26 NATAN
A Yuun Ka’am La Naba
SE’EM ma’a ti Natan yuun yɛ’ɛsa Naba David zɛ’an nayire la poan la, a yuun ta’an ti’isa yeti, ‘Beni n sɔi ti nɛresonkɔ wa tum gaasa tuuma wana?’ Yuuma fii n tole, Yehowa yuun tum la Natan ti a ta yele David ti a wan nyɛ yɔ’ɔ n kãregɛ beere sa’am. Yɔ’ɔ la dela, Mɛzaaya la wan ze’ele la David yizuo tuusum la poan na! (2 Sa. 7:4, 12, 13) Ge nananawa, David tum la tunfɛ̃’ɛsa, ti Yehowa yuun bɔta ti Natan ka’am en.
David yuun ti’isɛ ti nɛra ka nyɛ eŋa n eŋɛ sɛla la ge Yehowa yuun nyɛ mɛ. Yehowa yuun yele Natan, David n eŋɛ sɛla la mɛ. David yuun eŋɛ la bem? Daarɛ deyima zaanɔɔrɛ ti David ɛɛra a gɔsegɔ zuo ge nyɛ ti pɔka bɔna bim sɔɔra. A yuun nyɛ ti pɔka la ani la “soŋa,” ti a tum ti ba ta yi en. Pɔka wa yu’urɛ dela Batseba. David yuun mi ti a dela Uria n de Hiti nɛra la pɔɣa. Uria me yuun dela soogɛa n tari yelemɛŋɛrɛ bɔ’ɔra David. Ge la bala za’a, David yuun gã’arɛ la pɔka la mɛ, sa’am pɔɣedire la. Pooren, Batseba yuun yele David ti eŋa nyɔkɛ la puurɛ. David yuun tiregɛ mɛ ti a suɣɛ eŋa n eŋɛ sɛla la. A yuun yele Uria ti a ze’ele zaberɛ zɛ’an la kule yire na. David yuun ti’isɛ ti Uria wan ta naɛ la a pɔɣa la gã’arɛ. (Dekɛ makɛ 1 Samuel 21:5.) Ge Uria yuun dela soogɛa n tari yelemɛŋɛrɛ. A yuun yeti soogɛpa la n boi bim zabera bɔ’ɔra Yehowa la zuo, eŋa kan sakɛ kule yire ta di ge nyu ge naɛ la a pɔɣa gã’arɛ. David yuun nyaa yele la a soogɛpa kpɛ’ɛma la ti a basɛ ti Uria bɔna zaberɛ la zɛsɛka n kpe’em paa la, lan wan eŋɛ se’em ti ba ta’an ku en. A putɛbe’o wa yuun tum mɛ. Uria n yuun ki la, David yuun nyaa di la Batseba.
Baabule la yeti: “David n eŋɛ sɛla la ka pee Na’ayenɛ suunre.” Bala la, Yehowa yuun tum la a nɔdɛ’ɛsa Natan ti a keŋɛ ta yele David be’em sebo woo ti a tum la. Natan n yuun ye David zɛ’an la, dabeem yuun ta’an tara en la David n wan eŋɛ se’em. Natan yuun mi ti David n basɛ ti ba ku Uria. Bala la, a yuun ta’an ti’isa ti eŋa san ta yele David a be’em la ge ka’am en, David ta’an kan basɛ en. Natan yuun boti la a soŋɛ David ti a baŋɛ ti eŋa n eŋɛ sɛla la dela be’em paa. Nɔdɛ’ɛsa wa yuun zusɛ mɛ paa yele wa poan ge nyaa bisɛ makerɛ ti a wan dekɛ tɔɣɛ bo naba la.
Natan yuun yele David yeti, buraasi siyi n yuun boi tiŋa kayima poan. Ayima dela buntata ge tara piisi, la nii zo’e zo’e. Ayima la me dela nasa ge tara pesego ayina ma’a. A yuun nɔŋɛ a pesego wa mɛ, hali basɛ ti ka kɛ̃’ɛra a yire ti a kɔ’ɔn bisera ka soŋa soŋa. Daarɛ deyima ti saana wa’an buntata la yire, ti a bɔta ti a ku pesego bo saana la. Buntata wa yuun ka nyɔkɛ amea piisi la ayima. Ge a tuɣum “nyɔkɛ [la] naha la pehego la” ku, dekɛ duɣɛ dia bo a saana la. Natan n kɔ’ɔn tɔɣɛ ba’asɛ la, David sunsɔa n yuun nyie la buntata la! A yuun yeti: “Mam pɔ Na’ayenɛ wa n boe wa te boraa kana kɔ’ɔn dɛna la ka ki.” Sɛla n sɔi ti David sunsɔa yuun nyie la dela, buntata la ka zɔ nasa la “ninbɔn’ɔn.”
