45 PETER
“Mam Dela Toonbe’erodaana”
PETER la a yidoma yuun kɔ’ɔn muura mɛ ba zim nyɔka tuuma la poan. Peter yuun tari la sukpe’ene. A inya n yuun ni kita ti a tɔɣɛ a puti’irɛ n de se’em. A me ni bɔta la a eŋɛ kalam eŋɛ sɛla soŋɛ nɛreba. Daarɛ deyima ti a suɔ Andrew yele en la pupeelum yeti: ‘To nyɛ Mɛzaaya la.’ Peter yuun eŋɛ la kalam keŋɛ ta nyɛ Yezu ge nyaa pɔsɛ dɔla en.
Ŋmaresi fii pooren, Yezu yuun keŋɛ la Kapernaum, tinsɛka ti Peter yuun kɛ̃’ɛra ge nyɔɣera a zim la. Se’em ma’a ti Yezu yuun nyɛ Peter la, Peter yuun tum taregɛ mɛ, sɛla n sɔi la a yuun lobe zim la bala yu’uŋɔ la za’a ge ka nyɔkɛ sɛsɛla. Yezu yuun yele Peter ti a tari ɔɔreŋɔ la sige ko’om la tiŋasuka ta lobe yuka la ge a wan nyɔɣɛ zim. Peter yuun ka sakɛ ti a wan nyɛ zim, se’ere n sɔi la zim ni ka bɔna wuntɛɛŋa! Bala la, Peter yuun yeti: “To kɔ’ɔn tom mɛ yu’uŋɔ wa zan’an ge ka nyɔkɛ sɛla.” Ge a yuun sakɛ eŋɛ Yezu n yele en sɛla la mɛ. La ka yue ti ba nyɔɣɛ zim kekeko ti yuɣesi la pɔsɛ ãasena. Bala ti ba yibesi nu’usi yi ba zɔdoma basɛba n boi ɔɔreŋɔ kuyima poan ti ba wa’ana soŋɛ ba. Zim kekeko la basɛ ti ɔɔrenɔ toyi la pɔsɛ musera mɛ! La yuun eŋɛ Peter la pakerɛ ti dabeem kɛ̃ en. Bala ti a dɔ̃belɛ tiŋa Yezu nɛŋan ge yele en yeti: “N Daana, keŋɛ n zen’en ha te mam dela toonbe’erodaana.” Peter yuun ti’isɛ ti eŋa ka nari ti a naɛ la Yezu bɔna. Sɛla n sɔi la Yezu dela Naayinɛ Dayua ge tara paŋa tuna tunkiresi. Yezu yuun yele en yeti: “Da bahɛ te sɛla daana hɔ. Te ya dela zimlɔbera ge te nananawa kɔ’ɔn yɛ’ɛha ho wan tara nɛreba kena na te ba dɔla mam.”
Yezu yuun nyɛ ti Peter tari la halesoma. Pooren, a yuun loe en pa’asɛ la a tuntuneba la poan. Peter yuun tari la sukpe’ene sarɔtɔ zo’e zo’e poan. Makerɛ, Yezu yuun san tɔɣɛ sɛla ti a podɔleba la ka bɔkɛ, Peter n yuun ni soke Yezu ti a pa’alɛ de vuurɛ. Yezu n yuun keni ko’om la zuo la, Peter ma’a n yuun dekɛ sukpe’ene laɣum kena ko’om la zuo.
Saŋa zo’e zo’e, Peter yuun ni tɔɣera la yelese’a n ka nari. Ge ba yuun san ni ka’am en, a ni dekɛ la sukpe’ene sakɛ ge eŋɛ teere
Peter yuun le eŋɛ pa’alɛ ti a tari sukpe’ene, se’em ma’a ti Yezu yuun demese en la. Peter yuun ka ani wuu nɛreba basɛba. A yuun sakɛ a tuure mɛ ge eŋɛ teere. Saŋa kasɛka, Yezu yuun yeti ba wan ku en, ti Peter yele Yezu yeti: “N Daana, da ne tɛn’ɛhe [ti’isɛ kuna].” Peter yuun boti la Yezu eŋɛ sɛla ti Yehowa ka bɔta. Ge Yezu yuun yele Peter yeti, a tɔɣeri me wuu Sitaana la. Yezu yuun demese Peter la sugumnɔɔrɛ zo’e zo’e ge Peter yuun ni sirege la amea kelese ge eŋɛ teere.
Yu’uŋɔ seko ti ba yuun yeti ba nyɔkɛ Yezu la, a yuun pa’alɛ a tuntuneba la ti la nari ti ba siregera bamea. Bala la, a yuun pee la ba nama. Yezu yuun tum la tunse’ere ti yameŋa nara ti a tum. Peter yuun tiregɛ mɛ ti a gu Yezu ge yeti: “La kan ta’an eŋɛ mɛ te hon pee mam natala.” Ge Yezu yuun demese en mɛ. Peter le malum ŋmɛregɛ tɔɣɛ la sɛla n boi de to’ore. A yuun yele Yezu yeti, a da pee eŋa nama ma’a ge a pee a nu’usi, la a zuo pa’asɛ. Yezu yuun le demese en mɛ. Pooren, Yezu yuun yeti tuntuneba la za’a wan ta zaɣesɛ en. Peter yuun yeti, tuntuneba la za’a san puɣum zaɣesɛ Yezu, eŋa kan zaɣesɛ en! Yezu yuun lebese Peter yeti, a wan ta zaɣesɛ eŋa la sugumnɔɔrɛ butã yu’unkuŋɔ.
