Jasegíkena jaikuaa porãve Jehovápe

1. ¿Mbaʼéichapa ñañeñandu ñapensávo entéro umi mbaʼe Jehová oikuaávare ha la ojapóvare?

ÑANDEJÁRA Jehová oikuaa opa mbaʼe, iñarandueteve oimeraẽvagui ha ojapóma hetaiterei mbaʼe ijojahaʼỹva. Ñapensávo umívare ñandejurujái voi japytávo, ha jahechakuaa ñande ndahaʼeiha mbaʼevete ñande Apohare rovake. Ikatu voi ñañeñandu Apóstol Pablo oñeñandu haguéicha, haʼe heʼi vaʼekue: “Ajépa tuichaite umi vendisión Ñandejára omeʼẽva. Haʼe ningo iñarandueterei ha oikuaa entéro mbaʼe. Ñande ndaikatúi jaikuaapa umi mbaʼe haʼe odesidíva ha umi mbaʼe haʼe ojapóva” (Rom. 11:​33, 34).

2. ¿Mbaʼérepa jaʼekuaa ikatuha jaikuaa Jehovápe?

² Ñarrekonose ningo núnka ndaikatumoʼãiha jaikuaapa entéro mbaʼe Jehovágui, péro si oĩ umi mbaʼe ikatúva jaikuaa chugui. ¿Mbaʼérepa jaʼe upéva? Rréi David heʼi vaʼekue itaʼýra Salomónpe: ‘Eñehaʼãke eikuaa porã nde túa Járape, ha eservi chupe nde pyʼaite guive. Nde rehekáramo chupe, haʼe ojejuhukáta ndéve’ (1 Crón. 28:9). Avei heta tiémpo upe rire Apóstol Juan heʼi vaʼekue umi kristiánope Jesús ikatuha ‘omeʼẽ chupekuéra entendimiénto ikatu hag̃uáicha oikuaa Ñandejára teépe’ (1 Juan 5:20). Ha Jesús voi heʼi vaʼekue haʼe ikatuha oipytyvõ peteĩ persónape oikuaa porã hag̃ua Itúape (Mat. 11:27).

3. ¿Mbaʼépa jahecháta ko artíkulope?

³ Enterove jaservíva Jehovápe ñaaprendéma heta mbaʼe chugui, péro siémpre oĩta hetave mbaʼe ikatúva jaikuaa Jehovágui (Juan 17:​3, nóta). Por ehémplo ikatu jaikuaa porãve mbaʼépa ombovyʼa chupe, ha mbaʼéichapa ikatu ñakonfiave hese. Oiméramo jepe aréma jaservi hague Jehovápe, iñimportanteterei ñakontesta jahávo umi mbohapy porandu ñaanalisátava ko artíkulope. Umíva hína: ¿Mbaʼépa heʼise jaikuaa Jehovápe? ¿Mbaʼérepa jasegi vaʼerã jaikuaa porãve chupe? ¿Ha mbaʼéichapa ikatu jajapo upéva?

¿MBAʼÉPA HEʼISE JAIKUAA JEHOVÁPE?

4. ¿Mbaʼeichaite pevépa jaikuaa vaʼerã Jehovápe?

⁴ ¿Mbaʼeichaite pevépa jaikuaa vaʼerã Jehovápe? Jareko vaʼerã enkuénta la Jehová opromete vaʼekue umi judío osẽvape Babilóniagui oho jey hag̃ua hetãme. Haʼe heʼi vaʼekue: “Amomýita ikorasõnguéra oikuaase hag̃ua che haʼeha Jehová” (Jer. 24:7). Umi judío oikuaáma kuri unas kuánta kósa Jehovágui, péro osẽ rire Babilóniagui haʼekuéra oñehaʼã vaʼerã kuri ipyʼaite guive oikuaa porãve hag̃ua Jehovápe ha oñemoag̃uive hese. Peteĩ lívro omoĩ peteĩ ehémplo ñantende hag̃ua ko mbaʼe. Upépe heʼi: “Peteĩ persóna ikatu olee mbaʼépa oñandu peteĩ persóna oñenamoráva, péro idiferentetéta hína haʼe voi oúramo ohayhu algúnope. Péicha avei ikatu jaikuaa algúna ke ótra kósa Ñandejáragui, péro idiferentete hína jajúramo jaikuaa porã chupe ha oiko chugui ñane amígo. Upéva ótra kosaite”. Upéicharõ, ikatu oime jaikuaáma Jehová réra ha avei haʼe haʼeha Ñandejára. Péro ndaikatúi japyta upépente, síno jaikuaa vaʼerã avei mbaʼeichaguápa hína haʼe ha umi kualida porã porã orekóva.

