24 ABIGAIL
A Yuun Maalɛ La Yele N Kpe’em
YELE n yuun paɛ Abigail. Buraasi siyi sunsɔa n yuun nyie la taaba. Ayima dela amea sira Nabal n yuun de gberego ge me dɛna putɔya. Ayima la me dela David. David yuun dela nɛresonkɔ, dɛna Yehowa yelemɛŋɛrɛ yameŋa ge me wan ta dɛna Israel naba. Ge Nabal yuun eŋɛ la sɛla ti David sunsɔa nyie. Bala yuun basɛ ti Abigail, la a yire nɛreba za’a bɔna la yele poan. Abigail yuun som mɛ ge me tara yɛm. Abigail wan eŋɛ la wani dekɛ sukpe’ene maalɛ yele wa?
Abigail yuun ka mi Nabal n eŋɛ David sɛla la. Pooren ti Nabal yameŋa yuun yele en. Yameŋa la yuun yele Abigail ti David, la a buraasi 400 n ye na ti ba ku Nabal, “la a yire wa zan’an.” Beni n sɔi? David yuun yele Nabal ti a bo en dia. Yɛm boi bim ti a eŋɛ bala. Sɛla n sɔi la, David la a nɛreba la yuun ani wuu dangoone n kaɛ Nabal, a dunkeema, la a dusi zo’e zo’e la za’a mum. Nabal me yuun dela buntata. La boi bim ti Saul yuun yaɛ David mɛ ti bala yuun basɛ ti David zɔta suɣera ge David yuun kelum zabera tɛ’ɛla Israeldoma mɛ. David n yuun nyaa tum a yamesi ti ba ta zusɛ dia Nabal zɛ’an la, Nabal yuun to David mɛ. Hali a yuun yeti David dela yameŋa n zɔ ge basɛ a daana!
Nabal yameŋa la yuun mi soŋa soŋa ti a kan ta’an tee Nabal puti’irɛ. Yameŋa la yuun yele Abigail ti, Nabal ba’ɛ “dɛna la nɛre wurubere te a suunre kanbɛ gaŋɛ te nɛra kan ta’an tɔgɛ se’ere bo en.” Ge yameŋa wa yuun mi soŋa soŋa ti Abigail wan kelese en ge maalɛ yele la soŋa soŋa. Abigail nyaa wan eŋɛ la wani?
Abigail yuun ma’ɛ la amea. A yuun mi ti la nari ti a maalɛ yele la kalam. A yuun dekɛ la dia zo’e zo’e lu bosi zuo ge yele a yamesi la yeti ba deŋɛ nɛŋa tari ta bo David. A yuun nyaa bã la amea boŋa dɔla ba. A yuun ka yele Nabal sɛsɛla. A yuun mi soŋa soŋa ti a san yele a sira wa, a ta’an gu en.
Abigail yuun dekɛ la sukpe’ene tɔɣɛ bo David la a nɛreba sunsɔa n yuun nyie la a sira n tɔɣɛ ba yetɔɣepɔ̃’ɔsa la
Abigail n yuun bã’ari a boŋa la, zoore n yuun lile en. Bala zuo la, David la a buraasi la yuun ka nyɛ en. David sunsɔa yuun nyie mɛ. Ge Abigail n yuun nyɛ ba la, a sige a boŋa la zuo mɛ kalam ge keŋɛ tu’usɛ David. A yuun dɔ̃belɛ la tiŋa David nɛŋan ge belum en ti a bo en yɔ’ɔ ti a tɔɣɛ. Eŋa n yuun sirege amea la zuo, David yuun kelese en mɛ.
Abigail yuun belum David mɛ la Nabal n tɔɣɛ ba yetɔɣepɔ̃’ɔsa la. A me yuun yeti David tari buurɔ la a sunsɔa n nyie la Nabal la, se’ere n sɔi la Nabal dela nɛrewurebere. Abigail yuun tĩɛ David la tunsoma se’a woo ti a tum bo Naayinɛ, la Naayinɛ me n eŋɛ yelese’a bo en la. Yehowa kan bɔta ti David ku nɛreba n ka tari taalɛ, ti la ta daana en pooren. Abigail yuun le yeti saŋa woo, Yehowa wan loe nɛra David yizuo la poan ti a dɛna Israel naba. Yehowa me wan faaɛ en a dindoma nu’usin basɛ. Abigail yuun mi soŋa soŋa ti Yehowa loe la David ti a ta dɛna naba.
Abigail n yuun tɔɣɛ la yɛm se’em la zuo, David suure yuun ma’ɛ mɛ. David yuun yeti: “Kan’somɔ dɛna [Yehowa] Israel Yenɛ wa, Na’ayenɛ wa n dekɛ ho to’ohɛ mam zina wa denɛ!” David yuun pɛ̃ɣɛ Abigail mɛ la a yɛm la ge me yuun sakɛ doose a ka’aŋɔ la. David yuun yeti: “N wom ho yetɔgom la.”
