KI’ILEŊƆ

‘Tara Sukpe’ene’

Gɔnseko Ti Ba Printɛ

1. Baabule la wan ta’an le soŋɛ to la wani ti to tara sukpe’ene?

Lebese

GƆŊƆ wa poan, to zamesɛ baŋɛ nɛreba zo’e zo’e n yuun eŋɛ pa’alɛ ti ba tari sukpe’ene, la ton wan ta’an tɔɣesa ba se’em. Ge yele ana ma’a n wan ta’an soŋɛ tɔ ti to tara sukpe’ene? Aayi. Se’ere n sɔi la, nɛresɛba ti Baabule la pa’alɛ ti ba yuun tari la sukpe’ene la zo’e mɛ ti to kan ta’an tɔɣɛ ba za’a yele gɔŋɔ wa poan. Leyɛ’ɛsa, Baabule la pa’alɛ to la yɛla zo’e zo’e n wan ta’an soŋɛ tɔ ti to tara sukpe’ene.

2. Nɛrebani me n yuun eŋɛ pa’alɛ ti ba tari sukpe’ene?

Lebese

² Hon tɛ̃ri nɛreba basɛba n yuun tari sukpe’ene ti Baabule la tɔɣɛ ba yele ge ti to ka zamesɛ ba yele gɔŋɔ wa poan? Daanse’ere ho tĩɛ la diimi nɔdɛ’ɛseba basɛba yele n de wuu Isaiah, Yeremia, Ezekiel, Yona, la Malaki. Yelese’a ti tuntuna Paul tɔɣɛ ti la bɔna Hebru a zuo 11 poan la yuun ta’an paɛ buraasi wa. A yuun gulesɛ yeti, “nɛreba yuun la’are basɛba mɛ ge ŋmɛ’ɛra ba. Ba me lo basɛba me tare ba ta eŋɛ pakadeen.” A me yuun gulesɛ basɛba yele ti, ba yuun dela “nahadoma, ge te ba nameha ba ge eta ba sɛla n ka [ani] soŋa.” Hali ba yuun ku basɛba mɛ. (Heb. 11:36, 37) Ge la bala za’a, ba yuun kelum pu’usa Yehowa mɛ la sukpe’ene.

3-4. Sodeni poan ti pɔɣesi siyi ti Baabule la ka pa’alɛ ba yu’ura yuun laɣum soŋɛ ti ba te’ele Naba David dɛŋa poan?

Lebese

³ Nɛreba basɛba me yuun tari sukpe’ene mɛ ge Baabule la ka purɛ ba yu’ura. To geele ya pɔɣesi siyi n yuun boi Naba David saŋa la yele bisɛ. Ba yuun soŋɛ David mɛ se’em ma’a ti a dayua Absalom yuun ɛɛra en ti a ku la. Absalom yuun zɛ̃kɛ la amea ge bɔta ti a fã a sɔ na’am la. Bala, David yuun nari ti a zɔ keŋɛ Yerusalem. David yuun yele la Zadok ti a lebe Yerusalem ta bisɛ Absalom n maaseni ti a eŋɛ sɛla. Zadok yuun dela malemadaana n tari sukpe’ene. Eŋa n yuun baŋɛ Absalom n maaseni ti a eŋɛ sɛla la, a yuun tum la “pugula n de yameŋa” ti a keŋɛ ta yele David sɛla n iti. To ka mi pugela wa yu’urɛ ge to mi ti a yuun tari la sukpe’ene. La boi bim ti ba yuun ta’an ku ni en ge a yuun keŋɛ ta nyɛ la David zɔdoma bayi ge yele ba Zadok n yele sɛla la. David zɔdoma bayi la n yuun tari lasebaarɛ wa yɛ’ɛsa ti ba ta bo David la, buraa ayima n yuun nyɛ ba ge keŋɛ ta yele Absalom. Bala la, David zɔdoma la yuun eŋɛ la kalam sige lua poan ta suɣɛ. Burasɛka n sɔi lua la pɔɣa yuun eŋɛ la kalam dekɛ sɛla yɛregɛ pĩ lua la ge nyaa ka’ɛ witi witi dɔɣelɛ ka zuo. Baabule la ka pa’alɛ pɔka wa yu’urɛ. Absalom nɛreba la n yuun keŋɛ ta ɛɛra David zɔdoma bayi la, pɔka la yuun yele ba ti sɛba ti ba ɛɛra la tee doose la zɛ’an. Pɔɣesi siyi wa n yuun tari sukpe’ene la yuun laɣum soŋɛ mɛ ti ba te’ele se’em ti Yehowa loe ti a dɛna naba la!—2 Sa. 15:23-37; 17:8-22.

