Kɔ’ɔn Ana Du’a Du’a La Ho Luɣerɛ Kpɛ’a

1. Beni n sɔi ti to wan ta’an yeti, zɔsonɔ dela bo’olum n ze’ele Yehowa zɛ’an?

ZƆSONƆ dela bo’olum n ze’ele Yehowa zɛ’an. (Yam. 1:17) Ba nɔŋɛ Naayinɛ mɛ ge me nɔŋɛ tɔ. Ba boti la to tara pupeelum ge me ni buɣelɛ to suure, to suure san sa’am. La yele me san pakɛ, ba ni ka’am to mɛ. Ba tari la yelemɛŋɛrɛ ge ti to me wan ta’an dekɛ tomea delum ba. Zɔsonɔ sirum basɛ ti to tara la “popeelom”!—Mag. 27:9.

2. Beni n sɔi ti la yele pakɛ ti nɛra la a pɔɣa kɔ’ɔn ita yelese’a n wan basɛ ti ba zɔtɔ nyɔka la kpe’em? (Matu 19:6)

² La yele pakɛ mɛ ti nɛra la a pɔɣa dɛna zɔsonɔ paa. La nari ti ba tiregɛ basɛ ti ba zɔtɔ nyɔka la kpe’em. Ba san ka basɛ ti ba zɔtɔ nyɔka la kpe’em, la ta’an ana sira la, bii pɔɣa la wuu a boi la a ma’a la. Bala ta’an basɛ ti ba sunsɔa nyie la taaba, ti ba ka tara pupeelum. Ba san ita yelese’a n wan basɛ ti ba zɔtɔ nyɔka la kpe’em, la wan basɛ ti ba ana du’a du’a la taaba. (Kaalɛ Matu 19:6.) Zaseŋɔ wa poan, to wan sɔsɛ nɛra la a pɔɣa n wan ita se’em ti ba zɔtɔ nyɔka la kpe’em. Ge basɛ ya ti to deŋɛ ya nɛŋa sɔsɛ, nɛreyone n wan eŋɛ se’em ta’an nyɛ luɣerɛ kpɛ’a ti a kɔ’ɔn dɛna a zɔsonkɔ.

HON WAN EŊƐ SE’EM TA’AN NYƐ SIRESONKƆ BII PƆƔESONKƆ

3-4. Bem n wan soŋɛ mabia ti a ta’an nyɛ pɔɣesonkɔ bii siresonkɔ? (Magaha 18:22)

³ To san bɔta ti to kɔ’ɛ to puti’irɛ ninmu’urɛ yele poan, la nari ti to ti’isɛ daaŋɔ seto la nyuurɔ seto ti to wan nyɛ. Ton ni kɔ’ɛ to puti’irɛ se’em la ta’an tee to vom. Bala la, la nari ti to ni ti’isɛ soŋa ge nyaa kɔ’ɛ to puti’irɛ sɛla ti to yeti to eŋɛ la poan.

⁴ To san ɛɛra luɣerɛ kpɛ’a, la dela ninmu’urɛ yele paa. Sɛla n sɔi la, ho luɣerɛ kpɛ’a la n wan dɛna ho zɔsonkɔ ho vom poan. Yehowa n basɛ ti pɔɣedire bɔna la zuo, la nari ti to dɔla a pa’alegɔ to san ɛɛra luɣerɛ kpɛ’a. Yehowa boti la buraa nyɛ pɔɣesonkɔ ge me bɔta ti pɔka me nyɛ siresonkɔ. Yehowa n mi sɛla n ani soŋa bɔ’ɔra tɔ. (Kaalɛ Magaha 18:22; Isa. 48:​17, 18) Baabule naresum yɛla ta’an soŋɛ Kristabia ti a nyɛ mina n makɛ bo en.

