25 DAVID
A Yuun Dekɛ La Sukpe’ene Eŋɛ Sɛla N Ani Soŋa
NABA Saul zuo ti David yuun zɔta nyaara! Pɔsega la, Saul yuun nɔŋɛ David mɛ ge me dekɛ amea delum en. Eŋa n yuun zãli Saul zaberɛ lɔɣɔrɔ ge ti pooren, a nyaa dɛna soogɛpa la nɛŋadoma ayima. Ge Saul yuun boti la a ku David. Naayinɛ yuun biŋe nɔɔrɛ ti a wan basɛ ti David dɛna Naba. Ge David yuun suɣeri la pɔɣentia la poan lan wan eŋɛ se’em ti a ta’an te’ele amea, la buraasi 600 la n doli en la.
Saul yuun nyaa dela naba n tari putoo. A nini n yuun tɛ̃ti la David, ti bala yuun basɛ ti a sunsɔa nyie la en. Sugumnɔɔrɛ zo’e zo’e ti a yuun tiregɛ ti a ku David. Saŋa kayima, David yuun nyɛ yɔ’ɔ mɛ ti a ku Saul ge a yuun ka ku en. Hali la bala za’a, Saul yuun kelum ɛɛra la David ti a ku en. David yuun suɣɛ lɛm la Zif tiŋa, ti tiŋa la nɛreba yuun yele Saul, David n suɣɛ zɛsɛka. Nɛreba wa yuun dɔ̃rɛ David bo Saul la sugumnɔɔrɛ buyi. Bala yuun basɛ ti Saul dekɛ la soogɛpa tabegɛ David.
David wan eŋɛ la wani? Yia, David yuun tum la a buraasi basɛba ti ba keŋɛ ta baŋɛ Saul n boi zɛsɛka pɔɣentia la poan. La boi bim ti Saul soogɛpa la yuun dela 3,000 ge David paleŋa yuun ka ɛ̃ɣeri. Sankaŋa bɔba ti David yuun gulesɛ yeti: “Behɛ, Yenɛ n de mam soŋora. Daana la n tare mam vom.” (Ym. 54:4) David yuun kɔ’ɛ la a puti’irɛ ti a keŋɛ Saul la a nɛreba la n tiisum zɛ’an la yu’uŋɔ. A yuun yeti nɛra kɔlegɛ en ti ba keŋɛ.
Abisai n yuun doose David. Abisai yuun dela David tã bia. A me yuun dela soogɛa n ka zoti dabeem. Ge saŋa ase’a, a ni ka zɔta nɛreba nimbũ’ɔ. David la Abisai yuun li’isɛ mɛ kɛ̃ Saul tiiseŋo la poan. Ba yuun nyɛ ti ba za’a giseri mɛ. Yehowa n yuun basɛ ti ba zɛɛ guum ge puɣum ka wum ti sɛla iti. David la Abisai yuun nyɛ Naba Saul mɛ! Eŋa me yuun gise tole mɛ. Nɛnɛra yuun ka ze pigera en ge ti a kanɛ la me yuun sɛ ze’a lɛm a zuo bɔba.
David wan eŋɛ la wani? La yuun dela naana ti a ku Saul! Daanse’ere a san ku Saul, a kan le zɔta nyaara. A nyaa wan ta’an dɛna naba. Abisai yuun ka bɔkɛ sɛla n sɔi ti David gu’una ge ka bɔta ti a ku Saul. Abisai yuun waasum yeti: “Zina Na’ayenɛ kɔ’ɔn dekɛ ho diŋdaana wa eŋɛ la ho nu’uhen. Bahɛ te n dekɛ n kanɛ wa vorogɛ en tabelɛ teŋa baanlam. N ka yeti n lo en boyi.”
David yuun tĩɛ la se’em ma’a ti a yuun tabelɛ nyɛ yɔ’ɔ ti a ku Saul la. En Gedi pɔɣentia la poan, Saul yuun kɛ̃ la taŋa leŋen ge ka mina ti David me suɣɛ la bilam. La yuun ta’an dɛna naana bo David ti a ku Saul ge David yuun ka daam en. A yuun yeen ŋmaɛ la Saul fuo la kinkɛleŋa ge yele wa yuun daam David mɛ pooren. David suure n yuun sa’am la eŋa n ka bo Saul n de mina ti Yehowa loe la gilema la.
