Kɔ’ɔn Tara Putɛsonɛ Yeletoo San Paɛ Hɔ

1-2. La nari ti to eŋɛ la bem ta’an ŋmibe yeledaaŋɔ poan? (Bisɛ foote la.)

HON pu’useri Yehowa la zuo, nɛreba tuni ho ŋmɛlema tuuma, bii yaɛ hɔ? Bii ho yidoma n giiseri hɔ? Bã’asi n daani hɔ bii kuregerɛ n paɛ hɔ? Bii daanse’ere ho nɛra n ki bii yele n paɛ hɔ? “Daaŋɔ, la sunsagaŋɔ” ta’an paɛ hɔ wuu lan paari Yehowa yamesi zo’e zo’e se’em la.—Ym. 90:10.

² Yeledaaŋɔ san paɛ tɔ, la nari ti to geele de wuu Yehowa n geele de se’em la. Bala wan soŋɛ tɔ ti to ta’an ŋmibe. To wan eŋɛ la wani ta’an eŋɛ bala? To geele ya makerɛ wa bisɛ: To ta’an dekɛ to daaŋɔ la makɛ la yelese’a n boi sore zuo n wan ta’an basɛ ti dɛŋa paɛ nɛra n tukeri loore. Dɛŋa la n ani se’em la zuo, la ta’an nara ti dɔleba la ŋmɛregɛ bii a zɔta fii fii bii a teke loore la. La nari ti a nyɛ dɛŋa la soŋa soŋa ge ta’an baŋɛ eŋa n nari ti a eŋɛ sɛla. Ho loore nɛŋa biseŋa san dɛ̃ɣɛ, ho kan ta’an nyɛ dɛŋa la soŋa. Bala mea, to san bɔta ti to nyaŋɛ ŋmibe yeledaaŋɔ poan, la nari ti to gɛɛla yɛla wuu Yehowa n geele yɛla se’em la. Zaseŋɔ wa poan to wan sɔsɛ (1) ton wan gɛɛla yeledaaŋɔ se’em, (2) daaŋɔ sɛka n wan ta’an paɛ tɔ to san ka bisɛ yele la soŋa, la (3) yelese’a ti la nara ti to ita ta’an tara putɛsonɛ yeledaaŋɔ san paɛ tɔ.

LAN NARI TI TO GƐƐLA YELEDAAŊƆ SE’EM

3. Beni n sɔi ti to kan nyaŋɛ li’ise yeledaaŋɔ?

³ To kan ta’an li’ise yeledaaŋɔ. Ton ka di mi’a ge ti Sitaana me bisa tingɔŋɔ wa la zuo, yeledaaŋɔ paari to mɛ. Leyɛ’ɛsa, tingɔŋɔ wa n pɔ̃ri ba’asegɔ la zuo yeledaaŋɔ zo’e zo’e wan paara tɔ. Yeledaaŋɔ ase’a dela, tinmiiŋo, ko’om n uke yɛa, la bugum. Nɛreba tuunfɛ’ɛsa me ta’an ni basɛ ti daaŋɔ paɛ nɛreba basɛba. (Mt. 24:8; 2 Tim. 3:13) Yehowa san maalɛ yeledaaŋɔ ana nananawa, la wan ana wuu Yehowa soŋeri la Sitaana ti a bisera tingɔŋɔ wa. Sitaana n biseri tingɔŋɔ wa la zuo, la ka boi ti yeledaaŋɔ kan paɛ tɔ.—Pa. 9:12.

4. Bem yeledaaŋɔ n le paara Kristakɔma?

⁴ Ton nani Yezu la zuo, yeledaaŋɔ ase’a n le paara tɔ. Yezu yuun ni yɛta a podɔleba ti ban nani eŋa la zuo, nɛreba wan yaɛ ba. (Mt. 24:9; Yon 16:2) Ton mi bala la zuo, se’em ma’a ti wuŋerɛ paɛ tɔ, la ni ka eŋɛ to pakerɛ bii la basɛ ti to sakerɛ ma’ɛ. (1 Tes. 3:​3, 4) To san ŋmibe ge tara sakerɛ, la pa’alɛ ti to kɔ’ɔn bɔna la vom sore la poan ge ti Yehowa wan basɛ ti to ta vɔna daarewoo. Leyɛ’ɛsa, to le pa’alɛ ti to loe ti to pu’usa la Yehowa, sɛla n sɔi la eŋa n de bisegadaana n di mi’a ge ti Sitaana dɛna pumpɔrema. Sitaana parum ti nɛresaaleba ka nɔŋɛ Naayinɛ ge sɛla n sɔi ti ba pu’usa en dela bamam n nyɛti sɛla a zɛ’an la zuo. Sitaana ni basɛ ti la wuna Yehowa yamesi mɛ ti a ta’an pa’alɛ ti la san wuŋɛ tɔ, to kan tara yelemɛŋɛrɛ bɔ’ɔra Yehowa. (Yob 1:​9-11) Ton nɔŋɛ Yehowa la zuo, to san ŋmibe, la ni basɛ ti Yehowa puurɛ pee mɛ.—Mag. 27:11.