5. Beni n sɔi ti la yele pakɛ ti ho di bii ele mina n pu’useri Yehowa?

⁵ To san muse ko’om, to nyaa ni dɛna la Naayinɛ zɔdoma. (Ym. 25:14) Ho san bɔta ti ho di pɔɣa bii ele sira, la nari ti ho bisɛ mina n pu’useri Yehowa. (1 Ko. 7:39) Ho san eŋɛ bala, la pa’alɛ ti ho doli la Yehowa pa’alegɔ. Ho me wan baŋɛ ti ho luɣerɛ kpɛ’a la dela bo’olum n ze’ele Yehowa zɛ’an. (Mag. 19:14) Ho me san ka di bii ele se’em n ka pu’useri Yehowa, bala wan gu ho ti yɛla kan paɛ hɔ. (2 Ko. 6:14) Hali ho san puɣum ka nyɛ mabia ti ho wan di bii ele, da makɛ ti’isɛ ti ho di bii ele mina n ka pu’useri Yehowa. La me ka nari ti ho ti’isa ti ho san lɛɣera mina n ka pu’useri Yehowa, bala ta’an basɛ ti a zamesɛ yelemɛŋɛrɛ la.

6-7. Ho san lɛɣera nɛra, bem yɛla n nari ti ho soke homea?

⁶ Yelemɛŋɛrɛ, daɣɛ mina n muse ko’om woo n nari ti ho di bii ele en. Ho san nyɛ mabia bɔta, ho ta’an soke homea yeti: ‘A iti a yire nɛreba la wani? A ti’iseri nɛreba yele ge bɔ’ɔra gilema? Nɛrebani n de a zɔdoma? A ni eŋɛ la wani, nɛra san bo a puti’irɛ yele poan ti la ka makɛ la eŋa n ti’iseri sɛla la? A ni pɛ̃regera nɛreba ti ba doose la eŋa n boti sɛla, bii nɛreba san yele sɛla ti la ka makɛ la a puti’irɛ ge ti la me ka giisɛ Baabule la, a wan sakɛ doose? A geele ligeri yele la wani?’

⁷ Ho me ta’an le soke homea yeti: ‘Se’em ti mam bɔta la eŋɛ pa’alɛ ti a nɔŋɛ Yehowa? A dela mina n tiregeri ti a dekɛ ‘halepaalega la yɛ’? A wan nyaŋɛ soŋɛ mam ti n ta’an pu’usa Yehowa soŋa? Eŋa n tari puti’irɛ ti a tum sɛla Yehowa pu’usegɔ poan la makɛ mɛ la mam n boti sɛla la? To wan ta’an dɛna zɔsonɔ ge me ana du’a du’a la taaba?’ (Kol. 3:​9, 10) Ho san dɛna pɔka, ho ta’an soke homea yeti, mabia la ti mam bɔta la wan ta’an dɛna n zɔsonkɔ la siresonkɔ? (1 Ko. 11:3) Ho me san dɛna buraa, ho ta’an soke homea yeti, mabia la ti mam lɛɣera la wan nana mam ti n dɛna a zuodaana hali la n tuure la? La ta’an yue ge ti ho nyaa baŋɛ yele ana wa. Bala la, ya san lɛɣera taaba, dekɛ ya sankaŋa ta’an baŋɛ taaba soŋa.

8-9. Ho san bɔta nɛra, bem n wan soŋɛ hɔ ti ho ta’an kɔ’ɛ ho puti’irɛ soŋa? (Bisɛ foote la.)

⁸ Ho san bɔta nɛra, la nari ti ho tiregɛ baŋɛ nɛra la soŋa. Bala n wan soŋɛ hɔ ti ho ta’an kɔ’ɛ ho puti’irɛ soŋa. Viisɛ baŋɛ nɛreba n geele mabia la ti ho bɔta la se’em. Ho ta’an soke baŋɛ a hala n ani se’em, la eŋa n iti a yɛla se’em. Makerɛ, nɛreba mi en ti a dela mina n siregeri amea, tara itisoŋɔ ge me tara bɔkerɛ? Mabia Sarah n ze’ele French Guiana ti a sira yu’urɛ dɛna Daniel yeti: “Mam daa soke la mabiisi baŋɛ Daniel n de nɛresɛka taaba. Makerɛ, mam daa soke la mabisɛka n naɛ la en kɛ̃’ɛra, a tansugere keema, to zɔdoma sɛba n mi to soŋa, la mabipɔɣesi n boi a tansugere la poan.” Ho ta’an soke mabia la ti ho bɔta la nyaa sɛla tabelɛ eŋɛ a vom poan ti la nara ti ho mina? La yele pakɛ mɛ ti ho mina yele ana wa, sɛla n sɔi la yele aŋa wa ase’a ta’an ta basɛ ti daaŋɔ bɔna pɔɣedire la poan.

