Maasum Gura Yeledaaŋɔ Se’a N Ta’an Paɛ Hɔ Ho San Muse Ko’om Ba’asɛ

1-2. Bem n wan soŋɛ tɔ ti to ta’an ana du’a du’a la Yehowa yeledaaŋɔ san paɛ tɔ? Bo makerɛ.

SITAANA tiŋa wa poan, to mi ti yeledaaŋɔ wan ba’asɛ paɛ tɔ. Yezu yuun yele a podɔleba la yeti: “sɛla n bahere te nɛreba tona be’em la” wan bɔna. (Mt. 18:7) Bala pa’alɛ ti yele ta’an paɛ tɔ ti la basɛ ti to sakerɛ ma’ɛ. Makerɛ, yele ta’an ta bɔna tomam la to mabia tiŋasuka. Ge to san maasum mina to wan eŋɛ se’em yele aŋa taaba poan, la wan basɛ ti to tara bɔnsoŋa la Yehowa.

² To geele yele wa bisɛ. Yehowa tigere la kɔ’ɔn kpɛmesa la to giila ti to maasum gura yeledi’ima. To wan eŋɛ la wani ta’an maasum? Yia la, la nari ti to mina yeledi’ima se’a n wan ta’an paɛ tɔ to gingilega la poan. La yele pakɛ mɛ, yele yele wuu to san dɛna saama gingilega la poan. To san deŋɛ baŋɛ yeledi’ima se’a n wan ta’an paɛ tɔ, to nyaa wan ta’an maasum soŋa. (Mag. 21:5) Bala mea nɔɔ, la nari ti to mina daaŋɔ se’a n wan ta’an paɛ tɔ, se’em ma’a ti to muse ko’om ba’asɛ. Bala wan soŋɛ tɔ ti to mina ton wan eŋɛ se’em daaŋɔ la poan. To san deŋɛ mina bala, yeledaaŋɔ la san paɛ tɔ, la kan ba’ɛ daam tɔ ge me kan sa’am tomam la Yehowa bɔnsoŋa la. (Ym. 17:5) Bala la, to wan sɔsɛ yeledaaŋɔ atã n ta’an paɛ tɔ, la to wan maasum se’em gura.a

MABIA SAN EŊƐ SƐLA TI LA DAAM HƆ

3. Bem yeledaaŋɔ n wan ta’an paɛ tɔ, to san muse ko’om ba’asɛ?

³ Hon tɛ̃ri hon daa pɔsɛ keŋɛ zamesegɔ ge nyɛ Yehowa nɛreba n tari nɔŋerɛ se’em la? Daanse’ere, hon daa nyɛ sɛla la basɛ ti ho sakɛ ti Yehowa Sɛɛradoma n sirum tari yelemɛŋɛrɛ la. (Yon 13:35; Kol 3:12) La me yuun ani Blancab la bala. Ge eŋa n yuun muse ko’om ba’asɛ la, sɛla n yuun eŋɛ ti la dɛna pakerɛ bɔ’ɔra en. Blanca yeti: “Mabipɔka n yuun eŋɛ mam sɛla ti la daam mam. Mam yuun le wum la eŋa n tɔɣeri mabiisi yɛla ti la ka ana soŋa. La yuun eŋɛ mam la pakerɛ se’ere n sɔi la, mam zamesɛ baŋɛ ti Yehowa Sɛɛradoma kɔ’ɔn tiregera mɛ ti ba tara suma’asum la nɔŋerɛ.” La dela yelemɛŋɛrɛ ti Yehowa nɛreba kɔ’ɔn tiregera mɛ tɔɣesa Yehowa hala la. Ge ban ka ani ma’a la zuo, saŋa ase’a ba ta’an tɔɣɛ bii eŋɛ sɛla ti la ka ana soŋa. (Ep 4:​23, 24; 1 Yon 1:8) Bala la, saŋa ase’a mabia ta’an tɔɣɛ hɔ bii eŋɛ ho sɛla ti la daam hɔ. (Yam 3:8) Susa’aŋɔ yele la dela, yele ana wa zuo basɛba basɛ Yehowa pu’usegɔ mɛ.

