Sɛla N Wan Soŋɛ Fɔɔsi
Ba viisɛ baŋɛ ti tingole wa za’a poan, nɛreba n paɛ wuu 43 million n de fɔɔsi ge ti 295 million me ka ba’ɛ nyɛta.a Nimbaalega la dela, nɛreba basɛba ka iti fɔɔsi zo’e zo’e soŋa.
Naayinɛ geele fɔɔsi la wani? Baabule la tɔɣɛ fɔɔsi yele la wani? Yehowa Sɛɛradoma me soŋeri ba la wani zina beere wa?
Naayinɛ n geele fɔɔsi se’em
Baabule la pa’alɛ ti Yehowab fabeli fɔɔsi yele mɛ. A boti la nɛreba ita ba soŋa ge ti ba me ta’an zamesɛ Baabule la. A me bo ba la beere sa’am puti’irɛ.
Gulesegɔ: “Woŋerɛ wan woŋɛ hom se’em n tare fɔɔhe te se ta tue sore.”—Tɛɛnhegɔ 27:18.
Vuurɛ: Diimi sa la, Naayinɛ lɔɔ la yuun te’ele fɔɔsi mɛ ti nɛreba ka muɣesa ba.
Gulesegɔ: “Yenɛ ete nɛra woo la boyena.”—Tooma 10:34.
Vuurɛ: Naayinɛ nɔŋɛ fɔɔsi mɛ wuu eŋa n nɔŋɛ sɛba n nyɛti se’em la.
Gulesegɔ: Yezu yuun “bahɛ te fɔɔhe kekeko le nyɛta.”—Luke 7:21.
Vuurɛ: Yezu n yuun boi tingɔŋɔ wa zuo la, a yuun piɣesi fɔɔsi basɛba nini mɛ. Wana wa pa’ali la Naayinɛ Na’am la n wan ta eŋɛ sɛla beere sa’am.
Gulesegɔ: “Fɔɔhe nini wan pegehɛ.”—Isaiah 35:5.
Vuurɛ: Yehowa pu’ulum biŋe ti beere sa’am a wan basɛ ti tingɔŋɔ wa lebege paradiisi ti fɔɔsi nini piɣesɛ.
Yehowa Sɛɛradoma n soŋeri fɔɔsi se’em
Tingole wa za’a poan, Yehowa Sɛɛradoma mɔɔli Naayinɛ Na’am la yɛla mɛ bɔ’ɔra fɔɔsi. To eŋɛ la wani ta’an ita bala?
To maali la Baabule la Baabule zamesegɔ gɔnɔ fɔɔsi gulesegɔ poan, la kɔ̃a yetɔɣum poan ti la soŋɛ ba.
To iti tansugere zamesegɔ saŋa woo mɛ ti fɔɔsi wan ta’an wa’ana.
To me iti la Baabule zamesegɔ bɔ’ɔra fɔɔsi ti ho san bɔta, nɛra ta’an kena ti ya zamesa.c
To iti yele ana wa za’a mɛ ge ka tɔ’ɔsa ligeri. Beni n sɔi? Se’ere n sɔi la, Yezu yeti: ‘Ya to’e la zaŋa, me bo ya zaŋa.’—Matu 10:8.
Yehowa Sɛɛradoma fabeli fɔɔsi yele mɛ. Se’em woo n boti a naɛ la to pu’usa Naayinɛ wan tara bɔnsoŋa la Naayinɛ ge me nyɔɣɛ zɔsonɔ. Bisɛ Yehowa Sɛɛradoma sɛba n de fɔɔsi n yele sɛla.
Talita Alnashi, n boi Sweden, ka ba’ɛ nyɛta soŋa kɔ’ɔn pɔsɛ a bunbilimen. Zamesɛ baŋɛ a dɔɣereba n eŋɛ se’em zamesɛ en Baabule la, la mabiisi n soŋɛ eŋa la a deodoma se’em.
James Ryan, n boi United States, yuun dela gɔɔŋɔ a bunbilimen ge nyaa ta fɔ pa’asɛ. Zamesɛ baŋɛ sɛla n soŋɛ en ti a nyaa tara pupeelum.
