Beni N Sɔi Ti Baabule Naresum Yɛla Pakɛ Tɔ?

1-2. (a) Baabule la yue paɛ la wani? (b) Beni n sɔi ti Baabule la kelum tara nyuurɔ bɔ’ɔra tɔ?

BAABULE la dela diimi gɔŋɔ. Baabule gɔnseto n deŋɛ nɛŋa ti ba gulesɛ la yue paɛ wuu yuun 3,500. Ba me gulesɛ Baabule gɔnseko n de ki’i la ti la yue paɛ wuu yuun 2,000. La boi bim ti Baabule la dela diimi gɔŋɔ ge “Na’ayenɛ yetɔgom” la n boi bim la soŋeri to mɛ paa. (Heb. 4:12; 2 Tim. 3:​16, 17) Nɛreba zo’e zo’e yeti Baabule la soŋɛ bamam mɛ ti ba ta’an kɔ’ɛ ba puti’irɛ soŋa ge me tara pupeelum.

² La eŋɛ la wani ti Baabule la n de diimi gɔŋɔ la kelum tara nyuurɔ bɔ’ɔra tɔ? La dela yɛla ayi n sɔi. Yia, Baabule la dela gɔŋɔ n ze’ele ‘Yinɛ vɔa’ la zɛ’an. Eŋa n naam sɛla woo ge me tara yɛm gana nɛra woo. (1 Tim. 4:10; Arom 16:​26, 27) Yi’i, Baabule naresum yɛla kɔ’ɔn soŋera to mɛ saŋa woo. Diimi sa ta paɛ zina beere wa, Baabule naresum yɛla kɔ’ɔn soŋera nɛreba mɛ ti ba ta’an maala ba yɛla.

3. Zaseŋɔ wa poan to wan nyɛ la soke ani lebesego?

³ Baabule naresum yɛla dela bem? Beni n sɔi ti Baabule naresum yɛla pakɛ tɔ? To san kaala Baabule la, to wan eŋɛ la wani ta’an baŋɛ naresum yɛla la? Zaseŋɔ wa wan soŋɛ tɔ ti to nyɛ soke ana wa lebesego. To me wan zamesɛ baŋɛ Yezu n yuun soŋɛ nɛreba se’em ti ba bɔkɛ Naayinɛ n geele yɛla se’em.

BAABULE NARESUM YƐLA DELA BEM?

4. Baabule naresum yɛla dela bem?

⁴ Baabule naresum yɛla dela yelekpina n soŋeri tɔ ti to bɔkera Yehowa n geele yɛla se’em. Saŋa ase’a, naresum yɛla wa dela lɔɔdoma. (Mt. 22:37) Yehowa ta’an ni bisɛ bɔŋa la n ani se’em ge bo nɛreba lɔɔ ti ba dɔla. To san bɔkɛ sɛla n sɔi ti Yehowa ni bo lɔɔ, la wan soŋɛ tɔ ti to bɔkɛ Yehowa n geele yɛla se’em, la yelese’a n pakɛ en. Naresum yɛla la n boi Baabule la poan la me ka teeri. (Ym. 119:111) Lɔɔ san puɣum ka pa’alɛ yele wana mɔpi, Baabule naresum yɛla ta’an kelum soŋɛ tɔ ti to bɔkɛ Yehowa n geele yele la se’em.—Isa. 40:8.

5. Bo makerɛ pa’alɛ lɔɔ, la naresum yɛla n boi to’ore to’ore se’em. (Bisɛ fɔɔra la.)

⁵ To geele makerɛ wa ti la soŋɛ tɔ ti to bɔkɛ lɔɔ, la naresum yɛla n boi to’ore to’ore se’em. Pɔka ta’an yele a bia yeti, ‘da kalum kurefoote la.’ Bala dela lɔɔ. Ge naresum yele la bii sɛla n sɔi ti pɔka la yele a bia la bala dela, a san kalum sɛla n tulegɛ, la wan lakɛ en. Naresum yele la dela, la daɣɛ kurefoote ma’a n ta’an lakɛ nɛra. Makerɛ, la ka nari ti to kalum iron bii heater n tulegɛ bii sɛla n yeen tulegɛ, sɛla n sɔi la, la ta’an pɔɣelum tɔ. La daɣɛ to yɛa poan ma’a ti la nara ti to bisɛ tomea soŋa la lɔɣese’a n tulegɛ ge ton yeen bɔna zɛsɛka woo, la nari ti to bisa tomea soŋa. Bia la ti to sɔsɛ a yele la san zo’e kutɛ, a ta’an dekɛ kurefoote la duɣɛ dia. Ge la nari ti a kelum bisa amea soŋa, lan wan eŋɛ se’em ti a da kalum kurefoote la ti la lakɛ en. La boi bim ti a ka le ɛɛra lɔɔ a ma zɛ’an ge a mi ti a san kalum sɛla n tulegɛ, la wan lakɛ en.

