mɛ ti ba bisa to za’a soŋa bii ba tari to keŋɛ sukuu.”—Jeremias

La ani ya kɔma la wani la yan ka dɔɣɛ zo’e la?

“To kɔma la puurɛ pee mɛ. Ba nyɛ ti la kpe’em bo kɔnsɛba ti ba dɔɣereba dɔɣɛ ba zo’e la, se’ere n sɔi la ba dɔɣereba la ka ta’an bisera ba soŋa.”—Filipe

“To kɔma la n yuun nan zo’ori la, ba puurɛ yuun pee mɛ se’ere n sɔi la ba yuun mi ti to nɔŋɛ ba mɛ ge me tɛ’ɛla ba. To yuun ni yi la mabiisi n bĩ vo’osum poan ti ba wa’an to yire na ti to sɔsɛ. Mabiisi wa makesonɛ la yuun kpemese la to giila ti to tuna zo’e zo’e bɔ’ɔra Yehowa. To me nyɛ ti to kɔma la kɔ’ɔn tɔɣesɛ la ba makesonɛ la.”—Carlos

Yan ka dɔɣɛ kɔma zo’e la soŋɛ ya la wani?

“La soŋɛ to mɛ ti to ta’an bisa to kɔma la soŋa. Yuuma atã n tole ti mam tuuma sa’am. Tuuma wa yuun basɛ ti to nyɛta la ligeri zo’e zo’e. Ge ton ka zo’e la zuo, la yuun ka ba’ɛ wuŋɛ tɔ. Ton yuun tari sɛla fii la yuun seke to mɛ.”—Jeremias

“Ton ka dɔɣɛ kɔma zo’e la soŋɛ to mɛ ti to ta’an bɔ’ɔra to kɔma yelese’a n pakɛ ba ge me soŋera ba ti ba pu’usa Yehowa. To me nyaŋɛ keŋɛ zɛse’esi ti mabiisi ka zo’e bim ta mɔɔlɛ yelesoma la. To kɔma la n ka zo’e la zuo, to nyɛti la nɛŋa bɔ’ɔra bia woo ta’an soŋera ba ayina ayina. To kɔma la za’a pu’useri la Yehowa ge me kɔ’ɔn ti’isa ba wan eŋɛ se’em ta’an tum zo’e zo’e bo en.”—Lenadi

Bem ti ho wan bɔta ti ho yele dɔɣereba?

“Yooma 34:10b yeti: ‘Sɛba n eere Na’ayenɛ ka koŋere sɛla.’ Mam sirum nyɛ ti yele wa dela yelemɛŋɛrɛ. Yehowa soŋɛ mam la n deodoma mɛ ti to ka kɔŋera sɛsɛla.”—Rafael

a Buraa la a pɔɣa ma’a n wan kɔ’ɛ ba puti’irɛ ba wan dɔɣɛ makɛ se’em, la ban wan dɔɣɛ sansɛka. Bala, la ka nari ti nɛra zɛregɛ ba la ban kɔ’ɛ ba puti’irɛ se’em la. (Arom 14:4, 10-13) Ge buraa la a pɔɣa kan makɛ loe a dɔɣɛ makɛ sɛka n wan sa’am puurɛ. Leyɛ’ɛsa buraa la a pɔɣa san gɛɛla yele ana, la nari ti ba tɛ̃ra sɛla n boi 1 Korint 7:3-5.

b Kɔma la ti gulesegɔ la tɔɣɛ ba yele la dela nɛresɛba ti Yon yuun pa’alɛ ba yelemɛŋɛrɛ la. Ge dɔɣereba me ta’an geele ba kɔnsɛba n pu’useri Yehowa bala.