Cynthia Pablo, n boi Philippines, dela gɔɔŋɔ la fua. Mabiisi la yuun eŋɛ la wani ta’an soŋɛ en se’em ma’a ti COVID-19 bã’a la yuun wi’ira la? Kaalɛ zaseŋɔ yele la zuo n de “Congregation Supports Deaf and Blind Sister During Pandemic” baŋɛ ban yuun soŋɛ en se’em.
Bem n soŋeri tɔ ti to ta’an pa’ala ba Baabule la soŋa soŋa?
Braille bii fɔɔsi gɔnɔ. To tari Baabule la za’a mɛ bii ku bɔba ase’a ti la bɔna fɔɔsi gulesegɔ to’ore to’ore poan. (Ho san bɔta ti ho nyɛ yetɔɣum zo’e zo’e n boi fɔɔsi gulesegɔ poan, bisɛ daka la zuo n de “New World Translation La N Boi Fɔɔsi Gulesegɔ Poan Se’em.”) To gɔnɔ zo’e zo’e me boi fɔɔsi gulesegɔ poan mɛ. To me tari la gɔŋɔ n de Learn to Read Braille n wan ta’an soŋɛ sɛba n boti ba zamesɛ fɔɔsi n kaali se’em. Nɛra n nyɛti wan ta’an dekɛ gɔŋɔ wa soŋɛ fua n boti a zamesɛ kaalegɔ.
Ho san bɔta braille gɔnɔ, yele Yehowa Sɛɛradaana bii ho basɛ ti nɛra soŋɛ hɔ ti ho keŋɛ to intanɛt tuuma zɛ’an la ta yeti ho boti la nɛra wa’ana zamesa hɔ Baabule la.
Ho san kɛ̃ jw.org, ve’e yelese’a n wan ta’an ŋmɛ notetakerd maɣezim poan.
To tari la gɔnɔ ti gulesegɔ la ana kãra. Ho me ta’an eŋɛ ti gulesegɔ la n boi to intanɛt tuuma zɛ’an la kãregɛ. To gɔnɔ la zo’e zo’e tari la gulesegɔ n kãregɛ ti sɛba n ka ba’ɛ nyɛta la wan ta’an kaalɛ. Ban maalɛ to jw.org intanɛt tuuma zɛ’an la se’em la zuo, ho ta’an eŋɛ ti gulesegɔ la kãregɛ ti ho ta’an kaalɛ yelese’a n boi bim la. JW Library app la me ta’an basɛ ti gulesegɔ la n boi bim la kãregɛ.
Ho san bɔta gɔnɔ gulesegɔ n ani kãra, yele Yehowa Sɛɛradaana bii ho basɛ ti nɛra soŋɛ hɔ ti ho keŋɛ to intanɛt tuuma zɛ’an la ta yeti ho boti la nɛra wa’ana zamesa hɔ Baabule la.
Ho san kɛ̃ jw.org, ve’e gɔnse’a gulesegɔ n kãregɛ.
Kɔ̃a yetɔɣum. To tari New World Translation Baabule la, kɔ̃a yetɔɣum poan ti la bɔna yetɔɣum n gaŋɛ 200. Leyɛ’ɛsa, to gɔnɔ zo’e zo’e tari kɔ̃a yetɔɣum mɛ. Fɔɔra san bɔna bim, to ni tɔɣɛ pa’alɛ fɔɔra la vuurɛ mɛ.
Ho wan ta’an bisɛ bii ho ve’e kɔ̃a yetɔɣum jw.org bii JW Library app la poan.
Keŋɛ jw.org ta ve’e kɔ̃a yetɔɣum eŋɛ elektronik lɔɣɔrɔ n de wuu screen readers la digital talking book playerse poan ta’an kɛlesa.
Vidiyodoma n tari kɔ̃a n tɔɣeri pa’ala yelese’a n iti vidiyo la poan.f Yehowa Sɛɛradoma maalɛ la vidiyodoma n tari kɔ̃a n tɔɣeri pa’ala yelese’a n iti vidiyo la poan ti la gaŋɛ yetɔɣum 100. Vidiyodoma wa soŋeri nɛreba mɛ ti ba bɔkera Baabule la ge dɔla Baabule la n pa’alɛ sɛla la.
