¿Mbaʼérepa iñimportánte umi konsého bíblico?

1, 2. a) ¿Arakaʼépa ojeskrivi raʼe la Biblia? b) ¿Mbaʼérepa umi konsého oĩva la Bíbliape ideprovécho gueteri ñandéve koʼág̃a peve?

LA Biblia ningo ymaitereíma ojeskrivi hague. Ojapo amo 3.500 áñorupi oñepyrũ hague ojeskrivi ha haimete ojapo 2.000 áñorupi ojeskrivipa hague. Upéicharõ jepe “Ñandejára ñeʼẽ” koʼág̃a peve ideprovécho ñandéve (Heb. 4:12; 2 Tim. 3:​16, 17). Koʼág̃arupi hetaiterei hénte osegi umi konsého oĩva la Bíbliape ha upéicha rupi odesidi porã ha ovyʼave hikuái.

² ¿Péro mbaʼéicha piko peteĩ lívro ymaite ojeskrivi vaʼekue ikatúiti ideprovécho ñandéve koʼág̃a peve? Jaʼekuaa upéva mokõi mbaʼére. Primero, pe mensáhe oĩva la Bíbliape ou ‘Ñandejára oikovévagui’, haʼe ningo ñande Apohare ha ndaipóri iñaranduvéva chugui (1 Tim. 4:10; Rom. 16:​26, 27). Segundo, umi mbaʼe oĩva la Bíbliape nokambiái pe tiémpo ohasáramo jepe. Upévare umi konsého oĩva pype ñanepytyvõ koʼág̃a, oipytyvõ haguéicha avei yma umi héntepe ombohovái porã hag̃ua umi provléma.

3. ¿Mbaʼépa ñaanalisáta ko artíkulope?

³ Ko artíkulope ñambohováita koʼã porandu: ¿Mbaʼépa hína umi konsého térã prinsípio bíblico? ¿Mbaʼérepa umíva iñimportánte koʼág̃a ñandéve g̃uarã? ¿Mbaʼéichapa ikatu japilla la Jehová opensa lája jalee jave la Biblia? Avei ñaanalisáta mbaʼéichapa Jesús oipytyvõ vaʼekue ótrope ontende porãve hag̃ua Jehová opensa lája.

¿MBAʼÉPA HÍNA UMI KONSÉHO BÍBLICO?

4. ¿Mbaʼépa hína umi konsého térã prinsípio bíblico?

⁴ La Bíbliape oĩ umi enseñánsa iñimportánteva ohechaukáva ñandéve mbaʼéichapa Jehová opensa, umíva hína umi konsého téra prinsípio bíblico. Sapyʼánte ikatu avei Jehová ohechauka la opensáva peteĩ léi rupive (Mat. 22:37). Pyʼỹinte umi léi ojejapo vaʼekue peteĩ situasión térã peteĩ tiémpope g̃uarãnte. Péro ñantendéramo mbaʼérepa Jehová omeʼẽ raʼe umi léi, ikatúta hína jaikuaa la haʼe opensa lája ha mbaʼépa la iñimportánteva chupe g̃uarã. Ha umíva nokambiái pe tiémpo ohasáramo jepe (Sal. 119:​111, nóta). Upévare umi léi ikatu hína okambia, péro umi konsého térã prinsípio bíblico ohechaukáva mbaʼéichapa Jehová opensa, nokambiái (Is. 40:8).

5. ¿Mbaʼéichapa idiferénte peteĩ konsého térã prinsípio ha peteĩ léi? Emombeʼu peteĩ ehémplo. (Ehecha pe taʼanga).

⁵ ¿Mbaʼéichapa idiferénte peteĩ konsého térã prinsípio ha peteĩ léi? Epensamína ko ehémplore: Peteĩ sy oñekosina aja ikatu heʼi imemby michĩvape: “Aníkena epoko pe óllare”. Jaikuaaháicha, upéva ningo peteĩ léi. ¿Péro mbaʼérepa pe sy omanda upéva imembýpe? Rreálmente la pe sy heʼiséva imembýpe hína: “Ani epoko mbaʼeve hakúvare ikatúva nderapy”. Upéva hína la konsého térã prinsípio pe sy omboʼeséva imembýpe. Upéva oipytyvõta hína pe mitãme tahaʼe opokóta jave plánchare, vrasérore ha umícha. Pe isy heʼíva chupe ideprovéchota pe mitãme ndahaʼéi oĩ ajánte hógape, síno mamo oimehápe. Jaikuaaháicha, upéi pe mitã okakuaáta ha provávlemente oipurútamante peteĩ ólla oñekosina hag̃ua, péro haʼe katuete osegíta oñatende ani hag̃ua upéva ohapy chupe. Legálmente natekotevẽmoʼãvéima pe sy omoĩ peteĩ léi térã rrégla imembýpe, péro pe mitã osegíta oreko enkuénta mbaʼérepa la isy omanda vaʼekue chupe upéva.