BENI N SƆI TI BAABULE NARESUM YƐLA PAKƐ TƆ?

6. (a) Yehowa doli Baabule la poan soŋera to la wani? (b) Yehowa eŋɛ la bem ti la pa’alɛ ti a zu’usɛ to mɛ?

⁶ Yehowa n nɔŋɛ to la zuo ti a bo to lɔɔ ti to dɔla, lan wan eŋɛ se’em ti daaŋɔ da paɛ tɔ. (Yam. 2:11) Leyɛ’ɛsa, a ni soŋɛ to mɛ ti to bɔkɛ naresum yɛla la bii sɛla n sɔi ti a bo to lɔɔ la. Yehowa san puɣum ka bo to lɔɔ yɛla ase’a poan, a kelum dɔla la Baabule la poan pa’ala tɔ ton nari ti to ni kɔ’ɛ to puti’irɛ se’em. Baabule naresum yɛla soŋeri to mɛ ti to ni kɔ’ɛ to puti’irɛ soŋa ge me ita sɛla n nari. Yehowa n bo to naresum yɛla la pa’alɛ ti a zu’usɛ to mɛ ge bo to yɔ’ɔ ti to ta’an ni kɔ’ɛ to puti’irɛ ti la pa’alɛ ti to nɔŋɛ en mɛ ge me bɔta ti to dɔla a pa’alegɔ la.—Ga. 5:13.

7. Bo makerɛ pa’alɛ Baabule naresum yɛla n pakɛ to se’em. (Bisɛ foote la.)

⁷ Geele makerɛ wa bisɛ Baabule naresum yɛla n soŋeri to se’em. Tisi ase’a poan, traffic la palɛ zuo daalesum ase’a n boi ti la nara ti sɛba n tukeri lɔa dɔla. Palɛ zuo daalesum wa zo’e zo’e ni tiɛ dɔlebadoma ti ba mina ti ba san ka doose daalesum la, yele ta’an paɛ ba. Daalesum ase’a ta’an pa’alɛ dɔleba la n nari ti a zɔta se’em, la sansɛka n nari ti a teke. Ge daalesum ase’a ta’an ni pa’alɛ dɔlebadoma ti dɛŋa n boi nɛŋa. Makerɛ, daalesum ase’a ta’an pa’alɛ ti palɛ la zɛ’ɛsi ase’a sɛreseri mɛ bii dusi n ni dɔla bim yakera. Dɔleba n mi tukere san nyɛ daalesum ana wa, a ni bisa la amea soŋa lan wan eŋɛ se’em ti dɛŋa kan paɛ en. Leyɛ’ɛsa, saa san niira, dɔleba la wan bisɛ eŋa n wan tukera se’em ti daaŋɔ da paɛ en. Bala mea, Kristakɔma biseri la bamea soŋa lan wan eŋɛ se’em ti ba kan eŋɛ sɛla ti Baabule la tɔɣɛ giisɛ. Ba me le bisa la bamea soŋa, lan wan eŋɛ se’em ti ba kan eŋɛ sɛla bii ti’isa yelese’a n ka peeri Yehowa puurɛ. Wana pa’alɛ ti la nari ti ba ni ti’isɛ bɔkɛ yele la soŋa ge nyaa ni kɔ’ɛ ba puti’irɛ.

