54 TUNTUNA YON
A Yuun Tari La Sukpe’ene, Saŋa N Kpe’em Poan
TUNTUNA YON n yuun kuregɛ la, a yuun gulesɛ yeti “ba’ahegɔ dabaherɛ” la paɛ ya. Yon yuun mi ti Yezu, la tuntuna Paul yuun puɣum tɔɣɛ biŋe ti pumpɔreŋɔ pa’alegɔdoma wan ta kɛ̃ tansugere la poan tiregera ti ba pã’asɛ mabiisi. Bala n yuun pɔsɛ la, Yon la tuntuneba bana la n yuun te’ele mabiisi la ti ba ka nyaŋɛ pã’asɛ ba. (Mt. 7:15; Tm. 20:29, 30; 2 Tes. 2:6, 7) Pooren, tuntuneba bana la yuun ki mɛ ge gee Yon ma’a. Bala n sɔi ti a yuun yeti la dela “ba’ahegɔ dabaherɛ” la. Yon yuun nyɛ ti pumpɔreŋɔ pa’alegɔ kɔ’ɔn yiregera mɛ tansuga la poan. Bala yuun ta’an basɛ ti Yon ti’isa ti la kan yue, yelemɛŋɛrɛ pu’usegɔ kan le bɔna ge a giila yuun ka kɔ’ɔsɛ.
Yon yuun kuregɛ mɛ paa ge ti ba yuun mɛlesa en ge paɣɛ en Patmos. A me yuun nyɛ pumpɔreŋɔ pa’alegɔdoma n kɛ̃ tansuga la poan se’em mɛ. Bem n yuun soŋɛ en ti a ta’an ŋmibe yele ana poan?
Yon yuun gaŋɛ yuun 90 mɛ ge kelum tulegera mɔɔla yelesoma la. Bala zuo la, Arom gɔmena la yuun tari en ta paɣɛ la Patmos tiŋa. Zɛ’an wa yuun dela pɔɣentia ti tãsi bɔna bim. Bem n yuun soŋɛ Yon ti a ta’an tara sukpe’ene, la putɛsonɛ? Nɔkpe’ene kai ti Yon yuun tĩɛ la sɛla ti Yezu yuun yele a podɔleba la. Yezu yuun yeti: “N wan seren bɔna la ya daarɛ woo gura teŋa wa ba’ahegɔ.”—Mt. 28:20.
Yezu n yuun tɔɣɛ bala ba’asɛ la, yuun 60 pooren ti a yuun lilige sɛla n wan ta eŋɛ beere sa’am bo Yon. Yezu yuun pa’alɛ en ti ba’asegɔ dabesa la poan, Naayinɛ nɛreba n boi tingɔŋɔ wa zɛ’an woo wan pu’usa Yehowa lan nari se’em. Yezu yuun le basɛ ti Yon tara suure lua ti a wan soŋɛ a yamesi ti ba tara yelemɛŋɛrɛ, la ka pakɛ la daaŋɔ se’a ti Sitaana tara paara ba la.
Yon yuun ka bɔkɛ liligere yɛla la zo’e zo’e. Ge eŋa n yuun bɔkɛ sɛla dela, Yehowa la Yezu kan bo yɔ’ɔ ti pumpɔreŋɔ pa’alegɔdoma sa’am yelemɛŋɛrɛ pu’usegɔ. Ba’asegɔ dabesa la poan, Yehowa nɛreba wan zo’e ge ti a me kã’ara bɔ’ɔra ba. Yezu yuun zabɛ nyaŋɛ Sitaana mɛ saazuo sa ge lobe en basɛ tingɔŋɔ wa zuo. Ba’asegɔ poan la, ba wan sa’am Sitaana za’a za’a. Yelese’a ti Yezu yuun basɛ ti Yon nyɛ la, yuun kpemese la a giila. Bala la, Yon yuun gulesɛ “sɛla woo te a nyɛ la” mɛ.
La boi bim ti la yuun kpe’em bo Yon mɛ se’em ma’a ti ba yuun paɣɛ en Patmos tiŋa la ge a yuun kelum tulegera mɛ ge me tara pupeelum. Sankaŋa la, buraa ayima yu’urɛ n de Domitian n yuun biseri Arom sɔ’ɔlum la. Buraa wa yuun mɛleseri Kristakɔma la mɛ. La ani wuu buraa wa kum pooren ti ba yuun yu’ɛ Yon basɛ. Pooren, la ani wuu Yon yuun keŋɛ la Epesus. Se’em ma’a ti a yuun pɔ̃ra yuun 100 la, Naayinɛ yuun bo en la tuunɛ n kpe’em.
Yehowa yuun basɛ ti Yon gulesɛ la Yezu yɛla. Eŋa gɔŋɔ la n de ki’i yelesoma gɔŋɔ. Yon yuun mi ti eŋa n gulesɛ yelese’a la wan ba’asum paɛ tansuga la za’a. La wan soŋɛ mabiisi la ti ba sakerɛ kpe’em Yezu poan ge me tara sukpe’ene tɔɣera pɔ’ɔra ba sakerɛ yɛla. Yon yuun mi soŋa soŋa ti yelese’a ti a gulesɛ la wan nyie sɛba n yaɛ Kristakɔma la suure ge bala yuun ka gu en.
