July

Yehowa yamesi basɛba ti’isɛ ti ba kan ta’an tum zo’e zo’e bo Yehowa se’ere n sɔi la, ba kuregɛ mɛ ti basɛba me bɛ̃’ɛra. Ba me ta’an dɛna tarendoma. Bala ta’an basɛ ti ba ti’isa ti ba yele ka pakɛ Yehowa. Ba ta’an ni soke yeti, ‘Mam yele pakɛ Yehowa?’ La me yuun ani se’emdaana n gulesɛ Yooma 71 la bala. A yuun zusɛ yeti: “Da zagahɛ mam n paŋa ba’ahegɔ saŋa.” (Ym. 71:9, 18) La boi bim ti yuumadaana la giila yuun kɔ’ɔsɛ mɛ ge a yuun tari sakerɛ ti a san pu’usa Yehowa, a wan soŋɛ en. Yuumadaana la yuun nyaa baŋɛ ti Yehowa puurɛ ni pee mɛ la sɛba n tiregeri pu’usa en, la ka pakɛ la ba yeledaaŋɔ la. (Ym. 37:23-25) Ho san kuregɛ, ti’isɛ Yehowa n geele ho yele se’em. La boi bim ti ho nyaa taregɛ mɛ ge Yehowa wan soŋɛ hɔ ti ho kelum pu’usa en soŋa soŋa. (Ym. 92:12-15) Da ti’isa hon kan ta’an le eŋɛ sɛla la ge tuɣum ti’isa hon wan ta’an eŋɛ sɛla. w24.10 28 ¶14-16

Yele san paɛ Kristakɔma n ka bi kãsegɛ vo’osum poan, la ni kpe’em bo ba mɛ ti ba ta’an nyɛ Baabule naresum yele dekɛ tum tuuma. Baabule lɔɔ san ka tɔɣɛ de yele wana mɔpi, basɛba ta’an ti’isa ti ba eŋɛ bamam mea n boti sɛla. Basɛba me ta’an ɛɛra lɔɔ n tɔɣɛ de yele. Makerɛ, daanse’ere Korint Kristakɔma la yuun boti la tuntuna Paul pa’alɛ ba lɔɔ n yeti ba da dita baɣa dia. Paul yuun ka yele ba bamam n nari ti ba eŋɛ se’em. A yuun tuɣum pa’alɛ ba la nɛra woo n tari ‘yɔ’ɔ ti a loe’ sɛla ti la makɛ la a putɛkeeŋa. A yuun dekɛ la naresum yɛla pa’alɛ nɛra woo n nari ti a dekɛ a putɛkeeŋa la tum se’em ge da pirɛ basɛba basɛ. (1 Ko. 8: 7-9) Paul yuun soŋɛ Korint mabiisi la mɛ ti ba bi vo’osum poan, la wan eŋɛ se’em ti ba ta’an dekɛ bamea puti’irɛ tum tuuma bɔkɛ yɛla ge da kɔ’ɔn ɛɛra lɔɔ bii nɛra pa’alɛ ba. w24.04 5 ¶14

Yona saŋa la, Nineveh nɛreba la yuun nyɛ la yɔ’ɔ tee. Leyɛ’ɛsa, tɛ̃ra Yezu n yuun tɔɣɛ sɛba n wan ta isige ge nyɛ gãkerɛ la yele se’em. Sɛba n tum tuunbe’ero laɣum pa’asɛ bim mɛ. (Yon 5:29) Bala la, daanse’ere Sodom la Gomora nɛreba la me ta’an tara beere sa’am kum isigere puti’irɛ. Daanse’ere nɛrebana wa basɛba wan ta isige kum poan. Tomam me ta’an nyɛ yɔ’ɔ ti to pa’alɛ ba Yehowa la Yezu Krista yɛla. Yehowa n ‘maɣesɛ nɛreba puti’irɛ bisa ge mina sɛla n boi ba suuren.’ La san dɛna beere sa’am kum isigere la yele, a wan ‘yɔ nɛra woo la a itigɔ’ wuu eŋa n ni puɣum ita se’em la. La san nara, Yehowa wan zɔ nɛreba nimbũ’ɔ ge a kan eŋɛ kɔɔl. Bala la, la ka nari ti to yeti nɛra kan isige kum poan san daɣena la Baabule la n yele bala! w24.05 5-6 ¶15-16

Kɔ’ɔn pɔsɛ diimi sa ti Naayinɛ yetɔɣum la kpemese a nɛreba giila ti ba tum tuunkpe’eŋo. Geele nɔdɛ’ɛsa Yeremia yele la bisɛ. Dabeem n yuun tari en Yehowa n yuun bo en tuunɛ la. Yeremia yuun yeti: ‘N ka mi yetɔɣum, n nan dela bia.’ (Yer. 1:6) Bem n yuun soŋɛ en ti a nyɛ sukpe’ene mɔɔlɛ? Yehowa n yuun yele en sɛla la n yuun kpemese a giila ti a nyaa yeti: ‘La diti la mam kɔ̃ba poan sa wuu bugum la, mam kan ta’an mum n nɔɔrɛ sina.’ (Yer. 20:8, 9) La boi bim ti zɛ̃sɛka ti Yeremia yuun mɔɔlɛ la yuun basɛ ti la kpe’em bo en mɛ ge yelese’a ti a yuun nyaa ta mɔɔlɛ la yuun kpemeseri la giila. Naayinɛ Yetɔɣum la n bo’ori Kristakɔma paŋa. Tuntuna Paul yuun yeti ba san zamesɛ mina Naayinɛ puti’irɛ soŋa, la wan soŋɛ ba ti ba ‘kena lan nari se’em Yehowa zɛ’an’ ge ‘wɔna tuunsoma woo biila.’—Kol. 1:9, 10. w24.04 14-15 ¶2-4

