27 MEFIBOSET
A Yuun Ka Eŋɛ Sunsɔa
MEFIBOSET sɔyaaba Saul yuun dela Israel naba. A sɔ Yonatan me yuun tari la sukpe’ene ge tara yelemɛŋɛrɛ bɔ’ɔra Yehowa. Mefiboset n yuun paɛ yuuma anuu la, sɛla n yuun eŋɛ ti a vom tee. A sɔyaaba Saul yuun pɔɣelum la zaberɛ poan ge nyaa ku amea. Zaberɛ kaŋa mea poan ti Mefiboset sɔ Yonatan me yuun ki. Pɔɣesɛka n yuun biseri Mefiboset n yuun wum ti Saul, la Yonatan ki mɛ la, dabeem n yuun tari en ti daanse’ere nɛreba ta’an daam bia la. Bala la, a yuun dekɛ bia la zɔ mɛ. Bia la yuun fã la a nu’usin lui ti a nama pɔɣelum. A yuun nyaa dela kɔɔreŋɔ ta paɛ kum.
La boi bim ti yɛla yuun kpe’em bo Mefiboset mɛ ge a yuun ka eŋɛ sunsɔa. A puurɛ yuun pee mɛ la eŋa n tari sɛla la. Israel buraa yu’urɛ n de Makir n yuun bo en ga’aregɔ zɛ’an. Pooren, Naba David yuun tĩɛ ti a yuun tabelɛ yele Yonatan yeti a wan bisera a yire nɛreba. (1 Sa. 20:14-17) Bala la, David yuun tum ti ba ta yi Mefiboset ti a wa’an a zɛ’an na.
Dabeem n yuun tari Mefiboset ti a keŋɛ. A yuun ze’ele la Naba Saul n de putɔya la yizuo la poan. A yuun ta’an ti’isa ti Naba David eeri en ti a ku mɛ ge a yuun sakɛ keŋɛ a zɛ’an mɛ. David yuun tɔɣɛ la mama bo Mefiboset ge dekɛ Saul lɔɣɔrɔ la za’a bo en ge nyaa yele en yeti: “Hom mɛŋa wan dita la mam n tebole zuo.” Mefiboset puurɛ yuun pee mɛ paa la David n eŋɛ som sebo bo en la. A yuun bisɛ ti eŋa ka nari som wa. A yuun soke la Naba la sɛla n sɔi ti a ita som bɔ’ɔra eŋa n de mina n ka seke sɛsɛla wa. A yuun dekɛ amea makɛ la bakiireŋa!
Mefiboset yuun dela kɔɔreŋɔ a bunbilimen ti a dɔɣereba me ki. Pooren, ba yuun kaɛ la a poore ge tum en ŋmɛlema tuuma
Pooren, yele n yuun le paɛ Mefiboset. David dayua Absalom yuun boti a ku la David ge soe dɛna naba. Nɛreba zo’e zo’e me yuun pa la Absalom poore. Bala la, David yuun zɔ yese Yerusalem mɛ. Mefiboset yameŋa Ziba yuun keŋɛ ti a ta soŋɛ la David ge basɛ Mefiboset Yerusalem. Mefiboset yuun ka nyaŋɛ doose David ge a yuun eŋɛ pa’alɛ ti a tari yelemɛŋɛrɛ bɔ’ɔra David ge ti a suure me sa’am la sɛla n paɛ David la. A yuun ka maali a tɛɛŋa bii a nɔgiirɔ. Susa’aŋɔ yele yuun san paɛ nɛra, a yuun ni ka maala a tɛɛŋa bii a nɔgiirɔ. Se’em ma’a ti David yuun nyaŋɛ Absalom la, a yuun lebe la Yerusalem la suma’asum. Ge David puurɛ yuun ka pee la Mefiboset. Beni n sɔi?
Se’em ma’a ti Ziba yuun tari lɔɣɔrɔ keŋɛ ti a ta bo David la, a yuun sa’am la Mefiboset yu’urɛ bo David. Ziba yuun yele David yeti Mefiboset boti la a dɛna naba. Bala n sɔi ti a yee bɔna Yerusalem la. Ti’isɛ bisɛ lan yuun ani David se’em. La yuun daɣɛ a dayua ma’a n kaɛ a poore ge amea zɔ Ahitofel n yuun ni ka’ana en la, me yuun kaɛ la a poore. Daanse’ere bala n sɔi ti a yuun sakɛ ti Mefiboset me ta’an kaɛ a poore. David yuun bo nɔɔrɛ ti Ziba nyaa sɔna Naba Saul samana se’esi ti Mefiboset tara la.