Nabal yuun ka mi sɛla n iti. Yu’uŋɔ kuŋɔ la, a yuun di mɛ ge nyu daam “buge.” Abigail yuun guri mɛ ti beere yilegɛ ti a nyaa tɔɣɛ bo en. Sankaŋa ti daam la yese a ninin. Ge dabesa ase’a, Nabal sunsɔa ni nyie mɛ a san puɣum ka nyu daam. Hali la bala za’a, Abigail yuun yele en la sɛla woo n eŋɛ. Daanse’ere Abigail yuun ti’isɛ ti Nabal wan eŋɛ sunsɔa la en bii ŋmɛ en ge Nabal yuun ka eŋɛ bala. Beni n sɔi? Se’ere n sɔi la, Nabal “paleŋa [n] ɛnkɛ te a iŋa sɛɛn te a ka tana kena.” La yuun paɛ wuu dabesa pia pooren “te Na’ayenɛ ko Nabal.” Naayinɛ yuun dɔlegɛ Nabal tuberɛ mɛ la eŋa n ka soŋɛ David n de se’em ti a loe ti a ta dɛna naba la. Sɛla ti Yehowa yuun eŋɛ la yuun dela kã’a bɔ’ɔra Abigail, se’ere n sɔi la Abigail yuun ka le bɔna sire ele n ka tari pupeelum poan.
Yehowa yuun le eŋɛ la yɛla zo’e zo’e bo Abigail. David n yuun wum ti Nabal ki mɛ la, a yuun yele Abigail ti a boti a di en mɛ, ti Abigail me sakɛ. Pooren ti David yuun di na’am. A yuun pɔsɛ bisera la Yuda ge nyaa ta bisera Israel za’a. Abigail yuun dɔɣɛ la budibila bo en. Ge pooren, Amalekdoma n yuun nyɔkɛ Abigail keŋɛ. A sira David yuun dekɛ la sukpe’ene keŋɛ ta zabɛ faaɛ en basɛ.
Kaalɛ Baabule zɛ’ɛsi wa:
Sɔsɛ ya sokere wa:
Abigail yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Daanse’ere beni n sɔi ti Abigail yuun ele Nabal? (ia-E 77 ¶6)
2. La yuun dela piisi kɔberɔ kɛ’a saŋa ti David yuun zusɛ Nabal ti a bo en dia. Pa’alɛ piisi kɔberɔ kɛ’a saŋa n yuun ani se’em. (w97-E 7/1 14 ¶4) Bisɛ foote A
Foote A: Piisi kɔberɔ kɛ’a saŋa yuun dela de’eŋo saŋa
Foote A: Piisi kɔberɔ kɛ’a saŋa yuun dela de’eŋo saŋa
3. Bem zuo ti la yuun nara ti Nabal puurɛ pee la David soogɛpa la n yuun eŋɛ sɛla bo en la? (ia-E 77-78 ¶9-10) Bisɛ foote B
Hanan Isachar/Alamy Stock Photo
Foote B: Karmel tiŋa kinkɛlesi yuun ku’ɛ mɛ ge me pirɛ la kuga
4. Abigail n yuun tɔɣɛ sɛla ti la bɔna 1 Samuel 25:29 la vuurɛ? (1 Sa. 25:29; it-E “Life” ¶45)
Ti’isɛ Hon Wan Dekɛ Tum Tuuma Se’em
David yuun ma’ɛ la amea kelese Abigail. Sireba wan ta’an zamesɛ la bem bim? Bisɛ foote D
Foote D
Mabipɔɣesi sɛba sireba n daɣɛ mabiisi wan ta’an tɔɣesɛ Abigail la wani?
Ho wan eŋɛ la wani ta’an tɔɣesa Abigail sukpe’ene la?
Ti’isɛ Taɣesɛ Yehowa Yele
Abigail yele wa pa’alɛ mam ti Yehowa ani la wani?
Abigail yele wa makɛ la Yehowa puti’irɛ la wani?
Yehowa san ta isige Abigail kum poan, mam wan soke en la bem?
Zamesɛ Yɛla Pa’asɛ
Kristabia luɣerɛ kpɛ’a san ka pu’usa Yehowa, a wan eŋɛ la wani ti ba pɔɣedire la tara pupeelum?
Abigail yuun soŋɛ David mɛ ti a ta’an nyɔkɛ amea. Nɛra san nyie ho sunsɔa, ho wan eŋɛ la wani ta’an di’ise suure?
“The Insight of a Man Certainly Slows Down His Anger” (w14-E 12/1 12-13)