Yu’uŋɔ kuŋɔ, la yuun ta’an kpe’em bo David ti a gu Abisai ti a da ku naba la. David yuun mi ti Saul zuo ti Abisai me laɣum zɔta suɣera. David nɛreba la woo yuun taregɛ mɛ la Saul n daani ba la. Hali la bala za’a, David yuun ka boti a lerege sanɛ. A yuun ka’am Abisai n yuun boti a ku Saul la ti a di’ise suure. David yuun yele Abisai yeti: “Na’ayenɛ mɛŋa wan ko [Saul] . . . bii a daarɛ wan paɛ, a ta’an keŋɛ pɛɛnbɔn’en mɛ ta ki bini.” David yuun le tɔɣɛ di’e yele la zuo yeti: “Na’ayenɛ da sakɛ te mam dekɛ n nu’o kalom se’emdaana te a mɛŋa sɔ̃ wa!”
Abisai n yuun yele David ti a ku Saul la, David yuun eŋɛ la bem?
David yuun mi ti Yehowa wan dɔ̃legɛ Saul tuberɛ sansɛka n nari. David yuun le tɔɣɛ Yehowa yele ti la bɔna Yooma 54:5 yeti: “A wan yɔ n diŋdoma be’em la.” Bala la, David la Abisai yuun basɛ Saul tiiseŋo la mɛ ge ta zom zoore zuo. David ze’ele la bim yi Saul la a soogɛpa la. A yuun zɛregɛ soogɛpa la mɛ, la ban ka te’ele ba naba la. A me yuun yele Saul ti a da ɛɛra eŋa ti a ku se’ere n sɔi la eŋa daɣɛ a dima. A yele Saul ti eŋa ani wuu “zu’an” n ka tari daaŋɔ la. Valum n yuun nyɔkɛ Saul ti a yeti: “Mam seren tom mɛ wo gɔɔŋɔ la, ge me tue tuukantɛ.”
Saul yuun tee a puti’irɛ me yoi? Aayi. David yuun ta’an mina ti Saul nan ka tee. Ge David puurɛ yuun pee mɛ la eŋa n yuun dekɛ sukpe’ene eŋɛ sɛla ti Yehowa bɔta la. Pooren, David n yuun tari yelemɛŋɛrɛ, la sukpe’ene la zuo, Yehowa yuun kã bo en mɛ ti la ka tara makerɛ.
Kaalɛ Baabule zɛ’ɛsi wa:
Sɔsɛ ya sokere wa:
David yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Saŋa ase’a, Abisai yuun ka tari giile ge me ita yɛla kãbi kãbi. Ge a yuun eŋɛ la wani dekɛ sukpe’ene zabɛ po’e Yehowa nɛreba ge me soŋɛ David? (it-E “Abishai” ¶3-5)
2. Beni n sɔi ti David yuun dekɛ amea makɛ la “kɔrɔŋa [n boi] zoore zuo”? (1 Sa. 26:20; it-E “Partridge” ¶4) Bisɛ foote A
Ekaterina Kolomeets/stock.adobe.com
Foote A
3. Beni n sɔi ti la yuun nara ti David di’isa suure? (w17.08-E 6 ¶14-15)
4. David yuun eŋɛ la wani kelum siregera amea yuuma zo’e zo’e pooren? (w21.09-E 10 ¶8) Bisɛ foote B
Foote B
Ti’isɛ Hon Wan Dekɛ Tum Tuuma Se’em
La boi bim ti Saul yuun tue yɛla zo’e zo’e poan mɛ ge David yuun kelum bɔ’ɔra en la gilema. To wan eŋɛ la wani ta’an tɔɣesa David la ton geele . . .
to dɔɣereba se’em? Bisɛ foote D
Foote D
gɔmɛt kpɛ’ɛndoma se’em? Bisɛ foote E
Foote E
tansugere keendoma se’em? Bisɛ foote Ɛ
Foote Ɛ
David yuun ni ti’isɛ bisɛ la sɛla n wan pee Yehowa puurɛ ge ni dekɛ sukpe’ene kɔ’ɛ a puti’irɛ soŋa. Bɔnkani poan ti la nara ti to nyɛ sukpe’ene ta’an kɔ’ɛ to puti’irɛ soŋa?
Ho wan eŋɛ la wani ta’an tɔɣesa David sukpe’ene la?
Ti’isɛ Taɣesɛ Yehowa Yele
David yele wa pa’alɛ mam ti Yehowa ani la wani?
David yele wa makɛ la Yehowa puti’irɛ la wani?
Yehowa san ta isige David kum poan, mam wan soke en la bem?
Zamesɛ Yɛla Pa’asɛ
Bisɛ Baabule yele wa vidiyo poan.
Pɔsega la, Saul yuun siregeri la amea ge pooren, a yuun zɛkɛ la amea. Kɔma wan ta’an zamesɛ la bem a yele wa poan?