Gbiregere Kan Ta’an Maalɛ Yɛla

Nɛreba zo’e zo’e ti’isɛ ti gbiregere n wan ta’an maalɛ yeledaaŋɔ. Ge Yezu Krista yuun ka pa’alɛ ti to ita bala. Geele bisɛ yɛla ase’a ti Yezu yuun yele ge me eŋɛ.

Yezu n yuun yele sɛla

Yezu Zoore Zuo Yetɔɣum la poan, a yuun pa’alɛ ti sunsɔa, la gbiregere kan ta’an maalɛ nɔkpe’ene. Yelese’a ti a yuun yele la basɛba dela:

• “Hon bote nɛreba eta sɛla bɔ’ɔra hɔ la, eta bala me bɔ’ɔra ba.” (Matu 7:12; Luke 6:31) Yezu ka’aŋɔ wa kpemese to giila ti to ita nɛreba wuu ton boti ba ita to se’em la. Nɛra ka boi n boti ba vɛ̃ɣena en. Bala, la yi nari ti to tiregɛ bɔ’ɔra nɛreba gilema ge me ita ba soŋa, hali to san puɣum ka bɔkɛ taaba.

• “Nɛra han lobe ho zuɔ sapɛnka, le ŋmɛregɛ gɔbega sapɛnka bo en te a lobe pa’ahɛ.” (Matu 5:38, 39; Luke 6:29) Yezu yuun ka boti a yeti to basɛ ti la dɛna naana ti nɛreba eŋɛ to sɛla n ka ani soŋa. Pu’usegɔ nɛŋadoma basɛba yuun ni pa’ala ti nɛra san eŋɛ ho sɛla n ka ani soŋa, la daɣɛ be’em ti ho lerege sanɛ. Ge Yezu yuun tɔɣɛ bala ti a demese la nɛreba puti’irɛ. A yuun boti a yele a podɔleba ti nɛra san eŋɛ ba sɛla n ka ani soŋa, la ka nari ti ba lerege sanɛ ge ba tuɣum ana mama.a

• “Nɔŋɛ ya diŋdoma.” (Matu 5:43, 44; Luke 6:27) Yezu yuun pa’alɛ ti la nari ti to ita som bɔ’ɔra sɛba n yaɛ tɔ bii tum to ŋmɛlema tuuma la. A yuun ka boti a yeti to sakɛ ba be’em tuuma la.b Ge to san ita som bɔ’ɔra sɛba n yaɛ tɔ, la ta’an basɛ ti ba ana mama ge kpemese ba giila ti ba me eŋɛ som bo to.

Yezu n yuun eŋɛ sɛla ge me wan ta eŋɛ sɛla

Yezu yuun pa’alɛ ti gbiregere kan ta’an maalɛ yɛla. A me yuun dekɛ a itigɔ pa’alɛ la bala. Yu’unseko ti ba yuun nyɔkɛ en la, a podɔleba la ayima yuun boti a faaɛ en mɛ. Eŋa n yuun eŋɛ sɛla la pa’alɛ ti a yuun nɔŋɛ la gbiregere. Ge Yezu yuun yeti: “Dekɛ ho so’a la sun. Te sɛba woo n foe so’ahe la, so’ahe mea n wan ko ba.” (Matu 26:52) Yezu yuun eŋɛ pa’alɛ ti a nɔŋɛ a dindoma mɛ doose la eŋa n yuun di sugeri bo sɛba n yuun eŋɛ en sɛla n ka ani soŋa la. Hali a yuun zusɛ bo ba mɛ!​—Luke 23:33, 34; 1 Peter 2:23.

Baabule la yeti la kan yue, Yezu n de Suma’asum Nabia la wan yese gbiregere basɛ. (Isaiah 9:6, 7) Ho san bɔta ti ho zamesɛ baŋɛ beere sa’am n wan ta ana soŋa se’em, kaalɛ zaseŋɔ yele la zuo n de “How War and Violent Conflict Will End.”