4. To wan maasum tomea la wani ta’an dita sugeri bɔ’ɔra to mabiisi? (Epesus 4:32)

⁴ La nari ti to maasum tomea nananawa, ti mabia san ta eŋɛ to sɛla ti la daam tɔ, to wan ta’an kelum ana du’a du’a la Yehowa. Ho wan eŋɛ la wani maasum? Tiregɛ tara ka’aŋɔ la n boi Epesus 4:32 la tuna tuuma. (Kaalɛ Epesus 4:32.) Ho san tiregɛ ita nɛreba soŋa ge me tara giile, la wan soŋɛ hɔ ti ho kan ba’ɛ tara daaŋɔ la nɛreba. Leyɛ’ɛsa, ho ta’an kɔ’ɛ ho puti’irɛ ti, nɛreba san tɔɣɛ hɔ bii eŋɛ sɛla ti la daam hɔ, ho wan di sugeri bo ba. Bem n wan soŋɛ hɔ ti ho ta’an ita bala? Tɛ̃ra ti ho ni zusa la Yehowa ti a di sugeri bo ho. Ho puurɛ me pee mɛ la eŋa n ni dita sugeri bɔ’ɔra ho la. (Mt. 6:12) Ho san ti’isɛ bisɛ Yehowa n diti sugeri bɔ’ɔra hɔ saŋa woo se’em la, la wan dɛna naana bɔ’ɔra hɔ ti ho me dita sugeri bɔ’ɔra nɛreba.

5. Baabule gulesegɔ kuni n wan ta’an soŋɛ tɔ, nɛra san tue to? (Magaha 19:11) (Bisɛ fɔɔra la.)

⁵ Kaalɛ Magaha 19:11. Baabule la yeti to san bɔkerac nɛreba, la wan soŋɛ tɔ ti to di’isa suure ba san tue to. Baabule la n yele sɛla wa soŋɛ Rima mɛ. Rima n daa muse ko’om, la ka ba’ɛ yue. A yeti: “Mabiisi san ni eŋɛ sɛla ti la daam mam, mam ni tĩɛ la Magaha 19:11 n yele se’em la. Mam ni le ti’isɛ la ba bɔŋa n ani se’em, la yelese’a n tabelɛ paɛ ba ge nyaa ni ti’isɛ sɛla n ta’an basɛ ti ba eŋɛ bamam n eŋɛ sɛla la. Leyɛ’ɛsa, mam ni tiregɛ naɛ la ba keŋɛ la na’am mɔɔlegɔ. Bala n soŋeri mam ti n bɔkera mabiisi la soŋa.” La nari ti to tiregɛ mina to mabiisi la soŋa nananawa. Bala wan soŋɛ tɔ ti to bɔkera ba. Ba me san ta eŋɛ sɛla ti la daam tɔ, la kan kpe’em bo to ti to di sugeri bo ba.

6. Bem n wan soŋɛ tɔ ti to ta’an tara bɔnsoŋa la to mabiisi?

⁶ Bem n wan soŋɛ hɔ ti ho ta’an tara bɔnsoŋa la mabiisi? Tiregɛ mina ho mabiisi la ge kɔ’ɔn bisa ba halesoma la. (Dekɛ makɛ Magaha 10:12; Arom 12:10; Flp. 2:​2, 3) Mabia ayima yu’urɛ n de Mark eŋɛ la bala. Geele bisɛ bala n soŋɛ en se’em. Eŋa n yuun muse ko’om ba’asɛ la, a yuun nyɛti nɛŋa sɔsera la mabiisi mɛ. Bala yuun basɛ ti a nyɛta la ba tuure yɛla. Bem n yuun soŋɛ Mark ti a yuun kelum ana du’a du’a la Yehowa la mabiisi la? A yeti: “Mam san dekɛ mabiisi tuure yɛla la makɛ la sɛba n ka pu’useri Yehowa n tuni tunfɛ̃’ɛsa se’a la, ba tuure la ka seke sɛla. Bala la, mam daa kɔ’ɛ n puti’irɛ ti n kan ti’isa n mabiisi tuure yɛla ge n wan tuɣum ti’isa la ba halesoma la yele.” Ho me san ita bala, la wan soŋɛ hɔ ti ho tara bɔnsoŋa la ho mabiisi la.