5. Asegún rréi Josías ehémplo, ¿mbaʼépa heʼise jaikuaa Jehovápe?

⁵ Amáske jaikuaa jahávo Jehovápe, ñaaprende umi mbaʼe haʼe oguerohorýva ha la ndogustáiva avei chupe. Jahechamína rréi Josías ehémplo. La Biblia heʼi: “Ha 8 áño ogoverna haguépe, Josías oñepyrũ oservi itúa ypykue David Járape” (2 Crón. 34:3). Josías ostudia vaʼekue oikuaa hag̃ua Ñandejárape, péro ndahaʼéi upévante. Haʼe ojapo vaʼekue umi mbaʼe oaprendéva. Upévare proféta Jeremías rupive Jehová heʼi vaʼekue Josías ‘odefende hague pe hustísia ha umi mbaʼe iporãva, ha odefende hague umi ojejopy asy ha imboriahúvape’. Oñeʼẽ rire Josías rehe Jehová oporandu vaʼekue: “¿Ndahaʼéi piko chekuaa porã haguére la haʼe ojapo vaʼekue upéicha?” (Jer. 22:​15, 16).

6. Ohechaukaháicha Salmo 9:​10, ¿mbaʼépa avei oikóta jaikuaavévo jahávo Jehovápe?

⁶ (Elee Salmo 9:10). Jaikuaavévo jahávo Jehovápe jajeroviave avei hese. Upéva oiko vaʼekue Apóstol Pablo kásope. Pe última vuéltape oĩrõ guare kárselpe ha omano mboyvemi, haʼe omombeʼu vaʼekue mbaʼérepa notĩri la osufri haguére. Haʼe heʼi: ‘Natĩri, pórke che aikuaa porã hína Ñandejárape, upe ajeroviávare’ (2 Tim. 1:12). Umi mbaʼe Pablo oaprendéva ha la ohasa vaʼekue oikove aja oipytyvõ vaʼekue chupe okonfia hag̃ua Ñandejárare ipyʼaite guive. Pablo oĩ vaʼekue segúro Jehová ndahesaraimoʼãi hague chugui ha la ojapo vaʼekuégui iservísiope. Avei oikuaa Ñandejára omoingovetaha chupe.

¿MBAʼÉREPA JASEGI VAʼERÃ JAIKUAA JEHOVÁPE?

7. ¿Mbaʼépa ikatu oiko jaservi riréma Jehovápe heta áñore?

⁷ Ñañepyrũrõ guare jastudia la Biblia, oiméne ñañehaʼãmbaite jaikuaa hag̃ua Jehovápe, péro ohasávo pe tiémpo ikatu oime ndahaʼevéima la peichaite. ¿Mbaʼépa la oikóva jepi? Jaleévo la Biblia ñaneañoháme térã rreunionhápe, pyʼỹinte jaheka mbaʼéichapa pe informasión ikatu ideprovécho ñandéve térã ñaipytyvõ hag̃ua ótrope. Legálmente upéva oĩ porã, pórke la Biblia heʼi voi jajapo vaʼerãha péicha (2 Tim. 3:​16, 17). Péro oĩ hína peteĩ mbaʼe iñimportantevéva. Jehová hína pe oskrivika vaʼekue la Biblia, ha tekotevẽterei avei ñapensa hese jaleévo Iñeʼẽ (Sal. 25:​8-10). Upévare ñapensaiterei rangue ñandejehénte térã ótrore jalee jave Ñandejára Ñeʼẽ, aníkena ñanderesarái ñañeporandu hag̃ua: “¿Mbaʼépa chemboʼe ko párte Jehovágui?”.a

8. ¿Mbaʼeichagua amistápa jarekóta Jehovándi jaikuaa porãvévo chupe? (Salmo 73:​24-28).

