42 MARY
A Yuun Kɔ’ɔn Dekɛ La Amea Eŋɛ Yehowa Nu’usin
DAARƐ deyima ti saana yuun keŋɛ Yuda tiŋa pugela ayima zɛ’an. Pugela wa yu’urɛ dela Mary. A me yuun kɛ̃’ɛri la Nazaret n boi Galilee tiŋa. Saana la yuun daɣɛ nɛresaala ge a dela maleka! Maleka wa yu’urɛ dela Gabriel. A yuun keŋɛ Mary zɛ’an ti a ta yele en ti Naayinɛ bo en la ninmu’urɛ tuunɛ.
Maleka la yuun yele en yeti, “sunma’ahom bɔna la hɔ. Te Na’ayenɛ boe la ho mɛ.” Mary n wum bala la, “la daan en mɛ.” A yuun ti’isɛ ti eŋa ka nari maleka la n pɛ̃ɣɛ en se’em la. Gabriel yuun basɛ ti a tara suure lua ti “Na’ayenɛ tare popeelom la” en mɛ. Gabriel yuun nyaa basɛ ti Mary baŋɛ ti Yehowa bo en la tuunɛ n boi de to’ore. A yuun yeti: “Ho wan nyɔkɛ poorɛ dɔgɛ bodibila. Ho han dɔgɛ en, a wan de’a la nɛrekantɛ ge te ba [yi’ira en Gaŋɛ Za’adaana] la Dayɔa. To Daana Na’ayenɛ n yeti a bahɛ en te [a] de’a naba wo a sɔyaaba David [n] yuun de se’em la.”
Mary yuun maaseni ti a ele mɛ ge a ka tabelɛ gã’arɛ la buraa kurum. Bala zuo la, a yuun dekɛ la sukpe’ene soke maleka la yeti: “Dena wa yeti la eŋɛ la wane ta’an eŋɛ?” Gabriel yuun yele en yeti Yehowa zilam vo’osum la n wan basɛ ti a nyɔkɛ puurɛ. Bala wan basɛ ti a dɔɣɛ bia n ani kasi. Ba wan yi’ira bia wa la “Na’ayenɛ Dayɔa.” Maleka la yuun le yele en la sɛla ti Yehowa eŋɛ bo a suɔ Elizabet. Yele wa yuun basɛ ti Mary sakɛ maleka la n yele sɛla la mɛ. Bala la, Mary yuun sirege la amea ge yeti: “Mam dela to Daana Na’ayenɛ yameŋa. Bala ma sakɛ ya te sɛla woo te ho yele ma la wan de’a bala.” Mary yuun mi ti Yehowa dela a Daana. Bala zuo la, a yuun bɔkɛ ti la nari ti a nana en. A mi ti a san kɛlesa Yehowa, a wan bɔna la en ge gu’ura en. Wana n yuun bo en sukpe’ene ti a ta’an tum ninmu’urɛ tuunɛ wa.
Maleka la n yuun basɛ bim la, Mary me yuun keŋɛ ti a ta bisɛ la Elizabet. Pɔɣesi siyi wa yuun kpemese la taaba giila ge maasum bamea gura tunse’ere n gã ba nɛŋan la. Mary yuun tɔɣɛ pa’alɛ Elizabet eŋa puurɛ n pee se’em la Yehowa n iti yelese’a bɔ’ɔra a yamesi la. Sɔsega wa ma’a poan, Mary tɔɣɛ la yɛla to’ore to’ore n boi Hebru Gulesegɔ la poan ti la gaŋɛ sugumnɔɔrɛ 20. Sɛla n sɔi ti Mary yuun nyaŋɛ eŋɛ bala dela, a yuun zameseri Naayinɛ yelesum la mɛ soŋa soŋa. Mary yuun mi Yehowa soŋa mɛ ge me kɔ’ɔn sakɛ ti Yehowa pu’ulumbiŋ’a la wan tum. Mary yuun naɛ la Elizabet kɛ̃ paɛ wuu ŋmaresi sitã ge lebe kule. Mary yuun nari ti a tara sukpe’ene ta’an yele Yosef ti eŋa tari la puurɛ, la sɛla n sɔi ti la eŋɛ bala. Yosef yuun ka sakɛ Mary n yele sɛla la ge Yehowa yuun basɛ ti maleka n soŋɛ Yosef ti a baŋɛ ti Mary n yele sɛla la dela yelemɛŋɛrɛ.
Yosef n yuun di Mary ba’asɛ la, ba yuun nyaa maasum gura la se’em ma’a ti Mary wan ta dɔɣɛ. Se’em ma’a ti a yuun pɔ̃ra dɔɣum la, Kaesar yuun bo la nɔɔrɛ ti nɛra woo lebe a tiŋa ti ba ta kaalɛ en. Bala la, Yosef la Mary yuun nari ti ba lebe Betlehem, tinsɛka ti ba dɔɣɛ Yosef la. La yuun kpe’em mɛ bo Mary ti a zi’ire boŋa zuo keŋɛ sarɔɔ woko n paɛ wuu miila 93. Ge Mary yuun keŋɛ mɛ. Mary yuun ta dɔɣɛ la dusi zɔŋɔ poan ge dekɛ bia la gã’arɛ dusi la n diti zɛ’an la. A yuun tari la sukpe’ene ge dekɛ amea delum Yehowa. Mary yuun kɔ’ɔn lu la a suure ti a dekɛ eŋa n tari sɛla bisɛ bia wa n boi a to’ore la.