HO SAN TI’ISA YELESE’A TI HO DEKƐ BASƐ LA YELE

7. Bem n wan basɛ ti to puti’irɛ le bɔna yelese’a ti to dekɛ basɛ la poan?

⁷ Se’em ma’a ti ho daa zamesɛ baŋɛ yelemɛŋɛrɛ la nyaa dɛna Yehowa Sɛɛradaana la, nɔkpe’ene kai ti ho puurɛ daa pee mɛ la hon ka le pa’asɛ Sitaana tingɔnbe’o wa poan la. Daase’ere ho ta’an ti’isa ti ho kan sakɛ lebe yele aŋa poan. Ge yeledaaŋɔ san paɛ hɔ, ho ta’an le ti’isa hon daa basɛ yelese’a ge pu’usa Yehowa la. (Dekɛ makɛ Kanlɛ 11:​4-6.) Makerɛ, mabiisi basɛba dekɛ la tuunse’a n diti ba saŋa ge me wan basɛ ti ba nyɛ yu’urɛ la basɛ. Basɛba me zɔdoma basɛ ba mɛ, ban pɔsɛ zamesa Baabule la zuo. Daanse’ere mabiisi basɛba me tiregɛ basɛ la yelese’a n basɛ ti ba tara pupeelum ge me ka ana soŋa. Yeen ti’isɛ bisɛ Yehowa suure n wan sa’am se’em to san le eŋɛ yelese’a ti to daa pisegɛ basɛ ge pu’usa en la! Bem ti ho wan ta’an eŋɛ nananawa ti la soŋɛ hɔ ti ho da lebe yelese’a ti ho daa basɛ la poan?

8. To wan ta’an zamesɛ la bem Abraham la Sarah yele la poan?

⁸ Baaabule la tɔɣɛ la Yehowa yamesi basɛba n yuun ta’an basɛ ni ti ba puti’irɛ bɔna yelese’a ti ba yuun dekɛ basɛ la poan. Makerɛ, Abraham la Sarah yuun nam la Yehowa ge yese Ur n de tinkãtɛ n ani soŋa ti ba mɛ lalega kaɛ ka la, nyaa ta kɛ̃’ɛra tɛnti deto poan. (Heb. 11:​8, 9) Ba yuun tari la lɔɣɔsonɔ zo’e zo’e Ur tiŋa ge ba yuun san basɛ ni ti ba puti’irɛ bɔna lɔɣɔtuna poan, la yuun wan basɛ ti ba lebe Ur tiŋa. Ge Abraham la Sarah yuun ka eŋɛ bala. Ba yuun tuɣum basɛ ti ba puti’irɛ bɔna la Yehowa n pu’ulum biŋe ti a eŋɛ sɛla bo ba la poan.—Heb. 11:​15, 16.

9. Tuntuna Paul yuun geele yelese’a ti a yuun dekɛ basɛ la wani? (Filipi 3:​7, 8, 13)

⁹ Paul yuun basɛ la yɛla ase’a, lan wan eŋɛ se’em ti a ta’an pu’usa Yehowa soŋa. Makerɛ, Paul n yuun nan ka de Kristabia la, a yuun zamesɛ la Yudadoma Lɔɔ la Gamaliel zɛ’an. Gamaliel yuun dela pa’ala n tari yu’urɛ Yudadoma la poan. (Tm. 22:3) Paul yuun tari la yɔ’ɔ ti a nyɛ kpe’eŋo Yudadoma pu’usegɔ poan. (Ga. 1:​13, 14) Ge eŋa n yuun zamesɛ baŋɛ Krista la, a yuun basɛ yele ana woo mɛ. Eŋa n yuun nyaa de Kristabia la, la yuun dela naana bo en? Aayi. Amea nɛreba yuun yaɛ en mɛ ge me yuun ni ŋmɛ en ge paɣɛ en. (2 Ko. 11:​23-26) Paul yuun san ti’isa yeledaaŋɔ se’a n paari en la ma’a yele, la yuun ta’an basɛ ti a ti’isɛ ti eŋa n yuun daɣɛ Kristabia la n nyani. Ge Paul yuun ka ti’isɛ bala. A yuun tuɣum bisɛ ti la dela yɔ’ɔ kãtɛ bo en la eŋa n de Krista podɔla la. A me yuun ti’iseri la eŋa n wan ta nyɛ yɔɔrɛ se’a beere sa’am. Paul yuun mi ti yele aŋa dela kã’a bɔ’ɔra en gana yelese’a ti a yuun dekɛ basɛ la.—Kaalɛ Filipi 3:​7, 8, 13.