¿MBAʼÉREPA IÑIMPORTÁNTE UMI KONSÉHO OĨVA LA BÍBLIAPE?

6. a) ¿Mbaʼépa Jehová omeʼẽ ñandéve la Biblia rupive? b) ¿Mbaʼéichapa Jehová ohechauka okonfiaha ñanderehe?

⁶ Jehová ningo ñanderayhueterei, upévare haʼe omeʼẽ ñandéve umi léi ñandeprotehéva (Sant. 2:11). Avei haʼe ñanepytyvõ ñantende hag̃ua mbaʼéichapa haʼe opensa ha mbaʼérepa omeʼẽ ñandéve umi léi. Jehová ningo nomeʼẽi ñandéve peteĩ léi káda situasiónpe g̃uarã, péro Iñeʼẽme haʼe omeʼẽ umi konsého ñanepytyvõva jadesidi porã hag̃ua ha avei jajapo hag̃ua la oĩ porãva, ndaipóriramo jepe peteĩ léi. Jehová ningo ndoikói heʼi ñandéve uno a uno la jajapo vaʼerã opa mbaʼépe, ha upéicha ohechauka okonfiaha ñanderehe. Haʼe ningo omeʼẽ ñandéve liverta jadesidi hag̃ua heta mbaʼe, ha umi mbaʼe jadesidíva rupive ikatu hína jahechauka jahayhu ha ñaneñeʼẽrenduseha chupe (Gál. 5:13).

7. Umi léi iñimportánteramo jepe, ¿mbaʼérepa jaʼekuaa ñaikotevẽha avei umi konsého térã prinsípio bíblicore? Emombeʼu peteĩ ehémplo. (Ehecha pe taʼanga).

⁷ Ñantende hag̃ua mbaʼéichapa umi konsého bíblico ikatu ñanepytyvõ ñapensamína ko ehémplore: Algúno lugárpe oñemoĩ umi señál de tránsito. Heta señál ohechauka mbaʼe léipa ojesegi vaʼerã oñemaneha jave. Por ehémplo heʼi pe omanehávape mbaʼe velosidápa ikatu ohupyty térã mbaʼe moméntopepa opytaite vaʼerã. Pe chofér nopenáirõ koʼã señál de tránsitore ikatu hína oñemulta. Péro oĩ avei umi señál de tránsito oavisánteva pe omanehávape moõpa ikatu ipeligróso la tape. Ikatu oime oĩ peteĩ kúrva térã ohasa jepi upérupi derrepentete umi animál. Koʼãichagua situasiónpe ndaipóriramo jepe peteĩ léi, lomímonte peteĩ chofér ivaléva iñakãguapýta ha oñatendéta la omaneha lája. Por ehémplo oñepyrũramo oky, katuete ohóta mbeguemie ha trankílo porã oikuaágui ipeligrosoha. Péicha avei, la Bíbliape oĩ umi léi derechoite heʼíva mbaʼépa ndovaléi jajapo pórke Jehovápe ndogustái, umichagua mbaʼe vai ñande ñamboykete voi. Péro la Bíbliape oĩ avei umi konsého térã prinsípio bíblico ñanepytyvõva ñañatende hag̃ua la jajapóva ha ñapensávare, péicha ndajajapomoʼãi mbaʼeve ikatúva ñandeapeligra ha ñanderahátava Jehová léi kóntrape. Péro ñaneakãguapýmante vaʼerã ideprovécho hag̃ua ñandéve umi konsého bíblico.