Fɔɔra: Pɔɣesi siyi ti to ka mina ba yu’ura yuun dekɛ la sukpe’ene laɣum soŋɛ ti ba te’ele Naba David. 1. Pugela n de yameŋa n tɔɣeri bɔ’ɔra David zɔdoma bayi. 2. Pɔka la n dekɛ David zɔdoma suɣɛ a sira lua poan la n bala n ze ti’isa ge ti buraasi la yɛ’ɛsa. — Pugela la, la pɔɣesɛka sira n yuun tari lua la n bala. Bayi la yuun tari la sukpe’ene

⁴ Yelemɛŋɛrɛ la dela, Baabule la tɔɣɛ la buraasi, la pɔɣesi zo’e zo’e n yuun tari sukpe’ene yele. To mi basɛba yu’ura mɛ. Basɛba me, to ka mi ba yu’ura. Basɛba yuun dela buntateba, ti basɛba dɛna nasedoma. Basɛba yuun dela nɛrezureba, ti basɛba me daɣɛ nɛrezureba. Ge ba za’a yuun tari la sukpe’ene, la sakerɛ. Nɛreba wa n yuun tari sukpe’ene se’em la kpemeseri tomam me giila mɛ zina beere wa.

Zusega Yele N Pakɛ Se’em

5-7. Bem n yuun soŋɛ Paul ti a tara sukpe’ene, se’em ma’a ti ba yuun mɛlesa en la?

Lebese

⁵ To wan eŋɛ la wani ta’an tɔɣesa nɛresɛba n yuun tari sukpe’ene ti Baabule la tɔɣɛ ba yele la? La nari ti to bɔkɛ ti ba yuun ka dɔɣɛ nɛreba wa ti ba kɔ’ɔn tara sukpe’ene. La me daɣɛ bamea paŋa poan ti ba yuun nyaŋɛ pu’usɛ Yehowa soŋa. Bala la, bem n yuun soŋɛ ba?

⁶ Makerɛ, ti’isɛ bisɛ sɛla n yuun soŋɛ tuntuna Paul ti a tara sukpe’ene. Eŋa la Silas n yuun boi Filipi mɔɔla la, nɛrekuuŋɔ n yuun nyɔkɛ ba, ãasum ba lɔɣɔrɔ, ŋmɛ ba, tari ba ta eŋɛ paka deo poan ge ba ba nama labelɛ dɔɔrɔ. (Tm. 16:12, 19-24) Ban yuun yese ba paka deo la poan la, Paul yuun zoti la dabeem ti a mɔɔlɛ yoi? A yuun san zɔta dabeem, a tari buurɔ. Ge Paul yuun mi ti Yehowa boti la a kelum mɔɔla yelesoma la. A yuun mi ti la nari ti a mɔɔlɛ bo Tesalonika tiŋa nɛreba. Bem n yuun soŋɛ en ti a nyɛ paŋa, la sukpe’ene ta’an mɔɔlɛ?

⁷ Pooren, Paul yuun gulesɛ yeti: “Ya le kelom mina ban daa pon tom tɔ sɛla n ka ane soŋa se’em ge me daa to tɔ Filipi teŋa se’em. . . . Ge bala zan’an, to Yenɛ daa soŋɛ tɔ te to daa mɔɔlɛ a yelesoma bo ya. To daa mɔɔlɛ bo ya ge ka gangɛ la daanseko woo te to daa nyɛ la.” (1 Tes. 2:2) Paul yuun mi ti a san wan ta’an eŋɛ sɛla ti Naayinɛ bɔta, la nari ti a tara sukpe’ene. Ge a yuun nyɛ sukpe’ene la bɛ? La yuun dela amea paŋa poan? Aayi. Eŋa mea yeti, “to Yenɛ [n] daa soŋɛ tɔ.” Paul yuun mi ti la dela Yehowa n wan soŋɛ en ti a tara sukpe’ene. Yehowa me yuun sirum soŋɛ en mɛ.

