46 MARY MAGDALENE
‘Mam Nyɛ Daana La!’
MARY MAGDALENE yuun namesɛ mɛ paa. Kolekpabɛ’ɛsi n yuun daani en, ti bala yuun basɛ ti a vom ana bura. Ge a yuun seke la Yezu ti a vom tee. Baabule la yeti Yezu yuun sa’ɛ la “bonbɛ’ɛhe bayopɔe” a poan. Mary puurɛ n yuun pee paa la Yezu n eŋɛ sɛla bo en la. Bala yuun basɛ ti a pɔsɛ dɔla la Yezu ge me bɔta ti a soŋera en la a paŋa za’a.
A yuun nɔŋɛ Yezu mɛ paa ge me yi’ira en Pa’ala. Bala pa’alɛ ti a yuun bo’ori Yezu la gilema zo’e zo’e. Yezu, la a tuntuneba 12 la yuun kɔ’ɔn ɛɛra la tiŋa la za’a mɔɔla Naayinɛ Na’am la yɛla. Mary yuun baŋɛ ti ba basɛ la bamea tuuma, lan wan eŋɛ se’em ti ba ta’an dekɛ ba tɛm, la ba paŋa za’a tum Naayinɛ tuuma la. Mary yuun eŋɛ la bem ta’an soŋɛ?
Mary Magdalene vom yuun ani la bura ge se’em ma’a ti Yezu yuun soŋɛ en ba’asɛ la, a yuun mu’ɛ la nini soŋera Yezu la a podɔleba la
Mary yuun laɣum pa’asɛ la pɔɣesɛba n yuun “bo’ore Yezu la sɛba woo n lagom dɔla en la sɛla te ba nara te ba tara.” Pɔɣesi wa yuun tari la bamea ligeri da’ara lɔɣɔrɔ soŋera Yezu, la a podɔleba la. Baabule la yeti ‘pɔɣesi kekeko me’ yuun pa’asɛ Mary poan mɛ dɔla Yezu ɛɛra “teŋkanra la teŋbibihe” poan. Nɛreba yuun ta’an ti’isa ti la ka nari ti pɔɣesi laɣum dɔla Yezu, la a podɔleba la. Sɛla n sɔi la, sankaŋa la, pɔɣesi yuun ka doli pu’usegɔ nɛŋadoma ɛɛra. Bala la, nɛreba yuun ta’an zɛregera pɔɣesi wa. Ge Mary, la a taaba la yuun baŋɛ ti sɛla yele n pakɛ paa dela ba soŋera Yezu, la a podɔleba la. Ba yuun tari la sukpe’ene soŋera Yezu, la ka pakɛ la nɛreba n wan geele ba se’em.
Azɔɔtole daarɛ la yu’uŋɔ ti ba yuun nyɔkɛ Yezu, Yerusalem tiŋa poan. Bala yuun basɛ ti Mary suure n sa’am. Ba yuun parum bo Yezu ti a tuuri la Naayinɛ ge nyaa ku en mɛlesegɔ dɔɔ la zuo. Ge Mary yuun dekɛ la sukpe’ene doose Yezu ma, la pɔɣesi basɛba keŋɛ zɛsɛka ti ba yuun yeti ba ku Yezu la. Bala la, se’em ma’a ti Yezu yuun yula dɔɔ la zuo namesa ge suure nyɛ pɔɣesi wa la, a yuun baŋɛ ti ba nɔŋɛ en mɛ paa ge me kɔ’ɔn ana tapilapi la en. Pɔɣesi wa yuun nyɛ Yezu n tari yelemɛŋɛrɛ se’em ta paɛ a kum. Ba yuun le nyɛ ti a tum tunse’a woo ti a Sɔ dekɛ bo en la mɛ. Pɔɣesi wa me yuun boi bim mɛ se’em ma’a ti Yezu yuun nyaa ta ki la.
Arom soogɛpa la, la Yuda pu’usegɔ nɛŋadoma n yuun ku Yezu ge Mary, la pɔɣesi basɛba la yuun ze la ba nɛŋan kɛla. Bala pa’alɛ ti ba yuun tari la sukpe’ene. La boi bim ti Mary Magdalene suure yuun sa’am mɛ ge a yuun kelum bɔta la a eŋɛ sɛla pa’alɛ ti a nɔŋɛ Yezu. A yuun boti la a maalɛ Yezu inya la soŋa. Yudea tiŋa n tulegɛ se’em la zuo, la ta’an ni basɛ ti kum sa’am kalam. Bala la, nɛreba ni dekɛ la kaam, la tiim n tari nyuuŋo soŋɔ maalɛ kum, la wan eŋɛ se’em ti nɛreba san wa’ana ti ba bisɛ kum la, la kan fɛ̃’ɛra. Mary yuun mi ti ba yuun eŋɛ la kãbi kãbi maalɛ Yezu inya la ge laɛ. Bala zuo la, Mary yuun boti la a ma’ɛ amea maalɛ Yezu inya la soŋa. Vo’osego Daarɛ la n yuun tole la, Mary, la pɔɣesi basɛba yuun da la kaam, la tiim n tari nyuuŋo soŋɔ ge isige bulika yu’uŋɔ yu’uŋɔ keŋɛ yɔɔ la poan ti ba ta maalɛ Yezu inya la.