8. Ohechaukaháicha Romanos 12:​1, 2, ¿mbaʼéichapa avei ideprovécho ñandéve umi konsého bíblico?

⁸ ¿Mbaʼére piko Jehová nomeʼẽinte ñandéve peteĩ léi entéro mbaʼépe g̃uarã? Pórke haʼe oikuaa mbaʼépa okonvenive ñandéve, upévare haʼe omeʼẽ ñandéve umi konsého bíblico ñanepytyvõva ñantende hag̃ua la haʼe opensa lája. Epensamíntena, jalee jave umi rreláto oĩva la Bíbliape ñañepyrũma ñapensa mbaʼépa ñaaprende chugui, jajepyʼamongeta jaikuaa hag̃ua mbaʼérepa Jehová oipota raʼe ojeskrivi upéva Iñeʼẽme ha mbaʼéichapa ideprovécho ñandéve upéva. Upéicha jajapóvo, ñaaprende hína ‘jaipurukuaa hag̃ua ñane akã ha ñane pensamiénto’ jaservi hag̃ua chupe. Avei péicha ikatu jaikuaa porã “Ñandejára volunta iporãva, haʼe oguerohorýva ha ndorekóiva defékto” (elee Romanos 12:​1, 2).a

9. ¿Mbaʼéichapa avei ñanevenefisia jajegiáramo umi konsého bíblicore? (Hebreos 5:​13, 14).

⁹ Ñantende porãvéramo mbaʼéichapa jajegia vaʼerã umi konsého bíblicore, oikóta ñandehegui kristiáno ijerovia mbaretéva ha okakuaapámava. Jajegia rupi umi konsého bíblicore jadesidi porãve ha ñane amista Jehovándi imbareteve (elee Hebreos 5:​13, 14). Por ehémplo umi túa omeʼẽ jepi heta rrégla térã léi umi ifamília michĩvape pórke péicha umi mitã oikuaáta mbaʼépa ojapo vaʼerã ha mbaʼépa ndovaléi ojapo. Péro provávlemente umi mitã iñeʼẽrendúta ituakuérape okyhyjéguinte ojekastigárõ g̃uarã chupekuéra. Jehová katu nañandetratái mitãicha síno kakuaáicha. Haʼe okonfia ñande jasegitaha igía ha jadesidi porãtaha, ha jajapo jave péicha ñambovyʼa chupe (Sal. 147:11; Prov. 23:​15, 26; 27:11).

ÑAÑEHAʼÃ JAHECHAKUAA LA JEHOVÁ OPENSA LÁJA JALEE JAVE LA BIBLIA

10. ¿Mbaʼéichapa ikatu jatopa umi konsého térã prinsípio bíblico?

¹⁰ Jalee jave umi rreláto oĩva la Bíbliape, ñañehaʼã vaʼerã jatopa umi konsého térã prinsípio bíblico ñanepytyvõtava ñantende hag̃ua la Jehová opensáva ha oñandúva. Avei jatopáta umi konsého bíblico ñañeporandúramo mbaʼéicha rupípa Jehová omeʼẽ raʼe peteĩ léi. Amáske ñantende upéva, ñantendevétantema avei la Jehová opensa lája. Jastudiakuévo la Biblia, iñimportánte ñañemboʼe Jehovápe ñanepytyvõ hag̃ua ha ñañehaʼã vaʼerã jaipurukuaa hag̃ua la ñane akã jatopa hag̃ua umi konsého bíblico (Prov. 2:​10-12). Upearã iporãta ñañeporandu: “¿Mbaʼére Jehová omeʼẽ raʼe ko léi? Jehovápe ndogustáiramo ko mbaʼe, ¿mbaʼe ótra kósapa oiméne ndogustái avei chupe? ¿Mbaʼépa aaprende ko rrelátogui ha mbaʼéichapa upéva ideprovécho chéve?”. Jahechaháicha, iñimportánte ñantende mbaʼéicha rupípa Jehová omeʼẽ raʼe peteĩ léi ha mbaʼépa ñaaprende peteĩ rreláto bíblicogui. Upéva ñanepytyvõta jadesidi hag̃ua umi mbaʼe ombovyʼátava Jehovápe.

11. ¿Mbaʼéichapa Jesús ñanemboʼe vaʼekue jatopakuaa hag̃ua umi konsého bíblico? (Ehecha pe taʼanga).

¹¹ Pe Sermón del Móntepe Jesús ohechauka vaʼekue mbaʼéichapa ikatu jatopa umi konsého térã prinsípio bíblico, upévare jahechamína mbohapy ehémplo. Káda kásope primeroite voi Jesús omombeʼu mbaʼe léipa Jehová omoĩ vaʼekue, upéi haʼe oexplika mbaʼéicha rupípa Jehová omeʼẽ rakaʼe upe léi. Jajepyʼamongetávo la Jesús omboʼe vaʼekuére ñantendéta mbaʼéichapa umi konsého bíblico ikatu ñanepytyvõ jadesidi porã hag̃ua ko ñane tiémpope.

