Filipi 4:8​—“Yelese’a Woo N De Yelemɛŋɛrɛ, . . . Kɔ’ɔn Ti’isa Ya Yele Ana Wa”

“Ba’asegɔ poan, mabiisi, yelese’a woo n de yelemɛŋɛrɛ, yelese’a woo n de ninmɔ’ɔrɛ yɛla, yelese’a woo n de tontɔɔ, yelese’a woo n ani kasi, yelese’a woo n de nɔŋerɛ yɛla, yelese’a woo ti ba tɔɣera de yele soŋa, yelese’a woo n de sarumsoŋɔ la yelese’a woo ti ba pɛɣera, kɔ’ɔn ti’isa ya yele ana wa.”​—Filipi 4:8, New World Translation.

“Ba’asegɔ poan, mabiisi, yelese’a woo n de yelemɛŋɛrɛ, yelese’a woo n tari gilema, yelese’a woo n de tontɔɔ, yelese’a woo n ani kasi, yelese’a woo n tari nɔŋerɛ, yelese’a woo n ani soŋa​—yelese’a woo n di mi’a ti ba pɛ̃ɣera la​—kɔ’ɔn ti’isa ya yele ana wa.”​—Filipi 4:8, New International Version.

Filipi 4:8 Vuurɛ

Ton ti’iseri sɛla yele pakɛ Naayinɛ mɛ se’ere n sɔi la, to ni tum la ton ti’iseri sɛla la. (Yooma 19:14; Mark 7:20-23) Bala la, nɛresɛba n boti ba tum ti la pee Naayinɛ puurɛ ni zaɣesɛ la be’em ti’isegɔ ge ba tuɣum ti’isa la yelese’a ti a bɔta.

Kaalegɔ zɛ’an wa pa’alɛ la yɛla anii n ani soŋa ti la nara ti Kristakɔma ‘kɔ’ɔn ti’isa de yele’ saŋa woo.

• “Yelemɛŋɛrɛ.” Yelebire wa pa’alɛ la yelese’a n de tontɔɔ ge ti ho wan ta’an dekɛ homea delum, maɣesɛ wuu yelese’a n boi Naayinɛ Yelesum, Baabule la poan.​—1 Timoti 6:20.

• “Ninmɔ’ɔrɛ yɛla.” Yele wa pa’alɛ la yelese’a n kɔ’ɔn dɛna ninmɔ’ɔrɛ. Yele ana wa daɣɛ yelese’a n ka pakɛ bii de’eŋo bii yelepiɣesi. Ge la soŋeri Kristabia mɛ ti a malum maasum a suure soŋa soŋa tuna sɛla n de tontɔɔ.​—Titus 2:6-8.

• “Tontɔɔ.” Yelebire wa dela hon maasum ge tum ti la dɔla Naayinɛ pa’alegɔ gana hon wan dɔla nɛresaaleba mi’ilum.​—Magaha 3:5, 6; 14:12.

• “Kasi.” Yelebire wa pa’alɛ la ho suure poan bii ho puti’irɛ poan n ani filam ge ana zilam, daɣɛ gã’aregɔ poan yɛla ma’a ge yɛla woo poan.​—2 Korint 11:3.

• “Nɔŋerɛ yɛla.” Yele wa pa’alɛ la yelese’a woo n tari pupeelum, tara nɔŋerɛ kena na ge daɣɛ yaarɛ bii diŋo bii zaberɛ.​—1 Peter 4:8.

• “Ba tɔɣera de yele soŋa.” Yele wa pa’alɛ la hon eŋɛ sɛla n wan basɛ ti ho nyɛ yusonɛ ti nɛresɛba n nani Naayinɛ me wan bɔta.​—Magaha 22:1.

• “Sarumsoŋɔ.” Yelebire wa pa’alɛ la sareŋɔ se’a n makɛ la Naayinɛ pa’alegɔ. Yelemɛŋɛrɛ, la dela yelesoma.​—2 Peter 1:5, 9.

• “Ba pɛɣera.” Yelebire wa pa’alɛ la yelese’a n tari pumpɛɣum, yele yele wuu Naayinɛ nɛŋan. La laɣum pa’asɛ la Naayinɛ pumpɛɣum yɛla ti asaaleba nara ti ba ti’isa a yele.​—Yooma 78:4.

Filipi 4:8 Yelesum

Ba yuun nyɔkɛ tuuntuna Paul paɣɛ mɛ Arom tiŋa poan. Sankaŋa ti a yuun gulesɛ gɔŋɔ bo Filipi Kristakɔma la. Nɛresɛba n pa’ali Baabule yɛla vuurɛ pa’alɛ ti Paul gɔŋɔ wa dela “nyɛɛma gɔŋɔ” se’ere n sɔi la, gɔŋɔ la tɔɣeri la pupeelum yɛla ge tɔɣera yɛla n ani buɣa buɣa ge tara giile.​—Filipi 1:3, 4, 7, 8, 18; 3:1; 4:1, 4, 10.

Paul yuun nɔŋɛ a mabiisi n yuun boi Filipi tiŋa poan la mɛ. A me yuun boti ba tara la suma’asum la nyɛɛma sebo ti a yuun tara la. (Filipi 2:17, 18) Gɔŋɔ wa ki’ileŋɔ poan, a yuun kpemese ba giila ti ba tara nyɛɛma, ba ti’isa yɛla soŋa soŋa ge kɔ’ɔn zusa Naayinɛ saŋa woo ge basɛ ti ba puti’irɛ bɔna yelese’a n bo’ori suma’asum la yelese’a n wan basɛ ti ba tara suma’asum la Naayinɛ.​—Filipi 4:4-9.

Bisɛ vidiyo gi’a wa nyɛ Filipi gɔŋɔ la yelekpina.