8. Wuu Paul la, to wan eŋɛ la wani ta’an tara sukpe’ene?

Lebese

⁸ Ho wan ta’an tɔɣesɛ Paul. Ho san bisɛ ti hon ka tari sukpe’ene, da basɛ ti la daam hɔ ge tuɣum zusɛ Yehowa ti a soŋɛ hɔ ti ho tara sukpe’ene. Tara suure lua ti Yehowa wan sirum soŋɛ hɔ.—Tm. 4:29.

9. Beni n sɔi ti la nara ti to zusɛ Yehowa ti a bo to sakerɛ pa’asɛ?

Lebese

⁹ Ho me ta’an zusɛ Yehowa ti a soŋɛ hɔ ti ho tara sakerɛ. A wan dekɛ a zilam vo’osum la soŋɛ hɔ ti ho sakerɛ kpe’em. (Ga. 5:22, 23) Ho sakerɛ la wan gu ho sitaana bɛ̃tɔ poan ge ti ho kelum tara yelemɛŋɛrɛ pu’usa Yehowa. (Ep. 6:16) Sakerɛ tari paŋa mɛ paa. Bala n sɔi ti Baabule la yeti to san tara sakerɛ, to wan “nyaŋɛ teŋa wa.” (1 Yo. 5:4) Ho san tara sakerɛ Yehowa poan, ho wan ta’an tara sukpe’ene. Ho san tara sakerɛ ti Yehowa wan ta’an soŋɛ hɔ yeledaaŋɔ poan, ho kan zɔta dabeem. Kristabia woo nari ti a zusɛ Yehowa ti a bo en sakerɛ pa’asɛ, wuu Yezu tuntuneba n yuun zusɛ se’em la.—Lu. 17:5.

‘Tara Sukpe’ene!’

10-11. Beni n sɔi ti Paul yuun yele mabiisi la n kɛ̃’ɛri Yerusalem, la ka kinkɛlesi la ti ba nari ti ba tara sukpe’ene?

Lebese

¹⁰ Yezu yuun tɔɣɛ biŋe ti ba wan sa’am Yerusalem. Lan yuun gee yuuma fii ge ti ba sa’am tiŋa la, Paul yuun gulesɛ la gɔŋɔ ta bo mabisɛba n kɛ̃’ɛri Yerusalem, la ka kinkɛlesi. Eŋa n yuun gulesɛ yelese’a la wan soŋɛ ba ti ba maasum gura daaŋɔ seto n wan paɛ ba la. (Lu. 19:41-44; 21:20-24) Paul yuun soŋɛ ba la wani ti ba tara sukpe’ene? A yuun tĩɛ ba la Yehowa n pu’ulum sɛla biŋe ba la. To tɔɣɛ pu’ulumbiŋere wa yele mɛ gɔŋɔ wa Pɔsega la poan. Yehowa yuun yeti: “N kan malom bahɛ ho, bii n zagahɛ ho.” Yehowa n tɔɣɛ sɛla wa yuun ta’an basɛ ti la ana ba la wani? Paul tɔ̃kɛ yeti: “Na’ayenɛ n yele dena wa zuo, to ta’an yeti, Na’ayenɛ n soŋore mam, mam kan zɔta dabeem, asaala ete mam la bem?”—Heb. 13:5, 6.

¹¹ Baabule la ka pa’alɛ sɛla wana mɔpi n yuun eŋɛ, se’em ma’a ti ba yuun sa’am Yerusalem yuun 70 Y.B. poan la. Ge ton mi sɛla dela Kristakɔma sɛba n tari yelemɛŋɛrɛ la yuun doose la Paul n ka’am ba se’em la. Ba me yuun tari la sukpe’ene ge doose Yezu n yuun pa’alɛ ba se’em la. Bala la, saŋa la n yuun paɛ la, ba yuun “zɔ keŋɛ [la] zɔya bɔba.”—Lu. 21:20, 21.

12. (a) Yeledaaŋɔ san paɛ hɔ, pu’ulumbiŋ’a ani n wan ta’an soŋɛ hɔ ti ho tara sukpe’ene? (b) Zina beere wa, nɛreba basɛba eŋɛ la wani pa’alɛ ti ba tari sukpe’ene ge hon me wan eŋɛ la wani ta’an tɔɣesa ba? (Bisɛ daka la zuo n de “Tɔɣesa Ba Sukpe’ene La.”)

