BUNBILIPAALESI SOKE YETI
Buraasi N Gã Taaba La Pɔɣesi N Gã Taaba Dela Be’em?
“Mam n yuun zo’ore la sɛla n yuun kpe’em bo mam dela, mam nyasum n daa boi n buratadaandoma poan. Mam yuun ti’isɛ ti la kan yue ge tole ge la kelum ana mam la bala.”—David, 23.
David dela Kristabia n boti a eŋɛ Naayinɛ n boti sɛla. A wan ta’an eŋɛ bala a nyasum san bɔna a buratadaandoma poan? La ani Naayinɛ la wani la buraasi n gã taaba la pɔɣesi n gã taaba?
Baabule la yeti bem?
Nɛreba n geele buraasi n gã taaba la pɔɣesi n gã taaba yele se’em la boi la tɔka tɔka buuri woo poan. Leyɛ’ɛsa, nɛreba n yuun geele de yele se’em kurum sa la boi la de to’ore la zina beere wa. Ge Kristakɔma ka doli nɛreba zo’e zo’e n yeen ti’isa sɛla bii ‘basɛ ti pa’alegɔ seko woo deene pã’asɛ ba.’ (Epesus 4:14) Ge bamam n geele buraasi n gã taaba la pɔɣesi n gã taaba (la sareŋɔ woo deene) se’em la makɛ mɛ la Baabule la pa’alegɔ.
Baabule la n tɔɣɛ buraasi n gã taaba la pɔɣesi n gã taaba yele se’em la niɛ peelum mɛ. Naayinɛ Yetɔɣum la yeti:
“Da gã’arɛ buraa wuu a dela pɔka.”—Malema 18:22.
“Ba boti ba ita sɛla ti ba suure bɔta la zuo, ti Naayinɛ . . . basɛ ba ti ba ita ba putɛ’yaalesi itigɔ. Ge ti ba pɔɣesi me tuna yalumtuuma la ba pɔɣetadaandoma.”—Arom 1:24, 26.
“Da basɛ ya ti ba pã’asɛ ya. Nɛresɛba n de yalumdoma, baɣakaaberiba, pɔɣedisa’aŋɔdoma, buraasi n gã la taaba bii burasɛba n sakɛ ti ba ita ba bala, nayiɣeba, sɛba n nyiɣeri, dabugeriba, sɛba n tuuri nɛreba la nɛrefaareba kan kɛ̃ Naayinɛ Na’am la poan.”—1 Korint 6:9, 10.
Yelemɛŋɛrɛ, Naayinɛ pa’alɛ ti la ka nari ti to tara kunkoma’asum bɔ’ɔra nɛra n daɣɛ to pɔɣa bii to sira bii to tara kunkoma’asum la to buratadaandoma bii to pɔɣetadaandoma. Yelemɛŋɛrɛ la dela, nɛra woo nari ti a nyɔkera amea la san ta wa’an ti to tum sɛla n kan pee Naayinɛ puurɛ.—Kolose 3:5.
Bala pa’alɛ ti . . . ?
Bala pa’alɛ ti, Baabule la yeti to yaɛ buraasi n gã taaba bii pɔɣesi n gã taaba?
Aayi. Yelemɛŋɛrɛ, Baabule la ka tɔɣɛ pa’alɛ ti to yaɛ nɛnɛra, la ka pakɛ la dela buraasi n di taaba bii pɔɣesi n di taaba bii buraa n di pɔka. Ge la tuɣum yeti to “ɛɛra suma’asum [tomam] la nɛra woo tiŋasuka,” la ka pakɛ la ba sareŋɔ n ani se’em. (Hebru 12:14) Bala la, la ka nari ti to vɛɣena buraasi n gã taaba la pɔɣesi n gã taaba.
Bala pa’alɛ ti Kristakɔma nari ti ba giisa lɔɔ seto n bo yɔ’ɔ ti buraasi dita taaba bii pɔɣesi dita taaba?
