Gɔmɛtdoma Sa’am La Ligeri N Gaŋɛ Dollar Tusa Tusa Tustusa Ayi Zaberɛ Yɛla Poan​—Baabule La Yeti Bem?

Russia n yuun isige zabera la Ukraine la zuo, yuun 2022 poan, gɔmɛtdoma sa’am la ligeri n gaŋɛ dollar tusa tusa tustusa ti ba ta’an soŋɛ zaberɛ wa. Ba ka tabelɛ sa’am ligeri zaberɛ yɛla poan wana. April 2023 ti Stockholm International Peace Research Institute (SIPRI) daa bo lasebaarɛ ti, yuun 2022 poan:

• Europe tisi n daa sa’am ligeri se’em zaberɛ yɛla poan la, “malum pa’asɛ mɛ kɔbega poan 13. Hali se’em ma’a ti zaberɛ yuun bɔna yuuma zo’e zo’e n tole poan la, Europe tisi ka tabelɛ sa’am ligeri bala.”

• Russia…n sa’am ligeri se’em zaberɛ yɛla poan malum pa’asɛ mɛ kɔbega poan 9.2. Wana wa zuo la, tingole wa za’a poan, Russia n nyaa taɣelɛ butã dɛna tinsɛka n sa’ani ligeri paa.”

• Tingole wa za’a poan, America tiŋa n ba’ɛ sa’ana ligeri gana zaberɛ yɛla poan, “se’ere n sɔi la ho san pu ban sa’am ligeri se’em zaberɛ yɛla poan tingole wa za’a poan sugumnɔɔrɛ pia, America ma’a wan sɔna gaŋɛ batã.”

Dr. Nan Tian, n laɣum gulesɛ SIPRI lasebaarɛ la yeti: “Tingole wa za’a poan ti gɔmɛtdoma sa’ana ligeri se’em zaberɛ yɛla poan la pa’alɛ ti to kɔ’ɔn bɔna la tinsɛka poan ti nɛreba ka bɔna fai.”

Baabule la yuun tɔɣɛ biŋe ti tisi n kpe’em wan isige zabera la taaba ge me pa’alɛ tɔ sɛla n wan basɛ ti suma’asum bɔna.

Baabule la yuun tɔɣɛ biŋe ti zaberɛ zo’e zo’e wan bɔna

• Baabule la yeti to boi la ‘ba’asegɔ saŋa la n bala.’​—Daniel 8:19.

• Daniel gɔŋɔ la pa’alɛ ti sankaŋa la, nadoma wan zabera la taaba ti ba baŋɛ se’em n kpe’em gana. Nadoma wa wan ‘zabera,’ bii ba tiregera ti ba baŋɛ se’em n wan nyaŋɛ a tadaana. Ba wan sa’am la ‘sanlema la sanlenpɛɛlesi’ bii ligeri zo’e zo’e ta’an zabɛ nyaŋɛ taaba.​—Daniel 11:40, 42, 43.

Ho san bɔta ti ho zamesɛ baŋɛ Baabule yetɔɣebiŋere wa, bisɛ vidiyo la zuo n de Fulfilled Prophecy​—Daniel Chapter 11.

Sɛla n wan basɛ ti suma’asum bɔna

• Baabule la yeti Naayinɛ wan sa’am asaala gɔmɛt. A ‘wan sɛ na’am n kan makɛ sa’am. Ti nɛra kan soe na’am wa. Ka wan sa’am ge ba’asɛ na’am sɛba woo n boi la ge ti kaŋa ma’a kɔ’ɔn zɛ’a wuusa.’​—Daniel 2:44.

• La kan yue, Yehowaa Naayinɛ wan basɛ ti suma’asum bɔna zɛ’an woo. Wani wani? A saazuo Na’am la wan sa’am zaberɛ lɔɣɔrɔ woo ge me yese gbiregere basɛ.​—Yooma 46:8, 9.

Ho san bɔta ti ho zamesɛ baŋɛ Naayinɛ Na’am la n wan tum tuunse’a, kaalɛ zaseŋɔ yele la zuo n de “Under God’s Kingdom ‘Peace Will Abound.’” (Naayinɛ Na’am La Poan, ‘Suma’asum Wan Ta Bɔna Zɛ’an Woo’)