5. To wan ta’an zamesɛ la bem Pa’ala 7:​13, 14 poan? (Bisɛ fɔɔra la.)

⁵ Yehowa bo la yɔ’ɔ ti yeledaaŋɔ bɔna. Yehowa ka tuni putotuuma bii a tara yelebe’ero makera to bisa. (Yam. 1:13) Ge Naba Solomon yuun gulesɛ yeti, “nɔyalegerɛ dabeha la” dela “Yenɛ tooma.” (Kaalɛ Pa’ala 7:​13, 14.) Bala ka pa’alɛ ti Yehowa n basɛ ti yelebe’ero ita ge a yeen bo la yɔ’ɔ ti la ita. To wan ta’an zamesɛ la bem Solomon n yuun tɔɣɛ sɛla ti la bɔna Pa’ala 7:​13, 14 la poan? Yia, la nari ti to mina ti ton boi Sitaana tingɔŋɔ wa zuo, saŋa ase’a to puurɛ wan pee ge ti saŋa ase’a to suure me wan sa’am. To puurɛ san pee, to wan ta’an pɛ̃ɣɛ Yehowa sɛla sɔi la, la dela bo’olum n ze’ele Yehowa zɛ’an. Yi’i, Solomon basɛ ti to baŋɛ ti “asaala kan baŋɛ sɛla n ye beere na.” Nɛreba kan ta’an baŋɛ nyaa la wan ana soŋa bii la kan ana soŋa. Yeledi’ima paari tontɔɔdoma mɛ la sɛba n daɣɛ tontɔɔdoma.

6. Beni n sɔi ti Yehowa bo yɔ’ɔ ti yeletooro paara tɔ? (Hebru 12:​7, 11)

⁶ To san geele to yeledaaŋɔ la wuu Yehowa n geele de se’em la, to wan bɔkɛ ti Yehowa boti la to dekɛ tomea delum en ge daɣɛ to bisɛ nam tomea. Yehowa nyɛti yeletooro se’a n paari to la ge me fabela to yele. Hali to san puɣum bɔna “nyɔnpɔnhega poan,” Yehowa wan kelum pa’ala tɔ ge basɛ ti to baŋɛ ti a nɔŋɛ tɔ. A me wan bo to paŋa ti to ta’an ŋmibe. (Ym. 23:4) Yeledaaŋɔ san paɛ tɔ, la ta’an soŋɛ tɔ ti to baŋɛ to inbuulegɔ. Bala me wan basɛ ti to zusɛ Yehowa ti a soŋɛ tɔ ti to ta’an eŋɛ teere. (Kaalɛ Hebru 12:​7, 11.) Makerɛ, Yob yuun nari ti a tiregɛ tara sirege n mea pa’asɛ. Daɣɛ Yehowa n yuun basɛ ti yeledaaŋɔ la paɛ Yob ge a yuun doose yeledaaŋɔ la poan soŋɛ Yob ti a zamesɛ la yɛla zo’e zo’e. (Yob 42:​1-6) To kɔ’ɔn tara sakerɛ ti Yehowa san bo yɔ’ɔ ti yeletooro paara tɔ, a wan soŋɛ tɔ ti to tara yelemɛŋɛrɛ bɔ’ɔra en ge me wan kã bo to.—Arom 8:​35-39.

7. Beni n sɔi ti to wan ta’an tara pupeelum, ba san puɣum yaɛ tɔ to sakerɛ zuo?

⁷ To wan ta’an tara pupeelum yaarɛ poan. Yaarɛ san paara hɔ ho sakerɛ la zuo, da ti’isa ti Yehowa ka nɔŋɛ hɔ. Ge la tuɣum pa’alɛ ti Yehowa nam bo ho mɛ. (Mt. 5:​10-12) Ho san tara putɛsonɛ ge ti nɛreba puɣum yaɛ hɔ, ho wan ta’an tara pupeelum la gilema wuu lan yuun ani tuntuneba la se’em la. (Tm. 5:​40-42) Leyɛ’ɛsa, bala wan basɛ ti ho ta’an soŋɛ sɛba n daɣɛ Yehowa yamesi ti ba zamesɛ baŋɛ yelemɛŋɛrɛ la ge me “pɛngɛ Na’ayenɛ.” (1 Pe. 2:12) Ti’isɛ Yosef yele la bisɛ. Yehowa yuun soŋɛ en mɛ ge kã bo en hali la se’em ma’a ti a yuun bɔna sarega la. Yehowa me wan ta’an eŋɛ bala bo to, yeletooro san paara tɔ.—Pin. 39:​3, 23.

