Aníkena eheja mbaʼeve ndedistrae

1, 2. ¿Mbaʼéichapa peteĩ mbaʼe iñimportántevapa jepe ikatu ñandedistrae?

¿OIKÓMAPA nderehe rejapo jave peteĩ mbaʼe, degolpete álgo ndedistrae? Por ehémplo, remaneha jave rehóvo erresivi peteĩ llamáda. Pe llamáda iñimportánte, péro upepete edesidi vaʼerã mbaʼépa la iñimportantevéva: Esegítapa emaneha térãpa eñatendéta upe nerenóivare.

² Ñande ningo jareko heta mbaʼe iñimportánteva jajapo vaʼerã. Péro jaikuaa porã pe iñimportantevéva haʼeha jajapo la Jehová oipotáva (Mat. 6:33).a Peteĩ chofér oikuaa iñimportanteha oñatende hapére, ha upéicha avei ñande jaservíva Jehovápe jaikuaa iñimportantetereiha ñamotenonde Jehová heʼíva (Prov. 4:25; Mat. 6:22).

3. ¿Mbaʼe mbaʼépa ñaanalisáta ko artíkulope, ha mbaʼéichapa upéva ñanepytyvõta?

³ Legálmente ñande ndajaikomoʼãi a propósito jajapo álgo ñambotapykue hag̃ua Jehovápe. Péro ndahasyiete hína la jajedistrae hag̃ua (Luc. 21:​34-36). Upévare ñaanalisamíta algúna kósa ñanepytyvõtava jasegi hag̃ua ñamotenonde Jehovápe. Jahecháta: 1) Mbaʼépa ikatu ñandedistrae, 2) mbaʼépa ojapo vaʼekue Jesús ani hag̃ua mbaʼeve odistrae chupe, ha 3) mbaʼéichapa ikatu jasegi Jesús ehémplo pono mbaʼeve ñandedistrae.

¿MBAʼÉPA IKATU ÑANDEDISTRAE?

4-6. ¿Mbaʼe mbaʼépa ikatu ñandedistrae?

⁴ Káda uno ningo jareko heta mbaʼe jajapo vaʼerã. Por ehémplo, ikatu oime jajepyʼapy ñande salúre, ñañatende vaʼerã ñane famíliare, térã ñandejehe voi. Koʼã mbaʼe ningo iñimportánte ha ñañatendémante vaʼerã. Péro, ¿ikatúpa ou ñandedistrae koʼã mbaʼe? Si ikatu oiméramo ñapensa upévarentema voi, ha ñañekevrantaiterei rupi ñandepurupaitéma ha nahembyvéima tiémpo mbaʼeverã.

⁵ Heta ñande apytépe oiko umi lugár oĩháme heta violénsia, ijetuʼuhápe ñakonsegi pláta ñañemantene hag̃ua, térã oĩháme mbaʼasy ikontahiosoitereíva (2 Tim. 3:1). Jahasa jave koʼãichagua situasiónre, ifasileterei jaju ñañekevranta devísioma.

⁶ Oime vaʼerã jaikuaa algúno ohasa vaʼekue koʼãichagua situasiónre, ha upévare ou ojepyʼapyeterei térã oñetrauma voi. Ha upéva normál, pórke Jehová nañandekreái voi jasufri hag̃ua péicha. Ohasa rupi umichagua situasión ijetuʼúvare, algúno ndaikatuvéi odisfruta trankílamente la vída. Upévare oĩ persóna ojedespehaʼimi hag̃ua koʼã situasióngui ojeitýva voi umi vyʼarã térã diversión rapykuéri. ¿Péro mbaʼépa ikatu ñanepytyvõ ñañeñandúramo upéicha? Ñaanalisáta mbaʼéichapa ikatu jasegi Jesús ehémplo pono jajedistrae, ha jasegi hag̃ua jaadora Jehovápe.

¿MBAʼÉPA OJAPO VAʼEKUE JESÚS ANI HAG̃UA MBAʼEVE ODISTRAE CHUPE?

7. ¿Mbaʼe mbaʼépa ikatu kuri odistrae Jesúspe?

⁷ Jesús tiémpope oĩ vaʼekue heta mbaʼe ikatútava kuri odistrae chupe. Por ehémplo oĩ vaʼekue heta imboriahúva ha hasykatúva, ha umi politikokuéra katu ndojapói mbaʼeve (Mat. 14:14; Mar. 14:7). Avei umi rrománo ha judiokuéra otrata vai vaʼekue umi héntepe. Upéicha rupi, umi hénte ohechárõ guare Jesús orekoha podér ha ojapoha heta milágro, oipotaiterei oiko chugui rréi (Juan 6:​14, 15). Ha hústamente Satanás oofrese Jesúspe entéro umi goviérno ko mundopegua. Jesús ikatu opensa oikoitéta hague upéva (Mat. 4:​8, 9). Upe rire apóstol Pedro, peteĩva Jesús amigoite, heʼi chupe natekotevẽiha ojopyeterei. Entéro koʼã mbaʼe ikatu kuri odistrae Jesúspe (Mat. 16:​21, 22).

