Jasegíkena Jehová ehémplo ñakonsola hag̃ua ñane ermanokuérape

1. ¿Mbaʼérepa iñimportanteterei ñañokonsola?

ENTEROVÉVA ningo ñambohovái “heta mbaʼe ijetuʼúva”, upéicha rupi ñaikotevẽ jepi oĩ ñanekonsoláva ha ñanemokyreʼỹva (1 Ped. 1:6). Javyʼaiterei ningo oĩ jave ñanekonsoláva ñandéve, ha upéicha avei iñimportánte ñande ñaime preparádo ñakonsola hag̃ua umi osufrívape (Mat. 7:12). Jehová ningo “peteĩ Dios omeʼẽva konsuélo”, ha haʼe ñanemboʼe mbaʼéichapa ñakonsola vaʼerã umi “ohasávape opaichagua provlémare”. Upéicha rupi ñande ikatu jasegi iñehémplo ha ñaime preparádo ñañokonsola hag̃ua (2 Cor. 1:​3, 4; 1 Tes. 4:18). Ñande ñakonsola ñane ermanokuérape jahayhuetereígui chupekuéra, ha ndahaʼéi ñakumpli hag̃uánte hendivekuéra. Upévare ko artíkulope jahecháta koʼã mbohapy mbaʼe: 1) Mbaʼépa heʼise pe palávra “konsuélo” la Bíbliape, 2) mbaʼéichapa ikatu ñakonsola ñane ermanokuérape, ha 3) mbaʼépa ikatu jajapo ñaikotevẽ jave ótro ñanekonsola ñandéve.

¿MBAʼÉPA HEʼISE PE PALÁVRA “KONSUÉLO” LA BÍBLIAPE?

2. Asegún la Biblia, ¿mbaʼe mbaʼépa heʼise jepi pe palávra “konsuélo”?

² Pe palávra griega ojetradusíva jepi “konsuélo” ikatu heʼise heta mbaʼe, asegún mbaʼe rehepa oñeñeʼẽ hína. Por ehémplo sapyʼánte ikatu heʼise álgien omokyreʼỹha peteĩ persónape, péro ikatu avei heʼise omeʼẽha chupe peteĩ konsého (Rom. 12:8). Ko palávra griega ojetradusíramo direktoite, heʼise hína “ñahenói álgienpe oĩ hag̃ua ñande ykére”. Ikatu ñañeimahina álgien pyaʼe ohoha ohecha peteĩ iñamígo ohasa asývape ha oĩha oipytyvõ hag̃uáicha chupe oimeraẽ mbaʼe oikotevẽvape. Haʼe ningo ikatu ojapo heta mbaʼe okonsola hag̃ua iñamígope. Péro tahaʼe haʼéva la ojapóva, siémpre omokyreʼỹta ha omombaretéta iñamígope.

3. ¿Mbaʼépa nde reaprende Bernabé ehémplogui? (Ehecha pe taʼanga).

³ Jahechamína peteĩ ehémplo bíblico. Peteĩ kristiáno hérava José ivaleterei vaʼekue okonsola hag̃ua ótrope, ha upéicha rupi umi apóstol ohenói voi chupe Bernabé, heʼiséva “konsuélo raʼy” (Hech. 4:​36, nóta). Ko téra hoʼaiterei kuri hese, upéicha rupi upe guive la Bíbliape oñehenóintema chupe Bernabé. Ha haʼe heta vése ohechauka vaʼekue oĩha oipytyvõ hag̃uáicha iñermanokuéra oikotevẽvape. Por ehémplo, Saulo oho vaʼekue Jerusalénpe oiko riremi chugui kristiáno. Haʼe ohechaseterei kuri umi ermanokuérape upépe, péro haʼekuéra okyhyje chugui pórke oikuaa porã haʼe opersegi hague umi kristiánope. Péro Bernabé ikalidaiterei hendive, ojerovia hese, ha ogueraha voi chupe oikuaa hag̃ua umi apóstolpe (Hech. 9:​26-28).

¿MBAʼÉICHAPA IKATU ÑAKONSOLA ÑANE ERMANOKUÉRAPE?

4. ¿Mbaʼépa iñimportánte jajapo ñakonsola hag̃ua ñane ermanokuérape? (Romanos 1:​11, 12).