Zadok yuun kelum tara yelemɛŋɛrɛ bɔ’ɔra Yehowa mɛ, la ka pakɛ la Malema Nɛŋadaana Abiatar n yuun keŋɛ ta naɛ la David dayua Adoniya ti ba fã na’am la. David yuun mi ti a yuun wan ta’an dekɛ amea delum Zadok. Se’em ma’a ti Adoniya nigum nigumtuuma yuun niɛ peelumi la, David yele la Zadok, Natan, la Benaiah ti ba loe Solomon ti a dɛna naba. (1 Na. 1:32-34) Zadok giila yuun kpeŋe mɛ la eŋa n yuun nyɛ Yehowa yamesi maɣesɛ wuu Natan n yuun tari yelemɛŋɛrɛ bɔ’ɔra Yehowa ge pa Naba David poore la. Se’em ma’a ti Solomon yuun ta dɛna naba la, a yuun ‘dekɛ la Zadok tee ze’ele Abiatar na’arɛ, ti a dɛna malemadaana.’ (1 Na. 2:35.) Ho wan eŋɛ la wani ta’an tɔɣesɛ Zadok? Ho yire nɛra bii ho zɔ san basɛ Yehowa pu’usegɔ, eŋɛ pa’alɛ ti ho tari yelemɛŋɛrɛ bɔ’ɔra Yehowa. (Yos. 24:15) Yehowa wan bo ho paŋa la sukpe’ene ti ho ta’an eŋɛ bala. Zusɛ Yehowa ti a soŋɛ hɔ ge me ana du’a du’a la sɛba n tari yelemɛŋɛrɛ bɔ’ɔra Yehowa la. Yehowa puurɛ pee mɛ la hon tari yelemɛŋɛrɛ bɔ’ɔra en la. A me wan kã bo ho.—2 Sa. 22:26. w24.07 6-7 ¶16-17

Yooma 15:2 yeti, se’em n de Naayinɛ zɔ ‘ka tari daaŋɔ ge me tuna sɛla n ani soŋa.’ La nari ti to kɔ’ɔn ita bala. Ge la wan ta’an eŋɛ ti to da ‘tara daaŋɔ’? Ɛ̃ɛ. To ka di mi’a ge to san kɔ’ɔn tiregera ti to nana Yehowa, to kan ‘tara daaŋɔ.’ To san kã tomea bo Naayinɛ ge muse ko’om, pɔsega n nan bala. Makerɛ, diimi sa la nɛra san yeen dɛna Israel nɛra ka pa’alɛ ti a dela Yehowa saana. Basɛba yuun pɔ ti bamam pu’useri la Naayinɛ ge ka tara ‘yelemɛŋɛrɛ bii tuna tontɔɔ tuuma.’ (Isa. 48:1) Yelemɛŋɛrɛ Israeldoma yuun nari ti ba zamesɛ Yehowa yɛla ge me dɔla a. Bala mea nɔɔ ti la ka nara ti to yeen muse ko’om ge naɛ la Kristakɔma bɔna ti la pa’alɛ ti to dela Naayinɛ zɔdoma. La nari ti to ‘tuna sɛla n ani soŋa.’ To wan eŋɛ la wani ta’an eŋɛ bala? w24.06 9 ¶4; 10 ¶6

Bem yɛla ti Yehowa ita bɔ’ɔra tɔ? Geele yele ana wa. A bo’ori to la yelese’a n pakɛ tɔ. Yehowa kan bo to yelese’a n wan basɛ ti to vom ana lumta ge a wan bo to yelese’a n pakɛ tɔ. Makerɛ, a bo’ori to dia, lɔɣɔyɛɛtɔ la gã’aregɔ zɛ’an. (Ym. 4:8; Mt. 6:31-33; 1 Tim. 6:6-8) La dela Yehowa pɛ̃regerɛ tuunɛ ti a bɔ’ɔra to yelese’a n pakɛ tɔ? Aayi! Basɛ ya ti to geele ya Yezu yetɔɣum la n boi Matu 6:25, 26. Yezu dekɛ la niisi eŋɛ makerɛ yeti: “Ba ka bore, ba me ka kɛ’ɛre sun’unra banya poan, ge te ya Sɔ n boe saazuo ha ugura ba.” Yezu nyaa soke yeti: “Ya ka gane niihe?” Yezu yuun boti a pa’alɛ la bem? Yehowa san fabela dusi yele, to me tari puti’irɛ ti a wan bo to yelese’a n pakɛ tɔ! Wuu sɔ n biseri a deodoma se’em la, Yehowa me n nɔŋɛ to la zuo, a bo’ori to yelese’a n pakɛ to mɛ.—Ym. 145:16; Mt. 6:32. w24.09 26-27 ¶4-6