Daanse’ere, Mary n yuun paɛ yɔɔ la zɛ’an yia. Ba yuun dekɛ la kugere li yɔɔ la nɔɔren. Ge Mary n paɛ bim la, la yuun eŋɛ en la pakerɛ la eŋa n nyɛ ti ba bilege kugere la mɛ ge ti yɔɔ la me dɛna voore! Bala ti a zɔ ta yele Peter, la Yon. Mary yuun ta lɛbera yɔɔ la zɛ’an la ti pɔɣesi bana la ka le bɔna bim. Mary yuun veese bisɛ la yɔɔ la poan nyaa nyɛ “Na’ayenɛ soŋoreba bayi [n] yɛ lɔgɔpeelehe zin’an zen’an bɔba te ba daa dekɛ kum la biŋe la.” A yuun yele ba yeti eŋa eeri la Yezu inya la ge nyaa ŋmɛregɛ nyɛ buraa ayima. Mary yuun ti’isɛ ti buraa wa dela mina n biseri va’am la. Buraa la yuun soke Mary yeti: “Pɔka wa, bene te ho kɛla?” Mary yuun boti la a baŋɛ ban dekɛ Yezu inya la biŋe zɛ’an. Bala la, a yuun yele buraa la yeti: “Naa, la han de’a la ho dekɛ kum la, yele mam hon dekɛ bɔ keŋɛ zen’an te n keŋɛ ta dekɛ.” Mary yuun puɣum ka ti’isɛ Yezu inya la n wan tibegɛ se’em. Eŋa n yuun mi sɛla dela, la nari ti a tiregɛ eŋɛ sɛla.
Mary suure yuun sa’am mɛ ge buraa la yuun yi en yeti: “Mari!” Mary yuun baŋɛ kɔ̃a la mɛ. A yuun baŋɛ ti la dela Yezu kɔ̃a. Bala ti Mary sakɛ kpe’eŋo kpe’eŋo yeti, “Araboni!” ge nyaa kɔkɛ en. Yezu yuun ka basɛ ti a kɔ’ɔn gurɛ en tara. A yuun bo Mary la ninmu’urɛ tuunɛ. Yezu yuun yele en yeti: “Keŋɛ n dɔlɔba la n de n sɔɔnrɔ la zen’en.” Yezu yuun yele en ti a ta yele a podɔleba la ti eŋa n de ba Daana la isige kum poan mɛ! Mary yuun ka gu’um. Eŋa n yuun keŋɛ ta yele tuntuneba la, ba yuun nan ka sakɛ eŋa n yele sɛla la. Baabule la yeti tuntuneba la yuun “tɛn’ɛhe te [eŋa] n yele se’em la dela tɔgɔyooro.” Ge bala yuun ka kɔ’ɔsɛ Mary Magdalene giila la fii me. Dadendaarɛ yɛ’ɛsa, a yuun kɔ’ɔn mɔɔla bɔ’ɔra la nɛreba ti Yezu isige kum poan mɛ. Pɔka wa yuun sirum tari la sukpe’ene.
Kaalɛ Baabule zɛ’ɛsi wa:
Sɔsɛ ya sokere wa:
Mary Magdalene yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Mary Magdalene, la pɔɣesi basɛba yuun iti la bem soŋera Yezu, la a tuntuneba la? (ijwia-E zaseŋɔ 6 ¶5-6) Bisɛ foote A
Foote A
2. Se’em ma’a ti Yezu yuun isige kum poan la, beni n sɔi ti Mary yuun nan ka baŋɛ en? (ijwia-E zaseŋɔ 6 ¶16)
3. Beni n sɔi ti Yezu yuun yele Mary Magdalene ti a basɛ en? (w08-E 4/15 32 ¶6)
4. Podɔleba la yuun ti’isɛ ti Mary Magdalene n yeti Yezu isige kum poan la “dela tɔgɔyooro.” Daanse’ere, beni n sɔi ti ba yuun ti’isa bala? (Lu. 24:11; w12-E 9/1 10 ¶4-5)
Ti’isɛ Hon Wan Dekɛ Tum Tuuma Se’em
Mary Magdalene yuun sirege la amea soŋera nɛreba. To wan eŋɛ la wani ta’an tɔɣesa en? Bisɛ foote B
Foote B
To san mɔɔla yelesoma la bɔ’ɔra nɛreba ge ti ba ka sakɛ ton yeti sɛla la, to wan eŋɛ la wani ta’an tɔɣesa Mary Magdalene? (Lu. 24:10, 11)
Ho wan eŋɛ la wani ta’an tɔɣesa Mary Magdalene sukpe’ene la?
Ti’isɛ Taɣesɛ Yehowa Yele
Mary Magdalene yele wa pa’alɛ mam ti Yehowa ani la wani?
Mary Magdalene yele wa makɛ la Yehowa puti’irɛ la wani?
Beni n sɔi ti hon puurɛ pee ti Mary Magdalene ta’an pa’asɛ sɛba n wan naɛ la Krista di na’am saazuo la?
Zamesɛ Yɛla Pa’asɛ
Geele bisɛ Baabule la n tɔɣɛ Mary Magdalene yele se’em ti la bɔna de to’ore la nɛreba basɛba n tɔɣɛ sɛla.
Yezu n yuun iti Mary Magdalene, la pɔɣesi basɛba se’em la pa’alɛ ti tomam me nari ti to gɛɛla ge ita pɔɣesi la wani?
“Christian Women Deserve Honor and Respect” (w95-E 7/15 15-18 ¶3-8)