12. ¿Mbaʼépa ñaaprende pe léi oĩvagui Mateo 5:​21, 22-pe? (Ehecha pe taʼanga).

¹² Mateo 5:​21, 22-pe heʼi: “Ani reporojuka” (elee). ¿Mbaʼe prinsípio térã konsého bíblicopa jatopa ko léipe? Ohechauka ñandéve ndovaleiha ndajachaʼéi ñande rapicháre, ha ndahaʼéi voi umi mbaʼe jajapóva rupivénte, síno avei ni ñane pensamiéntope ni umi mbaʼe jaʼévare. Legálmente koʼã mbaʼére hína la peteĩ persóna upéi ikatu oporojuka. Upévare Jesús heʼi vaʼekue peteĩ persóna ndoporojukáiramo jepe, lomímonte naiñeʼẽrenduiha hína Jehovápe oikórõ ndochaʼéi hapicháre. Jehová ndoguerohorymoʼãi avei pe persóna osegívape ipochy iñermánondi térã heʼíramo álgo ivaietereíva chupe (1 Juan 3:15).

13. ¿Mbaʼéichapa pe konsého jatopáva Mateo 5:​21, 22-pe ideprovécho ñandéve koʼág̃a? (Ehecha pe taʼanga).

¹³ ¿Mbaʼéichapa koʼág̃a ideprovécho ñandéve pe konsého jatopáva Mateo 5:​21, 22-pe? Ñañatende vaʼerã ani hag̃ua jasegi ñandepyʼaro, pórke ikatu hína upévare jaʼe térã jajapo peteĩ mbaʼe ivaietereíva ha olastimáva voi ótrope (Lev. 19:18; Job 36:13; Prov. 10:12). Por ehémplo jasegíramo ñandepochy, ikatu hína ñamombeʼu chísme ha jaʼe japu peteĩ persónare ha péicha jaheja vai chupe ótro rovake (Prov. 20:19; 25:23). Jesús omeʼẽrõ guare pe konsého jatopáva Mateo 5:​21, 22-pe ndaipóri kuri Internet, teléfono ni komputadóra. Péro upe konsého iporãitéva haʼe omeʼẽ vaʼekue ñanepytyvõ ani hag̃ua jaipuru ñande teléfono ni ñane komputadóra jaʼe hag̃ua peteĩ mbaʼe ivaietereíva ótrore. Jaikuaa ningo ni mbaʼevéicharõ ndohasamoʼãiha ñane akãrupi japorojuka, péro upéicha avei ni noñantohái vaʼerã ñandéve jaʼe peteĩ mbaʼe oheja vaítava peteĩ persónape ótro rovake.

14. ¿Mbaʼépa ñaaprende pe léi oĩvagui Mateo 5:​27, 28-pe? (Ehecha pe taʼanga).

¹⁴ Mateo 5:​27, 28-pe heʼi: “Ani reporomoakãratĩ” (elee). ¿Mbaʼe prinsípio térã konsého bíblicopa jatopa ko léipe? Jehovápe ningo ombojeguaru pe tekovai, péro avei ndogustaiete chupe peteĩ persóna opensa jave umi mbaʼe ikyʼávare, pórke upéva ikatu hína oraha chupe ojapo hag̃ua álgo ivaíva. Jesús oexplika vaʼekue peteĩ kuimbaʼe opekamaha oikóramo omaña peteĩ kuña ndahaʼéivare hembireko ha iñakãraku hese. Upéicharõ peteĩ persóna ojapo vaʼerã la ikatúva guive pyaʼe voi oipeʼaite hag̃ua iñakãgui umi pensamiénto itieʼỹva (Mat. 5:​29, 30). Umi kristiáno nomendáiva gueteri oreko vaʼerã avei enkuénta ko konsého térã prinsípio bíblico.

15. ¿Mbaʼéichapa pe konsého bíblico jatopáva Mateo 5:​27, 28-pe ideprovécho ñandéve koʼág̃a? (Ehecha pe taʼanga).