10. Bem yele ti la nara ti to kɔ’ɔn ti’isa? (Mark 10:​29, 30) (Bisɛ fɔɔra la.)

¹⁰ To wan ta’an zamesɛ la bem Paul yele la poan? Ho san pɔsɛ ti’isa yelese’a ti ho yuun dekɛ basɛ la, la nari ti ho tɛ̃ra sɛla n sɔi ti to yuun dekɛ ba basɛ. (Pa. 7:10) Dekɛ kã’a se’a ti ho nyɛta nananawa la makɛ la hon yuun dekɛ yelese’a basɛ la. Makerɛ, ho nyaa tari la bɔnsoŋa la Yehowa. (Mag. 3:32) Mabiisi n boi ho tansugere la poan, la mabinɔɔrɛ la za’a nɔŋɛ ho mɛ. (Kaalɛ Mark 10:​29, 30.) Ti’isɛ taɣesɛ yelesoma se’a ti Yehowa yeti a eŋɛ bo ho beere sa’am la! (Isa. 65:​21-23) Ho san kɔ’ɔn ti’isa yelesoma se’a ti Yehowa eŋɛ bo ho la, ho puti’irɛ kan le ba’ɛ bɔna yelese’a ti ho dekɛ basɛ la poan.

11. Ho wan ta’an zamesɛ la bem Rosemary yele la poan?

¹¹ Mabipɔka ayima yu’urɛ n de Rosemary yuun dela yuun 50 bɔba ge muse ko’om. Daalɛ basɛ sɛla n soŋɛ en ti a puti’irɛ ka le bɔna yelese’a ti a dekɛ basɛ la poan. A yeti: “Mam n yuun nyaa de Yehowa Sɛɛradaana la, burenya saŋa woo mam suure n ni sa’am. Sɛla n sɔi la, sankaŋa ti mam la n deodoma yuun ni nyɛta nɛŋa ita yelese’a n bo’ori to pupeelum. Mam nɔŋɛ la n tara lɔɣɔrɔ bɔ’ɔra n deodoma la n zɔdoma. Mam san ni nyɛ kɔma la puurɛ n ni pee se’em, la lɔɣɔse’a ti mam dekɛ bo ba la, mam me puurɛ ni pee mɛ.” Bem n yuun soŋɛ Rosemary? A yeti: “Mam ni tee loe la dabeserɛ ta’an nyɛta nɛŋa bɔ’ɔra n deodoma ti to ita yelese’a n bo’ori to pupeelum. Yuunɛ woo, mam ni laɣesɛ la n deodoma ge bo ba lɔɣɔrɔ ge me ni basɛ ti ba baŋɛ ti mam nɔŋɛ ba za’a.” Sɛla n yuun le daana Rosemary. A yeti: “Mam n yuun baŋɛ yelemɛŋɛrɛ la, mam zɔdoma yuun basɛ mam mɛ. Bala yuun basɛ ti mam suure sa’am mɛ ge ti saŋa ase’a la ni ana wuu mam boi la n ma’a la.”d Bem n soŋɛ en? A yuun eŋɛ la maaseŋɔ dɔla mabipɔɣesi to’ore to’ore kena na’am mɔɔlegɔ. A yeti: “Bala soŋɛ mam mɛ ti mam ta’an baŋɛ mabipɔɣesi la soŋa ge nyɔɣɛ ba zɔtɔ. Mam nyaa tari la zɔdoma ti n nɔŋɛ ge ti n puurɛ me pee la ba” Ho wan ta’an zamesɛ la bem Rosemary yele la poan? Hon pu’useri Yehowa la zuo, ho san ka le tara yelese’a n daa basɛ ti ho tara pupeelum la, tɛ̃ra ti ho nyaa tari la yɛla zo’e zo’e n sirum bo’ori ho pupeelum. (Flp. 4:​8, 9) Le tɛ̃ra ti Yehowa n wan bo ho yelese’a la gani sɛla ti ho basɛ la.