Yezu n yuun ki la, la yuun paɛ wuu yuun 70 ge ti Yon nyaa gulesɛ a yɛla. Zilam vo’osum la n yuun soŋɛ Yon ti a ta’an tĩɛ Yezu n yuun tɔɣɛ ge eŋɛ yelese’a. Yon n yuun gulesɛ Yezu yɛla se’em la kɛ̃’ɛri la suure. A me yuun gulesɛ la yɛla zo’e zo’e ti Matu, Mark la Luke ka gulesɛ. Makerɛ, Yon ma’a n pa’alɛ Yezu n yuun isige Lazarus kum poan se’em. Eŋa ma’a me n pa’alɛ ti pu’usegɔ nɛŋadoma la yuun boti la ba ku Lazarus. (Yon 11:1-46; 12:10) Yon yuun le gulesɛ la yelesoma zo’e zo’e ti Yezu yuun tɔɣɛ bo a podɔleba la yu’uŋɔ seko ti ba yuun dɔ̃rɛ en la. A me yuun gulesɛ la Yezu n yuun zusɛ bo a podɔleba la se’em yu’uŋɔ kuŋɔ. Bisɛ to puurɛ n pee se’em la Yon n yuun gulesɛ yelesoma ana woo bo to la!
La ani wuu sankaŋa mea nɔɔ ti Yehowa yuun soŋɛ Yon ti a gulesɛ gɔnɔ totã n kpemeseri giila ta bo a mabiisi la. A yuun dekɛ la sukpe’ene kaɣɛ mabiisi la ti ba bisa bamea soŋa la pumpɔreŋɔ pa’alegɔdoma n yuun pɔsɛ kɛ̃’ɛra tansugere la poan la. A me yuun le kaɣɛ mabiisi la ti ba da naɛ la nɛrebana wa sɔsera. Yon gɔnɔ totã wa kɔ’ɔn tɔɣera la nɔŋerɛ, la to beere sa’am puti’irɛ la yele. Yon yuun pa’alɛ ti “Yenɛ dela nɔŋerɛ.” Yon n yuun kpemeseri a mabiisi giila se’em ge me ka’ana ba se’em la pa’alɛ ti a yuun tari la nɔŋerɛ. Yon yuun soŋɛ la nɛreba zo’e zo’e ti ba baŋɛ yelemɛŋɛrɛ la. A yuun gulesɛ yeti eŋa puurɛ pee mɛ la nɛrebana wa n “kelum bɔna yelemɛŋɛrɛ la poan” la. Eŋa n gulesɛ yelese’a la yuun kpemese mabiisi wa zo’e zo’e giila mɛ ti ba kelum pu’usa Yehowa.
Yon kum pooren, a yelege n meadoma yuun zo’e mɛ tansuga la za’a poan. Ge tomam n boi zina beere wa ka nari ti to fabela ti ba wan le zo’e wuu ban yuun zo’e se’em Yon saŋa la. Bem zuo? Se’ere n sɔi la, Yehowa pu’ulum biŋe ti a kan bo yɔ’ɔ ti bala le eŋɛ. (Isa. 54:17; Tm. 3:21) Wuu Yon la, nɛreba ta’an yaɛ tɔ, mɛlesa tɔ, bii paɣɛ tɔ to sakerɛ zuo. Basɛ ya ti to tɔɣesa a makesonɛ la ge lu to suure ti, la ka pakɛ la yelese’a n wan paɛ tɔ, to wan kelum pu’usa Naayinɛ la sukpe’ene!
Kaalɛ Baabule zɛ’ɛsi wa:
Sɔsɛ ya sokere wa:
Yon yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Bem n pa’alɛ ti Yon yuun iti la kãbi kãbi saŋa ase’a? (bt-E 33, daka ¶3-4)
2. Beni n sɔi ti ba yuun yeti Yon dela ‘yiremoa’? (Tm. 4:13; w08-E 5/15 30 ¶6)
3. Sodeni poan ti Yon yuun vɔna ta paɛ se’em ma’a ti Yezu lebe na? (Yon 21:22; w05-E 1/15 13 ¶14-15)
4. To eŋɛ la wani baŋɛ ti Yon n yuun gulesɛ Yelesoma Gɔŋɔ n pa’asɛ bunaasi la? (it-E “John, Good News According to” ¶2-8) Bisɛ foote A
Fondation Martin Bodmer, Cologny (Genève)
Foote A: Diimi gɔŋɔ n yuun boi yuun 200 Y.B. bɔba. Zɛ’an ti ba daalɛ basɛ la yeti “Yon Yelesoma Gɔŋɔ”
Ti’isɛ Hon Wan Dekɛ Tum Tuuma Se’em
Yon n yuun gulesɛ gɔnseto la tɔɣɛ Yezu kum yele ti la gaŋɛ sugumnɔɔrɛ 100. To wan eŋɛ la wani pa’alɛ ti to nini tiɣɛ ya la Yezu n yuun ki bo to la?
Yon yuun gee la fii la a paɛ yuun 100 ti Yehowa yuun basɛ ti a gulesɛ Baabule gɔnɔ tonuu. Bala pa’alɛ ti Yehowa geele bunkureba la wani? Bisɛ foote B
Foote B
Ho wan eŋɛ la wani ta’an tɔɣesa Yon sukpe’ene la?
Ti’isɛ Taɣesɛ Yehowa Yele
Yon yele wa pa’alɛ mam ti Yehowa ani la wani?
Yon yele wa makɛ la Yehowa puti’irɛ la wani?
Beni n sɔi ti hon puurɛ pee la ban loe Yon pa’asɛ sɛba n wan naɛ la Krista di na’am saazuo la?
Zamesɛ Yɛla Pa’asɛ
Mabiisi n de bunkureba zina beere wa wan ta’an tara sukpe’ene wuu Yon?
Yon gɔnɔ la kɔ’ɔn tɔɣera la nɔŋerɛ yele. Bisɛ ton wan ta’an zamesɛ sɛla gɔnɔ wa poan, la Yon mea n yuun eŋɛ makesonɛ se’em.
“Lessons From ‘the Disciple Whom Jesus Loved’” (w21.01-E 8-13)