Lebese

¹² Yehowa wan bo ho sukpe’ene nananawa, la beere sa’am. (Eze. 38:1, 2, 10-12; Mt. 24:21) Tɛ̃ra ti Yehowa pu’ulum biŋe ti a wan te’ele to Sitaana, la nɛrebɛ’ɛsi nu’usin. (Eze. 38:19-23; 2 Tes. 3:3) Yehowa kan malum basɛ nɛresɛba n nɔŋɛ en ge me tara sakerɛ bɔ’ɔra en la. Yehowa yuun yele Yosua yeti, “kpeŋe ho mɛŋa ge . . . da zɔta dabeem”! (Yos. 1:7, 9, 18) Yele wa wan ta’an soŋɛ tomam me. Tɛ̃ra ti Yezu yuun yele a podɔleba la ti, ba ‘sɛ ze’ele.’ Yezu yuun pu’ulum biŋe ti a sɔ wan dekɛ a zilam vo’osum la soŋɛ tɔ. Bala, to ta’an tara suure lua ti zilam vo’osum la wan soŋɛ tɔ ti to tara sukpe’ene, la sakerɛ pu’usa Yehowa. (Yon 14:26; 15:26, 27; 16:33) Wana pa’alɛ ti to wan ta’an sirum ‘tara sukpe’ene’!

Fɔɔra: Mabiisi n eŋɛ pa’alɛ ti ba tari sukpe’ene bɔŋa to’ore to’ore poan. 1. Pugela n zãli sukuu gɔŋɔ, la gɔnlɛmlɛm la n de “Was Life Created?” la ze’a kilaasi poan ge la’ara mɔsi mɔsi. 2. Buraa ayima la a pɔɣa n kɔkɛ ba bipugela ge la’ara mɔsi mɔsi. Ba boi la zɛ’an ti sɛba n zɔ loŋe tiŋa kɛ̃’ɛra. 3. Budibila ti ba paɣɛ en ge ti a la’ara ge bisera yiŋa na. — La ka pakɛ la to bɔŋa la n ani se’em, Yehowa pu’ulum biŋe ti a wan dekɛ a zilam vo’osum la soŋɛ tɔ ti to tara sukpe’ene bɔŋa woo poan

Tɔɣesa Ba Sukpe’ene La

Martin La Gertrud Poetzinger

Martin n yuun di a pɔɣa Gertrud la, ba yuun naɛ la taaba tuna sore ŋmɛ’a tuuma la. Ba puurɛ yuun pee mɛ ge ŋmaresi sitã la girego pooren, ba yuun nyɔɣɛ ba mɛ ta paɣɛ zɛ’ɛsi yima yima. Ba yuun nyɔkɛ Martin la yuun 1936 poan ge tari en ta paɣɛ Dachau tiŋa. Pooren, ba me yuun nyɔkɛ Gertrud mɛ. La yuun paɛ la yuuma awɛi ti ba ka nyɛ taaba. Sankaŋa poan la, ba se’em sa’am yuun ka mi nyaa a tadaana vɔi mɛ bii a ki mɛ. Ge ba za’a yuun kɔ’ɔn lu la ba suure ti ba wan tara ba birikinte la. Ba yuun yese Martin tee keŋɛ la Mauthausen paka deo la poan. Bilam ti ba yuun ta mɛlesɛ en ti la ka tana ita. Ba yuun paɣɛ Gertrud la yuuma atã la girego ti a bɔna a ma’a. Pooren ti ba yuun le paɣɛ en yuuma anaasi Ravensbrück paka deo la poan. Tingɔŋɔ Wa Za’a Zaberɛ Sɛka N Pa’asɛ Buyi la n yuun ba’asɛ la, Gertrud yuun baŋɛ ti Martin ka ki. Bala la, a yuun belum la soogɛpa kpɛ’ɛma ayima ti a yese Martin. Wana wa yuun soŋɛ mɛ ti ba yese mabiisi n paɛ wuu 100 n yuun kelum bɔna Mauthausen paka deo la poan. Martin la Gertrud yuun le naɛ la taaba tuna tɛm woo na’am tuuma la. Pooren, tigere la yuun basɛ ti ba keŋɛ la Brooklyn, New York ta tuna Betel poan. Bilam ti Martin yuun ta dɛna Yehowa Sɛɛradoma Tigere Zuo Bisegadoma la ayima. A yuun ni yɛta mabiisi la ti: “Sukpe’ene dela halesonɛ ti la nara ti Yehowa yameŋa woo tara!” Martin la Gertrud yuun tari la yelemɛŋɛrɛ pu’usa Yehowa la pupeelum ta paɛ ba kum.

