A Yuun Soŋɛ Nɛreba La Mɛ Ti Ba Le Pu’usa Yehowa

YOSIA yuun dela yuuma ayoobe ma’a ge ti a sɔyaaba Naba Manase ki. Bia wa yuun ta’an mina ti a sɔyaaba la yuun tum la tunfɛ̃’ɛsa ge nyaa tee pu’usa Yehowa. Yosia yuun ka makɛ tamɛ a sɔyaaba n yuun eŋɛ teere se’a ge nyaa ki la. Ge bia wa sɔ, Amon n yuun nyaa de naba. Amon yuun dela putɔya ge me yuun basɛ ti nɛreba la le kaabera baɣa ge tuna kolekpatuuma. Amon yuun di na’am la yuuma ayi ma’a ge ki. Yosia yuun dela yuuma anii ge soe dɛna naba.

Daanse’ere Yosia yuun zamesɛ eŋa n wan pu’usa Yehowa se’em la nɔdɛ’ɛsa Zefania, la Yeremia, la nɔdɛ’ɛsepɔka Hulda, la Malema Nɛŋadaana Hilkia zɛ’an. Baabule la tɔɣɛ Yosia yele yeti, eŋa n yuun “nan de bia la [wuu yuun 16], te a pɔhɛ a sɔ naba David Yenɛ la ɛɛa.” Yosia n yuun paɛ wuu yuun 20 la ti Yehowa yuun basɛ ti a tum ninmu’urɛ tuunɛ n de a soŋɛ nɛreba la ti ba le pu’usa Yehowa. Naayinɛ yuun doose la Yosia poan soŋɛ nɛreba la ti ba basɛ baɣa kaabegɔ, la tunfɛ̃’ɛsa. Naba wa n yuun nan de bunbilipaalega la yuun dekɛ la sukpe’ene ta’an tum tuunɛ wa.

Yosia yuun dekɛ la sukpe’ene keŋɛ Israel buuri pia sɔ’ɔlum la n boi saazuo bɔba la poan. Nɛresɛba n yuun kɛ̃’ɛri bilam la zo’e zo’e yuun daɣɛ Israeldoma, se’ere n sɔi la ba yuun tari Israeldoma la keŋɛ la Asiria tiŋa ti ba ta dɛna yamesi. Ge Yosia yuun kelum sa’am baɣa la, la kaabegɔ bimbina la n yuun boi bim la mɛ.

Yuuma anuu pooren, Yosia yuun yele nɛreba la ti ba maalɛ Yehowa pu’usegɔ yire la. Ban yuun boi bim maala la ti Malema Nɛŋadaana Hilkia yuun nyɛ sɛla ti la eŋɛ en pakerɛ. La yuun dela gɔnkile sɛka n tari Lɔɔ la ti Yehowa yuun dekɛ bo Moses la. Gɔŋɔ wa yuun yue mɛ. Daanse’ere Moses mea n yuun gulesɛ ku! Ba yuun dekɛ gɔnkile wa keŋɛ la Yosia zɛ’an ta kaalɛ bo en ti a ana kɛli kɛlesa. A suure n yuun sa’am la eŋa n wum sɛla la! A yuun nyaa baŋɛ ti nɛreba la ba’ɛ tue Yehowa mɛ. Yosia yuun bɔkɛ ti Yehowa sunsɔa n nyie la nɛreba la paa. Ge a wan nyɛ sukpe’ene ta’an tum eŋa n wum sɛla la?

Bilam bilam ti Yosia tum nɛreba banuu ti ba keŋɛ ta baŋɛ Yehowa n wan eŋɛ ba sɛla. Buraasi wa yuun keŋɛ la nɔdɛ’ɛsepɔka Hulda zɛ’an, ti a yele ba ti Yehowa suure sa’am mɛ paa la Yudadoma n zaɣesɛ en la. Bala la, ba wan sa’am Yuda, la Yerusalem. Ge a yuun le yele ba ti Yehowa nyɛ Yosia n nani en se’em ge me tiregera ti a basɛ ti nɛreba la le pu’usa en la. Bala la, sa’aŋɔ la kan wa’an a saŋa poan.

Ge hali la bala za’a, Yosia yuun kelum tiregera mɛ ti a soŋɛ nɛreba la ti ba pu’usa Yehowa soŋa. Eŋa la a nɛreba la za’a yuun biŋe la nɔɔrɛ la Yehowa ti ba wan dɔla a Lɔɔ la. A me yuun ãregɛ amea mɛ wɔ̃rɛ baɣase’a n boi tiŋa la poan la za’a ti nɛra yuun ka le kaabera baɣa. Naba la n yuun boti yelemɛŋerɛ pu’usegɔ le bɔna la zuo, a yuun eŋɛ la maaseŋɔ eŋɛ Azɔɔtole de’eŋo kãtɛ. Eŋa la a nabiisi la yuun dekɛ la dusi zo’e zo’e bo ti ba dekɛ kaabɛ bo Yehowa ge ti yuun yuuneba la me yuuna zilam yuuma pɛ̃ɣera Yehowa. De’eŋo kuna laɣum pa’asɛ la Azɔɔtole de’eŋo kãra se’a ti Naayinɛ nɛreba tabelɛ eŋɛ.