⁸ Ñane amista Jehovándi imbaretevéta jaikuaa porãvérõ chupe. Por ehémplo, ¿mbaʼéichapa reñeñandu káda día relee rire nde Biblia, ehecha rire peteĩ Broadcasting, térã reho rire peteĩ asambléape? Ajépa reñandu reñemoag̃uive hague nde Ru yvagapeguáre. ¿Mbaʼérepa? Pórke reaprendeve chugui, upéicha rupi remombaʼeguasuse chupe ha eagradese Ñandejárape la ojapóvare. Por ehémplo yma pe salmísta Asaf ojepyʼamongeta vaʼekue mbaʼeichaitépa Jehová ohayhu chupe, ha upévare haʼe heʼi Ñandejárape: “Nde hína che Ita Guasu. Nde hína pe párte otokáva chéve opa ára g̃uarã” (elee Salmo 73:​24-28). Ñande avei ñañeñandu pe salmísta oñeñandu haguéicha. Ñañehaʼãramo jaikuaa porãve Jehovápe, koʼýte jaagradeseséta chupe haʼe haguére peteĩ amígo ndaijojaháiva.

9. ¿Mbaʼépepa ñanepytyvõta jarekóramo enkuénta Ñandejárape? Emombeʼu peteĩ ehémplo.

⁹ La Biblia heʼi ‘jareko vaʼerãha enkuénta Ñandejárape opa mbaʼe jajapóvape’ (Prov. 3:​5, 6). Upéva heʼise jajapóta jave álgo, ñapensa vaʼerãha umi mbaʼe jaikuaávare Jehovágui, por ehémplo mbaʼépa haʼe oñandu ha opensa. Upéva ñanepytyvõta jadesidi porãve hag̃ua la jajapótava. Ñamoĩmína peteĩ ehémplo: Umi omendáva oreko jepi hembiayhu fóto peteĩ lugár pyʼỹi ohechatahápe, por ehémplo iteléfonope. Upéva oipytyvõ chupekuéra opensa meme hag̃ua hembiayhúre. Pe persóna oreko rupi enkuénta hembireko térã iménape, oñehaʼã ojapo umi mbaʼe ombovyʼátava chupe ha ndojaposéi mbaʼeve olastima hag̃ua hembiayhúpe. Upéicha avei ñapensa meméramo Jehováre, jadesidi porãvéta ha jajapóta umi mbaʼe ombovyʼáva chupe (Sal. 19:​13, 14).

10. ¿Mbaʼépa ikatúta jajapo ñaaprendevéramo Jehovágui?

¹⁰ Jehová ningo ñandeapo vaʼekue ijoguaháramo, upévare ikatu jasegi iñehémplo (Gén. 1:26). Jaikuaa porãvévo jahávo umi kualida haʼe orekóva, ifasilvéta ñandéve jasegi hag̃ua iñehémplo. Umi eskríva ha fariséo oĩva Jesús tiémpope ndojapói vaʼekue upéva. Haʼekuéra oikuaa vaʼekue umi mbaʼe michĩvéva jepe oĩva pe léipe, péro Jesús heʼi chupekuéra nokumplíri hague “umi mbaʼe iñimportantevéva oĩva pe léipe, umíva hína: hustísia, poriahuvereko ha jerovia” (Mat. 23:23). Ñande ndajajoguaséi umi líder rrelihiósope, upéva rangue ñañehaʼã jahecha mbaʼépa ñanemboʼe Jehovágui umi konsého ha léi haʼe omeʼẽva. Jajapóramo upéva ikatúta jasegi Ñandejára ehémplo (1 Juan 4:​8, 11).

¿MBAʼÉICHAPA IKATU JAIKUAA PORÃVE JEHOVÁPE?

11. ¿Mbaʼéichapa reikuaa ypy vaʼekue Jehovápe?

¹¹ ¿Mávapa nepytyvõ raʼe reikuaa hag̃ua Jehovápe? Ikatu oime nde tuakuéra raʼe nemboʼe. Oimérõ upéicha katuete haʼekuéra omombeʼúne raʼe ndéve umi istória oĩva la Bíbliape reikuaa hag̃ua umi kualida orekóva Jehová. Térã oiméne oñeʼẽ raʼe ndéve hikuái pe kreasiónre, pórke umíva ohechauka mbaʼeichaguápa hína Jehová. Péro ñamoĩ chupe reikuaa hague Jehovápe restudia rupi peteĩ testígo de Jehovándi. Oimérõ upéicha pe ermáno térã ermána oipurúne raʼe pe lívro hérava ¡Jaikóta vyʼápe pára siémpre!, ha katuete nepytyvõne raʼe rejepyʼamongeta hag̃ua la Biblia omboʼévare ha pe kreasiónre. Péicha nde rehecha porãve umi kualida porãite Jehová orekóva (Neh. 8:8; Hech.14:17).b Péro koʼág̃a jahecháta mbaʼéichapa ikatu jasegi ñaaprendeve Jehovágui.