“Sukpe’ene dela halesonɛ ti la nara ti Yehowa yameŋa woo tara!”—M. Poetzinger

Valentina Garnovskaya

Valentina yuun kɛ̃’ɛri la Belarus tiŋa. Yuun 1945 poan ti mabiburaa yuun sɔsɛ Baabule yele bo en. Valentina yuun de wuu yuun 20. A yuun nɔŋɛ eŋa n zameseri sɛla la mɛ. Mabia la yuun lebe a zɛ’an la sugumnɔɔrɛ buyi ti ba zamesɛ Baabule la pa’asɛ. Ge nimbãalega la dela, a yuun ka le nyɛ mabia la. Sankaŋa la, ba yuun gu Yehowa Sɛɛradoma tuuma mɛ. Bala la, la yuun kpe’em mɛ ti a nyɛ mabiisi la. Ge a yuun ka zoti dabeem ti a tɔɣɛ eŋa n zamesɛ sɛla la bo nɛreba. Wana wa zuo, ba yuun nyɔkɛ en mɛ paɣɛ en yuuma 8. Yuun 1953 poan ti ba yuun yese en. Bilam bilam ti a yuun le pɔsɛ mɔɔla bɔ’ɔra nɛreba. Bala la, pooren, ba yuun le nyɔkɛ en mɛ paɣɛ en yuun 10 paka deto to’ore to’ore poan. Paka deo ayima poan ti a yuun seke mabipɔɣesi zo’e zo’e. Ba yuun tari la Baabule ge ba yuun ni suɣɛ ku mɛ. Mabipɔɣesi la ayima n yuun dekɛ Baabule la pa’alɛ Valentina la, a puurɛ n yuun pee. Se’ere n sɔi la, yuuma zo’e zo’e ti a ka nyɛ Baabule. Ban yuun yese Valentina yuun 1967 poan la ti a yuun nyaa muse ko’om dɛna Yehowa Sɛɛradaana. A yuun kelum tulegera mɛ na’am mɔɔlegɔ tuuma la poan. Yuun 1969 poan ti ba yuun le nyɔkɛ en paɣɛ yuuma atã. Ge a yuun kelum mɔɔla yelesoma la mɛ bɔ’ɔra nɛreba. Valentina yuun soŋɛ la nɛreba 44 ti ba baŋɛ yelemɛŋɛrɛ la. A yuun yeti: “Mam yuun ka tari n mea yire. Mam n yuun tari sɛla za’a dela lɔɣɔrɔ fii n boi tapɔɔ poan ge mam yuun kelum tara la pupeelum pu’usa Yehowa.” Valentina yuun kɔ’ɔn tara la yelemɛŋɛrɛ pu’usa Yehowa ta paɛ a kum. A yuun ki la yuun 2001 poan.

“Mam yuun ka tari n mea yire. Mam n yuun tari sɛla za’a dela lɔɣɔrɔ fii n boi tapɔɔ poan ge mam yuun kelum tara la pupeelum pu’usa Yehowa.”—V. Garnovskaya