Keendoma soŋeredaana dela mabia n muse ko’om ti zilam vo’osum la loe en ti a soŋera keendoma la ti ba tuna ninmu’urɛ tuuma tansugere la poan. Keendoma soŋeredoma dela buraasi n nɔŋɛ Yehowa ge me dɔla Yehowa pa’alegɔ. Ba me nɔŋɛ ba mabiisi la mɛ paa. (Mt. 22:37-39) Mabiburaa n muse ko’om wan ta’an tiregɛ la wani ta’an dɛna keendoma soŋeredaana? Baabule la pa’alɛ to nɛra n nari ti a tari halese’a ta’an nyɛ yɔ’ɔ dɛna keendoma soŋeredaana. (1 Tim. 3:8-10, 12) Ho san bɔta ti ho dɛna keendoma soŋeredaana, zamesɛ baŋɛ hala wa ge tiregɛ tara a tuna tuuma. Ge sɛla n deŋɛ nɛŋa dela, la nari ti ho ti’isɛ bisɛ sɛla n sɔi ti ho bɔta ti ho dɛna keendoma soŋeredaana. w24.11 15 ¶4-5

Nɛreba basɛba yeti bamam kaalɛ Baabule la mɛ sugumnɔɔrɛ zo’e zo’e ge ba sakɛ bo sɛla ti Baabule la yɛta la? Ba tiregeri ti ba tara Baabule la n yele sɛla la tuna tuuma? Lebesego la dela aayi. Ge Yehowa nɛreba ka ani bala! To tiregeri mɛ ti to dekɛ ka’aŋɔ la n boi Baabule la poan la tuna tuuma. La daɣɛ naana ti to kaala Baabule la ge tara de tuna tuuma. La ta’an kpe’em bo to ti to nyɛ saŋa kaala Baabule la. To me ta’an yeen kaala Baabule la ge ka ti’isa taɣesa, bii to ta’an ti’isa ti ton nari ti to eŋɛ teere se’a la ba’ɛ zo’e mɛ. Lan yeen dɛna se’em, Yehowa wan soŋɛ tɔ. Basɛ ya ti to lu to suure ti to wan tara Naayinɛ Yelesum la tuna tuuma. Nɔkpe’ene kai ti to san tara Naayinɛ Yelesum la tuna tuuma, to wan tara pupeelum.—Yam. 1:25. w24.09 7 ¶15-16

Yeledaaŋɔ san paɛ tɔ bii to suure n sa’am, Yehowa ni dekɛ la a zilam vo’osum la buɣelɛ to suure. Yeledaaŋɔ san paɛ hɔ ti la wuna hɔ, yele Yehowa lan ani ho se’em. Ho ta’an zusɛ Yehowa sugumnɔɔrɛ zo’e zo’e, la sansɛka woo ti ho bɔta. (Ym. 86:3; 88:1) Kɔ’ɔn zusa Yehowa ti a bo ho a zilam vo’osum la. A kan mɔŋɛ hɔ, a wan ba’asum soŋɛ hɔ. Yeledaaŋɔ tabelɛ paɛ hɔ ti ho giila kɔ’ɔsɛ? Zilam vo’osum la ta’an kpemese ho giila ti ho kelum tara sakerɛ pu’usa Yehowa. (Ep. 3:16) Ho san zusɛ Yehowa, ti a dekɛ a zilam vo’osum la soŋɛ ho ba’asɛ, bem n nari ti ho eŋɛ? Ita yelese’a n wan basɛ ti a kɔ’ɔn soŋera hɔ la a zilam vo’osum la. Yele ana wa dela, ho kena zamesegɔ ge mɔɔla yelesoma la. Ho me san kaala Baabule la daarewoo ge ti’isa taɣesa, la wan soŋɛ hɔ ti ho ta’an bɔkɛ Naayinɛ puti’irɛ. (Flp. 4:8, 9) Ho san kaala Baabule la, bisɛ nɛresɛba ti yeledaaŋɔ yuun paɛ ba, la Yehowa n yuun soŋɛ ba ti ba ta’an ŋmibe se’em. w24.10 9 ¶12-14

To nɔŋɛ nɛreba wuu Yehowa la a Dayɔa la. (Mag. 8:31) To tari la giile bɔ’ɔra sɛba n ‘ka mi Naayinɛ,’ la sɛba n ‘ka tari beere sa’am puti’irɛ la.’ (Ep. 2:12) Yelese’a n paɛ ba, ba vom poan la basɛ ti la ana ba wuu ba boi la boko poan. Ge tomam tari yelese’a n wan soŋɛ ba ti ba doe na n de Naayinɛ Na’am yelesoma la. Ton tari nɔŋerɛ la giile la n soŋeri tɔ ti to bɔta ti to tiregɛ mɔɔlɛ yelesoma la bo ba. Ba san wum yelesoma wa la ni basɛ ti ba tara la beere sa’am puti’irɛ. Hali nananawa, ba wan tara pupeelum ge mina ti beere sa’am ba wan ta vɔna daarewoo Naayinɛ tinpaalega la poan. (1 Tim. 6:19) Ton nɔŋɛ nɛreba la zuo, to kɔ’ɔn bɔta la to yele ba ti tingɔŋɔ wa pɔ̃ri la ba’asegɔ. (Eze. 33:7, 8) To boti la ba baŋɛ sɛla n wan ta eŋɛ mɛleskãtɛ daarɛ la. Ba mina ti ba wan ta sa’am pumpɔreŋɔ pu’usegɔ ge nyaa sa’am tingɔŋɔ be’o wa Armagedon poan.—Lil. 16:14, 16;17:16, 17; 19:11, 19, 20. w24.05 16-17 ¶8-9