Baabule la pa’alɛ ti Naayinɛ n pa’alɛ pɔɣedire se’em dela, buraa ayima la pɔka ayima naɛ taaba bɔna. (Matu 19:4-6) Ge nɛreba san sɔsera lɔɔ seto n tɔɣeri buraasi n diti taaba bii pɔɣesi n diti taaba yele, la ni dɛna la nalɛɣerɛ yele ge daɣɛ sareŋɔ yele. Baabule la yele Kristakɔma ti ba da dekɛ bamesi pa’asɛ nalɛɣerɛ yɛla poan. (Yon 18:36) Bala la, ba kan tɔɣɛ po’e bii tɔɣɛ giisɛ gɔmɛt lɔɔ seto n tɔɣeri buraasi n gã taaba la pɔɣesi n gã taaba yele.
Ge la san dɛna ti . . . ?
Buraa n gã la buraasi bii pɔka n gã la pɔɣesi, nɛra n ana bala wan ta’an tee?
Ɛɛ. Yelemɛŋɛrɛ la dela, yuun kɔbesɛka n deŋɛ nɛŋa la poan, nɛreba basɛba yuun ani la bala! Baabule la n tɔɣɛ pa’alɛ ti buraasi n gã taaba la pɔɣesi n gã taaba kan kɛ̃ Naayinɛ Na’am la poan la, la yeti: “ya sɛba daa ani la bala.”—1 Korint 6:11.
Wana pa’alɛ ti burase’esi n yuun gã la buraasi la pɔɣese’esi n yuun gã la pɔɣesi ge basɛ la, kan makɛ tari kunkoma’asum ti ba eŋɛ bala? Aayi, la daɣɛ bala. Baabule la yeti: “Dekɛ ya halɛ paalega la yɛ, sɛla n bala ti yelemɛŋɛrɛ mi’ilum la kɔ’ɔn basɛ ti ka ana paalega.” (Kolose 3:10) Nɛra kan ta’an dekɛ daayinɛ tee.
Nɛra san bɔta ti a tum sɛla n wan pee Naayinɛ puurɛ ge kelum tara kunkoma’asum be’ero wa, a wan eŋɛ la wani?
Nɛra san tara kunkoma’asum n ka ani soŋa, a san bɔta a kan ti’isa a kunkoma’asum la yele bii a kan tum a kunkoma’asum la n boti sɛla. A wan eŋɛ la wani ta’an eŋɛ bala? Baabule la yeti: “Ya kelum kena vo’osum la poan, la wan eŋɛ se’em ti ya kan malum tum yamea kunkoma’asum n boti sɛla.”—Galatia 5:16.
Daalɛ basɛ ti, kaalegɔ zɛ’an wa ka yeti nɛra kan tara kunkoma’asum. Ge la tuɣum dɛna se’em dela, nɛra san tɛ̃ra tuna a vo’osum poan yɛla n de a Baabule zamesegɔ la zusega, la wan soŋɛ en ti a ta’an zaɣesɛ kunkoma’asum be’ero.
David ti to puɣum tɔɣɛ a yele la yeti, la dela yelemɛŋɛrɛ—yele yele wuu se’em ma’a ti a yuun tɔɣɛ sɛla n daani en bo a dɔɣeriba la. A yeti, “la daa dela zeero kãtɛ ti mam tukɛ basɛ. Mam ti’isɛ ti mam bunbilimen, mam daa san te’ele yele ni ba sɛla n daani mam la, mam wan tari ni pupeelum sankaŋa.”
Yele la gi’a gi’a dela, to san dɔla Yehowa pa’alegɔ la to wan tari la pupeelum. To sakɛ ti a pa’alegɔ la “dela tontɔɔ, ni basɛ ti suure la tara pupeelum” ge ti “Nɛra san dɔla ba, a yɔɔrɛ wan kãregɛ.”—Yooma 19:8, 11.