⁹ Daanse’ere yɛla ase’a ta’an basɛ ti ho tara puti’ira ayi ayi ti se’em ti ho bɔta la ta’an kan dɛna siresonkɔ bii pɔɣesonkɔ. Bii daanse’ere mabiisi n yele ho sɛla ti ba nyɛ nɛresɛka ti ho bɔta la zɛ’an ti la ka ana soŋa. La san dɛna bala, ti’isɛ yele aŋa wa bisɛ soŋa soŋa. Ho san eŋɛ bala, la wan soŋɛ hɔ ti ho baŋɛ nyaa ho kelum bɔta nɛra la bii ho basɛ en.a Nananawa, to wan sɔsɛ nɛra la a pɔɣa n wan eŋɛ se’em ta’an ana du’a du’a la taaba.

NYƐTA YA NƐŊA ITA YELESE’A N WAN BASƐ TI YA ANA DU’A DU’A LA TAABA

10. Beni n sɔi ti la ana soŋa ti nɛra la a pɔɣa nyɛta nɛŋa bɔ’ɔra taaba?

¹⁰ Nɛra la a pɔɣa ta’an basɛ ti ba pɔɣedire la ana soŋa, ba san nyɛta nɛŋa bɔ’ɔra taaba la ka pakɛ la ba tuuma n zo’e se’em. Wana wan bo ba yɔ’ɔ ti ba sɔsɛ sɛla n eŋɛ dabeserɛ la poan, sɔsɛ sɛla n bo ba suuren, naɛ taaba dɛ’ɛna ge me eŋɛ pa’alɛ ti ba nɔŋɛ taaba.

11. Bem n ta’an sa’am nɛra la a pɔɣa bɔnsoŋa la?

¹¹ Nɛra la a pɔɣa san ana du’a du’a la taaba, ba ni ka bɔta ti ba zãara la taaba. Yelemɛŋɛrɛ la dela, la daɣɛ saŋa woo ti ba wan ta’an kɔ’ɔn bɔna la taaba. Ge ba san zãɛ la taaba ti la yue, la ta’an dɛna dɛ̃ŋa. Makerɛ, nɛreba basɛba ni keŋɛ la tiŋa kayima ta tuna ge basɛ ba deodoma ti la yue. Bala ta’an basɛ ti ba nyɛ ligeri ge ba san zãɛ la taaba ti la yue, bala ta’an ta’asɛ yeledaaŋɔ zo’e zo’e ba pɔɣedire la poan.

12-13. (a) Mabiisi basɛba eŋɛ la wani ta’an nyɛta nɛŋa bɔ’ɔra ba luɣerɛ kpɛ’a? (Bisɛ foote la.) (b) La nari ti hon la ho luɣerɛ kpɛ’a la bɔŋa la yele pakɛ ho la wani? (Bisɛ daka la zuo n de “Ho Luɣerɛ Kpɛ’a Yele Nari Ti La Pakɛ Ho La Wani.”)