Tuntuna Paul yele Kristakɔma ti, “bahɛ ya te Na’ayenɛ ihege suunre la ba.” To san basɛ ti Yehowa mea isige suure, la pa’alɛ ti to ni basɛ yele la bo la Yehowa ti a bisɛ sansɛka, la sarɔɔ sɛka ti a wan maalɛ yele la. Ba yuun eŋɛ mabia ayima yu’urɛ n de John la sɛla n ka ani soŋa. A yeti: “La yuun nari ti n nyɔkera n mea la n sunsɔa la, lan wan eŋɛ se’em ti n kan eŋɛ sɛla n ka nari. Ge la yuun daɣɛ naana. Arom 12:19 yuun soŋɛ mam mɛ ti n ta’an di’isa suure ge dekɛ n mea delum Yehowa.” To san gura ti Yehowa maalɛ yele la bo to, to wan nyɛ nyuurɔ. To san tiregera ti to maalɛ yele la tomea, daaŋɔ la susa’aŋɔ wan paɛ tɔ. Ge to san gura Yehowa, bala n ani soŋa. Yehowa boti la a soŋɛ tɔ. A yeti to gura en. A me pu’ulum biŋe ti a wan maalɛ yele ana. To san sakɛ ti Yehowa wan gãkɛ sɛba n iti sɛla n ka ani soŋa la, la ka nari ti to kelum ita sunsɔa. To mi ti Yehowa wan tum sɛla n nari. w24.11 6 ¶14-15

La nari ti to bisɛ tomea soŋa ti innaanɛ lɔɣɔrɔ da ba’ɛ pakɛ tɔ. Tuntuna Paul n yuun gulesɛ sɛla bo Kristakɔma la basɛ ti to bɔkɛ yele wa soŋa. A yuun tɔɣɛ pa’alɛ Israeldoma la n eŋɛ sɛla pɔɣetia la poan, la se’em ma’a ti ba yuun lɛm Sinai Zoore la zuo la. A yuun ka’am Kristakɔma ti ba “da kɔ’ɔn bɔta yelese’a n de be’em [ba] sunya poan wo [Israeldoma la] n eŋɛ se’em la.” (1 Ko. 10:6, 7, 11) Yehowa yuun tum la yelekirega bo Israeldoma la dia. Ge bamam n yuun ba’ɛ ti’isa dia ma’a yele la zuo, la yuun basɛ ti ba ‘tum la be’em.’ (Kan. 11:4-6, 31-34) Israeldoma la n yuun kaabɛ salema naɣebila la, ba yuun eŋɛ pa’alɛ ti ba nɔŋɛ la dia, daam nyua la nyɛɛma gana bamam n wan tara bɔnsoŋa la Yehowa. (Yɛh. 32:4-6) Paul yuun tɔɣɛ yele ana wa mɛ ti a ka’am Kristakɔma sɛba n yuun vɔi sankaŋa, se’em ma’a ti Yerusalem, la ka pu’usegɔ yire la yuun pɔ̃ra sa’aŋɔ yuun 70 Y.B. la. Tomam me kɔ’ɔn bɔna la tingɔŋɔ wa ba’asegɔ saŋa. Bala zuo la, la nari ti to dekɛ Paul ka’aŋɔ la ninmu’urɛ. w24.12 6 ¶13

Yehowa dela “Yenɛ n tare popeelom.” A me boti la to tara pupeelum. (1 Tim. 1:11) A bo to la yɛla zo’e zo’e n wan basɛ ti to vom ana soŋa. (Yam. 1:17) Ayima dela pɔɣedire. Buraa la pɔka san di taaba, ba ni biŋe la nɔɔrɛ ti ba wan nɔŋɛ taaba ge me bɔ’ɔra taaba gilema. Ba san ana tapilapi la taaba, ba wan tara pupeelum. Susa’aŋɔ la dela, zina beere wa, sireba la pɔɣeba zo’e zo’e tamɛ ban yuun biŋe nɔɔrɛ se’em ba pɔɣedire daarɛ la mɛ. Bala zuo la, ba ka tari pupeelum. Yehowa boti sira ita a pɔɣa la wani? Yehowa yele sireba ti ba na’asa ba pɔɣeba. Ho san na’asa nɛra, ho wan ita yelese’a n pa’alɛ ti ho bo’ori en gilema. Sira n na’aseri a pɔɣa nɔŋɛ en mɛ ge me ita en soŋa.—1 Pe. 3:7. w25.01 8 ¶1-2; 9 ¶4-5

Nɔkpe’ene kai ti gɔnseko ti Paul yuun gulesɛ bo diimi Hebru Kristakɔma la yuun soŋɛ ba mɛ ti ba ta’an maasum gura yelese’a n wan paɛ ba la. Paul yuun ka’am ba ti ba kaala Naayinɛ Yelesum la ta’an bɔkɛ de soŋa. Bala wan basɛ ti ba baŋɛ yelese’a n daɣɛ yelemɛŋɛrɛ ge zaɣesɛ a. A yuun le ka’am ba ti ba tara sakerɛ, la wan eŋɛ se’em ti ba ta’an dɔla Yezu la keendoma la n pa’ali ba se’em tansugere la poan. A yuun kpemese Kristakɔma wa giila ti ba ŋmibera yelese’a n paari ba la poan ge me le basɛ ti ba baŋɛ ti yelese’a n paari ba la wan kumesɛ ba. Tomam me nari ti to dekɛ ka’aŋɔ wa tum tuuma. To san eŋɛ bala, to wan nyaŋɛ ŋmibe ta paɛ ba’asegɔ.—Heb. 3:14. w24.09 13 ¶17, 19