8. Wuu Arom 12:​1, 2 n pa’alɛ se’em la, to san ɛɛra Baabule naresum yɛla, la wan soŋɛ to la wani?

⁸ To san viisa ɛɛra Baabule naresum yɛla ge tara a tuna tuuma, to wan nyɛ nyuurɔ. Makerɛ, Baabule naresum yɛla wan ta’an soŋɛ tɔ ti to bɔkɛ Yehowa n geeli yɛla se’em. To san kaala Baabule la, la nari ti to ni ti’isɛ bisɛ ton wan dekɛ tum tuuma se’em. To san kaala Baabule la, to ta’an soke tomea soke ana wa: Beni n sɔi ti Yehowa basɛ ti ba gulesɛ yele wa? Yele wa wan ta’an soŋɛ mam la wani? To san ita bala, la wan soŋɛ tɔ ti to ‘tara to puti’irɛ gɛɛla yɛla soŋa’ ta’an pu’usa Yehowa. Bala wan soŋɛ tɔ ti to baŋɛ “sɛla te Yenɛ bɔta, [la] yelese’a n ane soŋa ge eta Yenɛ suunre nyɛlom.”—Kaalɛ Arom 12:​1, 2.a

9. To wan le nyɛ la bem nyuurɔ to san tara Baabule naresum yɛla tuna tuuma? (Hebru 5:​13, 14)

⁹ To san tara Baabule naresum yɛla tuna tuuma, bala wan soŋɛ tɔ ti to ta’an tɔɣesa Yehowa. La me wan basɛ ti tomam la Yehowa zɔtɔ nyɔka la kpe’em. (Kaalɛ Hebru 5:​13, 14.) Dɔɣereba ni bo ba kɔma la lɔɔ zo’e zo’e, lan wan eŋɛ se’em ti ba mina sɛla n nari ti ba ita. Kɔma la ta’an yeen dɔla lɔɔdoma la, sɛla n sɔi la ba ka boti ba dɔɣereba dɔlegɛ ba tuba. Ge Yehowa ka bo’ori to lɔɔ zo’e zo’e ti la ana wuu to dela kɔma ge a geele to ti to dela bunkureba. A mi ti to wan doose a pa’alegɔ la ta’an kɔ’ɛ to puti’irɛ soŋa. To me san eŋɛ bala, la ni basɛ ti a puurɛ pee mɛ.—Ym. 147:11; Mag. 23:​15, 26; 27:11.

TO WAN EŊƐ LA WANI TA’AN BAŊƐ BAABULE NARESUM YƐLA?

10. To san kaala Baabule la, to wan eŋɛ la wani ta’an baŋera naresum yɛla la?

¹⁰ To san kaala Baabule la, la nari ti to ti’isɛ baŋɛ naresum yɛla la. Bala wan soŋɛ tɔ ti to bɔkera Yehowa n geeli yɛla se’em, la lan ani en se’em. Sɛla n wan le soŋɛ tɔ ti to ta’an bɔkɛ Baabule naresum yɛla dela to ni ti’isɛ bisɛ sɛla n sɔi ti Yehowa bo lɔɔ la. To san bɔkɛ sɛla n sɔi ti Yehowa bo to lɔɔ, to wan ta’an bɔkɛ Yehowa soŋa. Ge to san bɔta ti to bɔkɛ Naayinɛ n geeli yɛla se’em, la nari ti to ni zusɛ en ti a soŋɛ tɔ ge me ti’isa taɣesa sɛla ti to zamesa la soŋa. (Mag. 2:​10-12) To ta’an soke tomea soke ana wa: ‘Beni n sɔi ti Naayinɛ dekɛ lɔɔ wa bo to? Yehowa san ka bɔta halese’ere, la wan ana en la wani n san ita yelese’a n wɔ̃ni la halese’ere ti a ka bɔta la? Mam zamesɛ la bem yele wa poan ge n wan ta’an dekɛ tum tuuma la wani?’ To san bɔkɛ sɛla n sɔi ti Yehowa bo lɔɔ, la ton wan nyɛ nyuurɔ se’em, bala wan soŋɛ tɔ ti to ta’an kɔ’ɛ to puti’irɛ ti la makɛ la Yehowa n boti sɛla.

11. Sodeni poan ti Yezu pa’alɛ tɔ ton wan ita se’em ta’an baŋera Baabule naresum yɛla? (Bisɛ fɔɔra la.)

¹¹ Yezu n yuun bo a zoore zuo yetɔɣum la, a yuun pa’alɛ ton wan eŋɛ se’em ta’an baŋɛ Baabule naresum yɛla. Basɛ ya ti to geele ya yɛla atã bisɛ. Ba woo poan, Yezu yuun ni pa’alɛ la lɔɔ la n yele sɛla. Ge nyaa ni pa’alɛ sɛla n sɔi ti Naayinɛ bo lɔɔ la bii naresum yelese’ere n boi bim. To san ti’isa taɣesa Yezu n yuun pa’alɛ sɛla la, to wan bɔkɛ ton wan dekɛ naresum yɛla wa tum tuuma se’em. To me wan kelum zamesɛ baŋɛ ton wan ta’an nyɛ nyuurɔ se’em naresum yɛla wa poan.

