Kristabia Nari Ti A Ana La Wani?—Baabule La Yeti Bem?

Zina beere wa, nɛreba zo’e zo’e ni ŋmɛ la nyũ’ɔ yeti bamam dela Kristakɔma ge ba ka iti nɛreba soŋa. Basɛba tari la punya’anɛ ge me ka tara yelemɛŋɛrɛ. Basɛba me ni kaɛ la ba luɣerɛ kpɛ’ɛsi poore. Halese’a ti ba tara la ni basɛ ti nɛreba sɔkera yeti: ‘Kristabia nari ti a ana la wani?’

Hon de Kristabia vuurɛ n de sɛla

La dela naana ti nɛra yeti eŋa dela Kristabia. Ge bala ma’a ka seke. Baabule la pa’alɛ ti Kristabia dela mina n de Yezu Krista podɔla. (Tooma 11:26) Yezu mea yuun yeti: ‘Ya san nana mam yelesum wa, ya sirum dela mam podɔleba.’ (Yon 8:31) Yelemɛŋɛrɛ la dela, nɛra ka boi n wan ta’an nana Yezu nɔya la nima nima. Ge Kristabia ni tiregɛ doose la Yezu n pa’alɛ sɛla la ge me tara dɛ tuna tuuma a vom poan. Geele makerɛ ana wa bisɛ.

Kristakɔma ka ti’iseri ba ma’a yele

Yezu n yuun yele sɛla: “Ge nɔpaalese’ere te mam bo ya te ya nɔŋɛ taaba. Wo mam nɔŋɛ ya se’em la, bala me ya sontii ya nɔŋɛ taaba. Ya han nɔŋɛ taaba, nɛra woo wan baŋɛ te ya dela mam dɔlɔba.”—Yon 13:34, 35.

Yezu n yuun eŋɛ sɛla: Yezu yuun nɔŋɛ nɛra woo mɛ la ka pakɛ la ba bɔŋa n ani se’em bii ban yese zɛ’an. A yuun tibɛ la bã’adoma, diisi nɛreba ge me ki bo nɛreba.—Matu 14:14-21; 20:28.

Kristakɔma n iti ba yɛla se’em: Kristakɔma iti pa’ala ti ba ka ti’iseri ba ma’a yele. Ba bo’ori la yɛri yɛri, ka yɛlesa nɛreba ge me dita sugeri. Ba ni soŋɛ sɛba n boi wuŋerɛ poan ge me ni dekɛ yɛla basɛ ta’an soŋɛ nɛreba.—1 Yon 3:16.

Kristakɔma tari la yelemɛŋɛrɛ

Yezu n yuun yele sɛla: ‘Mam dela . . . yelemɛŋɛrɛ la.’—Yon 14:6.

Yezu n yuun eŋɛ sɛla: Yezu yuun tari la yelemɛŋɛrɛ a yetɔɣum la a itigɔ poan. A ka makɛ pã’asɛ nɛreba ti ba eŋɛ sɛla ti a bɔta bii basɛ ti ba sakɛ sɛla n daɣɛ yelemɛŋɛrɛ. Nɛreba yuun mi ti a tari la yelemɛŋɛrɛ. Hali la nɛreba n yuun yaɛ en la, a yuun kelum tara la yelemɛŋɛrɛ.—Matu 22:16; 26:63-67.

Kristakɔma n iti ba yɛla se’em: Kristakɔma ka pareni. Ba yɔɔri ba lampo mɛ, ba ka zuuri ge me yɔɔra ba tuntuneba soŋa. (Arom 13:5-7; Epesus 4:28) Ba ka fãari nɛreba, ba ni ka copy sukuu exams poan, bii parena ba san ɛɛra tuuma.—Hebru 13:18.

Kristakɔma tari la itisoŋɔ

Yezu n yuun yele sɛla: “Ya sɛba woo n tom gee zi tebehegɔ taregɛ, wa’an ya n zen’en na ge n wan bo ya vo’ohogo. Dekɛ ya n yɔka yɔgɛ ya mɛhe ge zamehe ya sɛla n zen’en. Se’ere n sɔe la mam dela nɛremama ana baanlam ge sigehe n mɛŋa n suunre poan. Ya han wa’an n zen’en na, ya wan nyɛ Vo’ohogo. Se’ere n sɔe la, mam yɔka la ka tɔe, mam zeero me ka tebegɛ.”—Matu 11:28-30.

Yezu n yuun eŋɛ sɛla: Yezu yuun ani la mama ge ti la me ka tɔna ti nɛreba lɛna en. A yuun basɛ ti kɔma lɛna en mɛ, buɣela sɛba suure n sa’am la ge me tara gilema bɔ’ɔra nɛreba.—Mark 10:13-15; Luke 9:11.

Kristakɔma n iti ba yɛla se’em: Kristakɔma tɔɣeri la mama bɔ’ɔra nɛreba; ba ka tɔɣeri yetɔɣepɔ̃’ɔsa. (Epesus 4:29, 31, 32) Ba fabeli nɛreba yele mɛ ge me ni bisɛ ban wan eŋɛ se’em ta’an soŋɛ nɛreba.—Galatia 6:10.

Kristakɔma tari la yelemɛŋɛrɛ bɔ’ɔra ba luɣerɛ kpɛ’ɛsi

Yezu n yuun yele sɛla: “Bala te la ka ane soŋa te nɛra se’em yelege sɛba te Na’ayenɛ dekɛ lagom taaba.”—Mark 10:9.

Yezu n yuun eŋɛ sɛla: La boi bim ti Yezu yuun ka tari pɔɣa ge a yuun kpemese sireba la pɔɣeba giila ti ba tara yelemɛŋɛrɛ bɔ’ɔra taaba. (Matu 19:9) A yuun kaɣɛ ba yelese’a n wan ta’an basɛ ti ba sa’am pɔɣedire.—Matu 5:28.

Kristakɔma n iti ba yɛla se’em: Kristakɔma ka iti yelese’a n pa’alɛ ti ba ka bo’ori ba luɣerɛ kpɛ’ɛsi gilema. (Hebru 13:4) Sireba la pɔɣeba tari la nɔŋerɛ la gilema bɔ’ɔra taaba.—Epesus 5:28, 33.