Baabule la pa’alɛ ti lua bunɔ dela sɛla ti ho yɔ to’e sɛla, la wan eŋɛ se’em ti yele la maalɛ. Wuu Baabule la n pa’alɛ se’em la, Yehowa yuun kɔ’ɛ a puti’irɛ ti la nari ti lua bunɔ la bɔna, la wan eŋɛ se’em ti a ta’an tara bɔnsoŋa la nɛresaaleba. Lua bunɔ la dela bem ti a yuun dekɛ yɔ ti to ta’an nyɛ sɛla n yuun piɛ Adam nu’usin la? Tɛ̃ra ti Adam la Hawa yuun ka le ana kasi ge me kan ta’an le vɔna daarewoo. Bala la, lua bunɔ la nari ti la zuna la sɛla n piɛ ba nu’usin la. (1 Tim. 2:6) Burasɛka n wan ta’an yɔ lua bunɔ la nari ti (1) a ana kasi; (2) a tara puti’irɛ ti a wan vɔna daarewoo tingɔŋɔ wa zuo; (3) a dɛna se’em n wan bɔta ti a yese a suuren ki bo to. To wan geele yɛla atã baŋɛ sɛla n sɔi ti Yezu yuun ta’an yɔ lua bunɔ la. (1) A yuun ani la kasi ‘ge me ka tum be’em.’ (1 Pe. 2:22) (2) A yuun tari puti’irɛ ti a wan vɔna daarewoo tingɔŋɔ wa zuo. (3) A yuun boti la a yese a suuren ki bo to.—Heb. 10:9. w25.02 4 ¶11-12

Yehowa nɔŋɛ ho mɛ ge me bɔta ti ho pa’asɛ a yizuo la poan. La ka pakɛ la yelese’a n wan ta’an basɛ ti la kpe’em bo ho ti ho muse ko’om, tɛ̃ra ti Yehowa nɔŋɛ ho mɛ. Yezu yuun yele a podɔleba la yeti: “Ho sakerɛ han pɔ’ɛ wo biileho peka la, ho ta’an yele zoore wa yeti, Vuruge kalam keŋɛ ke, te la eŋɛ. Sɛla ka boe tɔna bo ya.” (Mt. 17:20) Yezu podɔleba la n yuun wum a yetɔɣum wa yuun nari ti ba sakerɛ kpe’em pa’asɛ, se’ere n sɔi la ba yuun nan boi la en mɛ saŋa fii wa. Ge Yezu yuun basɛ ti ba tara suure lua ti ba sakerɛ san kpe’em, Yehowa wan soŋɛ ba ti ba nyaŋɛ yelekãra seto n daani ba la. Yehowa me wan soŋɛ hɔ ti ho eŋɛ bala! Yɛla ase’a san gu’ura hɔ ti ho kan ta’an muse ko’om, tiregɛ eŋɛ kalam nyaŋɛ yeledaaŋɔ la. Ho san muse ko’om, bala dela sɛla n gani za’a! w25.03 7 ¶18-20

To san tɛ̃ra ti Naayinɛ kɔ’ɔn maasum mɛ ti a soŋɛ tɔ, la wan basɛ ti to ta’an ŋmibe daaŋɔ poan. To san ti’isa taɣesa Naayinɛ n tabelɛ eŋɛ sɛla bo to, bala wan basɛ ti to tara suure lua a poan. (Isa. 37:17, 33-37) Ge me bisɛ yelese’a n boi jw.org baŋɛ Yehowa n soŋɛ mabiisi se’em. Leyɛ’ɛsa, ni tɛ̃ra sansɛka woo ti Yehowa eŋɛ sɛla soŋɛ hɔ. Daanse’ere ho ta’an ti’isa ti yelekãtɛ ka tabelɛ paɛ hɔ. Ge yelemɛŋɛrɛ la dela, Yehowa tabelɛ eŋɛ yɛla zo’e zo’e bo ho mɛ! A basɛ ti ho dɛna la a zɔ. (Yon 6:44) Zusɛ Yehowa ti a soŋɛ hɔ ti ho tɛ̃ra sansɛka ti a ni kelese ho zusega, bo ho yelese’a n pakɛ hɔ ge me ni soŋɛ hɔ yele poan la. Ho san ti’isa yele ana wa, la wan soŋɛ hɔ ti ho sakerɛ kpe’em ti Yehowa wan kelum soŋera hɔ. w24.06 21 ¶8

Yelemɛŋɛrɛ, to kɔ’ɔn lu la to suure ti to kan eŋɛ sɛla n wan daam Yehowa. Ge ton ka di mi’a la zuo, to ta’an tum be’em. (Arom 7:21-23) To bɔŋa zɛ’an ta’an ta tee ti la dɛna naana bɔ’ɔra tɔ ti to tum be’em. To san bɔta ti to tara yelemɛŋɛrɛ bɔ’ɔra Yehowa la a Dayɔa la, la nari ti to dɔla Yezu ka’aŋɔ la. A yuun ka’am tɔ ti to bisɛ tomea soŋa ge da tum be’em. Ton ka di mi’a la zuo, to ta’an tue. To za’a waabi tari to inbũulegɔ mɛ ge yɛla ase’a ta’an ni basɛ ti la dɛna naana bɔ’ɔra tɔ ti to tum be’em. Makerɛ, nɛra ta’an tiregera ti a da tum yalumtuuma. Basɛba me tiregeri mɛ ti ba da tum dɛ̃ɣerɔ tuuma, maɣesɛ wuu ban waaseni ba inya ti ba nyɛ gã’aregɔ nyɛlum bii ba bisera yalumfɔɔra. Basɛba me ta’an tiregera ti ba nyaŋɛ asaala dabeem bii ba basɛ zɛ̃kɛ n mea, sunsɔa bii yɛla ase’a me. w24.07 14 ¶3; 15 ¶5