¹² Bisɛ nɛreba basɛba, la ba pɔɣeba n iti se’em ta’an nyɛta nɛŋa bɔ’ɔra taaba. Leah n ze’ele Guam yeti: “Mam la mam sira nɔŋɛ la to naɛ taaba ita yɛla to’ore to’ore. Nɛra me san beem to, to za’a n ni laɣum keŋɛ.” Roxanne n ze’ele United States me yeti: “To tuuma n zo’e la zuo, to ni te’ele loe la sansɛka ti to wan nyɛta nɛŋa sɔsera ge ita yɛla ase’a.” (Dekɛ makɛ Amos 3:3.) Damien, n ze’ele France yeti: “mam ni zamesɛ baŋɛ la mam pɔɣa n boti sɛla ti eŋa me zamesɛ baŋɛ mam n boti sɛla. Bala me ta’an ni basɛ ti mam nɔŋɛ eŋa n boti sɛla ti eŋa me nɔŋɛ mam boti sɛla.” (Mt. 7:12) Katie me n ze’ele United States yeti: “Saŋa ase’a to ni dekɛ to fondoma la biŋe zãɛ mɛ, la wan eŋɛ se’em ti to ta’an sɔsa la taaba ge ti sɛla kan burena to puti’irɛ.”

¹³ Sɛla n gani za’a dela, nɛra la a pɔɣa nari ti ba naɛ taaba ita yelese’a n wan basɛ ti ba ana du’a du’a la Yehowa. Myriam n ze’ele France yeti: “Tomam san isige bulika, to ni kaalɛ la Baabule la ge nyaa ni sɔsɛ ton zamesɛ sɛla, la ton wan ta’an dekɛ tum tuuma se’em. Mam nɔŋɛ bala mɛ paa.” Myriam le yeti: “Mam ni nɔŋɛ la n naɛ la n sira zusa, sɛla n sɔi la mam puurɛ ni pee mɛ la mam n ni wuna eŋa n tɔɣeri se’em ti la pa’alɛ ti a nɔŋɛ Yehowa la.” Katie ti to puɣum tɔɣɛ a yele la yeti: “Sɛla n bo’ori mam la n sira pupeelum paa dela ton ni naɛ taaba bɔna na’am mɔɔlegɔ poan la. To puurɛ me ni pee mɛ la ton wuni taaba n tɔɣeri Yehowa yɛla bɔ’ɔra nɛreba la. La me basɛ ti to malum baŋera la taaba pa’asa.”—Mag. 27:17.

ANA YA DU’A DU’A LA TAABA YELEDAAŊƆ SAN PUƔUM BƆNA YA PƆƔEDIRE LA POAN

14-15. Beni n sɔi ti nɛra la a pɔɣa nara ti ba tiregɛ maalɛ yeledaaŋɔ se’a n boi ba pɔɣedire poan la? Bo makerɛ.

¹⁴ Ton ka di mi’a la zuo, nɛra la a pɔɣa wan tara yeledaaŋɔ ba pɔɣedire la poan. Baabule la pa’alɛ ti nɛra la a pɔɣa wan ba’asum nyɛ “daaŋseko n boe . . . pɔgɔdire poan.” (1 Ko. 7:28) Baabule la n yele sɛla la pa’alɛ la daaŋɔ seto n paari nɛreba la ba pɔɣeba. Daaŋɔ san bɔna, beni n sɔi ti la nara ti ba ana du’a du’a la taaba ge maalɛ yeledaaŋɔ la?

¹⁵ Geele makerɛ wa bisɛ. Yisonɛ san sa’am, se’em n sɔi yire la wan ba’asum bɔta ti a maalɛ ka. Daanse’ere, la wan nara ti a dekɛ ligeri la saŋa zo’e zo’e ge ta’an maalɛ ka. Beni zuo? Sɛla n sɔi la, yire la tari la tuulum bɔ’ɔra en. Bala mea nɔɔ ti pɔɣedire dɛna tuulum. Hali nɛra la a pɔɣa san puɣum tara bɔnsoŋa, ba wan kelum nyɛ daaŋɔ ba pɔɣedire poan. Wuu yire n sa’am ti ba ta’an malum maalɛ ka se’em la, bala mea ti nɛra la a pɔɣa wan ta’an maalɛ yeledaaŋɔ se’a n bo ba pɔɣedire poan la. La wan nara ti nɛra la a pɔɣa tiregɛ ta’an maalɛ yeledaaŋɔ se’a n boi ba pɔɣedire la poan la. La me ta’an yue fii ge ti ba nyaŋɛ eŋɛ bala ge Yehowa puurɛ wan pee ba san tiregera ti ba tara bɔnsoŋa la taaba. (Ma. 2:16) Ba san ita bala, la pa’alɛ ti ba tari la nɔŋerɛ la gilema bɔ’ɔra taaba. La me le pa’alɛ ti ba tari la nɔŋerɛ la gilema bɔ’ɔra Yehowa, se’em n basɛ ti pɔɣedire bɔna la.

