44 YON KO’OM MUSEGADAANA LA
‘Nɛra Ka Boi N Gani Yon’
LA YUUN yue mɛ ge ti Naayinɛ nan ka tum a nɔdɛ’ɛsa ti a ta ka’am a nɛreba. Bala la, Naayinɛ yuun nyaa tum la buraa ayima yu’urɛ n de Yon ti a ta tɔɣɛ A yelesum la bo nɛreba. A yuun kɛ̃’ɛri la a ma’a Yudea pɔɣentia la poan. Zɛkana wa yuun dela tãsi zɛ’an. Bunsɛldoma, nasi, goo dusi la nɛrewuruba n yuun boi bim. Yon yuun san ka tari ni sukpe’ene, a kan ta’an kɛ̃’ɛra zɛ’an wa poan. A me yuun tari la sukpe’ene mɔɔla gãkerɛ yɛla bɔ’ɔra nɛreba la.
Zekaria la Elizabet n yuun nan ka dɔɣɛ Yon la, maleka n yuun yele ba Yon n wan ta ana se’em. Maleka la yuun yeti, Yon wan ta dɛna la Nazar nɛra, tulegera wuu nɔdɛ’ɛsa Eliya la ge me maalɛ sore bo se’emdaana n gani eŋa. Se’em ma’a ti Yon yuun paɛ yuun 30 la, a yuun wan ta’an dɛna malemadaana wuu a sɔ la. Ge a yuun tuɣum pa’ala la nɛreba ti ba tee ba puti’ira. Eŋa ti nɔdɛ’ɛsa Isaiah yuun tɔɣɛ a yele ti “nɛra n mɔɔle . . . pɔgɔtia la poan.” A yuun mu’ɛ la nini mɔɔla “saazuo sɔ’ɔlom” la yɛla ti nɛreba zo’e zo’e yuun ze’ele tisi la poan keŋɛ a zɛ’an ta kɛlesa en. Wuu maleka la n yuun pa’alɛ se’em la, a yuun museri la nɛresɛba n basɛ ba be’em la ko’om poan. Se’em ma’a ti Saduseedoma, la Fariseedoma la yuun keŋɛ ti ba ta nyɛ Yon la, a yuun dekɛ la sukpe’ene yele ba yeti ba dela putɔpa. Se’ere n sɔi la, ba ka doli Naayinɛ Lɔɔ la lan nari se’em.
Yon yuun ka tari a tuuma la pa’ala amea. A yuun tuɣum sirege la amea ge yele nɛreba la yeti, eŋa yeen maala la sore bɔ’ɔra buraa n gani eŋa. Yon yuun yeti eŋa puɣum ka nara ti a pirege a taɣera. Se’em ma’a ti Yon yuun muse Yezu ko’om poan ba’asɛ la, Yon yuun wum la Yehowa n tɔɣɛ yeti: “Mam dayɔba’arɛ te mam nintegɛ. N tare popeelom la en.” Sitaana n yuun makɛ Yezu bisɛ la, bilam pooren ti Yon yuun tɔɣɛ kpe’eŋo kpe’eŋo yeti: “Behɛ ya, Yenɛ Pebila la n wa’ana te a dekɛ teŋa wa zuo be’em bahɛ.”
Yon n yuun sirege amea la zuo, a yuun yele a podɔleba la ti ba dɔla Yezu. Ba zo’e zo’e yuun eŋɛ la bala. Basɛba dela Peter suɔ Andrew, la Zebedee dayua Yon. Pooren, ba yuun nyaa dela Yezu tuntuneba. Yezu n yuun pɔsɛ a na’am tuuma la, a me yuun kpemeseri la nɛreba giila ti ba muse ko’om ti la pa’alɛ ti ba basɛ ba be’em, wuu Yon n yuun iti se’em la. Yon podɔleba la basɛba n yuun yele en yeti Yezu podɔleba la museri nɛreba zo’e zo’e ko’om gana eŋa Yon la, a yuun ka basɛ ti la daana en. Ge a yuun tuɣum sirege la amea ge yeti: “La sontii enŋa Yezu de’a nɛrekantɛ ge te mam sirihe n mea.”
Buraasi n de putɔpa yuun ka boti Yon n yuun mɔɔli sɛla la ge nɛresɛba n yuun guri Mɛzaaya la puurɛ yuun pee mɛ
Yon yuun eŋɛ pa’alɛ ti a tari la sukpe’ene se’em ma’a ti a yuun ka’am Herod Antipas la. Yon yuun yele buraa wa n tari kpe’eŋo la ti a tum la sɛla n ka nari. Herod yuun yeti eŋa nyaa doli la Yudadoma malema ge a yuun di la a suɔ pɔɣa Herodias sore sɛka n ka nari poan. Bala la, Yon yuun dekɛ la sukpe’ene yele en yeti a tue mɛ. Bala yuun basɛ ti Herod nyɔkɛ Yon paɣɛ mɛ. Herodias me sunsɔa n yuun ba’ɛ nyie ti a bɔta ti ba ku Yon.
