BUNBILIPAALESI SOKE YETI

Bem Zuo Ti La Nara Ti N Zusa Naayinɛ?

Bunbilipaalesi zo’e zo’e yeti bamam zuseri ge daɣɛ daarewoo. Nɔkpe’ene kai ti basɛba ta’an soke yeti: ‘Zusega dela sɛla ti ba yeen ita bii la kɔ’ɔn dɛna la ninmɔ’ɔrɛ ti to zusa?’

Bem n de zusega?

Zusega dela nɛra n sɔseri la Naaŋɔdaana la. Bisɛ la de yɔ’ɔ se’em! Yehowa kɔ’ɔn gana to sɛla woo poan mɛ ge la bala za’a, a “ka zaen la to.” (Tooma 17:27) Yelemɛŋɛrɛ, Baabule la beem to ti: “Vuruge ya lɛm Na’ayenɛ te a me wan vuruge lɛm ya.”—Yames 4:8.

Ho wan eŋɛ la wani lɛm Naayinɛ?

Sarɔɔ kuyima dela to wan zusera. Ho san zusa, ho tɔɣeri bɔ’ɔra la Naayinɛ.
Sarɔɔ kuyima le dɛna la to zamesa Baabule la. Naayinɛ doli la bilam “tɔɣera” bɔ’ɔra hɔ.

Ho san zusa ge zamesa Baabule la, ho sɔseri mɛ la Naayinɛ. Bala wan basɛ ti hon la eŋa zɔtɔ nyɔka la ana soŋa.

“La dela yɔ’ɔ kãtɛ ti nɛresaaleba ta’an sɔsera la Yehowa Naayinɛ n de Gaŋɛ Za’a Daana la.”—Jeremy.

“Mam ni yese n suure za’a sɔsɛ la Yehowa zusega poan la, basɛ ti mam ana la du’a du’a la en.”—Miranda.

Naayinɛ keleseri?

Ho san puɣum sakɛ ti Naayinɛ boi, puɣum zusa en, ho ta’an kan sakɛ ti a sirum keleseri ho. La bala za’a la, Baabule la yi’iri Yehowa la “se’em n leregere sohoga.” (Yooma 65:2) La yeti, ho yele “en sɛla woo n daane” hɔ. Bem zuo? “A dela se’em n tare [hɔ] a potɛ’ɛrɛ poan.”—1 Peter 5:7.

Ti’isɛ bisɛ: Hon nyɛti tɛm sɔsa la ho zɔdoma saŋa woo? Ho me ta’an sɔsa la Naayinɛ saŋa woo. Ho san zusera Yehowa, yi’ira a yu’urɛ la saŋa woo. (Yooma 86:5-7; 88:9) Yelemɛŋɛrɛ, Baabule la yele ho ti “sohora Yenɛ daarɛ woo.”—1 Tesalonika 5:17.

“Zusega vuurɛ dela mam n sɔseri sɛla woo n boi n suuren bɔ’ɔra n saazuo Sɔ la.”—Moises.

“Mam ni yele Yehowa la sɛla woo wuu mam ni tɔɣera mam boti sɛla bɔ’ɔra n ma bii n zɔ se’em la.”—Karen.

Bem n nari ti n zusa?

Baabule la yeti: “Sohɛ ya Yenɛ ya poohegɔ poan sɛla [woo] te ya bɔta. Ya sohora en daarɛ woo la popeelom.”—Filipi 4:6.

Bala pa’alɛ ti ho ta’an yele en sɛla woo n daani hɔ? Ɛɛ! Yelemɛŋɛrɛ, Baabule le yeti: “Dekɛ ho zeero bo Na’ayenɛ, ge a wan gorɛ hɔ.”—Yooma 55:22.

Yele la dela, ho san tɔɣera la Naayinɛ la ka nari ho kɔ’ɔn tɔɣera sɛla n daani ho la ma’a. Pɔɣesa’arɛ ayima yu’urɛ n de Chantelle yeti “To zɔtɔ nyɔka la kan ana soŋa n san kɔ’ɔn zusa Yehowa ɛɛra la mam boti sɛla la ma’a.” “Mam ti’isɛ ti la nari ti n pɛɣɛ en yia n zusega la poan ge mam wan pɛɣɛ en se’em la nari ti la zo’e.”

Ti’isɛ Bisɛ: Hon vom poan, hon puurɛ pee la bem yɛla? Ho ta’an pɛɣɛ Yehowa la yɛla atã ti hon nyɛ zina?

“Hali la sɛla n de yelepika makɛ wuu ho san nyɛ mɔpuo n ani soŋa, bala ta’an kpemese ho giila ti ho pɛɣɛ Yehowa ho zusega poan.”—Anita.

“Ti’isɛ taɣesɛ naaŋɔ lɔkɔ ti ho nɔŋɛ bii Baabule kaalegɔ zɛsɛka n kɛ̃ ho suure dɛna ti ho pɛɣɛ Yehowa la sɛla ti ho nyɛ la.”—Brian.

Ho Tadaandoma N Yele Sɛla

“Zusega nari ti la kɔ mɛ wuu ateko ko’om ge daɣɛ wuu ko’om pika n yeen ga’a. Yehowa boti a soŋɛ to mɛ, a mi yelese’a n pakɛ to mɛ ge ti to nyaa ni yele en. To ta’an kelum eŋɛ pa’alɛ ti to dekɛ tomesi delum en mɛ doose la to zuseri en se’em la.”—Moises.

“Zusega ani wuu mi’a ti Yehowa gurɛ mi’a la ki’ileŋa bɔba ti hon me gurɛ de pɔsega bɔba. Mam san zusera sɛla n boi mam suuren, la ani wuu mam ve’eri mi’a la mɛ kankaŋi ti Yehowa me vɛ’ɛra ti la nyaa ni basɛ ti zɔtɔ nyɔka la ana kankaŋi.”—Miranda.

“To san ka bisɛ tomesi soŋa, to zusega la ta’an kɔ’ɔn dɛna la sɛla ti to bɔta ma’a . Ge to san pɛɣera Yehowa to zusega poan to puurɛ wan pee la yelese’a za’a ti a eŋɛ bo to la, la me wan basɛ ti to kan zusa tomam ma’a n boti sɛla.”—Jeremy.

“To san pɛɣera Yehowa, to puurɛ wan pee la yelese’a ti a ita bɔ’ɔra to la. To san pɛɣera Yehowa zusega poan, la soŋeri to mɛ ti to ti’isa la kã’a la ti to nyɛ la ge daɣɛ yelese’a n paari to la.”—Shelby.