30 ZAREFAT TIŊA POKƆƆRƐ LA
A Yuun Tari La Sukpe’ene Biɣi Biɣi Saŋa Poan
PƆKA wa yuun ta’an ti’isa ti nɛreba ka tɛ̃ri a yele. Nɛreba yuun nyɛti daaŋɔ seto n paari pɔka wa yoi? Nɛreba yuun fabeli a yele yoi? A yuun dela pokɔɔrɛ ge me tara bia. Naayinɛ yuun bo Israeldoma la lɔɔ ti la ta’an soŋɛ pokɔpa la kiibesi ti ba nyɛta sɛla n pakɛ ba. Ge pokɔɔrɛ wa yuun daɣɛ Israel nɛra. A yuun kɛ̃’ɛri la Zarefat n boi Sidon tiŋa. Sidon Naba Etbaal yuun kaaberi la baɣerɛ ti ba yi’ira dɛ Astoret. Daanse’ere, naba wa n yuun de baɣerɛ wa malemadaana. Nɛresɛba n yuun pu’useri Astoret wa yuun tuni la tunfɛ̃’ɛsa. Putotuuma n yuun zo’e tiŋa la poan ge ti nɛreba me ziɣera ti ba nyɛ sɛla basɛ ba nɔɔren warɛ saŋa la poan. Bala la, ani n wan zɔ pokɔɔrɛ wa n de nasa wa nimbũ’ɔ?
Pokɔɔrɛ wa yuun ni kɔ’ɔn tiregera mɛ ti a bisɛ eŋa n wan eŋɛ se’em ti eŋa la a bia la nyɛ sɛla di. Ge yɛla yuun gaam la be’ero ge ti la yuun ana wuu la kan yue, ba wan ki.
Ge Yehowa yuun nɔŋɛ pokɔɔrɛ wa mɛ paa ge me nyɛ ti a boi la a to’ore. La boi bim ti eŋa n yuun boi tinsɛka poan la, nɛreba yuun kaaberi la baɣa ge a yuun tari la sakerɛ Yehowa poan. Daanse’ere, a yuun zamesɛ Yehowa yele mɛ ge ti a puurɛ me yuun pee la Yehowa n eŋɛ sɛla bo a nɛreba la. A me yuun tari sakerɛ ti Yehowa n de yelemɛŋɛrɛ Naayinɛ la. Pooren, la wɔnti la yuun gee la fii ti la paɛ yuun 1,000 ti Yezu Krista yuun tɔɣɛ pɔka wa yele ge yeti Yehowa yuun soŋɛ en mɛ. Yehowa yuun soŋɛ en la wani?
Yehowa yuun tum la a nɔdɛ’ɛsa Eliya ti a keŋɛ Zarefat tiŋa ge yele en yeti pokɔɔrɛ wan ta bɔ’ɔra en dia bilam warɛ saŋa la poan. Se’em ma’a ti Eliya yuun paɛ Zarefat la, a yuun nyɛ la pɔka n pi’iseri dɔɔrɔ ti a tuurɛ bugum. A yuun tɔɣɛ la mama bo en ge belum en yeti: “Ho kan tare ko’om fiin na bo mam te n nyu?” Pɔka wa yuun ka mi Eliya ge a yuun keŋɛ mɛ ti a ta eŋɛ ko’om bo en. Daanse’ere Eliya n yuun yɛ lɔɣeseto la bii eŋa n yuun tɔɣeri gilema sore poan se’em la n yuun basɛ ti pɔka wa baŋɛ ti a dela Yehowa yameŋa. Eliya yuun ta’an ti’isa nyaa: ‘Pɔɣekana ti Yehowa tum mam ti n keŋɛ a zɛ’an la?’ Daanse’ere bala n sɔi ti Eliya yuun le yele pɔka la ti a eŋɛ boroboro na bo en la.
Bilam ti pɔka la nyaa tɔɣɛ a bɔŋa la n ani se’em bo Eliya. A yuun pɔsɛ yeti, “Mam pɔ la [Yehowa] ho Yenɛ.” Bala pa’alɛ ti a yuun tari sakerɛ ti Yehowa ma’a n de yelemɛŋɛrɛ Naayinɛ. Eŋa n de “Yenɛ [vɔa] la.” (Yer. 10:10) Ti pokɔɔrɛ la yele Eliya yeti eŋa ka tari boroboro ge eŋa tari la zom fii n boi kumpĩ’o poan, la kaam fii n boi dugela poan. Pokɔɔrɛ wa yuun yeti a tuurɛ la bugum duɣɛ ba dia za’a za’a ti eŋa la a bia la di. A yuun nyaa yele Eliya yeti “mam la n bibodibila [wa wan] di ge ki.”
Pokɔɔrɛ la, la a bia la yuun yeti ba vibe mɛ ge ti Yehowa nɔdɛ’ɛsa yuun yeti a dekɛ ba dia za’a za’a bo en
Daanse’ere, la yuun eŋɛ en la pakerɛ la Eliya n yuun yele en yeti, “Da bahɛ te ho yam [yɔɔra].” Pɔka wa yuun ta’an ti’isa ti, beni n sɔi ti Eliya yeti ba da basɛ ti ba yɛm yɔɔra ge mina ti la kan yue ba wan vibe ki? La bala za’a, a yuun eŋɛ Eliya n yele en sɛla la mɛ. Eliya yuun nyaa yele pokɔɔrɛ la Yehowa n wan eŋɛ sɛla bo en. A san maalɛ boroboro fii bo Eliya yia, Yehowa wan kã bo en. Yehowa wan basɛ ti zom bɔna a kumpĩ’o la poan ti kaam me bɔna a dugela la poan ti ba nyɛta dia dita ta paɛ se’em ma’a ti saa wan le pɔsɛ niira!