Alfredo Fernández

Alfredo n yuun de wuu yuun 19 la ti ba yuun pɛ̃regɛ en ti a tum soogɛpa tuuma Argentina tiŋa. Eŋa n yuun zamesɛ Baabule la baŋɛ ti zaberɛ, la nalɛɣerɛ yɛla ka ani soŋa la zuo, a yuun lu la a suure ti a kan keŋɛ zaberɛ. Bala la, a yuun ka sakɛ ti a dɛna soogɛa bii a puɣum to’e soogɛpa fuo yɛ. Alfredo n yuun zaɣesɛ ti a kan dɛna soogɛa la zuo, ba yuun paɣɛ en mɛ. Eŋa n yuun boi paka deo la poan la, sɛba n biseri ba la yuun mɛleseri en mɛ. Saŋa ase’a, ba ta’an ni mina ge eŋɛ wuu ba yeti ba ku en mɛ. Ge la bala za’a, Alfredo yuun kelum kaala Baabule la mɛ ge me gulesa eŋa n zameseri sɛla la biŋera. Ban yuun tari en zom kootin la, gãkereba la ayima yuun yele en yeti a san yeen sakɛ yɛ soogɛpa fuo la wa’an kootin la na, ba wan basɛ en. Ge Alfredo yuun kɔ’ɔn ze’a la kankaŋi ti eŋa kan yɛ fuo la. Bala la, ba yuun tari en lebe ta paɣɛ mɛ. Nɛreba la n yuun ba’ɛ mɛlesa en la zuo, a yuun bɛ̃ mɛ paa gee fii la a ki. Dɔgeta sɛka n yuun biseri ba la, yuun yele Alfredo ti la kan yue a wan ki. Alfredo n yuun baŋɛ ti la kan yue a wan ki la, a yuun gulesɛ la gɔŋɔ ta bo a yidoma. A yuun gulesɛ yeti: “N yidoma wa, mam nɔŋɛ ya mɛ. Mam ka boti ni ti n gulesɛ gɔŋɔ kana taaba na bo ya ge la deŋɛ wa’an la bala na.” Alfredo yuun pɛ̃ɣɛ a yidoma mɛ la eŋa n boi paka deo ti ba kpɛmesa a giila se’em la. A gulesɛ yeti: “Mam pu’usɛ Yehowa zo’e zo’e la mam n laɣum pa’asɛ to yizuo wa poan la. . . . Mam mi ti ya san ta kaala gɔŋɔ wa, ya suure wan sa’am paa. Ge mam n boti n yele ya sɛla dela, ya da basɛ ti susa’aŋɔ la kɔ’ɔsɛ ya giila ge ya tuɣum tara supke’ene ta’an ze’a kankaŋi. Yehowa Zilam Gulesegɔ la wan buɣelɛ ya suure. . . . Ya tɛ̃ra ti Naayinɛ wan ta isige mam. Ya san ni tĩɛ n yele, ya mina ti mam yuun tari la yelemɛŋɛrɛ pu’usa Yehowa ta paɛ n kum. Bala la, n yidoma wa, yamam me tiregɛ pu’usa Yehowa la yelemɛŋɛrɛ ta paɛ ba’asegɔ.” Ba yuun paɣɛ Alfredo la yuuma 3. Alfredo yuun tari la yelemɛŋɛrɛ pu’usa Yehowa ta paɛ a kum yuun 1982 poan. A yuun dela yuun 21.

“Mam n boti n yele ya sɛla dela, ya da basɛ ti susa’aŋɔ la kɔ’ɔsɛ ya giila ge ya tuɣum tara supke’ene ta’an ze’a kankaŋi.”—A. Fernández