BASƐBA SAN BASƐ YEHOWA PU’USEGƆ

12. Bem n wan ta’an eŋɛ tansugere la poan ti la daam ho paa?

¹² Se’em ma’a ti ho daa nyaa dɛna Yehowa Sɛɛradaana la, ho puurɛ daa pee mɛ la hon ka le pa’asɛ tinbe’o wa poan la. Ge ho nyaa pa’asɛ la nɛresɛba ma’a n tɔɣeri yelemɛŋɛrɛ ge me tuna sɛla n nari la poan. (Isa. 65:14) Ge saŋa ase’a nɛra ta’an ta tum be’em tansugere la poan. Nɛra la me san ka tee, ba ta’an yese en tansugere la poan. (1 Ko. 5:13) Geele bisɛ lan yuun ani mabipɔka ayima yu’urɛ n de Samar se’em, la ban yuun yese mabia tansugere la poan la. A yeti: “Mam n yuun muse ko’om la, la yuun ka yue ti keema ayima tum be’em ti ba yese en tansugere la poan. La yuun ba’ɛ eŋɛ mam la pakerɛ sɛla n sɔi la, mam yuun ka ti’isɛ ti keema wan sakɛ tum be’em giisɛ Yehowa.” La ani soŋa ti to sakɛ ti mabiisi nɔŋɛ Yehowa mɛ ge bɔta ti ba ana tapilapi la en. (1 Ko. 13:​4, 7) Ge susa’aŋɔ yele la dela, yuunɛ woo ba ni yese mabiisi basɛba mɛ tansugere la poan. La san dɛna ho yire nɛra bii ho zɔ bii mabia ti ho bɔ’ɔra en gilema n basɛ Yehowa pu’usegɔ, la ta’an daam ho paa.

13. To wan ta’an maasum tomea la wani nananawa ti to zɔ bii to yire nɛra san ta basɛ Yehowa pu’usegɔ ti to sakerɛ da ma’ɛ?

¹³ Ho wan ta’an maasum homea la wani nananawa ti ho zɔ bii ho yire nɛra san ta basɛ Yehowa pu’usegɔ ti ho sakerɛ da ma’ɛ? Kɔ’ɔn basɛ ti hon la Yehowa bɔnsoŋa la kpe’em. (Yam. 4:8) Tɛ̃ra ti ho kɔ’ɛ la ho puti’irɛ ti ho pu’usa Yehowa, la ka pakɛ la nɛreba basɛba n iti se’em. Makerɛ, la boi bim ti to ta’an ni naɛ la to deodoma ita zamesegɔ ge kena tansugere zamesegɔ. Ge la nari ti to me ita tomea Baabule zamesegɔ ge zusa Yehowa.—Ym. 1:2; 62:8.