¹⁵ ¿Mbaʼéichapa koʼág̃a ideprovécho ñandéve pe konsého jatopáva Mateo 5:​27, 28-pe? Ndovaléi ningo japyta ñapensa umi mbaʼe ikyʼávare (2 Sam. 11:​2-4; Job 31:​1-3). Jaikuaaháicha peteĩ kristiáno iñakãguapýva omboykéta opaichagua pornografía, ndoikomoʼãi opensa ikatuha ohecha umi taʼanga térã vidéo itieʼỹva haʼe ndojapóima guive umi mbaʼe vai. Ko múndope oñepensa oĩha umi pornografía ndahaʼéiva la ivaietereíva. Péro ñande ni mbaʼevéicharõ nañapensamoʼãi upéicha, síno ñamboyketéta voi umíva. Jesús tiémpope ndaipóri vaʼekue teléfono, pelíkula ni fóto. Upéicharõ jepe pe konsého haʼe omeʼẽ vaʼekue ohechauka mbaʼépa Jehová opensa umi taʼanga ha vidéo itieʼỹvare. Upéva ñanepytyvõ ñantende hag̃ua Jehovápe ndogustaieteha jaikóramo ñamondo vidéo, taʼanga térã mensáhe itieʼỹva. Avei ombojeguarueterei chupe jajapóramo oimeraẽ mbaʼe itieʼỹva Internet rupive. Ko konsého oĩva la Bíbliape oipytyvõ avei umi omendávape osegi hag̃ua ifiél hembiayhúpe (Mal. 2:15). La omboʼéva ko téxto ideprovécho umi omendávape ha umi soltérope omboykete hag̃ua oimeraẽ mbaʼe ikatúva oraha chupekuéra tekovaípe (Prov. 5:​3-14).

16. ¿Mbaʼépa ñaaprende pe léi oĩvagui Mateo 5:​43, 44-pe? (Ehecha pe taʼanga).

¹⁶ Mateo 5:​43, 44-pe heʼi: “Rehayhu vaʼerã nde rapichápe” (elee). ¿Mbaʼe prinsípio térã konsého bíblicopa jatopa ko léipe? Jehová oipota jahayhu entéro umi persónape. Ñambyasýramo jepe, Jesús tiémpope umi judío opensa vaʼekue haʼekuéra ohayhu vaʼerãha umi ótro judíope añónte, ha ndochaʼéi vaʼerãha iñenemigokuérare. Péro Jesús omboʼe kuri ndahaʼéi hague upéva la Jehová idéa omeʼẽrõ guare pe léi. Jesús ningo oikuaa porã Itúa yvagapegua oipotaha jahayhu entéro umi persónape, tahaʼe haʼéva la ikultúra térã ipaís (Mat. 5:​45-48).

17. ¿Mbaʼéichapa pe konsého jatopáva Mateo 5:​43, 44-pe ideprovécho ñandéve koʼág̃a? (Ehecha pe taʼanga).

¹⁷ ¿Mbaʼéichapa koʼág̃a ideprovécho ñandéve pe konsého jatopáva Mateo 5:​43, 44-pe? Jahayhu rupi entéro umi persónape nañañentremetemoʼãi umi gérrape ni mbaʼeveichagua ñorairõ oĩvape ko múndope (Is. 2:4; Miq. 4:3). Upéva rangue ñanembaʼeporãta la héntendi, tahaʼe haʼéva ikultúra, ipaís térã irrelihión (Hech. 10:​34, 35). Pe mborayhu avei ñanemomýi ñaperdona hag̃ua umi ñandetrata vai vaʼekuépe térã otrata vaíva peteĩ jahayhúvape (Mat. 18:​21, 22; Mar. 11:25; Luc. 17:​3, 4).

JASEGÍKENA JAJEGIA UMI KONSÉHO BÍBLICORE

18. a) ¿Mbaʼépa iñimportánte jajapo jadesidíta jave peteĩ mbaʼe? b) ¿Mbaʼe rehepa ñañeʼẽta pe artíkulo oúvape?

¹⁸ Ajépa ningo javyʼaite Jehová ñandetrata haguére kakuaáicha ha ndahaʼéi mitãicha. Haʼe oipota jajegia umi konsého bíblicore jadesidi porã hag̃ua (1 Cor. 14:20). Káda ke jadesidíta iñimportánte ‘jasegi jahecha mbaʼépa hína Jehová oipota jajapo’ (Efes. 5:17). Ñande ningo jadesidi porãse jahayhúgui Jehovápe ha jaipotágui haʼe ñandeguerohory, ndahaʼéi hína jakyhyjégui haʼe ñandekastigárõ g̃uarã. Péro oĩ hína avei ótra kósa ñanepytyvõva ha upéva hína ñane konsiénsia. Pe artíkulo oúvape ñañeʼẽta upévare.