Se’em ma’a ti Mefiboset yuun baŋɛ ti Ziba sa’am la a yu’urɛ la, a yuun boti la a seke David ge yele en sɛla n sirum eŋɛ. David yuun soke Mefiboset ti a baŋɛ sɛla n sɔi ti a yee Yerusalem ge ka doose en. Mefiboset yuun yeti eŋa n de kɔɔreŋɔ la zuo ti a ka nyaŋɛ doose en. A le yeti Ziba keŋɛ ge gee eŋa basɛ mɛ. Daanse’ere David yuun nyɛ ti Mefiboset ka maalɛ a nɔgiirɔ, la a tɛɛŋa. Bala pa’alɛ ti Mefiboset suure yuun sa’am mɛ la sɛla n paɛ David la. La me pa’alɛ ti a tari la yelemɛŋɛrɛ bɔ’ɔra David. La yeen dɛna se’em, yelese’a n yuun eŋɛ la basɛ ti David sunsɔa nyie mɛ. A yuun ka boti a wum yetɔɣum zo’e zo’e Mefiboset zɛ’an. David yuun nyaa dekɛ la samana la ase’a bo Mefiboset ge a yuun ka bo en ba za’a. A yuun yeti Mefiboset la Ziba laɣum pu Saul samana la.
Mefiboset yameŋa la parum bo en mɛ ge David kelum yeti ba laɣum pu samana la. Bala yuun basɛ ti Mefiboset sunsɔa nyie me yoi? Aayi. (Tɛɛ. 19:18, 19) La boi bim ti ba yuun tum Mefiboset la ŋmɛlema tuuma ge a yuun ka eŋɛ sunsɔa bii a giila kɔ’ɔsɛ. A yuun tari la sukpe’ene, sɛla n sɔi la a yuun ti’isɛ la yelese’a n pakɛ, maɣesɛ wuu a dita sugeri bɔ’ɔra nɛreba ge me tara suma’asum la ba.
A yuun lebese David la mama sore poan yeti: “Bahɛ te [Ziba] ma’an kɔ’ɔn sɔna sɛla woo.” La boi bim ti ba yuun parum bo en mɛ ge to’e a lɔɣɔrɔ ge a yuun kelum tara la pupeelum pu’usa Naayinɛ. Mefiboset yuun daɣɛ soogɛa ge a yuun tari sukpe’ene gana soogɛpa zo’e zo’e mɛ!
Kaalɛ Baabule zɛ’ɛsi wa:
Sɔsɛ ya sokere wa:
Mefiboset yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Ge ti ba yuun nyaa tari Mefiboset keŋɛ David zɛ’an la, a yuun boi la “Makir zen’an.” Makir yuun le eŋɛ la bem ti la pa’alɛ ti a tari la yelemɛŋɛrɛ bɔ’ɔra Yehowa ge me tɔ’ɔsa saama soŋa? (2 Sa. 9:3, 4; it-E “Machir” No. 2)
2. Beni n sɔi ti Mefiboset yuun dekɛ amea makɛ la “baa kiiriŋa”? (2 Sa. 9:8; it-E “Dog” ¶5) Bisɛ foote A
PhotoStock-Israel/Photodisc via Getty Images
Foote A: Diimi Israel poan, ba yuun geele baasi ti ba dela dusi n dɛ̃ɣɛ ge dita diyooro
3. To eŋɛ la wani baŋɛ ti Mefiboset yuun daɣɛ mina n boti a di na’am? (w02-E 2/15 14 ¶11, tiŋanɔɔrɛ yelesum) Bisɛ foote B
Foote B: Yonatan yuun ta’an pa’alɛ Mefiboset, Yehowa n loe nɛresɛka ti a dɛna naba.
4. Yele ana wa pooren la, Yehowa yuun le kã bo Mefiboset la wani? (it-E “Mephibosheth” No. 2 ¶3)
Ti’isɛ Hon Wan Dekɛ Tum Tuuma Se’em
Puti’irɛ bã’a bii daaŋɔ ase’a paari to mabiisi mɛ ti mabiisi basɛba ta’an kan bɔkɛ lan ani ba se’em. Bem subuɣelegɔ yele ti ba wan ta’an zamesɛ Mefiboset zɛ’an?
David yuun wum la nɛra ayina ma’a yetɔɣum ge dekɛ Mefiboset samana tee bo nɛra. Tomam me san bɔta ti to kɔ’ɛ to puti’irɛ, to wan eŋɛ la wani kan tue wuu David n yuun tue se’em la? Bisɛ foote D
Foote D
Ho wan eŋɛ la wani ta’an tɔɣesa Mefiboset sukpe’ene la?
Ti’isɛ Taɣesɛ Yehowa Yele
Mefiboset yele wa pa’alɛ mam ti Yehowa ani la wani?
Mefiboset yele wa makɛ la Yehowa puti’irɛ la wani?
Yehowa san ta isige Mefiboset kum poan, mam wan soke en la bem?
Zamesɛ Yɛla Pa’asɛ
Geele bisɛ to wan ta’an tɔɣesɛ Mefiboset se’em, la san ana to wuu ba tum to la ŋmɛlema tuuma la.
Bia san ti’isa ti nɛreba ka nɔŋɛ a yele, dɔɣereba wan ta’an dekɛ Mefiboset yele la soŋɛ en la wani?