Awa fii pooren, soogɛpa n yuun wa’ana nyɔkɛ Yezu la, Peter yuun kɔ’ɔn dekɛ la sukpe’ene dɔla ba ti a baŋɛ ban tari Yezu ye’a zɛ’an. Ba yuun tari Yezu keŋɛ la malema nɛŋadaana la yire. Bilam ti ba yuun mɛlesɛ en ge gãkɛ en ti a dela be’emdaana ge ti la daɣena bala. Sankaŋa la, Peter yuun boi la zinzaka la poan. Nɛresɛba n yuun boi bilam la yuun baŋɛ ti Peter dela Yezu podɔla. Ge sugumnɔɔrɛ butã ti Peter yuun zaɣesɛ ti eŋa ka mi Yezu. Wana ti Yezu yuun yele la.
Sankaŋa mea nɔɔ ti Yezu yese yire la poan kɔ’ɔn bisera Peter. Peter suure yuun sa’am mɛ la eŋa n eŋɛ sɛla la. Bala ti Peter yuun “yehe yeŋa ta kele.” Ban yuun nyaa ku a zɔ Yezu la, Peter suure yuun ba’ɛ sa’am mɛ. Ge a yuun ka basɛ ti a tuure yɛla la kɔ’ɔsɛ a giila. A yuun kɔ’ɔn lu la a suure ti a ŋmibe. A yuun le naɛ la tuntuneba bana la pu’usa Yehowa. Pooren, Yezu n yuun isige kum poan la, a yuun niɛ amea pa’alɛ la Peter, se’em ma’a ti a yuun bɔna a ma’a. Baabule la ka pa’alɛ Yezu n yuun yele Peter sɛla. Ge to mi ti Peter giila yuun kpeŋe mɛ ti a puurɛ pee la Yezu n yuun di sugeri bo en la.
Bakwai fii pooren, se’em ma’a ti Yezu yuun seke a tuntuneba la Galilee Mɔɣeren la, a yuun bo Peter la tuunɛ n boi de to’ore. Wuu Peter n yuun zaɣesɛ Yezu sugumnɔɔrɛ butã la, Yezu me yuun bo en la yɔ’ɔ sugumnɔɔrɛ butã ti a yeti a nɔŋɛ eŋa Yezu. Yezu yuun nyaa bo Peter la ninmu’urɛ tuunɛ. Yezu yuun yele en yeti: “Gura n piihe wa.” Wuu ton wan zamesɛ sɛla Zuo 49 poan la, Peter yuun dekɛ la sukpe’ene tum Yezu n yuun bo en tunse’ere la, a vom dabesa za’a.
Kaalɛ Baabule zɛ’ɛsi wa:
Sɔsɛ ya sokere wa:
Peter yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Baabule saŋa la, zim lɔbereba tuuma yuun ani la wani? (it-E “Hunting and Fishing” ¶6-7) Bisɛ foote A
Foote A
2. Beni n sɔi ti Yezu yuun siɣɛ Simon ti Kepas (Peter)? (w24.06 28 ¶11)
3. Yezu n yuun yele Peter la Andrew ti ba “wan tara nɛreba [kena na] bɔ’ɔra” eŋa la vuurɛ dela bem? (Mt. 4:18-20; w16.05-E 9 ¶3-4) Bisɛ foote B
Foote B
4. Lan yuun ta gee fii la Yezu zom saazuo la, a yuun soke Peter yeti: “Ho nɔŋɛ mam gana bana wa?” Yezu sokere wa ta’an pa’alɛ la bem? (w17.05-E 22 ¶2)
Ti’isɛ Hon Wan Dekɛ Tum Tuuma Se’em
Yeledaaŋɔ san paɛ hɔ, Peter makesonɛ la wan ta’an soŋɛ ho la wani ti ho kelum pu’usa Yehowa? Bisɛ foote D
Foote D
Ho san ti’isɛ Yehowa la Yezu n yuun di sugeri se’em bo Peter la, la wan ta’an soŋɛ ho la wani?
Ho wan eŋɛ la wani ta’an tɔɣesa Peter sukpe’ene la?
Ti’isɛ Taɣesɛ Yehowa Yele
Peter yele wa pa’alɛ mam ti Yehowa ani la wani?
Peter yele wa makɛ la Yehowa puti’irɛ la wani?
Hon zamesɛ la bem Peter yele wa poan ti la basɛ ti hon puurɛ pee la ban loe en pa’asɛ sɛba n wan naɛ la Krista di na’am saazuo la?
Zamesɛ Yɛla Pa’asɛ
Dɔɣereba wan dekɛ Peter yele wa pa’alɛ ba kɔma la wani ti ba bɔkɛ Yehowa n zoti nɛreba nimbũ’ɔ se’em?
Ti’isɛ bisɛ Peter n yuun kelum tara birikinte se’em, hali la nɛreba zo’e zo’e n yuun zaɣesɛ Yezu la.