8. Bem yele n ta’an le kpemese to giila ti to ta’an ŋmibera yeledaaŋɔ poan?

⁸ Yeledaaŋɔ se’a n paari to la wan tole. Yob yele la basɛ ti to baŋɛ ti daaŋɔ seto n paari to la wan tole. Hali, “Na’ayenɛ [yuun kã] bahɛ Yob pooren dabeha la gana a yia, dabeha la.” (Yob 42:12) Bala mea, Yehowa wan kã bo to tinpaalega la poan ti la ka tara makerɛ. Daaŋɔ seto n paari tɔ nananawa ka seke sɛsɛla, to san dekɛ makɛ la daarewoo vom la ti to wan ta nyɛ tinpaalega la poan la. Wana wa nari ti la kpeŋe to giila ti to kɔ’ɔn ŋmibera ta paɛ ba’asegɔ.—Mt. 24:13.

TO SAN KA GƐƐLA YƐLA WUU YEHOWA N GEELI YƐLA SE’EM LA, LA WAN TA’AN DAAM TƆ

9. To san ka tara putɛsonɛ la to yeledaaŋɔ la, bala wan ta’an daam to la wani?

⁹ La ka pakɛ la yeletooro se’a n paari tɔ, la nari ti to tara putɛsonɛ lan wan eŋɛ se’em ti to kan basɛ ti yɛla ba’ɛ kpe’em bo to. Makerɛ, to ta’an ti’isa ti Yehowa n basɛ ti yeledaaŋɔ la paɛ tɔ. La yuun ta paɛ la beense’ere ti Yob yuun ti’isa ti Yehowa n ta’asɛ a yeledaaŋɔ la, bala yuun basɛ ti a “behɛ nam a mɛŋa [gana Naayinɛ].” (Yob 32:2) Bala mea ti Naomi me yuun zɛregɛ Yehowa la yeletooro la n yuun paɛ en la. (Arut 1:​13, 20, 21) Yob la Naomi yuun san ba’ɛ ti’isa ti Yehowa n basɛ ti la wuna ba, bala yuun ta’an basɛ ti ba sunsɔa nyie ti ba basɛ Yehowa pu’usegɔ. (Mag. 19:3) Ge, Yehowa yuun soŋɛ ba mɛ ti ba tara putɛsonɛ la yelese’a n paari ba la ge me kã bo ba la ban tari yelemɛŋɛrɛ la.

10. Yeledaaŋɔ san paɛ tɔ, la ta’an basɛ ti to ti’isa la bem?

¹⁰ Hali to san puɣum mina ti la daɣɛ Yehowa n ta’asɛ to yeledaaŋɔ la, to ta’an ti’isa ti daanse’ere a ka fabeli to yele. To san ti’isa bala, la wan ta’an kɔ’ɔsɛ to giila. (Mag. 24:10) Yeletooro n yuun paɛ Naba David, la nɔdɛ’ɛsa Habakuk la, bala yuun basɛ ti ba ti’isa ti Yehowa nɔn keleseri ba zusega? (Ym. 10:1; Hab. 1:2) Ge la bala za’a, ba yuun kelum zusera Yehowa mɛ. Yehowa yuun lebese ba zusega la mɛ ge me soŋɛ ba. A me wan soŋɛ hɔ.—Ym. 10:17.

