1 Peter 5:6, 7—“Sirihe Ya Mɛhe Ge Dekɛ Ya Mɛhe Eŋɛ Na’ayenɛ Se’em N Gane Zan’an Nu’uhen, . . . Yele Ya En Sɛla Woo N Daane Ya”

“Bala la, sirege ya yamea ge dekɛ yamea eŋɛ Gaŋɛ Za’a Naayinɛ la nu’usin, la wan eŋɛ se’em ti a zɛ̃kɛ ya saazuo sansɛka n nari poan. Dekɛ ya putɛyiila bo en, se’ere n sɔi la a fabeli ya yele mɛ.”​—1 Peter 5:6, 7, New World Translation.

“Sirege ya yamea ge dekɛ yamea eŋɛ Gaŋɛ Za’a Naayinɛ la nu’usin, ti sansɛka n nari poan a wan zɛ̃kɛ ya saazuo. Dekɛ ho yeledaaŋɔ za’a bo en, se’ere n sɔi a fabeli ho yele mɛ.”​—1 Peter 5:6, 7, New King James Version.

1 Peter 5:6, 7 Vuurɛ

Tuntuna Peter yele wa kpemese Kristakɔma giila ti, ba wan ta’an yese ba suuren yele Naayinɛ sɛla woo n daani ba, la sɛla woo ti ba bɔta. Naayinɛ zu’useri sɛba woo n siregeri bamea la mɛ ge me ni kã bo ba.

“Sirihe ya mɛhe ge dekɛ ya mɛhe eŋɛ Na’ayenɛ se’em n gane zan’an nu’uhen.” Baabule la poan, ba san yeti Naayinɛ nu’o, la pa’alɛ la eŋa n tari paŋa wan ta’an faaɛ ge te’ele to la. (Yɛhega 3:19; Tɛɛnhegɔ 26:8; Ezra 8:22) Kristakɔma iti pa’ala ti ba siregeri bamea ba san dekɛ bamea delum Naayinɛ. Ba mi ba tɔregɔ beene mɛ ge me le mina ti bamea ma’a kan nyaŋɛ yeledaaŋɔ se’a n paari ba la. (Magaha 3:5, 6; Filipi 4:13) Ba tari suure lua ti Yehowa wan soŋɛ ba sansɛka n nari poan.​—Isaiah 41:10.

“Lan wan eŋɛ se’em ti a zɛkɛ ya saazuo sansɛka n nari poan.” Sɛba n nyaŋɛ ŋmibe yeledaaŋɔ poan la wan ta’an tara puti’irɛ ti Yehowa wan kã bo ba. Naayinɛ kan basɛ ti yeledaaŋɔ sɛka n wan paɛ a yamesi la basɛ ti ba kan sɛ ze’ele soŋa soŋa. (1 Korint 10:13) Ba san ita sɛla n ani soŋa, a wan kã bo ba “sansɛka n nari poan.”​—Galatia 6:9.

“Dekɛ ya putɛyiila bo en, se’ere n sɔi la a fabeli ya yele mɛ.” Kristakɔma wan ta’an dekɛ ba yeledaaŋɔ bo Naayinɛ doose la ban wan zusera en. Viisegɔ gɔŋɔ ayima yeti: “Yelebire la n de dekɛ bo bii lobe la pa’alɛ la hon dekɛ ho paŋa za’a lobe sɛla ti la keŋɛ zaaɛ. La pa’alɛ la hon mi ge eŋɛ sɛla.” Kristabia san dekɛ a yeledaaŋɔ la bo Naayinɛ, la wan ana en ma ma ge ti a tara “Yenɛ sunma’ahom.” (Filipi 4:6, 7) A wan ta’an tara suure lua ti Naayinɛ wan soŋɛ en, se’ere n sɔi la Naayinɛ fabeli a yele mɛ. Naayinɛ wan dekɛ a paŋa la n ka tari makerɛ la soŋɛ en.​—⁠Yooma 37:5; 55:22.

1 Peter 5:6, 7 Yelesum

Peter gɔŋɔ sɛka n deŋɛ nɛŋa la poan, a zuo bunuu la n de ki’i. (1 Peter 1:1) Wuu lan ani se’em zina beere wa la, yaarɛ me yuun paari Yezu podɔleba la mɛ. Bala yuun ta’an basɛ ti ba tara putɛyiila. (1 Peter 1:6, 7) Peter n yuun mi bala la zuo la, a yuun gulesɛ la gɔŋɔ kpemese ba giila yuun 62-64 Y.B. poan.​—1 Peter 5:12.

Peter gɔŋɔ la ki’ileŋɔ poan la, a yuun kpemese mabiisi la ti yaarɛ paara ba la giila mɛ. Ba san sirege bamea ge dekɛ bamea delum Yehowa, ba wan ta’an tara puti’irɛ ti Yehowa wan soŋɛ ba ti ba zi’a kankaŋi. (1 Peter 5:5-10) Peter yetɔɣum wa me wan ta’an kpemese Kristakɔma sɛba ti yaarɛ paara ba zina beere wa la giila.

Bisɛ vidiyo gi’a wa ti la soŋɛ hɔ ti ho baŋɛ yelese’a n boi Peter gɔŋɔ n deŋɛ nɛŋa la poan.