⁴ Jaha javisita ñane ermanokuérape ikatúma guive. Jehová ojevale isiervokuérare okonsola hag̃ua iñamigokuérape. Por ehémplo, pe proféta Elías oñedeprimi ha oñeñandu vaietereírõ guare, Jehová ojevale vaʼekue peteĩ ánhel rehe omokyreʼỹ hag̃ua chupe (1 Rey. 19:​4-7). Apóstol Pablo heʼi vaʼekue avei ohoseterei hague ovisita umi ermánope oñomokyreʼỹ hag̃ua chupekuéra (elee Romanos 1:​11, 12). Jahátaramo javisita álgienpe ñakonsola hag̃ua chupe, ani jajapo upéva ku jahasarõguáicha upérupi de pásonte, síno ñañemotiémpo vaʼerã ikatu hag̃uáicha jahasa tiémpo hendive (1 Cor. 16:7). Péro ndaikatúiramo jaha javisita peteĩ oikotevẽvape, lomímonte ikatu ñakonsola chupekuéra jajapóramo koʼã mbaʼe: Ñahenói chupekuéra por teléfono, jaskrivi chupekuéra peteĩ kárta térã peteĩ notaʼi, térã ñamondo chupekuéra peteĩ mensáhe. Jehová ningo ojevalese hína nderehe omokyreʼỹ hag̃ua iñamigokuérape, ¿ndépa rehejáta chupe ojapo upéva?

5. ¿Mbaʼérepa sapyʼánte ijetuʼúta ñamokyreʼỹ ha ñakonsola hag̃ua ermanokuérape?

⁵ Koʼã ára paha amás día ijetuʼuve ohóvo, upéicha rupi sapyʼánte ndahaʼéi la ifasilpáva jaha javisita ñane ermanokuérape. Upéva oiko vaʼekue Páblore oĩrõ guare préso Rómape. Peteĩ kristiáno Efesogua hérava Onesíforo oheka vaʼekue Páblope okonsola hag̃ua chupe. Ha upéva ipeligróso kuri, pórke ikatu vaʼekue ojegueraha chupehaitéma kárselpe térã ojejuka voi chupe upe haguére (2 Tim. 1:​16-18). Ñane ermanokuéra oikóva Rúsiape osegi Onesíforo ehémplo, haʼekuéra oñomokyreʼỹ ha oñokonsola ojepersegi jave chupekuéra. Por ehémplo, algúnope ojegueraha jave umi trivunálpe ojehusga hag̃ua, heta ermáno ha ermána oho avei upépe oapoja hag̃ua chupekuéra. Hiʼarive péicha jave ikatu hína haʼekuerahaitéma ojegueraha avei kárselpe. ¿Mbaʼéichapa ikatu jajeprepara ñande avei ñakonsola hag̃ua ermanokuérape peichagua situasiónpe? Ikatu jastudia la ojapo vaʼekue Ñandejára siervokuéra yma guare ha koʼag̃agua, péicha jahecháta mbaʼéichapa haʼekuéra oñokonsola vaʼekue ha mbaʼépa oipytyvõ chupekuéra ovyʼa hag̃ua oĩrõ jepe opersegíva chupekuéra.

6. ¿Mbaʼéichapa ikatu jasegi Jehová ehémplo ñakonsolávo ñane ermanokuérape? (Ehecha pe taʼanga).

⁶ Ñahendúkena ñane ermanokuérape. Pe proféta Elías okyhyje vaʼekue ojejukárõ g̃uarã chupe, ha upérõ guare haʼe omombeʼupaite vaʼekue Jehovápe la oñandúva. Jehová ningo oikuaáma voi kuri mbaʼépa la ohasáva Elías ha mbaʼépa la oipyʼapýva chupe, upéicharõ jepe haʼe ojapysaka porã kuri hese. Jehová ipasiénsia Elías rehe haʼe ojeplageáramo jepe heta vése la mísma kósare (1 Rey. 19:​9, 10, 14). Jehová oheja vaʼekue avei pe proféta Habacuc tomombeʼu chupe la opensáva guive. Hiʼarive la oñeʼẽ lája pe proféta haʼetévaicha la odesafia léntova Jehovápe. Upéicharõ jepe Jehová ndaipochýi hendive ha ojapysaka porã hese (Hab. 1:​2, 3). Ñane tiémpope, Jehová ojapysaka porã avei ñanderehe ñañemboʼe jave chupe oikuaámarõ jepe mbaʼépa la ñaikotevẽva. Ñande ikatu hína jasegi Jehová ehémplo jarrespetávo ñane ermanokuérape ha jajapysaka porãramo hesekuéra oñeʼẽ jave ñanendive. Sapyʼánte ikatu hína heʼi hikuái álgo nañandegustáiva, térã orrepeti jey jey la mísma kósa. Upéicharõ jepe, ñande ñaime vaʼerã ‘preparádo ñahendu’ hag̃ua chupekuéra, ha ndovaléi ñañeʼẽjoko chupekuéra ni ñañeofende la heʼívare (Sant. 1:19; Ecl. 7:9).