14. To wan ta’an zamesɛ la bem Peter makesonɛ la poan? (Yon 6:​66-68)

¹⁴ Peter yuun eŋɛ la makesonɛ ti la wan ta’an soŋɛ tɔ. Saŋa kayima Yezu podɔleba zo’e zo’e yuun ka le dɔla en se’ere n sɔi la, Yezu yuun yele la sɛla ti ba ka bɔkɛ. Peter me yuun ta’an ka bɔkɛ Yezu n yele sɛla la ge a yuun kelum tara la yelemɛŋɛrɛ bɔ’ɔra Yezu. (Kaalɛ Yon 6:​66-68.) Peter yuun ka basɛ ti a puti’irɛ bɔna nɛreba n iti yelese’a la poan ge a yuun tuɣum ti’isa la Yezu n pa’alɛ en sɛla la. Bala yuun soŋɛ en mɛ ti a ka basɛ Yezu dɔlega. Bala mea nɔɔ, nɛreba san puɣum basɛ Yehowa pu’usegɔ, tɛ̃ra ti Yehowa doose la tigere wa poan basɛ ti ho baŋɛ yelemɛŋɛrɛ la. Kɔ’ɔn gurɛ yelemɛŋɛrɛ la kankaŋi! Samar ti to puɣum sɔsɛ a yele la yeti, “Mam ni yele n mea yeti nɛra san tum be’em, la ka pa’alɛ ti nɛra woo n boi tansugere la poan tuni la tumbe’ero bii Yehowa tigere la n pa’alɛ sɛla la daɣɛ yelemɛŋɛrɛ. La me ka pa’alɛ ti Yehowa ani la bala.”

15. Hon zamesɛ la bem Emily yele la poan?

¹⁵ Geele sɛla n yuun paɛ Emily. Emily n yuun muse ko’om la, bakwai pooren ti a ma yuun basɛ ba ge ti ba me yese en tansugere la poan. Emily yeti: “Mam yuun ka ti’isɛ ti mam ma wan sakɛ eŋɛ bala. Sɛla ka tabelɛ daam mam paɛ yele wa. Mam me ni ti’isa mam ma yele mɛ paa.” Bem n soŋɛ Emily? A yeti: “Mam ka boi n ma’a. Mam sɔ nɔŋɛ mam mɛ ge bisera mam soŋa. Mabiisi la n boi tansugere la poan iti mam mɛ wuu to dela deodoma la. Nɛra woo tari yeledaaŋɔ mɛ. Bala n sɔi ti la yele pakɛ ti to nɔŋɛ taaba ge me kpɛmesa taaba giila.” (1 Pe. 5:9) Da basɛ ti yeledaaŋɔ paɛ hɔ ge ti ho nyaa basɛ ti hon la ho mabiisi bɔnsoŋa la kpe’em. Tiregɛ la ho baŋɛ ho mabiisi la soŋa soŋa. Ho san eŋɛ bala, yele san ta paɛ hɔ, la wan dɛna naana ti ho mabiisi la soŋɛ hɔ ge buɣelɛ ho suure.

16. Bem n nari ti to tɛ̃ra? (Bisɛ foote la.)

¹⁶ Tɛ̃ra ti nɛresɛba ti Yehowa nɔŋɛ la ti a dɔ̃legera ba tuba. (Heb. 12:6) A boti la sɛba ti ba yese ba tansugere la poan la lebe na. (2 Pe. 3:9) Bala la, ba san yese ho zɔ bii ho yire nɛra tansugere la poan, tara suure lua ti keendoma la wan tiregɛ la ba paŋa za’a soŋɛ en ti a lebe Yehowa zɛ’an na.—2 Tim. 2:​24, 25.

17. To wan ta’an tara suure lua la bem poan?

¹⁷ To sɔsɛ la yeledaaŋɔ se’a n wan ta’an paɛ mabia n nan muse ko’om. Yeledaaŋɔ wa taaba san paɛ hɔ, ho ta’an kelum pu’usa Yehowa la yelemɛŋɛrɛ. Ho me ta’an maasum hon wan eŋɛ sɛla, yeledaaŋɔ aŋa san ta paɛ hɔ. Kɔ’ɔn tɛ̃ra ti Yehowa wan soŋɛ hɔ ti ho tara yelemɛŋɛrɛ pu’usa en. A puɣum soŋɛ ho mɛ ge me wan kɔ’ɔn soŋera hɔ wuusa! (1 Pe. 5:10) A wan bo ho paŋa ti ho ta’an ŋmibera yeledaaŋɔ woo poan. Ho san basɛ ti Yehowa soŋera hɔ, sɛsɛla ka boi n wan ta’an sa’am hon la Yehowa bɔŋa la!—Ym. 119:165; Arom 8:​38, 39.