11. To san ka tara putɛsonɛ la yelese’a n paari to la, la wan ana to la wani?

¹¹ To san ka tara putɛsonɛ la yelese’a n paari to la, to ta’an ti’isa ti Yehowa ka nari ti a bo yɔ’ɔ ti yeletooro paara tɔ. Bala la, la ta’an eŋɛ to pakerɛ yeletoo san paɛ tɔ. (1 Pe. 4:12) La yuun kpe’em bo Yezu podɔleba mɛ ti ba sakɛ ti ba wan mɛlesɛ Yezu. (Lu. 18:​33, 34) La boi bim ti Yezu yuun yele a podɔleba ti ba wan mɛlesɛ en ti a ki ge tuntuna Peter yuun ti’isɛ ti Naayinɛ kan bo yɔ’ɔ ti Yezu namesɛ ta ki. Yezu yuun mi ti putɛdena ta’an kɔ’ɔsɛ a giila ti a kan tum Naayinɛ n boti sɛla la, bala la a yuun zɛregɛ Peter mɛ. (Mr. 8:​31-33) Hali Naayinɛ n yuun isige Yezu kum poan la, a podɔleba yuun kelum ka bɔkɛ sɛla n sɔi ti ba ku Yezu. Ge Yezu yuun nɔŋɛ ba mɛ ge soŋɛ ba ti ba bɔkɛ. A yuun dekɛ la sɛla n boi “Yenɛ gɔŋɔ la” poan la, pa’alɛ ba ti ba bɔkɛ sɛla n sɔi ti a namesɛ ta ki. (Lu. 24:​25-27, 32, 44-48) Yezu podɔleba la n yuun ti’isɛ taɣesɛ Yezu n pa’alɛ ba sɛla la, la yuun soŋɛ ba mɛ ti ba ta’an maasum gura yaarɛ. Tomam me ta’an bisɛ Baabule la n tɔɣɛ yaarɛ la yeletooro yele se’em ta’an maasum tomea soŋa.

12. To san ka gɛɛla yɛla wuu Yehowa n geeli yɛla se’em la, bala ta’an basɛ ti la ana to la wani?

¹² To san ka gɛɛla yɛla wuu Yehowa n geeli yɛla se’em la, to ta’an ti’isa ti tomam yele la ba’ɛ gaam la be’ero. Yezu yuun bo la makerɛ pa’alɛ ti wana wa ta’an eŋɛ. A makerɛ la poan, a yuun tɔɣɛ la nɛreba n tuni va’am poan yele. Tuntuneba basɛba yuun nyɔni mɛ sɛla n sɔi la ba yuun ti’isɛ ti ba ka yɔ bamam soŋa ge kpɛ’ɛma la yuun yele ba poan ayima yeti: “N zɔ, mam ka eŋɛ ya la potɔɔ.” (Mt. 20:​10-13) Ba yuun ti’isɛ ti kpɛ’ɛma la ka eŋɛ bamam soŋa. Sɛla n sɔi ti ba puurɛ yuun ka pee dela, ba yuun ti’isɛ ti kpɛ’ɛma la nari ti a yɔ bamam zo’e mɛ ge la yuun ka nari ti ba ti’isa bala. Zina beere wa, la ta’an ana mabiisi basɛba bala. Makerɛ, ba san ka nyɛ yɔ’ɔ ti ba tum tuunɛ tansugere la poan, ba ta’an ti’isa ti ba ka eŋɛ bamam soŋa. Yeledaaŋɔ san paɛ tɔ, bem n wan ta’an soŋɛ tɔ ti to gɛɛla yɛla wuu Yehowa n geeli yɛla se’em la?

YELESE’A TI TO WAN TA’AN EŊƐ YELETOO SAN PAƐ TƆ

13. Yeletoo ta’an basɛ ti to eŋɛ la bem?

¹³ Ho ta’an mina Baabule la n pa’alɛ yeledaaŋɔ yele se’em. Daanse’ere, ho tabelɛ dekɛ Baabule gulesegɔ soŋɛ nɛreba ti ba ta’an ŋmibe yeledaaŋɔ poan. Ge yeledaaŋɔ san paɛ homea, la ta’an kpe’em bo ho ti ho geele yele la wuu Yehowa n geele de se’em la. Makerɛ, ho ta’an ti’isa ti Yehowa n dɔ̃legeri ho tuberɛ bii a ka keleseri ho zusega. Ho wan eŋɛ la bem ti la soŋɛ hɔ ti ho ta’an tara putɛsonɛ?

14. Yeledaaŋɔ san paɛ hɔ, ho wan ta’an zusɛ Yehowa ti a eŋɛ la bem bo ho? (Filipi 4:13)

¹⁴ Zusɛ Yehowa ti a soŋɛ hɔ. Yele Yehowa sɛla n paɛ hɔ la, la yele la n daani ho se’em. Ho ta’an yele Yehowa sɛla wana mɔpi ti ho bɔta ti a eŋɛ bo ho. Ho ta’an zusɛ Yehowa ti a bo ho a zilam vo’osum la ti la soŋɛ hɔ ti ho nyɛ paŋa la yɛm ta’an ŋmibe. Tɛ̃ra ti Yehowa ta’an lebese ho zusega la sarɔɔ sɛka ti ho ka ti’isa poan. (Ep. 3:20) A me ta’an doose malesi bii mabiisi poan soŋɛ hɔ. (Ym. 34:7) Bala la, Yehowa n yeen doose sarɔɔ sɛka poan soŋɛ hɔ, pɛ̃ɣɛ en la eŋa n eŋɛ sɛla bo ho la. Tara sakerɛ ti Yehowa wan bo ho a zilam vo’osum la ti la soŋɛ hɔ yeledaaŋɔ woo poan.—Kaalɛ Filipi 4:13.

