33 YEHOIADA
A Yuun Te’ele La Mina Ti Yehowa Loe Ti A Dɛna Naba La
YEHOIADA yuun dela buranya’aŋa ge ti a nini yuun kelum mu’ɛ la Yehowa tuuma. A yuun kɔ’ɔn bɔta la a ita sɛla n ani soŋa. Yehoiada n yuun de malema nɛŋadaana Yerusalem pu’usegɔ yire la poan. Bala la, la yuun dela a zugbere tuunɛ ti a soŋɛ nɛreba la ti ba pu’usa Yehowa tontɔɔ sore poan. Ge la yuun daɣɛ naana bɔ’ɔra en, se’ere n sɔi la nɛreba la zo’e zo’e yuun kaaberi la baɣa ge tuna be’em.
Pɔka ayima n de putɔya ti a yu’urɛ dɛna Ataliah n yuun ta’asɛ ti nɛreba la zo’e zo’e tuna be’em. A dɔɣereba yuun dela Israel naba, Ahab, la pɔɣenaba Yezebel. Ba yuun kɔ’ɔn tuna la be’em ti Yehowa yeti a wan sa’am ba yizuo la za’a. La boi bim ti Ataliah yuun ele la Yuda naba ge a yuun yaɛ Yehowa pu’usegɔ mɛ. A sira n yuun ta ki la, a dayua n yuun soe dɛna naba ge Yehowa yuun basɛ ti ba ku en mɛ ti Ataliah fã na’am la. Yehowa yuun ka boti bala, se’ere n sɔi la a yuun ni loe la buraasi n ze’ele David yizuo la poan ti ba bisera a nɛreba. Ataliah yuun ku la sɛba woo n wan ta’an ta di na’am la, la wan eŋɛ se’em ti eŋa soe bisera. A yuun bo la nɔɔrɛ ti ba ku a yaasi la za’a, se’ere n sɔi la ba poan ayima n wan ta dɛna Israel naba.
Malema nɛŋadaana, la a pɔɣa n dekɛ ba vom eŋɛ dɛŋa poan nyaŋɛ faaɛ bia ti pɔɣenaba puurɛ n nyɔ̃ bɔta ti a ku en
Yehoiada yuun di la pɔka n tari sukpe’ene ti a yu’urɛ dɛna Yehoseba, bii Yehosabeat. Pɔka wa sɔ yuun tabelɛ dɛna la Yuda naba. Yehoiada la Yehoseba yuun ka basɛ ti Ataliah ku David yizuo budibito la za’a. Ba yuun mi ti Yehowa pu’ulum biŋe ti David yaaŋa n wan ta dɛna naba wuusa! (2 Sa. 7:12, 13) David yaasi wa poan ayima yuun dela bia n ka paɛ yuunɛ. Yehoseba yuun kɔ’ɛ a puti’irɛ ti a wan te’ele bia wa. A yuun tari la sukpe’ene ge dekɛ bia wa yese nayire la poan ti nɛnɛra ka nyɛ en. A yuun dekɛ bia wa, la se’em n biseri en la ta bo la a sira. Yehoiada yuun loe la bɔ’ɔ pu’usegɔ yire la poan dekɛ bia wa suɣɛ bim.
Bia wa yu’urɛ dela Yehoas. Yehoiada yuun suɣɛ en la yuuma ayoobe Naayinɛ yire la poan ti dɛŋa ka paɛ en. La yuun ta’an kpe’em bo Yehoiada, se’ere n sɔi la Ataliah san baŋɛ ti eŋa, la a pɔɣa n suɣɛ bia la, a wan ku ba za’a. Yehoiada n yuun suɣɛ bia la yuuma ayoobe la, a yuun nyaa kɔ’ɛ la a puti’irɛ ti la pa’alɛ ti a tari sukpe’ene. A yuun yele la soogɛpa banuu n tari yelemɛŋɛrɛ bɔ’ɔra Yehowa ti bia n boi David yizuo la poan n nari ti a dɛna naba! A yuun yele ba yeti, ba basɛ ti soogɛpa 500 gu’ura pu’usegɔ yire la, la ka kinkɛlesi. Soogɛpa wa yuun kaɛ bia la mɛ ge zãla ba zaberɛ lɔɣɔrɔ, la ba tɛ’ɛlesi ge ti Yehoiada nyaa bobe Yehoas ti a dɛna naba. Nɛreba la puurɛ yuun pee mɛ ti ba paara nu’usi. Ataliah n wum nɛreba la n vooli la, a zɔ keŋɛ la pu’usegɔ yire la poan.
Ataliah n yuun zɔ paɛ pu’usegɔ yire zinzaka la poan la, a yuun bɔkɛ sɛla n iti ge nyaa tiregɛ ti a gu ba ti ba da bobe Yehoas na’am. A yuun kaasɛ yeti: “Bɛnregɔ! Bɛnregɔ!” Ge a tamɛ ti eŋa fã na’am la mɛ. A yuun san ti’isa ti nɛreba wan pa a poore, a yuun pã’aseri la amea. Yehoiada yuun tari la sukpe’ene. A yuun bo soogɛpa nɛŋadoma la nɔɔrɛ ti ba nyɔkɛ pɔka wa puurɛ n nyɔ̃ wa yese pu’usegɔ yire la poan. Ba yuun tari en yese mɛ ta ku en. Yehowa yuun tɔɣɛ biŋe ti, “Ahab yire la zan’an wan mɛlom.” (2 Na. 9:8) La yuun ta’an dɛna ti Ataliah ma’a n yuun gee Ahab, la Yezebel yizuo la poan ti ba yuun ku en.