Maleka n yuun yele Mary ti Yehowa bo en la tuunɛ n boi de to’ore ti asaala ka tabelɛ tum dɛ
Kɔ’ɔn pɔsɛ sankaŋa yɛ’ɛsa la, Mary yuun nari ti a tara sukpe’ene. La yuun nari ti a tara sukpe’ene ta’an naɛ la Yosef tari bia la zɔ keŋɛ Egypt. Se’ere n sɔi la Naba Herod yuun boti la a ku bia la. Mary la Yosef yuun dela nasedoma ge bisera kɔma n paɛ bayopɔi bii gaŋɛ bala. Bala la, la yuun nari ti Mary tara sukpe’ene. Daanse’ere Yosef yuun ki mɛ ge ti Yezu yuun nyaa ta dɛna Mɛzaaya la. Bala la, la yuun nari ti Mary tara sukpe’ene sankaŋa. La yuun le nara ti Mary tara sukpe’ene se’em ma’a ti Yezu yuun pɔsɛ a na’am mɔɔlegɔ tuuma la. Se’ere n sɔi la Yezu kan le bɔna yire soŋera en. Sɛla n gani za’a la, Mary yuun nari ti a tara sukpe’ene ta’an ŋmibe se’em ma’a ti ba yuun parum yɛla bo Yezu ge tari en ta ku la. Ba’asegɔ la, la yuun nari ti a tara sukpe’ene ta’an pa’asɛ Yezu podɔleba la poan, se’ere n sɔi la Yudadoma la yuun yaɛ ba mɛ.
Yelemɛŋɛrɛ, Mary yuun sirum tari la ninmu’urɛ tuunɛ! A yuun eŋɛ la wani nyɛ sukpe’ene ta’an tum dɛ? Baabule la pa’alɛ ti Mary yuun san ni zamesɛ sɛla n wan basɛ ti a sakerɛ kpe’em, a ni dekɛ de eŋɛ la a suuren. Bala zuo la, a yuun tari la tuulum yɛla zo’e zo’e ti a wan ta’an ti’isa taɣesa. A yuun nyɛ yɛla wa la Naayinɛ Yelesum la poan, malesi zɛ’an, Yehowa yamesi zɛ’an, la Yezu zɛ’an. Mary n yuun ti’iseri taɣesa yele ana wa la, yuun soŋɛ en mɛ ti a tara sukpe’ene ta’an ŋmibera, la ka pakɛ la yelese’a woo n yuun paɛ en la.
Kaalɛ Baabule zɛ’ɛsi wa:
Sɔsɛ ya sokere wa:
Mary yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Bem n pa’alɛ ti Luke 2:1-3 n tɔɣɛ nɛresɛba yele la yuun sirum boi mɛ? (g-E 4/11 11 ¶4-5) Bisɛ foote A
British Library, London, UK, from the British Library archive/Bridgeman Images
Foote A: Yuun 104 Y.B. poan ti Arom gɔmena sɛka n yuun biseri Egypt la yuun bo nɔɔrɛ ti nɛra woo kule a tiŋa ti ba ta kaalɛ en
2. Beni n sɔi ti la yuun wan kpe’em bo Mary ti a ze’ele Nazaret keŋɛ Betlehem? (ia-E 153-155 ¶4-7)
3. Yezu n yuun de bia la, nɔdɛ’ɛsa ayima yuun yele Mary yeti: ‘Ba wan dekɛ su’a n wɔɣɛ lu ho tuɛ.’ Yele wa yuun tum tuuma la wani? (Lu. 2:35 NWT; w08-E 3/15 30 ¶8)
4. Beni n sɔi ti to wan ta’an yeti Mary nyaa boi la saazuo? (w18.07-E 10 ¶14) Bisɛ foote B
Foote B: Mary la a dayɔɔsi la yuun boi la Yerusalem, lan yuun ta gee fii la Pentekost 33 Y.B. paɛ la
Ti’isɛ Hon Wan Dekɛ Tum Tuuma Se’em
Se’em ma’a ti Mary yuun ɛɛra giilekpeŋere la, a yuun keŋɛ la Elizabet zɛ’an. (Lu. 1:39, 40) Yeledaaŋɔ san paɛ tɔ bii ba san bo to tuunɛ n kpe’em, beni n sɔi ti la ana soŋa ti to sɔsɛ bo mabia n bi vo’osum poan? Bisɛ foote D
Foote D
La boi bim ti Yosef yuun maaseni ti a di Mary mɛ ge Yehowa yuun tum la a maleka ti a keŋɛ Mary zɛ’an yia. Wana pa’alɛ ti Yehowa geele pɔɣesi n tari sakerɛ la wani?
Ho wan eŋɛ la wani ta’an tɔɣesa Mary sukpe’ene la?
Ti’isɛ Taɣesɛ Yehowa Yele
Mary yele wa pa’alɛ mam ti Yehowa ani la wani?
Mary yele wa makɛ la Yehowa puti’irɛ la wani?
Daanse’ere Mary boi la saazuo dita na’am la Krista. La san dɛna bala, beni n sɔi ti hon puurɛ pee la bala?
Zamesɛ Yɛla Pa’asɛ
Ti’isɛ bisɛ Mary n yuun tum tunkpe’eŋo se’em bisɛ a kɔma la.
Hon ti’isɛ ti la yuun ani Mary la wani se’em ma’a ti Gabriel yuun yele en yeti Yehowa bo en la tuunɛ n boi de to’ore la?