12, 13. ¿Mbaʼépa ikatu ñaaprende Jehovágui jaleévo la Biblia? Emombeʼu peteĩ ehémplo. (Jeremías 39:​15-18). (Ehecha pe taʼanga).

¹² Ikatu jaikuaave Jehovápe jaleéramo ha jastudiáramo Iñeʼẽ. Sapyʼánte la Biblia derechoite voi oñeʼẽ Ñandejára kualidáre (Éx. 34:​6, 7). Péro hetave vése oñeʼẽ umi héntere ha la odesidi vaʼekuére hikuái. Jalee jave peichagua istória ñañehaʼã vaʼerã jahecha mbaʼépa umíva ñanemboʼe Jehovágui.

¹³ Jahechamína peteĩ ehémplo. Ñamoĩ chupe releeha hína Jeremías 38:​6-13. Upépe oñeñeʼẽ pe etíope Ébed-Mélec rehe, haʼe ningo osalva vaʼekue proféta Jeremíaspe. Oiméne ensegída voi rehechakuaa mbaʼéichapa ikatu resegi Ébed-Mélec ehémplo, haʼe nopensái vaʼekue ijehénte, ipyʼaguasu ha oporohayhu. Péro, ¿rehechakuaápa avei umi mbaʼe ikatúva reaprende Jehovágui ko istória rupive? (elee Jeremías 39:​15-18). Releévo ko istória, eñehaʼãmína ehecha koʼã mbaʼe: ¿Mbaʼe versíkulopa ohechauka Jehová ovaloraha la ojejapóva hesehápe, haʼe ihustoha ha nomboykeiha avavépe tahaʼe haʼéva la hetã? ¿Oĩpa ótra kósa nemboʼéva Jehovágui ko istória? Jalee jave la Biblia ñañehaʼãkena jahecha mbaʼépa ikatu ñaaprende Jehovágui. Upéi jaagradese Jehovápe haʼe haguére peichagua Dios ha ñamombaʼeguasu chupe.

14. ¿Mbaʼérepa jajepyʼamongeta vaʼerã umi mbaʼe Jehová okrea vaʼekuére?

¹⁴ Ikatu avei jaikuaave Jehovápe jajepyʼamongetáramo umi mbaʼe haʼe okrea vaʼekuére (Sal. 145:​9, 10). Jaikuaa upéva ndeʼiseiha ñamañánte vaʼerãha Jehová rembiapokuére ha oĩma. Oĩ ningo umi hénte oikove aja pukukue ostudiáva pe naturalésa, péro haʼekuéra ndohechakuaái oĩha peteĩ Dios okrea vaʼekue umi mbaʼe, ni mbaʼeichaguápa hína haʼe. Apóstol Pablo heʼi vaʼekue ‘Ñandejára ojapo guive ko múndo umi hénte ikatuha oikuaa mbaʼeichaguápa haʼe, pórke ndajahecháiramo jepe chupe, ñamañávo hembiapokuére ikatu jahecha ipodér opaʼỹva’ (Rom. 1:20). Peteĩ traduksión de la Biblia heʼi ko versíkulo ohechaukaha peteĩ persóna ojepyʼamongeta porãrõ ikatuha ohecha Ñandejára kualida. Upéicharõ tekotevẽ japytaʼimi ha ñapensa umi mbaʼe porãite Jehová okrea vaʼekuére ha mbaʼépa umíva ñanemboʼe chugui.

15. ¿Mbaʼépa ojapo Patrick oikuaa porãve hag̃ua Jehovápe, ha mbaʼépa nde avei ikatu rejapo? (Ehecha pe taʼanga).