Yosia n yuun soŋɛ nɛreba la ti ba basɛ baɣa kaabegɔ la pa’alɛ ti a tari la sakerɛ, la sukpe’ene. Saŋa kasɛka, Yosia yuun nyɔ̃ la nɛreba kɔ̃ba baɣa kaabegɔ zɛ’an. Ba yuun puɣum tɔɣɛ yele wa biŋe mɛ yuun 300 n tole ge ti la nyaa tum. (1 Na. 13:2) Hali Yuda tiŋa poan, Yosia yuun sa’am baɣa se’a ti nɛreba la yuun kaabera, se’em ma’a ti Naba Solomon yuun zaɣesɛ Yehowa la. Ge bala pooren la, Yosia yuun eŋɛ la sɛla n ka ani soŋa. Yosia yuun maaseni mɛ ti a zabɛ la Egypt naba ayima yu’urɛ n de Neko. Neko yuun yele Yosia ti Yehowa yeti a san zabɛ la eŋa a wan ki. Ge Yosia yuun ka soke Yehowa nɔdɛ’ɛseba ti a baŋɛ nyaa Neko n yele sɛla la sirum ze’ele la Naayinɛ zɛ’an. Ge a yuun tuɣum pɔsɛ zabera mɛ la en. Yosia n yuun zabɛ la Neko soogɛpa la ta’an ana wuu a tari la sukpe’ene ge bala yuun dela gberentuuma. A yuun dela yuun 39 ma’a ge ki zaberɛ la poan.

Yehowa yuun tamɛ tunsoma la woo ti Yosia tum la mɛ? Daɣɛ bala la fii me! Naba Yosia n yuun ki la, nɔdɛ’ɛsa Yeremia yuun gulesɛ la yuunɛ n pa’alɛ a suure n yuun sa’am se’em la Yosia n ki la. Naayinɛ nɛreba yuun kelum yuuna yuunɛ wa mɛ yuuma zo’e zo’e pooren. Yosia san ta isige kum poan, a wan kaalɛ Baabule la n pa’alɛ eŋa n yuun soŋɛ nɛreba se’em, la Yeremia n yuun yuum pɛ̃ɣɛ en se’em. La niɛ peelumi ti Yehowa ka makɛ tamɛ Yosia n yuun tari sakerɛ, la sukpe’ene se’em la.

Kaalɛ Baabule zɛ’ɛsi wa:

• 2 Nadoma 22:1–23:30

• 2 Yelebiŋ’a 33:21–35:27

Sɔsɛ ya sokere wa:

Yosia yuun eŋɛ la wani pa’alɛ ti a tari sukpe’ene?

StockStudio/Alamy Stock Photo

1. 4. Hulda yuun tɔɣɛ Yosia yele biŋe ti “ho wan sige ho yɔɔ poan la sunma’ahom.” Ge Yosia yuun ki la zaberɛ poan. Bala la, yetɔɣebiŋere wa yuun tum tuuma la wani? (2 Na. 22:20; w00-E 9/15 30 ¶2-3)

   Lebese

Ti’isɛ Hon Wan Dekɛ Tum Tuuma Se’em

• Kristakɔma sɛba dɔɣereba n ka pu’useri Yehowa wan ta’an zamesɛ la bem Yosia zɛ’an?

  Lebese

• Yosia yuun mi ti a nari ti a nyɛ soŋerɛ ta’an bɔkɛ gulesegɔ la. (2 Yel. 34:21) To wan eŋɛ la wani tɔɣesa en? Bisɛ foote B

  Lebese

  

• Ho wan eŋɛ la wani ta’an tɔɣesa Yosia sukpe’ene la?

  Lebese

Ti’isɛ Taɣesɛ Yehowa Yele

• Yosia yele wa pa’alɛ mam ti Yehowa ani la wani?

  Lebese

• Yosia yele wa makɛ la Yehowa puti’irɛ la wani?

  Lebese

• Yehowa san ta isige Yosia kum poan, mam wan soke en la bem?

  Lebese

Zamesɛ Yɛla Pa’asɛ

Yosia, la Yuda nadoma bayi me n yuun de bunbilipaalesi ge di na’am. Ho wan ta’an zamesɛ la bem, la bamam n yuun kɔ’ɛ ba puti’irɛ se’em la?

“Bunbilipaalesi—Ya Wan Bɔta Ti Ya Eŋɛ La Bem Ya Vom Poan?” (w23.09 8-13)

Yosia yuun dekɛ la amea paŋa sa’am baɣa la? Bisɛ vidiyo wa ge ho wan nyɛ lebesego la.

Yosia Vom Poan Yɛla: Nɔŋɛ Yehowa; Yaɛ Be’em—Bɔberɛ II—Ase’a (3:43)