16. Wuu 1 Korint 13:​4-8a n pa’alɛ se’em la, bem n wan soŋɛ nɛra la a pɔɣa n tari yeledaaŋɔ ba pɔɣedire poan? (Bisɛ foote la, la daka la zuo n de “Yelese’a N Wan Soŋɛ Hɔ Ti Ho Ta’an Tara Bɔnsoŋa La Ho Luɣerɛ Kpɛ’a.”)

¹⁶ Daaŋɔ san bɔna ho pɔɣedire poan, da ita kãbi kãbi ti ya yelese. (1 Ko. 7:​10, 11) Ge soke homea yeti, ‘Mam wan eŋɛ la bem pa’asɛ ti la basɛ ti mam la n luɣerɛ kpɛ’a la tara bɔnsoŋa n kpe’em?’ Zamesɛ Baabule la n pa’alɛ nɔŋerɛ yele se’em la ge ti’isɛ bisɛ hon wan eŋɛ se’em ta’an tara nɔŋerɛ zo’e zo’e wuu 1 Korint 13:​4-8a n pa’alɛ se’em la. (Kaalɛ 1 Korint 13:​4-8a.) Da ti’isa ti ho basɛ ho luɣerɛ kpɛ’a la. Ge tuɣum ti’isɛ bisɛ hon wan eŋɛ se’em ta’an ana du’a du’a la en. Da ti’isa ti ho luɣerɛ kpɛ’a la n nari ti a eŋɛ teere ge tuɣum ti’isɛ bisɛ hon nari ti ho eŋɛ yelese’a ti ya ta’an tara bɔnsoŋa. Kaalɛ tigere la gɔnɔ ge bisɛ vidiyodoma ti la soŋɛ hɔ. Ho me ta’an yele keendoma bii mabiisi n tari Baabule pa’alegɔ tuna tuuma ba pɔɣedire poan ti ba soŋɛ hɔ. Ya san kɔ’ɔn dekɛ yamea delum Yehowa ge basɛ ti a pa’asɛ ya poan ti ya ana wuu “mi’an n ta botan,” ya pɔɣedire la wan kpe’em.—Pa. 4:12.

17. Nɛreba la ba pɔɣeba, la sɛba n tari puti’irɛ ti ba ele bii di pɔɣeba la wan eŋɛ la wani tara pupeelum?

¹⁷ Yehowa boti la a yamesi za’a tara pupeelum. A me boti la nɛreba la ba pɔɣeba, la sɛba n tari puti’irɛ ti ba ele bii ba di pɔɣeba tara pupeelum. Bala la, ho san dɛna nɛreyone ge bɔta ti ho ele bii di pɔɣa, ma’ɛ homea bisɛ mina n wan ta’an dɛna siresonkɔ bii pɔɣesonkɔ. Ho me san di pɔɣa bii ho ele mɛ, bisɛ hon wan ita yelese’a ti hon la ho luɣerɛ kpɛ’a la ana du’a du’a la taaba. Tiregɛ dekɛ homea delum Yehowa ti a soŋɛ hɔ ti ho ta’an maalɛ yeledaaŋɔ se’a n boi ho pɔɣedire la poan la. Ho san ita yele ana wa, la wan soŋɛ hon la ho luɣerɛ kpɛ’a la ti ya dita “vom nyɛlom”!—Pa. 9:9.