Karen Oehm

Karen yuun pɔsɛ pu’usa Yehowa la a bunbilimen. A yuun nɔŋɛ nɛreba mɛ ge me tara pupeelum. A me yuun pee la puurɛ tuna sore ŋmɛ’a tuuma la. Pooren, a yuun ele la Rainer ti ba za’a laɣum tuna United States Betel poan. Eŋa n yuun de wuu yuun 55 la, a yuun baŋɛ ti a tari la bã’a n wan ta’an ku en. Ba yi’iri bã’a wa la Amyotrophic Lateral Sclerosis (ALS). Bã’a wa kuuri la yɛla ase’a n boi to zuputo la poan n basɛ ti to ta’an kena, lɔbera nu’usi, tɔɣera ge me ita yɛla ase’a. Bala la, nɛra san tara bã’a wa, a kan ta’an ita yele ana za’a ge ti la me wan kuura en fii fii. Karen n yuun baŋɛ bã’a wa n ani se’em la, a yuun tiregɛ bisɛ la eŋa n wan eŋɛ se’em ta’an kelum tara pupeelum ge me tara a saŋa la tuna soŋa. Karen yuun tari a saŋa zo’e zo’e zamesa la Baabule la ge me mɔɔla yelesoma la bɔ’ɔra nɛreba. A me yuun tiregɛ bisera la amea soŋa. Lan yuun ta kpe’em bo en ti a ta’an tɔɣera la, a yuun zamesɛ la eŋa n wan tara kɔmpiita tɔɣera se’em. A san bɔta ti a yele sɛla, a ni bisɛ tɔ la yelebɛa la n boi screen la zuo, ti kɔmpiita la mea gulesɛ eŋa n boti a tɔɣɛ sɛla la eŋɛ screen la zuo bo en. Wana wa daɣɛ tunpika ge a yuun ni tiregɛ mɛ maasum eŋa n wan bo lebesego se’em zamesegɔ poan ge me gulesa gɔnɔ kɔmpiita la poan dita sɛɛra. Mabipɔka ayima n yuun laɣum bisera Karen yeti: “A yuun ka makɛ soke yeti, ‘Beni n sɔi ti wana paara mam?’ Lan yuun ta gee bakwai ayi ge ti Karen ki la, a yuun gulesɛ la gɔŋɔ bo pɔka ayima ti mam zamesera en Baabule la. Gɔŋɔ la ki’ileŋɔ poan, a yuun gulesɛ yeti, ‘Ho suure san sa’am, ti ho ɛɛra nɛra n wan buɣelɛ ho suure, mam kɔ’ɔn bɔna mɛ.’” Mabipɔka ayima me n yuun biseri en yeti: “A yuun ka makɛ kaasɛ a bã’a wa zuo. La boi bim ti a yuun mi ti bã’a la kan basɛ ge bala yuun ka kɔ’ɔsɛ a giila. A yuun tari sakerɛ ti a san puɣum ki, Yehowa wan ta isige en. Bala zuo la, a suure yuun ka ba’ɛ sa’am.” Karen bã’a la n yuun nan pɔsɛ la, a liiberɛ tadaana yuun soke en yeti, “Ho eŋɛ la wani tana ŋmibera wana?” Karen yuun lebese en yeti: “Yehowa n bo’ori mam paŋa ti n tana ŋmibera.” Yehowa me yuun kɔ’ɔn soŋera en mɛ ti a tara sukpe’ene ta’an ŋmibera ta paɛ ba’asegɔ. Karen yuun gulesɛ la gɔnɔ zo’e zo’e ti a wan dekɛ bo a yidoma, la a zɔdoma ti la kpemese ba giila. Eŋa n yuun ki la, a sira yuun tɔ̃rɛ gɔnɔ la mɛ ti nɛra woo to’e a denɛ.

“Yehowa n bo’ori mam paŋa ti n tana ŋmibera.”—K. Oehm

13. Bem zuo ti hon bɔta ti ho kɔ’ɔn ita pa’ala ti ho tari sukpe’ene?

Lebese

¹³ Ti’isɛ bisɛ vom n wan ta ana se’em, suma’asum san ta bɔna tingɔŋɔ wa zɛ’an woo. Bisɛ to puurɛ n wan pee se’em, Yehowa san ta isige to nɛresɛba n ki la. Sankaŋa la, to wan ta nyɛ nɛreba zo’e zo’e n yuun tari sukpe’ene. To puɣum sɔsɛ basɛba yele mɛ gɔŋɔ wa poan. Daanse’ere ba yuun namesɛ mɛ, hali ti ba ku basɛba ban tari sakerɛ pu’usa Yehowa la zuo. Bala la, hon ti’isɛ ti Yehowa san ta isige nɛrebana wa kum poan, ba suure wan sa’am la ban yuun tari sukpe’ene pu’usa en la? Aayi! Ge la wan ta ana hon me la wani sankaŋa? Ho wan ta tuna tunsoma la pupeelum. Ho wan ta naɛ la sɛba n isige kum poan la tum ti tingɔŋɔ wa lebege paradiisi. Hon ti’isɛ ti ho san ta bɔna paradiisi la poan, ho wan ta yeti ho daa san baŋɛ ni, ho kan loe ni ti ho pu’usa Yehowa? Aayi! Ho kan makɛ yele bala. Bala la, kɔ’ɔn lu ho suure ti ho wan tara sukpe’ene pu’usa Yehowa ta paɛ ba’asegɔ. Ho san eŋɛ bala, ho wan ta tara pupeelum wuusa!

Nɛreba n boi Paradiisi ti ba puurɛ pee. Basɛba biseri la dusi, ti basɛba duɣera. Basɛba sɔsera mɛ ge ti basɛba me ŋmɛ’ɛra yuuma.