12. Lɔɔ la n boi Matu 5:​21, 22 la tari la bem naresum yele? (Bisɛ foote la.)

¹² Kaalɛ Matu 5:​21, 22. “Da ko nɛra.” Lɔɔ wa naresum yele ayima dela bem? Yehowa ka boti to dina nɛreba. A ka boti to tɔɣera nɛreba yetɔɣepɔ̃’ɔsa bii to ita ba sɛla n ka ani soŋa. A me ka boti to ti’isa be’em bɔ’ɔra nɛreba. Yezu basɛ ti to baŋɛ ti nɛra ta’an kan ku nɛra ge a san dina nɛra, la pa’alɛ ti a tue lɔɔ wa mɛ. Nɛra san ita “sunsunya la a sɔɔn” bii a tɔɣeri en la yetɔɣepɔ̃’ɔsa, ba wan “ta gankɛ” en. La ni dɛna la sunsɔa, la yetɔɣepɔ̃’ɔsa n ni ta basɛ ti nɛra ku a tadaana.—1 Yo. 3:15.

13. To wan ta’an dekɛ naresum yele la n boi Matu 5:​21, 22 tum tuuma la wani? (Bisɛ fɔɔra la.)

¹³ To wan ta’an dekɛ naresum yele la n boi Matu 5:​21, 22 tum tuuma la wani? Nɛra san eŋɛ to sɛla ti la daam tɔ, la ka nari ti to ugera yɛla. (Mal. 19:18; Yob 36:13) Beni n sɔi? Sɛla n sɔi la, to san ugera yɛla, bala ta’an basɛ ti to tɔɣɛ bii eŋɛ sɛla n pa’alɛ ti to dini nɛra la mɛ. (Mag. 10:12) Makerɛ, bala ta’an basɛ ti to bibisa nɛra la yɛla bɔ’ɔra nɛreba bii to sa’ana a yu’urɛ. (Mag. 20:19; 25:23) Se’em ma’a ti Yezu yuun pa’alɛ ti to da dina nɛreba la, ti intanɛt la fon la kompiita yuun ka boi sankaŋa. Ge Yezu n ka’am to se’em la pa’alɛ ti to da tara to fon bii kompiita tɔɣera nɛreba yetɔɣepɔ̃’ɔsa. Wuu ton kan sakɛ ku nɛra la, bala mea ti to kan tɔɣɛ bii gulesɛ sɛla n wan sa’am nɛra la yu’urɛ.

14. Lɔɔ la n boi Matu 5:​27, 28 la tari la bem naresum yele? (Bisɛ foote la.)

¹⁴ Kaalɛ Matu 5:​27, 28. “Da gan’anrɛ la ho tadaana pɔga bii ho tadaana sera.” Lɔɔ wa naresum yele dela bem? Yehowa ka yaɛ la yalumtuuma ma’a ge a me yaɛ putɛse’a n wan basɛ ti nɛra tum yalumtuuma. Yezu yuun pa’alɛ ti buraa san bisa pɔka n daɣɛ a pɔɣa nyaa ta tara kunkoma’asum la en, a tum la be’em. Bala la, yalum yɛla san wa’an to puti’iren na, la nari ti to eŋɛ kalam yese ba basɛ, hali la san puɣum nara ti to ãregɛ tomea ta’an eŋɛ bala. (Mt. 5:​29, 30) Kristakɔma n de nɛreyɔna me nari ti ba dekɛ naresum yele wa tum tuuma.