¹⁵ La majoría ningo jaiko pe siudaháre saʼihápe pe naturalésa. Oimérõ upéva la ñane situasión, ¿ikatúpa lomímonte jaikuaave Jehovápe pe kreasión rupive? Jahechamína Patrick káso, haʼe oiko peteĩ siuda tuichaitereíva héravape Brazzaville opytávape República del Cóngope. Patrick heʼi: “Káda día añehaʼã amaña peteĩ mbaʼe Jehová okrea vaʼekuére. Pyʼỹinte ahecha mbaʼéichapa umi vícho michĩʼíva térã umi guyraʼikuéra ombaʼapo jejopy otopa hag̃ua hembiʼurã térã ojapo hag̃ua hogaʼirã. Una vuéltape apyta amaña umi guyraʼi ojaitypóvare. Haʼekuéra oipuru umi mbaʼe otopáva pe siudápe ojapo hag̃ua la hogarã, ha upépe omokunuʼũta hína kuri itaʼyraʼikuérape”. Péro Patrick ojapo ótra kósa avei, haʼe oñepyrũ ojepyʼamongeta ñande Apoharére. Patrick heʼi: “Ahechakuaa Jehová okuidaha umi ikreasión michĩvévare jepe. Upéva chemboʼe haʼe oñeinteresaha avei cherehe ha núnka nombofaltamoʼãiha chéve umi mbaʼe aikotevẽva”.

16. ¿Mbaʼépa oipytyvõ vaʼekue Maríape oikuaa porãve hag̃ua Jehovápe, ha mbaʼéichapa ikatu jasegi iñehémplo? (Ehecha pe taʼanga).

¹⁶ ¿Mbaʼe ótra kósapa avei ikatu jajapo jaikuaa porãve hag̃ua Jehovápe? Ikatu avei jajepyʼamongeta umi mbaʼe Jehová ojapóma vaʼekuére ñande rehehápe. Upéicha ojapo vaʼekue María, haʼéva Jesús sy. Haʼe ningo oikuaa porãma kuri Jehovápe ha ‘Ñandejára oguerohory chupe’ (Luc. 1:30). Péro upéi Jehová ojerure Maríape ojapo hag̃ua peteĩ mbaʼe ijetuʼúva. Maríagui oikóta kuri Ñandejára Raʼy sy. Jehová ojevale vaʼekue ánhel Gabriel ha Elisabet rehe omombarete hag̃ua Maríape ha oasegura hag̃ua chupe haʼe oĩtaha ijykére. ¿Mbaʼépa ojapo upéi María? Haʼe ojepyʼamongeta la oikóvare hese ha opensa mbaʼépa upéva omboʼe chupe Jehovágui. María ohechakuaa vaʼekue Jehová ipoderosoha, oiporiahuverekoha la héntepe, otrataha entérope peteĩchapa ha oñeinteresaha avei umi iñumíldevare (Luc 1:​46-55). María oagradeseterei vaʼekue Ñandejárape oĩ haguére ijykére, ha ñande avei jaagradeseterei Jehovápe ñanepytyvõ haguére ñaikotevẽ jave (Heb. 4:16). Upévare ehechakuaávo Jehová nepytyvõha hína eñeporandumína: “¿Mbaʼépa ikatu aaprende Jehovágui? ¿Mbaʼe kualidápa haʼe ohechauka chéve ko situasiónpe?”.

SIÉMPRE JASEGÍTA ÑAAPRENDE HETA MBAʼE

17, 18. ¿Mbaʼérepa siémpre oĩta heta mbaʼe ñaaprende vaʼerã Jehovágui?

¹⁷ Ñapensamína mbaʼeichaitépa jasegíta ñaaprende Jehovágui múndo pyahúpe. Upépe ‘ojeavríta ótro kuatiañeʼẽ’ heʼítava mbaʼépa Jehová oipota jajapo (Apoc. 20:12). Avei jadisfruta porãvétantema pe naturalésa ha ñaaprendéta heta mbaʼe pe kreasióngui (Is. 11:​6-9). Pe múndo pyahúpe jaikuaáta Jehovápe hetave hendáicha, pórke jahasáta heta mbaʼe ipyahúva ñandéve g̃uarã. Por ehémplo opuʼã jeýta umi jahayhúva omano vaʼekue ha mbeguekatúpe ñandeperféktota.

¹⁸ Ñande ningo siémpre jasegíta ñaaprende Jehovágui, haʼe ningo oikove ymaite guive ha upévare “avave ndaikatúi oikuaapa mbaʼeichaite pevépa haʼe iñarandu” (Sal. 90:2; 147:5). “Núnka ndaikatumoʼãi jaikuaapa umi mbaʼe haʼe ojapo vaʼekue iñepyrũ guive ipahaite peve” (Ecl. 3:11). Upévare oiméramo jepe jaservíma Jehovápe heta tiémpore, jasegíkena jaaprovecha entéro oportunida jaikuaa porãve hag̃ua ñande Ru ñanderayhuetévape.