15. Bem n wan soŋɛ hɔ ti ho ta’an ŋmibe yeledaaŋɔ poan? (Bisɛ foote la.)

¹⁵ Kɔ’ɔn ita yelese’a n wan basɛ ti hon la Yehowa bɔnsoŋa la kpe’em. Ho san puɣum ka ta’an ita yelese’a ti ho daa ita la, tiregɛ ita sɛla ti ho wan ta’an eŋɛ nananawa. Hali “Daaŋɔ la ninbɔn’ɔn” saŋa n nari ti ho ti’isa Naayinɛ yɛla zɔ’ɔra. Bala la, tiregɛ zamesa ge kɛlesa Baabule yɛla ti la soŋɛ hɔ ti ho ta’an ti’isa Naayinɛ yɛla. (Ym. 119:143) Kɔ’ɔn zamesa Baabule la ge ti’isa taɣesa de poan. Tiregɛ kena na’am mɔɔlegɔ la zamesegɔ ge me laɣum bɔ’ɔra lebesego. Naɛ la ho mabiisi la laɣum bɔna ge da wɛlegera homea.—Mag. 18:1.

16. Yeletooro ta’an basɛ ti ho tara puti’ira ayi ayi la wani ge ho wan eŋɛ la wani kan tara puti’ira ayi ayi? (2 Korint 10:​4, 5)

¹⁶ Basɛ ti Baabule la soŋɛ hɔ ti ho da tara puti’ira ayi ayi. Yeletoo san paɛ hɔ, bala ta’an basɛ ti hon ti’iseri homea bii Yehowa yele se’em la daɣena yelemɛŋɛrɛ. La san ana ho bala, bem n wan soŋɛ hɔ ti ho kan ti’isa putɛ- aŋa? (Kaalɛ 2 Korint 10:​4, 5.) To san “mina yelemɛŋɛrɛ” la n boi Baabule la poan la ge me kaala to tigere gɔnɔ la, la wan soŋɛ tɔ ti to kan tara puti’ira ayi ayi. Makerɛ, la kpe’em bo ho mɛ ti ho sakɛ ti Yehowa puurɛ pee mɛ la hɔ? Zamesɛ baŋɛ yelese’a n yuun paɛ tuntuna Paul la. A na’am tuuma la poan, yeletooro n yuun paɛ en ge yele aŋa yuun basɛ ti a mina ti Yezu Krista puurɛ pee mɛ la en. (2 Ko. 11:​23-27) Hon ti’isɛ ti Yehowa ka di sugeri bo ho la hon tabelɛ tum sɛla la? Ho san ti’isa bala, gulesɛ Baabule zɛse’esi woo n pa’alɛ ti Yehowa diti sugeri bɔ’ɔra to mɛ. (Isa. 43:25) Tiregɛ kaalɛ gulesegɔ aŋa ge ti’isɛ a taɣesɛ. (Ym. 119:97) Yeletoo tabelɛ paɛ hɔ ti ho ti’isa ti Naayinɛ ka te’eli a yamesi? Malum viisɛ baŋɛ sɛla n sɔi ti Naayinɛ bo yɔ’ɔ ti namesegɔ bɔna ge me baŋɛ Naayinɛ n te’eli to se’em vo’osum poan la ka pakɛ la yelese’a n paari to la. (Ym. 91:​9-12) Yeletooro paɛ mabiisi mɛ ti ba nyaŋɛ ŋmibe. Ho ta’an kaalɛ ba yele.a

17. La nari ti to eŋɛ la bem yeletoo san paɛ tɔ?

¹⁷ Daanse’ere yeledaaŋɔ zo’e zo’e ka paari ho nananawa. La san dɛna bala, pɛ̃ɣɛ Yehowa ge dekɛ ho saŋa la tum sɛla n ani soŋa ti la pa’alɛ ti ho puurɛ pee ya la a itisoŋɔ la. (Pa. 7:14) Yeletoo san paɛ hɔ, tara putɛsonɛ ge dekɛ homea delum Yehowa soŋa. Ho san eŋɛ bala, Yehowa ‘wan bo ho paŋa ti ho ŋmibe de poan ge kan tum be’em.’ (1 Ko. 10:13) Ge yeletoo san paɛ to mabiisi, to wan eŋɛ la wani? To wan sɔsɛ yele wa zaseŋɔ seko n taɣelɛ la poan.