7. ¿Mbaʼéichapa ikatu japilla mbaʼépa oikotevẽ ñane ermanokuéra?

⁷ Ñañehaʼã vaʼerã japilla mbaʼépa la oikotevẽva ñane ermanokuéra. Jehová ningo ikatu ohecha la oĩva ñane korasõme, péro ñande ndaikatúi jajapo upéva. Upéicha rupi, japilla hag̃ua mbaʼéichapa ikatu ñakonsola peteĩ ermáno térã ermánape, jajapysaka porãmante vaʼerã hesekuéra. Ndovaléi ñapensa jaikuaapamaha voi mbaʼépa la oikotevẽtava. Enterovéva ningo ñanediferénte, upévare la haʼe oikotevẽva, ikatu hína idiferénte la ñande ñaikotevẽtavagui ñaimérire upe situasiónpe. Upéicha rupi iñimportánte ñañemotiémpo ha jajapysaka porã hese. Oikoitéta avei ñaneamávleramo ha ñaporandu porãnte chupe algúna ke ótra kósa japilla hag̃ua mbaʼépa la oikotevẽva legálmente (Prov. 20:5).

8. ¿Mbaʼéichapa Jesús okonsola vaʼekue Marta ha Maríape, Lázaro omano rire? (Ehecha pe taʼanga).

⁸ Jahechamína la Jesús ojapo vaʼekue okonsolárõ guare Marta ha Maríape, omano rire iñermáno Lázaro. Mokõivéva ningo oñembyasyeterei kuri omano haguére chuguikuéra la iñermáno, péro Jesús okonsola lája káda únape idiferénte kuri. Marta oñeʼẽrõ guare Jesúsndi, haʼe omomanduʼa chupe pe rresurreksiónre ha oipytyvõ Mártape ojerovia mbareteve hag̃ua upe esperánsare. Péro María oúrõ guare hendápe ha hasẽ, la Biblia ndeʼíri Jesús oñeʼẽ hague chupe pe rresurreksiónre. Upéva rangue, haʼe hasẽ María ndive ha oporandu chupe moõpa oñemoĩ kuri Lázaro retekue (Juan 11:​20-35). ¿Mbaʼépa ñaaprende ko rrelátogui? Ñakonsola jave umi ermáno ha ermána osufrívape, ñañehaʼã vaʼerã japilla mbaʼépa la oikotevẽva káda uno, ha ndahaʼéi jaipurúnteva la mísma téknika ñapensáva ou porãtaha enterovévape.

9. ¿Mbaʼéichapa ikatu jaipuru porã la Biblia ñakonsola hag̃ua ñane ermanokuérape? (Romanos 15:​4, 5).

⁹ Jaipurúkena la Biblia. Jaipurúramo Ñandejára Ñeʼẽ ñakonsola hag̃ua peteĩ ermáno térã ermánape, ñaipytyvõta chupe oreko hag̃ua esperánsa Jehováre (elee Romanos 15:​4, 5). Upéva tuichaiterei okonsoláta ha omokyreʼỹta pe ermánope, pórke haʼe oĩta segúro Jehová ohayhuha chupe ha okuidataha hese (Is. 40:31). ¿Mbaʼéichapa ikatu jatopa umi téxto bíblico ideprovéchotava ñandéve ñakonsola hag̃ua ótrope? Algúno oprepara voi peteĩ lísta omoĩháme koʼãichagua téxto. Repreparaséramo peichagua lísta, ikatu nepytyvõ pe lívro hérava Téxto bíblico ogiáva kristianokuérape, pe párte heʼihápe “Konsuélo”. Ejerurékena Jehovápe tanepytyvõ reipuru porã hag̃ua Iñeʼẽ la Biblia rekonsola hag̃ua ermanokuérape. Haʼe ikatu hína oipuru ijespíritu sánto nemomanduʼa hag̃ua umi téxtore reikotevẽve jave (Juan 14:26).

10. ¿Mbaʼérepa iñimportánte ñaneamávle ha ñandepositívo ñamokyreʼỹ hag̃ua ermanokuérape?