Ve’e vidiyodoma wa n tari kɔ̃a n tɔɣeri pa’ala yelese’a n iti vidiyo la poan la:
Zamesegɔ la laɣesegɔ. To tari tansuga mɛ tingole wa za’a poan ti to laɣesa taaba bakwai woo zamesa Baabule la ge pu’usa Yehowa. Yuunɛ woo, to me ni eŋɛ la laɣesegɔ kãra la laɣesegɔ bibisi zamesa Baabule la. To san wan ŋmɛ vidiyodoma to laɣesegɔ poan, to ni tiregɛ mɛ ŋmɛ kɔ̃a n tɔɣeri pa’ala yelese’a n iti vidiyo la poan ti sɛba n ka nyɛti la ta’an kɛlesa. Sɛba n ka wuni ge me dɛna fɔɔsi san wa’an to zamesegɔ bii to laɣesegɔ na, to ni gurɛ la ba nu’usi ge tara ba nudibisi la tɔɣera bɔ’ɔra ba, ti ba ta’an bɔkɛ ban tɔɣeri sɛla la. To to’oseri nɛra woo soŋa mɛ ge ka gãsera.
Baŋɛ sansɛka la zɛsɛka ti ba wan eŋɛ laɣesegɔ kãra la laɣesegɔ bibisi.
Keŋɛ Yezu Kum Tiirɛ la. La dela to ninmu’urɛ laɣesegɔ yuunɛ la poan.
José Luis Ayala boi la Mexico tiŋa. Ba yuun dɔɣɛ en ti a dɛna la gɔɔŋɔ. Eŋa n yuun ta paɛ yuun 29 la ti a fɔ pa’asɛ. Zamesɛ baŋɛ to zamesegɔ la n soŋɛ en se’em a vom poan ge me baŋɛ lan soŋɛ en se’em ti a ta’an pa’ala nɛreba Baabule la.
a “Sɛba n ka ba’ɛ nyɛta” dela sɛba n ka nyɛti soŋa ge me ka tara tibegɔ. Zaseŋɔ wa poan, “fua” dela mina n kɔ’ɔn ka nyɛta bii mina n ka ba’ɛ nyɛta.
b Yehowa dela Naayinɛ yumɛŋerɛ. (Yooma 83:18) Bisɛ zaseŋɔ yele la zuo n de “Ani N De Yehowa?”
c Basɛ ti nɛra soŋɛ hɔ ti ho keŋɛ to intanɛt tuuma zɛ’an la ta yeti ho boti la nɛra wa’ana zamesa hɔ Baabule la. La dela zaŋa.
d Notetakers dela elektronik lɔɣɔrɔ n tari braille ti ho wan ta’an gulesɛ a zuo ge me tara kɔ̃a yetɔɣum n wan ta’an tɔɣɛ bo ho ti ho me tɔɣɛ hon boti a eŋɛ sɛla. Notetakers me tari la sɛla ti ba yi’ira ku ti Refreshable displays. Refreshable displays wa soŋeri mɛ ti nɛra n ka nyɛti ta’an ni gulesɛ yelebɛa eŋɛ braille la poan. Nɛra san tara Notetaker, la yele ka le pakɛ ti a tara braille gɔnɔ zo’e zo’e.
e Screen readers la digital talking book players dela elektronik lɔɣɔrɔ ti ho wan ta’an gulesɛ sɛla eŋɛ bim, ti la kaalɛ bo ho bii ho tɔɣɛ eŋɛ bim ta’an ni ŋmɛ kelese. Elektronik lɔɣɔrɔ wa soŋeri fɔɔsi mɛ ti ba ta’an ni yu’ɛ keŋɛ zaseŋɔ seko ti ba bɔta.
f Vidiyodoma n tari kɔ̃a yetɔɣum dela kɔ̃a n tɔɣeri pa’ala yelese’a n iti vidiyo la poan.