La yuun nari ti Natan ka’am naba ti a nɔŋɛ ge me soŋɛ en ti a baŋɛ a tuure
Natan yuun bo David la makerɛ n kɔ’ɔn makɛ. David mea n yuun tabelɛ dɛna dunkeena la zuo, a yuun yaɛ ŋmɛlema tuuma mɛ. Natan yuun dekɛ la sukpe’ene yele David yeti, “Hom n de boraa la.” La yuun eŋɛ David la liɣebi. Natan yuun yele David la yelese’a woo ti a eŋɛ la, sɛla n sɔi la Yehowa nyɛ sɛla woo mɛ. Natan yuun nyaa yele David la yelese’a woo ti Yehowa yeti la wan paɛ en la. A yuun yeti gbiregere, la yeledaaŋɔ wan bɔna a yire poan yuuma zo’e zo’e. David nyaa wan eŋɛ la bem?
Naba la yuun yeti: “Mam tom [la] be’em Na’ayenɛ . . . nɛŋan.” David suure yuun sa’am mɛ paa, ti a yuun eŋɛ teere. Natan puurɛ yuun pee mɛ ti a yele David ti Naayinɛ wan di sugeri bo en. A yuun yeti: “Na’ayenɛ . . . bahɛ ho be’em la, ho kan le ki.” Ge David yuun kelum namesɛ mɛ paa la eŋa n yuun tum be’em sebo la Batseba la. Bisɛka ti ba yuun dɔɣɛ la yuun ki mɛ. Ŋmɛlema tuuma, la gbiregere yuun kɔ’ɔn paara David, la a yidoma la bala yuuma zo’e zo’e.
La ka pakɛ la yeledaaŋɔ la za’a, David yuun kɔ’ɔn ana la tapilapi la Naayinɛ. A yuun gulesɛ la yuuma Baabule la poan pa’alɛ Yehowa n diti sugeri se’em bɔ’ɔra sɛba n basɛ ba be’em. (Yooma 32 la 51) Naba wa yuun nyaa tari la bɔnsoŋa la Yehowa. A yuun kɔ’ɔn tara Natan ka’aŋɔ la tuna tuuma mɛ a vom dabesa za’a. David yuun kɔ’ɔn tara la sakerɛ bɔ’ɔra Yehowa ta paɛ kum. (1 Na. 9:4) Natan puurɛ yuun pee mɛ la eŋa n yuun dekɛ sukpe’ene ka’am David la.
Kaalɛ Baabule zɛ’ɛsi wa:
Sɔsɛ ya sokere wa:
Natan yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Natan yuun gulesɛ Baabule gɔnɔ toseto mɛ ge to ka mi a yizuo yɛla bii eŋa mea vom poan yɛla. Bala ta’an pa’alɛ ti a dela nɛrekani taaba? (w12-E 2/15 25 ¶2-3)
2. Uria yuun dela Hiti buraa ge beni n sɔi ti a laɣum pa’asɛ David soogɛpa poan? (w24.04 31)
3. Natan yuun yele David ti yeledaaŋɔ, la gbiregere wan bɔna a yire poan. Yele wa yuun tum tuuma la wani? (it-E “David” ¶29)
4. Naba David n yuun ta kuregɛ la, Natan yuun dekɛ sukpe’ene tum tuuma la wani? (w12-E 2/15 25 ¶1) Bisɛ foote A
Foote A
Ti’isɛ Hon Wan Dekɛ Tum Tuuma Se’em
To zɔ san tum be’em, to wan eŋɛ la wani soŋɛ en ti la pa’alɛ ti to tɔɣeseri la Natan makesonɛ la?
Natan makesonɛ la wan soŋɛ to la wani ti to me ta’an tɔɣɛ ti la kɛ̃ nɛra suure? Bisɛ foote B
Foote B
Ho wan eŋɛ la wani ta’an tɔɣesa Natan sukpe’ene la?
Ti’isɛ Taɣesɛ Yehowa Yele
Natan yele wa pa’alɛ mam ti Yehowa ani la wani?
Natan yele wa makɛ la Yehowa puti’irɛ la wani?
Yehowa san ta isige Natan kum poan, mam wan soke en la bem?
Zamesɛ Yɛla Pa’asɛ
Sodeni poan ti David be’em la yuun daam amea, a zɔdoma, a yidoma, la Yehowa Naayinɛ?
Zamesɛ baŋɛ sɛla n sɔi ti Natan ka’aŋɔ la yuun di mi’a bala.
“Respond Humbly to Correction” (“Bible Study Activities” n boi jw.org)