15. To wan ta’an dekɛ naresum yele la n boi Matu 5:​27, 28 tum tuuma la wani? (Bisɛ fɔɔra la.)

¹⁵ To wan ta’an dekɛ naresum yele la n boi Matu 5:​27, 28 tum tuuma la wani? La ka nari ti to ti’isa yalumtuuma yɛla. (2 Sa. 11:​2-4; Yob 31:​1-3) Bala pa’alɛ ti Kristabia ka nari ti a bisa yelese’a woo n tari yalumtuuma yɛla. A ka ti’iseri ti eŋa yeen bisera la yalum fɔɔra bala la, la daɣɛ be’em. To me ka ani wuu nɛreba basɛba n ti’isɛ ti yalum fɔɔra ase’a bisega ka tari daaŋɔ la. Yezu saŋa la, fon la kompiita la vidiyodoma yuun ka boi. Ba me yuun ka kɛ’ɛri fɔɔra. Ge Yezu n pa’alɛ to sɛla la basɛ ti to bɔkɛ lan ani Yehowa se’em, to san bisera fɔɔra, la vidiyodoma n tari yalum yɛla. Wana wa basɛ ti to bɔkɛ ti Yehowa puurɛ kan pee la tɔ, to san tɛɣesera bii tɔɣera yalum yɛla bɔ’ɔra nɛreba. Yehowa me ka boti to tɛɣesera yalum fɔɔra bii vidiyodoma n tari yalum yɛla. Naresum yɛla wa wan soŋɛ nɛra la a pɔɣa ti ba tara yelemɛŋɛrɛ bɔ’ɔra taaba. (Ma. 2:15) La me wan soŋɛ to za’a ti to kan eŋɛ sɛla n wan ta basɛ ti to tum yalumtuuma.—Mag. 5:​3-14.

16. Lɔɔ la n boi Matu 5:​43, 44 la tari la bem naresum yele? (Bisɛ foote la.)

¹⁶ Kaalɛ Matu 5:​43, 44. “Nɔŋɛ ho tadaana.” Lɔɔ wa naresum yele dela bem? Yehowa boti la to nɔŋɛ nɛra woo. Ninbaalega yele la dela, Yezu saŋa la, Yudadoma la yuun tuɣum ti’isɛ ti ba nari ti ba nɔŋɛ la ba Yuda tadaandoma ge yaɛ ba dindoma. Ge Yezu yuun mi ti daɣɛ lɔɔ la vuurɛ n bala. Yezu yuun mi ti Yehowa boti la to nɔŋɛ nɛra woo, la ka pakɛ la nɛra la n ze’ele zɛ’an bii eŋa n de buuri sɛka nɛra.—Mt. 5:​45-48.

17. To san tara naresum yele la n boi Matu 5:​43, 44 tuna tuuma, to wan nyɛ nyuurɔ la wani? (Bisɛ fɔɔra la.)

¹⁷ To wan ta’an dekɛ naresum yele la n boi Matu 5:​43, 44 tum tuuma la wani? Ton nɔŋɛ nɛra woo la zuo, to kan dekɛ tomea pa’asɛ zaberɛ poan. (Isa. 2:4; Mik. 4:3) To me san nɔŋɛ nɛreba, to wan ita som bɔ’ɔra ba, la ka pakɛ la ban ze’ele tinsɛka, ba buuri bii ban boi pu’usegɔ seko poan. (Tm. 10:​34, 35) Nɛra me san eŋɛ to sɛla ti la daam tɔ bii a eŋɛ la sɛla ti la daam nɛra ti to mina, ton tari nɔŋerɛ la zuo, to wan di sugeri bo nɛra la.—Mt. 18:​21, 22; Mr. 11:25; Lu. 17:​3, 4.

TIREGƐ TARA BAABULE NARESUM YƐLA TUNA TUUMA

18. (a) La nari ti to tiregɛ eŋɛ la bem? (b) To wan zamesɛ la bem zaseŋɔ seko n taɣelɛ la poan?

¹⁸ Bisɛ to puurɛ n pee se’em la Yehowa n ka bo’ori to lɔɔ zo’e zo’e ti la ana wuu to dela kɔma la! A ni bɔta la to dekɛ Baabule naresum yɛla tum tuuma ta’an kɔ’ɛ to puti’irɛ soŋa. (1 Ko. 14:20) To san bɔta ti to kɔ’ɛ to puti’irɛ, la nari ti to tiregɛ “mina sɛla te Na’ayenɛ bɔta.” (Ep. 5:17) Ton nɔŋɛ Yehowa la zuo, to wan kɔ’ɛ puti’irɛ eŋɛ sɛla ti a bɔta ge daɣɛ ti to zoti la dabeem ti a wan dɔlegɛ to tuberɛ zuo. Ge Naayinɛ le bo to la sɛla n wan soŋɛ tɔ ti to ta’an ni kɔ’ɛ to puti’irɛ soŋa. La dela to putɛkeeŋa la. To wan zamesɛ putɛkeeŋa wa yele zaseŋɔ seko n taɣelɛ la poan.