¹⁰ Ñaneamávle ha ñandepositívokena. Pe palávra griega ojetradusíva “konsuélo” ikatu avei ojepuru ojeʼe hag̃ua ñameʼẽha konsého peteĩ persónape. Upévare, sapyʼánte ñakonsola jave hína álgienpe, tekotevẽta avei ñaipytyvõ chupe okorrehi hag̃ua la opensa lája. Ñaiméramo pe situasiónpe, iñimportánte ñapensa porãiterei la jaʼétavare pono ñamoñeñandu vaive chupe (Prov. 12:18). Ko kásope Jehová omoĩ ñandéve pe ehémplo iporãvéva oñeʼẽrõ guare Elías ndive. Haʼe ningo opensa kuri ndovaleiha mbaʼeverã la ojapóva oservívo Jehovápe, ha Israélpe henyhẽtemaha umi apóstata. Jehová okorrehi kuri Elías opensa lája, péro iñamávle hendive ha otrata porã chupe, ndahaʼéi ku heʼi vai guasúva chupe mbaʼépepa la ojavy (1 Rey. 19:​15-18). Ñande avei ñaneamávle ha ñapensa porãramo ñañeʼẽ mboyve, ikatu hína ñamokyreʼỹ ñane ermanokuérape. Ha oiméramo otoka ndéve ejapo peteĩ diskúrso térã emeʼẽ komentário emokyreʼỹ hag̃ua ermanokuérape, iñimportánte avei neamávle ha ndepositívo rehupyty hag̃ua upéva.

11. ¿Mbaʼépa oikotevẽ jepi umi ohasa asýva? (1 Juan 3:18).

¹¹ Ñanembaʼerechakuaákena. Umi ohasáva peteĩ situasión ijetuʼúvare noikotevẽi jaʼénte chupekuéra álgo iporãva, síno oikotevẽ jepi avei jajapo hesehapekuéra álgo (elee 1 Juan 3:18). Bernabé oheja vaʼekue ñandéve peteĩ ehémplo iporãitereíva upévape. Haʼe ovende vaʼekue ijyvy ha omeʼẽ la hepykue oñepytyvõ hag̃ua umi kristiáno ojevautisa ramóvape, pórke haʼekuéra oikotevẽta kuri ajúda (Hech. 4:​36, 37). Heta ñane ermanokuéra koʼag̃agua osegi pe iñehémplo porãite, ha imbaʼerechakuaa oipytyvõ hag̃ua ótrope. Peteĩ ermána hérava Gabriela, oikóva Polóniape, omombeʼu mbaʼépa ohasa vaʼekue peteĩ inundasión ombyaipaitérõ guare chugui la hóga. Haʼe heʼi: “Che ha che tuakuéra ningo rokyhyje ha roñekevrantaiterei vaʼekue. Ndaikuaái kuri mbaʼépa la ajapótava asolusiona hag̃ua pe situasión. Péro umi ermáno ha ermána oĩva umi ótro kongregasiónpe ore jerére, ou ore rendápe ha hetaiterei mbaʼe ojapo un díapente oarregla jey hag̃ua la ore róga. La ahasa vaʼekue tuichaiterei chemokyreʼỹ ha chepytyvõ ajeroviave hag̃ua Jehováre. Ahecha porãiterei haʼe oipuruha isiervokuérape okonsola hag̃ua umi ohasa asývape”.

12. ¿Mbaʼéichapa oipytyvõta ermanokuérape ohecháramo ñandefielha Jehovápe?

¹² Jasegíkena ñandefiél Jehovápe. Pablo heʼi vaʼekue umi Tesalonicaguápe ovyʼaiterei hague oikuaárõ guare haʼekuéra ifielha Jehovápe. Pablo heta oñehaʼã vaʼekue opredika hag̃ua chupekuéra, ha upévare oikuaárõ guare haʼekuéra noñentregaiha, ovyʼaiterei kuri (1 Tes. 3:​5-8). Ha Pablo oikuaa vaʼekue haʼe voi osegíramo ifiél, iñehémplo oipytyvõta hague ótrope ikyreʼỹ hag̃ua (Col. 2:​1, 2). Upéicha avei, ñane ermanokuéra ohecha vove mbaʼéichapa Jehová ñanepytyvõ ñaaguanta ha jasegi hag̃ua ñandefiél, tuichaiterei ñakonsola ha ñamokyreʼỹta chupekuéra.