La wan ana buraa la n tee la, la wani keendoma la san zaɣesɛ ti ba kan to’e en lebe tansugere la poan na? Bii la wan ana en la wani, a san lebe tansugere la poan na ti mabiisi la ka to’e en soŋa? A giila wan kɔ’ɔsɛ ti a ti’isa ti eŋa kan le ta’an pu’usa Yehowa. A me ta’an ti’isa ti Yehowa kan makɛ di sugeri bo en. Bala la, yɛm ka boi bim ti a tee. Bem n wan le eŋɛ, mabiisi la san zaɣesɛ ti ba kan di sugeri bo buraa la n tee la? Bamam la Yehowa zɔtɔ nyɔka la wan sa’am. Beni n sɔi? Se’ere n sɔi la ba ka tɔɣeseri Yehowa n diti sugeri se’em la. Ba tuɣum tɔɣesa la Sitaana n de putɔa ge ka zɔta nɛreba nimbu’ɔ la. Sitaana nyaa wan doose la bamam poan kɔ’ɔsɛ buraa la n tee la giila.—2 Ko. 2:10, 11; Ep. 4:27. w24.08 17 ¶7, 10-11

Yezu Krista le dekɛ la buraasi bo to tansugere la poan, ti ba tuna tuuma ase’a. A yuun doose la keendoma la n boi Yerusalem la poan tum Paul, Barnabas la nɛreba basɛba ti ba dɛna kaarɛ bisegadoma. (Tm. 11:22) Beni n sɔi? Ti ba kpɛmesa tansuga la giila, wuu keendoma soŋeredoma la keendoma n tuni se’em la. (Tm. 15:40, 41) Gingilega kaarɛ bisegadoma kɔ’ɔn ɛɛra mɛ saŋa woo. Basɛba ni keŋɛ la mɛɛla zo’e zo’e ge nyaa paɛ tansugere la n boi zɛ’an. Bakwai woo gingilega kaarɛ bisegadaana bo’ori la yetɔɣum, kaara mabiisi la, sɔsera la sore ŋmɛ’adoma la keendoma ge maasena na’am mɔɔlegɔ sɔsega. A ni maasum la yetɔɣum ge me bisera gingilega, la tinkãtɛ laɣesegɔ. Eŋa n ni pa’ala sore ŋmɛ’adoma sukuu poan, ita laɣesegɔ n boi de to’ore bɔ’ɔra sore ŋmɛ’adoma ge me ni tuna tuuma ase’a ti tigere yile la ni dekɛ bo en. w24.10 21 ¶12-13

Nɔdɛ’ɛsa Yeremia yuun gulesɛ la Yehowa yelesum la n boi zina gulesegɔ wa poan. Tuntuna Paul me yuun gulesɛ ti, Yehowa yeti, ‘N kan le tɛ̃ra ba be’em la buyina me.’ (Heb. 8:12) Bala vuurɛ? Baabule la poan, yelebire la n de ‘tɛ̃ra’ la ka pa’alɛ la nɛra n tɛ̃ri yelese’ere n eŋɛ tole ma’a ge la me ta’an pa’alɛ nɛra n iti sɛla. Nayiga la ti ba yuun kpa en lɛm Yezu la yuun yeti, ‘Yezu, ho san ta wa’an ho Na’am la poan na, tɛ̃ra n yele.’ (Lu. 23:42, 43) A yuun boti la Yezu eŋɛ sɛla bo en. Yezu yuun yele buraa wa ti, a wan ta isige en kum poan. Yehowa n yeti eŋa kan le tɛ̃ra to be’em la pa’alɛ ti a di sugeri bo to mɛ. A me kan le dɔlegɛ to tuberɛ, to be’em la zuo. w25.02 10-11 ¶14-15

To san mina Yehowa hala, a puti’irɛ n de sɛla, la eŋa n nɔŋɛ ge yaɛ sɛla, la pa’alɛ ti to tari la bɔkerɛ. Soke homea yeti, ‘Mam n mi Yehowa se’em la wan basɛ ti n kɔ’ɛ n puti’irɛ la wani ti a puurɛ pee?’ (Ep. 5:17) Saŋa ase’a la nari ti to eŋɛ sɛla n wan daam to yidoma ta’an basɛ ti Yehowa puurɛ pee. Makerɛ, dɔɣereba basɛba ta’an pɛ̃regɛ ba bipugela ti a ele mabia n tari ligeri zo’e zo’e, la boi bim ti mabia la ka muuri Yehowa pu’usegɔ poan. La dela yelemɛŋɛrɛ ti ba boti la mabia la ta’an bisa ba bipugela la soŋa. Ge pugela la nari ti a soke amea yeti, ‘Ani n wan soŋɛ mam ti n nyɛta nɛŋa tɔlega vo’osum poan? Yehowa geele yele wa la wani? Lebesego la boi la Matu 6:33. Yezu yeti, Kristakɔma nari ti ba ‘kɔ’ɔn ɛɛra Naayinɛ Na’am la yia.’ La boi bim ti to bo’ori to dɔɣereba, la nɛresɛba n boi to gingilega la poan gilema ge sɛla yele n pakɛ to paa dela to basɛ ti Yehowa puurɛ pee. w25.01 17 ¶9-10