Pokɔɔrɛ wa wan tara sakerɛ bɔ’ɔra Yehowa ge sirum eŋɛ sɛla ti Eliya yele en la? A wan dekɛ a dia la za’a za’a bo Yehowa nɔdɛ’ɛsa wa? Daanse’ere a yuun mi ti Yehowa tum yelekiresi zo’e zo’e bo a nɛreba mɛ. Bala la, la kan kpe’em bo Yehowa ti a basɛ ti eŋa la a bia wa nyɛta dia dita. Ge a wan nyɛ sukpe’ene ta’an tum sɛla ti Eliya yele en la? Baabule la yeti: “Pɔka la keŋɛ ta eŋɛ Eliya n yele en se’em la.”
Yehowa yuun kã bo pokɔɔrɛ wa n tari sakerɛ la mɛ. Yehowa yuun doose la yelekirega sore poan basɛ ti zom, la kaam kɔ’ɔn bɔna, la wan eŋɛ se’em ti bamam la Eliya ta’an nyɛta dia dita ta paɛ se’em ma’a ti saa wan ni. Yehowa yuun le tum la yelekirega n gani za’a bo pokɔɔrɛ la. Bã’a n yuun ŋmɛ pokɔɔrɛ la bia ti a kɔ’ɔn ki. Ge Yehowa n yuun basɛ ti Eliya isige bia la kum poan! Kum isigere dena n de yia bɔna Baabule la poan. Yehowa n yuun tum tunkirega bo pɔka wa la, yuun basɛ ti a sakerɛ kpe’em mɛ. A makesonɛ la kpemese la nɛreba zo’e zo’e giila ti ba me tara sakerɛ.
Kaalɛ Baabule zɛ’ɛsi wa:
Sɔsɛ ya sokere wa:
Zarefat tiŋa pokɔɔrɛ la yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Sidondoma la yuun pu’useri la bem ge ba me yuun ni ita la bem ba pu’usegɔ la poan? Ba pu’usegɔ la yuun basɛ ti Israeldoma la ita la bem? (it-E “Sidon” ¶6) Bisɛ foote A
Penta Springs Limited/Alamy Stock Photo
Foote A: Astoret baɣerɛ n wana, ba yuun ta’an yaɣebɛ ka yuun 1500 G.Y.B. bɔba
2. Etbaal bem n yuun de Israel Naba Ahab? (it-E “Ethbaal”)
3. Zarefat pokɔɔrɛ la n yuun kɛ̃’ɛri tinsɛka poan la, nɛreba zo’e zo’e yuun pu’useri la Astoret (Astarte) yinɛ la. Pu’usegɔ wa malema ase’a dela bem, ti la kelum bɔna zina beere wa? (g93-E 11/22 13 ¶1-4)
4. Se’em ma’a ti pokɔɔrɛ la bia la yuun ki la, bem n yuun ta’an basɛ ti a soke Eliya yeti: “Hom wa’ana te ho tɛɛn mam mɛ n be’em n de se’em ge ko mam bia wa?” (1 Na. 17:18; w14-E 2/15 15 ¶4-5) Bisɛ foote B
Foote B
Ti’isɛ Hon Wan Dekɛ Tum Tuuma Se’em
La boi bim ti pokɔɔrɛ wa yuun boi la tinsɛka poan ti nɛreba kaabera baɣa ge Yehowa yuun tɛ̃ri a yele mɛ. Bala pa’alɛ ti Yehowa ani la wani ge bala me wan basɛ ti to gɛɛla nɛresɛba n boi to gingilega la poan la wani? (Tm. 10:35)
Kristakɔma sɛba n naseri wan ta’an zamesɛ la bem Zarefat tiŋa pokɔɔrɛ la n yuun tari sakerɛ la zɛ’an? Bisɛ foote D
Foote D
Ho wan eŋɛ la wani ta’an tɔɣesa Zarefat tiŋa pokɔɔrɛ la sukpe’ene la?
Ti’isɛ Taɣesɛ Yehowa Yele
Zarefat tiŋa pokɔɔrɛ la yele wa pa’alɛ mam ti Yehowa ani la wani?
Zarefat tiŋa pokɔɔrɛ la yele wa makɛ la Yehowa puti’irɛ la wani?
Yehowa san ta isige Zarefat tiŋa pokɔɔrɛ la kum poan, mam wan soke en la bem?
Zamesɛ Yɛla Pa’asɛ
Tomam me wan eŋɛ la wani ta’an basɛ ti tomam la Yehowa bɔŋa kpe’em gana ligeri la nutatum, wuu Zarefat pokɔɔrɛ la n yuun eŋɛ se’em la?
“Gaining God’s Approval Leads to Everlasting Life” (w11-E 2/15 13-17)
To san tara sakerɛ bɔ’ɔra Yehowa, bem n wan basɛ ti to tara suure lua ti a nyɛti sɛla woo ti to ita mɛ?