Suma’asum Wan Ta Bɔna Zɛ’an Woo

Nɛra woo boti la a kɛ̃’ɛra zɛ’an ti suma’asum bɔna. Yuuma zo’e zo’e n wana ti tingɔŋɔ wa zuodoma tiregera ti ba yese zaberɛ basɛ ti suma’asum ta’an bɔna. Saŋa ase’a, ba ni ta’an basɛ ti suma’asum bɔna saŋa fii. Ge nimbaalega la dela, la ni ka yue ti nɛreba le pɔsɛ zabera la taaba. La wan ta’an eŋɛ ti suma’asum bɔna zɛ’an woo? Ɛɛ, la wan ta’an eŋɛ! Sɛla n basɛ ti to baŋɛ bala dela Yezu n wan eŋɛ sɛla, la eŋa n yuun pa’alɛ sɛla.

Yezu n wan eŋɛ sɛla

Baabule la pa’alɛ ti la kan yue, Yezu wan basɛ ti suma’asum bɔna zɛ’an woo.

• “[Yezu] yu’urɛ wan yi’ira la . . . Sunma’ahom Nabia. Ka paŋa la ka sunma’ahom pa’ahere la bala ka tare tɛka.” (Isaiah 9:6, 7) Yezu n de Naayinɛ Na’am la Naba la wan basɛ ti suma’asum n ka tari ba’asegɔ bɔna zɛ’an woo.

• “Nahadoma han ne yi bo en, a ne fan ba bahɛ mɛ . . . sɛba n ka tare soŋora han ne yi en, a ne fan [ba] bahɛ mɛ.” (Yooma 72:12-14) Yezu n tari kpe’eŋo la zuo, a wan yese zaberɛ, gbiregere, la namesegɔ basɛ ge basɛ ti tontɔɔ tuuma bɔna.

• “Teŋa kan le tɛn pɛɛma la ka tadaana, [bii ba zamesɛ zaberɛ leyɛ’ɛsa].” (Isaiah 2:4) Yezu san ta bisa tingɔŋɔ wa, nɛra kan le zamesɛ zaberɛ ge nɛra woo wan tuɣum bisɛ eŋa n wan eŋɛ se’em basɛ ti suma’asum kelum bɔna.

Ho san bɔta ti ho zamesɛ baŋɛ Yezu n wan eŋɛ se’em basɛ ti suma’asum bɔna tingɔŋɔ wa zuo, la hon wan eŋɛ se’em ta’an ta bɔna bim, bisɛ vidiyo la zuo n de Naayinɛ Na’am La Dela Bem?

Yezu n yuun pa’alɛ sɛla

Hali la nananawa, Yezu pa’alegɔ la soŋeri la nɛreba zo’e zo’e ti ba tara suma’asum la taaba. Yezu Zoore Zuo Yetɔɣum la poan, a yuun pa’alɛ la yelese’a n wan basɛ ti nɛreba tara suma’asum la taaba. Yɛla wa basɛba n wana:

• “Som wan bɔna la sɛbadoma n eere sunma’ahom.” (Matu 5:9) Yezu yuun pa’alɛ a podɔleba la ti ba da nɔŋɛ gbiregere ge ba tuɣum ɛɛra suma’asum.

• “Keŋɛ ta naɛ la ho sɔɔn la ge lebena dekɛ ho bo’olom la bo Na’ayenɛ.” (Matu 5:23, 24) Yezu yuun kpemese a kɛleseriba la giila ti yɛla san bɔna bamam la nɛreba tiŋasuka, ba maalɛ de kalam. A yuun pa’alɛ ti to san tara suma’asum la nɛreba, la wan ta’an basɛ ti to tara bɔnsoŋa la Naayinɛ.

• “Da gankerɛ ya ya taaba te Yenɛ me da gankera ya.” (Matu 7:1) Yezu kaɣɛ tɔ ti to da gãkera nɛreba bii to bɔta ti ba eŋɛ sɛla ti tomam mea ka ita, se’ere n sɔi la wana ta’an basɛ ti nɔkpe’ene bɔna. Yezu yuun pa’alɛ ti to da bisa nɛreba tuure yɛla ge to ‘kɔ’ɔn dita sugeri’ bɔ’ɔra ba, se’em ma’a ti ba tue to.​—Luke 6:37.

Nɛreba n boi tingɔŋɔ wa zɛ’an woo tari la Yezu n pa’alɛ sɛla la tuna tuuma. Hali la zɛse’esi ti zaberɛ bɔna la, nɛrebana wa tiregeri ti yele san bɔna bamam la nɛreba tiŋasuka, ba wan maalɛ dɛ. Nɛreba san eŋɛ ba sɛla n ka ani soŋa, ba ni di la sugeri bo ba ge eŋɛ pa’alɛ ti ba nɔŋɛ ba mɛ.

Ho san bɔta ti ho baŋɛ Yezu pa’alegɔ la n soŋɛ nɛreba basɛba se’em ti ba tara suma’asum, kaalɛ zaseŋɔ yele la zuo n de “Finding Peace Despite War and Violent Conflict.”