13. ¿Mbaʼe kualidápa jareko vaʼerã jasegi hag̃ua ñamokyreʼỹ ermanokuérape?

¹³ Ñanepasiénsiakena. Sapyʼánte umi ermáno ha ermána oñedesanimáva ndahaʼéi la ensegída voi orreaksiona porãva. Péro la Biblia heʼi porã ñandéve ‘jasegi vaʼerãha ñañomokyreʼỹ’, ha upéva ohechauka porã ndovaleiha ñañentrega (1 Tes. 5:11). Ñanepasiénsiakena ha jasegi ñakonsola ha ñamokyreʼỹ umi oikotevẽvape ñande ajúda (1 Tes. 5:14). Péro jaikuaaháicha, sapyʼánte ñande voi ñaikotevẽta ótro ñanekonsola. ¿Mbaʼépa ikatu jajapo upéicha jave?

ÑANDE ÑAIKOTEVẼ JAVE ÓTRO ÑANEKONSOLA

14, 15. ¿Mbaʼe mbaʼépa ikatu jajapo jajepyʼapy ha ñañekevrantaiterei jave?

¹⁴ Ñañemboʼe Jehovápe. Jajerurékena Jehovápe tañanekonsola jajepyʼapy ha ñañekevrantaiterei jave (Sal. 94:19). Ñañemboʼe jave chupe iñimportánte ñandeespesífiko porã ha ñamombeʼupaite chupe la ñañandúva guive (Sal. 62:8). Legálmente Jehová oikuaáma voi mbaʼépa la ñañandúva, péro ñamombeʼúramo chupe umi sentimiénto jaguerekóva jahechauka hína jajeroviaha hese. Ha ndaipóri jaduda hag̃ua haʼe oikuaa porãitereiha mbaʼéichapa okontestáta ñandéve (Mar. 11:24). Filipenses 4:​6, 7 heʼi voi ñandéve: ‘Pejerure Ñandejárape penepytyvõ hag̃ua. Ha Ñandejára pyʼaguapy tuichavéva entéro mbaʼe yvyporakuéra ikatúvagui ontende, oñangarekóta pene korasõre ha umi mbaʼe pepensávare’.

¹⁵ Jajerure ñane ermanokuérape tañanepytyvõ. Ikatu ñamombeʼu la ñañandúva peteĩ ñane amígope, térã peteĩ ansiáno de konfiánsape. Ñane ermáno ha ermanakuéra ningo tuichaiterei ikatu ñanekonsola, péro ndoikuaáiramo umi mbaʼe ñañandúva hasyvéta chupekuéra ñanemokyreʼỹ ha ñanepytyvõ hag̃ua (Prov. 14:10). Ikatu jajerure chupekuéra ñanerendumínte hag̃ua jaexplika jave umi mbaʼe ñañandúva, térã tokomparti ñanendive peteĩ téxto térã peteĩ artíkulo ñanepytyvõtava.

16. ¿Mbaʼépa ikatu oiko ñane ermanokuéra oñehaʼã jave ñanekonsola, péro mbaʼe rehepa ñanemanduʼa vaʼerã?

¹⁶ Ñanepasiénsiakena ha ñañoperdona. Ñane ermáno ha ermanakuéra oñehaʼã jave ñanekonsola, ikatu hína heʼi térã ojapo álgo nañandegustáiva, ha amo ipahápe ñañeñandu vaive. Oikóramo upéva, ñanepasiénsiakena hesekuéra (1 Cor. 13:​4, 7). Ñanemanduʼa vaʼerã la heʼívare Santiago 3:2: “Enterovéva ningo jajavy heta vése, oĩramo ndojavýiva oñeʼẽ jave, upéva hína peteĩ kuimbaʼe perfékto”. Upévare, iporãiteve ñapensa meme ñane ermanokuéra ñanepytyvõsenteha. Ñanemanduʼa vaʼerã ñandéicha avei haʼekuéra ojaposeha iporãva, péro heta vése ojavyha (Mat. 26:41).

17. ¿Mbaʼépa jajedesidi vaʼerã jajapo?

¹⁷ Enterovéva ñañokonsola ha ñañomokyreʼỹ vaʼerã. Ha koʼýte ñaikotevẽta upéva ivaivévo ohóvo la pórte koʼã ára pahápe, ha amáske Ñandejára enemigokuéra oñemoĩ mbareteve ñanderehe. Upéicha rupi, jajedesidíkena jasegitaha ñañokonsola ha ñañomokyreʼỹ.