Ban yuun ku Ataliah la, pooren, Yehoiada yuun le tum la ninmu’urɛ tuunɛ. A yuun soŋɛ nɛreba la, la naba la ti ba biŋe nɔɔrɛ ti ba wan tara yelemɛŋɛrɛ bɔ’ɔra Yehowa Naayinɛ. A me yuun basɛ ti ba sa’am Baal pu’usegɔ yire ge ku Baal malemadoma la. Pooren, Yehoiada yuun tiregɛ mɛ kumesɛ Yehoas ti a ta dɛna nasonkɔ. Yehoiada n yuun kelum vɔna la, Yehoas yuun tari la yelemɛŋɛrɛ bɔ’ɔra Naayinɛ. Ba’asegɔ la, Yehoiada yuun ki mɛ, se’em ma’a ti a dɛna yuun 130. Ba yuun laɛ en pa’asɛ la nadoma sɛba n yuun biseri Yerusalem la poan. Bala yuun dela na’asegɔ, se’ere n sɔi la ba yuun ni ka laɛ malemadoma pa’asɛ nadoma poan.
Susa’aŋɔ yele la dela, Yehoiada n yuun ta ki la, Yehoas yuun ka le tara yelemɛŋɛrɛ bɔ’ɔra Naayinɛ. Yehoas yuun basɛ ti Yuda nabiisi sɛba n kaaberi baɣa la pã’asɛ en mɛ. Bala la, a yuun basɛ ti nɛreba la me kaabera la baɣa. Yehowa nɔdɛ’ɛseba yuun ka’am en mɛ ge a yuun ka kelese. Nɔdɛ’ɛseba la ayima yuun dela Yehoiada dayua Zekaria. Zekaria yuun soke nɛreba la yeti: “Bene te ya ganlona Na’ayenɛ nɔya la?” Bala ti Yehoas eŋɛ sunsɔa ge yeti ba ku Zekaria! Ge la bala za’a la, Zekaria yuun kelum tara la sukpe’ene ta paɛ a kum wuu a sɔ la. Yuuma zo’e zo’e pooren, Yezu Krista yuun tɔɣɛ Zekaria yele yeti a dela tontɔɔdaana. Yezu, la a Sɔ kan makɛ tamɛ nɛresɛba n tari yelemɛŋɛrɛ, la sukpe’ene.
Kaalɛ Baabule zɛ’ɛsi wa:
Sɔsɛ ya sokere wa:
Yehoiada yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Bani ti gɔnmi’ileba pa’alɛ ti ba dela ‘Karia gu’ureba’ n yuun soŋɛ Yehoiada ti a yese Ataliah na’am kuka la zuo la? (2 Na. 11:4, 19; it-E “Carian Bodyguard”)
2. “Nɔze’elego gɔŋɔ” la yuun ta’an ze’ele bo la bem ge beni n sɔi ti Yehoiada yuun dekɛ ku paɣelɛ Yehoas zuo? (2 Na. 11:12; w91-E 2/1 31 ¶5-6) Bisɛ foote A
Foote A
3. Beni n sɔi ti Yehoas yuun bo nɔɔrɛ ti ba maalɛ Yehowa yire la? (2 Yel. 24:4-7, 11-14; it-E “Jehoash” No. 1 ¶5)
4. Zekaria yuun dela Yehoiada dayua. Bala la, beni n sɔi ti Yezu yuun yeti a dela ‘Barakiah dayua’? (zaseŋɔ yele n boi Mt. 23:35, “son of Barachiah,” nwtsty-E)
Ti’isɛ Hon Wan Dekɛ Tum Tuuma Se’em
Yehoiada yuun ta’an dɛna yuun kɔbega se’em ma’a ti a suɣɛ Yehoas la. A yele la wan ta’an kpemese Yehowa yamesi n de bunkureba giila la wani? (Ym. 92:12, 14) Bisɛ foote B
Foote B
Yehoas n yuun nani Yehoiada la, yɛla yuun keni soŋa mɛ. Bunbilipaalesi wan ta’an zamesɛ la bem yele wa poan?
Ho wan eŋɛ la wani ta’an tɔɣesa Yehoiada sukpe’ene la?
Ti’isɛ Taɣesɛ Yehowa Yele
Yehoiada yele wa pa’alɛ mam ti Yehowa ani la wani?
Yehoiada yele wa makɛ la Yehowa puti’irɛ la wani?
Yehowa san ta isige Yehoiada kum poan, mam wan soke en la bem?
Zamesɛ Yɛla Pa’asɛ
Kɔma wan ta’an zamesɛ la bem Yehoas yele la poan la ban wan nyɔɣera nɛresɛba zɔtɔ?
“Jehoash Left Jehovah Because of Bad Association” (w09-E 4/1 24-25)
To wan ta’an zamesɛ la bem Yehoiada yele la poan la ton wan bɔ’ɔra bo’olum soŋera yelemɛŋɛrɛ pu’usegɔ se’em?