To eeri la Yehowa soŋɛ tɔ ti to mu’ɛ nini mɔɔla, yaarɛ san paɛ tɔ. (Lil. 12:17) Beni n sɔi ti ho wan ta’an tara puti’irɛ ti Yehowa wan soŋɛ hɔ? Geele Yezu zusega la n boi Yon a zuo 17 la. Yezu yuun zusɛ Yehowa ti a bisera a tuntuneba la, ti Yehowa me yuun lebese a zusega la. Tooma gɔŋɔ la basɛ ti to baŋɛ ti a yuun soŋɛ tuntuneba la ti ba tulegera, la ka pakɛ la yaarɛ la za’a. Yezu yuun le zusɛ ti Yehowa bisera sɛba n wan sakɛ a tuntuneba la n wan mɔɔlɛ yelese’a bo ba la. Ho me laɣum pa’asɛ sɛba n tari sakerɛ la poan mɛ. Yehowa kelum kɛlesa la Yezu zusega la; A wan soŋɛ hɔ wuu eŋa n yuun soŋɛ tuntuneba la se’em la. (Yon 17:11, 15, 20) Ba’asegɔ la n pɔ̃ri la, la ta’an kpe’em bo to ti to mɔɔla yelesoma la. Ge Yezu basɛ ti to tara suure lua ti Yehowa wan soŋɛ tɔ ti to mu’ɛ nini mɔɔla.—Lu. 21:12-15. w25.03 18 ¶13-14

Naayinɛ nɛreba kɔ’ɔn ‘vɔɔla la pupeelum’ se’ere n sɔi la ba suure sukɛ mɛ la sɛla ti a ita bɔ’ɔra ba la. Yelemɛŋɛrɛ la, la Naayinɛ Yetɔɣum n buɣeli to suure la, la Krista lua bunɔ la n basɛ ti to tara beere sa’am puti’irɛ. Bala basɛ ti to ‘suure ana la mama.’ To san ni naɛ la to mabiisi sɔsera yɛla wa, la basɛ ti to tara la pupeelum! (Ym. 34:8; 133:1-3) Hala ayi n niɛ peelumi pa’alɛ ti Yehowa nɛreba boi la vo’osum paradiisi la poan dela nɔŋerɛ la nɔyinɛ. ‘Nɔyinɛ n di mi’a’ wa basɛ ti to baŋɛ la vom n wan ta ana se’em tinpaalega la poan. Bilam ti Yehowa yamesi wan ta tara nɔŋerɛ la nɔyinɛ ti la ka tara makerɛ. (Kol. 3:14) Se’em n boti a sirum tara pupeelum nari ti a bɔna la vo’osum paradiisi la poan. La ka pakɛ la tingɔŋɔ wa n ti’iseri Yehowa yamesi yele se’em, to dela nɛresɛba n tari gilema la yusonɛ bɔna Yehowa yire la poan.—Isa. 65:15. w24.04 21 ¶7-8

To za’a waabi wan eŋɛ la wani ta’an soŋɛ Kristakɔma sɛba n boti ba ele bii di pɔɣeba la? Sore deyima dela to wan bisɛ tomea soŋa la yelese’a ti to tɔɣera. (Ep. 4:29) To ta’an soke tomea yeti: ‘Mam iti nɛresɛba n boti ba ele bii di pɔɣeba la sia sia? Mam san nyɛ mabia la mabipɔka n sɔseri, mam ni kɔ’ɔn ti’isa ti ba boti la taaba?’ (1 Tim. 5:13) Leyɛ’ɛsa, la ka nari ti to ita Kristakɔma sɛba n de nɛreyɔna wuu ba koŋe la sɛla la ban ka ele bii di pɔɣeba la. Tuɣum bisɛ hon wan yele sɛla ti la kpemese Kristakɔma n de nɛreyɔna giila! To wan eŋɛ la bem to san ti’isa ti abunɔ la abunɔ wan ta’an lɛɣɛ taaba? Baabule la yele to ti to ti’isa basɛba yele. (Arom 15:2) Nɛreyɔna zo’e zo’e ka boti nɛreba ɛ luɣerɛ kpɛ’a bo ba, bala la, la dela to nam ban boti sɛla ge bo ba gilema. (2 Tes. 3:11) Basɛba me wan bɔta ti to soŋɛ ba ge ba san ka yele ho ti ho soŋɛ ba, da kabela ti ho eŋɛ bala.—Mag. 3:27. w24.05 24-25 ¶14-15

Saŋa ase’a, yeledi’ire ta’an paɛ tɔ ti la kpe’em bo to bii la basɛ ti to vom tee kalam. Bisɛ to puurɛ n pee se’em la Yehowa n ni soŋera to la! Yehowa san soŋɛ tɔ, la ni basɛ ti to tara la suure lua ti ‘a boi mɛ!’ (Ym. 18:46) David n yuun yeti Naayinɛ boi mɛ ba’asɛ la, a le dekɛ Naayinɛ makɛ me la sɛla n ka tari vom. David yuun yeti Naayinɛ dela ‘eŋa Taŋa.’ Bala vuurɛ? Baabule la dekɛ Yehowa makɛ la ‘taŋa’ ti la soŋɛ tɔ ti to bɔkɛ a hala la. Saŋa zo’e zo’e la Yehowa yamesi san ni pɛɣera en ti a hala la di la mi’a, ba ni dekɛ makɛ la taŋa Baabule la poan. Zɛsɛka ti ba gulesɛ yia ti Yehowa dela ‘Taŋa’ Baabule la poan la boi la Tɛɛnhegɔ 32:4. Hana yuun tɔɣɛ a zusega poan yeti, ‘Taŋa ka boi ana wuu tomam Naayinɛ wa.’ (1 Sa. 2:2) Habakuk yuun yeti, Yehowa dela ‘eŋa Taŋa.’ (Hab. 1:12) Burasɛka n gulesɛ Yooma 73 la yuun yeti, a dela ‘eŋa suure wa paŋa.’ (Ym. 73:26) Hali Yehowa yuun dekɛ amea makɛ mɛ la taŋa.—Isa. 44:8. w24.06 26 ¶1, 3

