43 YOSEF
A Yuun Dela Sɔ N Tari Sukpe’ene
SƆ NARI ti a tuna kpe’eŋo kpe’eŋo ta’an bisera a pɔɣa, la a kɔma ge me tara sukpe’ene ta’an tɛ’ɛla ba. Yosef n ze’ele Nazaret la yuun boti a dɛna la sɔsonkɔ. Ge ti a yuun nyaa di a pɔɣa la, yeledaaŋɔ n yuun paɛ en ti la nara ti a tara sukpe’ene. Pɔɣesɛka ti a yuun bɔta ti a di la yuun tari la puurɛ ge ti puurɛ la daɣena a denɛ. Pɔka wa dela Mary. Mary yuun yele Yosef lan eŋɛ se’em ti a tara puurɛ. Ge la bala za’a, la yuun daɣɛ naana bo Yosef ti a sakɛ yele wa. Basɛ ya ti to bisɛ sɛla ti Yosef yuun eŋɛ?
Baabule la yeti ‘Yosef dela tontɔɔdaana’ n doli Yehowa pa’alegɔ. A me yuun zoti nɛreba nimbu’ɔ mɛ ge ita ba soŋa. Yosef n yuun ta baŋɛ ti Mary tari la puurɛ la, a yuun ti’iseri la eŋa n wan eŋɛ se’em. Yosef n yuun boti a te’ele Mary la zuo, a yuun maasum mɛ ti a basɛ en baalam. Sankaŋa la, nɛreba san ni maasum ti ba di taaba, ba ni geele ba ti ba dela nɛra la a pɔɣa. Ge Yehowa yuun gu Yosef mɛ. Yehowa yuun tum la maleka ti a tɔɣɛ bo en zaaseŋɔ poan. Maleka la yuun yele Yosef yeti: “Da zɔ dabeem la ho di ho pɔga [Mary].” Maleka la yuun basɛ ti Yosef tara la suure lua ti Mary tɔɣeri la yelemɛŋɛrɛ. Bia la yuun sirum dela Naayinɛ dayua ge me wan ta dɛna Mɛzaaya la!
Yosef yuun nari ti a bisa Naayinɛ Dayua la. Bala yuun dela tunkãtɛ
Yosef yuun “eŋɛ Na’ayenɛ soŋora la n yele en sɛla la” mɛ. Yosef yuun dekɛ la sukpe’ene tum Yehowa n boti a tum sɛla la. A yuun nari ti a bisa a pɔɣa la n wan ta dɔɣɛ Naayinɛ dayua la. Yosef yuun nari ti a tara la sukpe’ene.
La yuun ka yue ti Kaesar Augustus bo nɔɔrɛ ti nɛra woo keŋɛ a tiŋa ti ba ta kaalɛ en. Daanse’ere lɔɔ la n yuun yele sɛla la ka pa’alɛ ti la dela pɛ̃regerɛ ti Mary laɣum keŋɛ Betlehem ge a yuun doose Yosef mɛ. Yosef me yuun ta’an fabela ti a san basɛ Mary ge keŋɛ, nɛra ka boi n wan ta’an bisa en soŋa. La boi bim ti Mary yuun ‘pɔ̃ri la dɔɣum’ ge a yuun kelum keŋɛ la sarɔɔ woko ta paɛ Betlehem. Ban yuun paɛ la, Mary yuun virige mɛ nyaa ta dɔɣɛ Yezu, dusi zɔŋɔ poan.
Yosef yuun dela kampinta n tuni kpe’eŋo kpe’eŋo bisera a deodoma ge a yuun daɣɛ buntata. Yosef la Mary yuun tari ba bia la keŋɛ la pu’usegɔ yire la n boi Yerusalem la ta pa’alɛ, wuu Naayinɛ lɔɔ la n pa’alɛ se’em la. Ban de nasedoma la zuo, ba yuun tari la nadoma dayɛnbibisi bayi ta bo bo’olum. Pooren, nɛresɛba n biseri ŋmarebɛa yuun nyɛ la sɛla n ani wuu ŋmarebila la ge nyaa dɔla dɛ. Daanse’ere ba yuun ze’ele la Babilon. Ba yuun wa’an la Yosef yire n boi Betlehem ge dekɛ bo’olum bo bia la, la a dɔɣereba. Bala pooren la, Yehowa maleka yuun kaɣɛ Yosef ti Naba Herod n de putɔya la, boti la a ku Yezu! Maleka la yuun le yele Yosef yeti a tari a deodoma la zɔ keŋɛ Egypt.