Yon n yuun boi sarega la, a yuun eeri la giilekpeŋere. A yuun tum la a podɔleba la bayi ti ba ta soke Yezu yeti: “Ho dela se’em te Yenɛ loe la bii ba gura se’em me sa’am?” Yezu yuun yele ba ti ba ta tɔɣɛ pupeelum yele bo Yon yeti, “fɔɔhe [nyɛti], . . . te wahe me wona, te sɛba n ki le vo’e ba kum la poan.” La boi bim ti Yon yuun dela nɔdɛ’ɛsa wuu Eliya la ge a yuun ka tum yelekiresi. Se’em ma’a ti Yon yuun wum Yezu n tuni yelekiresi se’em la, la yuun kpemese la a giila. Yon yuun baŋɛ ti a nyaŋɛ soŋɛ nɛreba la mɛ ti ba dɔla Yezu.
Ge la yuun ka yue ti Herodias baŋɛ eŋa n wan ta’an eŋɛ se’em ku Yon. A bipugela n yuun wa ti Herod puurɛ pee gaŋɛ ti a yele en yeti eŋa n boti sɛla woo, a wan eŋɛ bo en. Herodias yuun yele a bipugela la ti, a yele Herod yeti eŋa boti la Yon Ko’om Musegadaana la zuo. Herod yuun ka boti a ku Yon ge dabeem n yuun tari en ti a gu ti ba da ku en. Ge Yon yuun kɔ’ɔn tara la sukpe’ene ta paɛ a kum.
Yezu yuun tɔɣɛ Yon yele yeti: “N yete ya mɛ te nɛra se’em ka boe te ba dɔgɛ en teŋa wa zuo te a gana Yon.” Nɛresaala ka boi n tabelɛ nyɛ yɔ’ɔ wa ti ba tɔɣɛ a yele ti “nɛra n mɔɔle . . . pɔgɔtia la poan” ge maasum sore bo Mɛzaaya la. Hali Moses bii Eliya yuun ka nyɛ yɔ’ɔ wa. To san ti’isa taɣesa Yon n yuun tari sukpe’ene se’em la, la wan soŋɛ tɔ ti to me tara sukpe’ene.
Kaalɛ Baabule zɛ’ɛsi wa:
Sɔsɛ ya sokere wa:
Yon Ko’om Musegadaana la yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Yon Ko’om Musegadaana la bem n yuun de Yezu? (w10-E 9/1 15 ¶4-6)
2. Diimi yɛla gɔngulesa ayima yu’urɛ n de Flavius Josephus yuun gulesɛ la bem ti la pa’alɛ ti Yon Ko’om Musegadaana la yuun sirum boi mɛ? (mrt-E zaseŋɔ 14) Bisɛ foote A
Foote A: Herod Antipas n maalɛ coin wa 30 Y.B. poan. Ban gulesɛ sɛla eŋɛ ku zuo la yeti: “Herod N De Tinbisera”
3. Sodeni poan ti Yon yuun tara pansɛka, la ‘vo’osum sɛka n boi Eliya poan’ la? (Lu. 1:17; it-E “Spirit” ¶60) Bisɛ foote B
Foote B
4. Bem n pa’alɛ ti Yon yuun ka keŋɛ saazuo? (Mt. 11:11; ijwbq-E zaseŋɔ 178 ¶4)
Ti’isɛ Hon Wan Dekɛ Tum Tuuma Se’em
Yon yuun soŋɛ mɛ ti Baabule pu’ulumbiŋ’a tum tuuma ge me maalɛ sore bo Mɛzaaya la. Hali la bala za’a, a yuun kelum siregera la amea. (Yon 1:26, 27) To wan ta’an zamesɛ la bem a zɛ’an?
Yon yuun basɛ ti a vom ana la naana ti a ta’an tum Naayinɛ puti’irɛ n boti sɛla. (Mt. 3:4) Zina beere wa me, to wan eŋɛ la wani basɛ ti to vom ana naana? Bisɛ foote D
Foote D
Ho wan eŋɛ la wani ta’an tɔɣesa Yon Ko’om Musegadaana la sukpe’ene la?
Ti’isɛ Taɣesɛ Yehowa Yele
Yon Ko’om Musegadaana la yele wa pa’alɛ mam ti Yehowa ani la wani?
Yon Ko’om Musegadaana la yele wa makɛ la Yehowa puti’irɛ la wani?
Yehowa san ta isige Yon Ko’om Musegadaana la kum poan, mam wan soke en la bem?
Zamesɛ Yɛla Pa’asɛ
Zamesɛ baŋɛ Yon n yuun eŋɛ se’em ta’an ŋmibera ge di’isa suure.
“John the Baptist—A Lesson in Maintaining Joy” (w19.08-E 29-31)
Yon yele la wan ta’an soŋɛ to la wani nɛreba san yaɛ tɔ, nɔŋɔ san kɛ̃ tɔ, la se’em ma’a ti to ka nyɛ sɛla ti to suure bɔta Yehowa pu’usegɔ poan?