Nadoma sɛba n yuun eŋɛ sɛla ti Yehowa puurɛ pee la yuun ni kɔ’ɔn nɔŋɛ Yehowa mɛ la ba suure za’a. Baabule la tɔɣɛ Yosia yele yeti, ‘Nadoma la woo n daa deŋɛ a nɛŋa la, se’em ka boi n daa ani wuu eŋa n ŋmɛregɛ lebe Yehowa zɛ’an la a suure za’a.’ (2 Na. 23:25) Solomon n yuun ta tuna be’em a kuregerɛ saŋa la, yuun dela nɛrekani taaba? ‘A daa ka dekɛ a suure za’a pu’usa Naayinɛ.’ (1 Na. 11:4) Baabule la tɔɣɛ naba Abiya n yuun ka tari yelemɛŋɛrɛ bɔ’ɔra Yehowa yele yeti, ‘A daa ka dekɛ a suure za’a bo Naayinɛ.’ (1 Na. 15:3) La vuurɛ dela bem ti to pu’usa Yehowa la to suure za’a? Nɛra n pu’useri Naayinɛ la a suure za’a ka yeen pu’usa Naayinɛ la pɛ̃regerɛ zuo. Ge eŋa n nɔŋɛ Yehowa ge bɔ’ɔra en gilema la n sɔi ti a pu’usa en. w24.07 21 ¶4-5

Baabule la le dekɛ la makerɛ pa’alɛ Yehowa n ni di sugeri bo to se’em. A yeti, ‘N wan pĩ ya be’em la za’a wuu saa sagbana la.’ (Isa. 44:22) Bala la, Yehowa san di sugeri bo to la ni ana wuu a dekɛ la sagbana pĩ to be’em la ti to kan le nyɛ dɛ. To zamesɛ la bem makerɛ wa poan? Yehowa san di sugeri bo to, la ka nari ti to le ti’isa to be’em la yele ti la daana tɔ to vom dabesa za’a. Lua bunɔ la dela sɛla n kɔ’ɔn saalum to be’em la za’a za’a. Yehowa san di sugeri bo to, la ni ana wuu to ka tabelɛ tum la be’em. Yehowa n ni di sugeri bo to se’em n bala. Yehowa nimbɔ̃zore la, basɛ ti to tara la bɔnsoŋa la en ge ti la me soŋera tɔ ti to ka le ti’isa to be’em la yele ti la daana tɔ. w25.02 10 ¶11-14

Yehowa bo keendoma la tuunɛ ti ba basɛ ti tansugere la ana filam. (1 Ko. 5:7) Ba me boti la ba tiregɛ soŋɛ sɛba n tum be’em la ti ba basɛ ba be’em. Ba san soŋera be’emdaana, ba ni tara puti’irɛ ti a wan tee. Beni n sɔi? Se’ere n sɔi la ba boti la ba tɔɣesa Yehowa n ‘tari giile la nimbɔzore la.’ (Yam. 5:11) Tuntuna Yon yuun eŋɛ pa’alɛ ti a nɔŋɛ a mabiisi la mɛ. A yuun gulesɛ yeti: “N kɔma wa, n golehɛ dena wa bɔ’ɔra ya te ya da tom be’em. Ge to se’em han tom be’em, to tare Yesu Krista n de tontɔɔdaana la. Enŋa n de to nu’poŋmɛ’ɛra.” (1 Yo. 2:1) Nimbaalega la dela, saŋa ase’a Kristabia ta’an zaɣesɛ ti a kan basɛ a be’em. San dɛna bala, la dela ba yese en tansugere la poan. w24.08 25 ¶19-20

Ho ta’an bɔta ti ho tara homea makera la mabiisi. Ge da ita bala! Beni n sɔi? Se’ere n sɔi la Yehowa ka tari to makera la taaba. (Ga. 6:4) Makerɛ, Mary yuun dekɛ la kaam n tari nyuuŋo soŋa ge eŋɛ ligeri bo Yezu. (Yon 12:3-5) Ge pu’usegɔ yire la poan pɔkuurɛ la me yuun dekɛ la ligekɔ̃ba ayi n pɔ’ɛ eŋɛ ligeri daka la poan. (Lu. 21:1-4) Ge Yezu yuun bisɛ ti ba za’a waabi tari sakerɛ mɛ. Yezu yuun tɔɣesɛ a Sɔ mɛ ti la di mi’a. Bala la, Yehowa puurɛ pee mɛ la sɛla woo ti to ita bɔ’ɔra en la. Sɛla n pakɛ en dela hon nɔŋɛ en ge tara sakerɛ bɔ’ɔra en la ge daɣɛ hon tum zo’e se’em. Saŋa ase’a, to ta’an ni tara puti’ira ayi ayi. Ge Baabule la wan ta’an soŋɛ tɔ ti to kan tara puti’ira ayi ayi. Yehowa ti’iseri ho yele mɛ. A puurɛ pee mɛ la hon dekɛ a pu’usegɔ deŋɛ nɛŋa la, a me wan kã bo ho. Tara suure lua ti Yehowa nɔŋɛ a yamesi mɛ ge me fabela ba yele. w24.10 25 ¶3; 29 ¶17-18