Yosef yuun tari la sukpe’ene ge doose maleka la n yele en sɛla la. A yuun isige mɛ ge yele Mary yeti a isige ti ba yese Betlehem kalam. Yu’unkuŋɔ la, Yosef, Mary, la Yezu yuun basɛ yire mɛ ge zɔ keŋɛ zɛ’an n zaaɛ ti ba ka ba’ɛ mina. Yosef wan eŋɛ la wani ta’an bisa a deodoma Egypt tiŋa? Bo’olum seto ti nɛresɛba n biseri ŋmarebibisi la yuun dekɛ bo ba la yuun soŋɛ Yosef mɛ ti a ta’an da yelese’a n pakɛ ba Egypt tiŋa. Pooren, Yehowa yuun yele Yosef ti a tari a deodoma la lebe Israel tiŋa. Ge naba ayima n soe bisera Betlehem sɔ’ɔlum la ge dɛna putɔya. Bala la, Yosef yuun ka keŋɛ bim. A yuun tuɣum keŋɛ la Nazaret, se’ere n sɔi la Yehowa n yuun yele en zaaseŋɔ poan ti a keŋɛ bilam.
Ban yuun boi Nazaret la, Yosef la Mary yuun dɔɣɛ la kɔma bayoobe bii gaŋɛ bala pa’asɛ Yezu poan. Bala la, Yosef yuun tuni la kampinta tuuma ta’an bisera a deodoma la. Sɛla n gaŋɛ za’a dela, Yosef yuun pa’alɛ a deodoma la Yehowa yɛla ge me tiregera ti ba ta’an naɛ taaba pu’usa Yehowa. Saŋa woo, ba yuun ni kena la zamesegɔ deo la poan zamesa Yehowa yɛla. Ba me yuun ni keŋɛ la Yerusalem ta de’em Azɔɔtole De’eŋo, la de’eŋo ase’a. Sansɛka n de ki’i ti Baabule la tɔɣɛ Yosef yele dela, se’em ma’a ti eŋa la a deodoma yuun keŋɛ Yerusalem la. La yuun dela sankaŋa ti Yosef la Mary yuun ti’isɛ ti Yezu bɔ me la. Yezu yuun dela yuun 12. Ti’isɛ bisɛ yele wa n yuun daam Yosef se’em! Ban yuun nyɛ Yezu pu’usegɔ yire la poan la, ba yuun nyaa vo’ose la fũu. Yosef la Mary n yuun tari ba deodoma la kule la, Baabule la yeti Yezu yuun kɔ’ɔn “nana ba” mɛ.
Baabule la ka pa’alɛ Yezu n yuun zuni se’em ge ti Yosef ki. Ge la ani wuu Yosef yuun pa’alɛ Yezu kampinta tuuma la mɛ soŋa soŋa. Bala n sɔi ti nɛreba yuun mina Yezu ti a dela ‘kampinta’ ge daɣɛ la a yeen dɛna la kampinta “dayɔa.” Yosef eŋɛ la makesonɛ bo sɔdoma. Yehowa boti la sɔdoma za’a tɔɣesa Yosef. A yuun dekɛ la sukpe’ene te’ele a deodoma la, bisera ba ge pa’ala ba Naayinɛ yɛla.
Kaalɛ Baabule zɛ’ɛsi wa:
Sɔsɛ ya sokere wa:
Yosef yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Mary san dɛna la Heli bipugela, beni n sɔi ti Luke 3:23 yeti Yosef dela “Heli dayɔa”? (w17.08-E 32 ¶4)
2. La ta’an dɛna la bem zuo ti Yosef yuun ka gã’arɛ la Mary ta paɛ se’em ma’a ti a dɔɣɛ Yezu? (w03-E 12/15 5 ¶5)
3. Bem n pa’alɛ ti Yosef yuun nɔŋɛ la tuuma? (ia-E 166-167 ¶15-18) Bisɛ foote A
Foote A
4. Beni n sɔi ti to wan ta’an yeti Yosef yuun ki mɛ ge ti Yezu nyaa pɔsɛ a na’am tuuma la? (w17.07-E 13 ¶8, tiŋanɔɔrɛ yelesum)
Ti’isɛ Hon Wan Dekɛ Tum Tuuma Se’em
Yosef yuun nani Yehowa mɛ, la boi bim ti la yuun daɣɛ naana. Dɔɣereba wan ta’an zamesɛ la bem a zɛ’an? (Mt. 1:20, 24; 2:13-15, 19-21)
Sodeni poan ti Yosef makesonɛ la pa’alɛ deodoma ti ba dekɛ Yehowa pu’usegɔ deŋɛ nɛŋa ba vom poan? (Lu. 2:41) Bisɛ foote B
Foote B
Ho wan eŋɛ la wani ta’an tɔɣesa Yosef sukpe’ene la?
Ti’isɛ Taɣesɛ Yehowa Yele
Yosef yele wa pa’alɛ mam ti Yehowa ani la wani?
Yosef yele wa makɛ la Yehowa puti’irɛ la wani?
Yehowa san ta isige Yosef kum poan, mam wan soke en la bem?
Zamesɛ Yɛla Pa’asɛ
Itipa’alegɔ vidiyo wa poan, bisɛ Yosef n yuun eŋɛ se’em ta’an tum Yehowa n boti sɛla.
Gɔmɛt la san biŋe lɔɔ ti la kpe’em bo to bii ka makɛ la to bɔŋa la, to wan ta’an tɔɣesa Yosef la Mary la wani?