8. ¿Mbaʼépa umi mbohapy mbaʼe ojapo vaʼekue Jesús pono ojedistrae?

⁸ ¿Mbaʼépa ojapo vaʼekue Jesús ani hag̃ua ojedistrae? Primero, haʼe opensa vaʼekue Jehová opensaháicha (Juan 8:28; 14:9). Segundo, oipurupaite vaʼekue itiémpo opredika ha omboʼe hag̃ua la héntepe (Mat. 9:35). Ha tercero, ontende porã vaʼekue mbaʼépa la iñimportantevéva ha omotenonde upéva (Juan 4:34). Jesús ndodudái vaʼekue orrechasaite hag̃ua umi tentasión Satanás omoĩva chupe. Ha oikuaárõ jepe Pedro iñintensión porã hague, orrechasa avei la heʼíva chupe pórke oikuaa upéva ndojoguerahaiha la Jehová oipotávare (Mat. 4:10; 16:23). Jesús ndohejái vaʼekue la hénte heʼíva, opensáva, térã ojapóva odistrae chupe. Ha upéicha rupi okumpli porã Jehová volunta. Ñande kásope ikatu idiferenteʼimi umi mbaʼe ñambohováiva koʼág̃arupi, péro jarekóramo enkuénta umi mbohapy mbaʼe ojapo vaʼekue Jesús, tuichaiterei ñanepytyvõta ani hag̃ua mbaʼeve ñandedistrae ñandéve.

¿MBAʼÉPA IKATU JAJAPO PONO MBAʼEVE ÑANDEDISTRAE?

9. ¿Mbaʼéichapa ikatu japilla ‘la Jehová oipotáva jajapo’? (Efesios 5:17).

⁹ Ñaaprende ñapensa Jehová opensaháicha. Upéva tuichaiterei ñanepytyvõta japilla hag̃ua ‘mbaʼépa hína la Jehová oipotáva jajapo’ (elee Efesios 5:17). Jaikuaa hag̃ua mbaʼépa ogusta Jehovápe, jalee vaʼerã la Biblia káda día ha jajepyʼamongeta hese. Upéva tuichaiterei ñanepytyvõta oimérõ jepe la Biblia noñeʼẽi espesífikamente peteĩ situasión jahasávare. ¿Mbaʼérepa jaʼe upéva? Pórke jajepokuaáramo jastudia la Biblia, japilláta mbaʼéichapa Jehová opensa, ha upéva ñandegiáta oimehaichagua situasiónpe ñande ñamoĩramo ñande párte.

10. ¿Mbaʼépa ñanepytyvõta ñapensa hag̃ua Jehová opensaháicha?

¹⁰ Ikatu ñaaprende mbaʼéichapa opensa Jehová jastudiáramo la Biblia, ha jahecháramo mbaʼéichapa haʼe otrata vaʼekue isiervokuérape (Jer. 45:5). Jaleévo umi rreláto bíblico, iporãta ñapensáramo koʼã pregúntare: “¿Mbaʼépa chemboʼe péva Jehovágui? ¿Mbaʼépepa tekotevẽ akambia apensa hag̃ua Jehová opensaháicha?”. Jaikuaaháicha Jehová iñaranduetereive ñandehegui (Is. 55:9). Upévare iñimportanteterei avei jajerure chupe tohechauka ñandéve mbaʼépa la ohaʼarõva ñandehegui (Sal. 143:10). Ha jajeruréramo chupe ajúda, ikatu ñaime segúro haʼe ñanepytyvõtaha ñapensa hag̃ua haʼéicha (1 Juan 5:14).

11. ¿Mbaʼépa Jehová oipota ñandéve g̃uarã?

¹¹ Ñaaprendévo ñapensa Jehová opensaháicha, japilláta peteĩ mbaʼe iñimportantetereíva: Haʼe oipotaha ñaime preparádo og̃uahẽ vove pe fin. Upéicha rupi ndoipotái jajedistrae umi mbaʼe oĩvare ko múndope (Mat. 24:44). Haʼe ndoipotái jaiko ñañekevrantaiterei ha jajedesespera (Mat. 6:​31, 32). Upéicha rupi omeʼẽ ñandéve umi konsého iporãitereíva ñanepytyvõva jajepyʼapýramo ñande salúre, ñande traváhore, ñande rógare, ñandejehe voi, térã ñane famíliare. Jajeruréramo chupe ajúda, haʼe ñanemoarandúta ha omeʼẽta ñandéve la fuérsa ñaikotevẽva ñambohovái hag̃ua koʼã mbaʼe (Sal. 55:22; Prov. 3:​5-7).

12. ¿Mbaʼépa ñanepytyvõta jasegi hag̃ua javyʼa jajepyʼapýramo jepe la oikóvare ko múndope? (Mateo 5:3).

¹² Ñanerembiapo heta Jehová servísiope. Enterovéva jajepyʼapýnte voi umi mbaʼe oikóvare ko múndope, ndaikatúiramo jepe jajoko umi mbaʼe vai. Péro ani hag̃ua koʼã mbaʼe ñandedistrae voi, ñañekonsentra vaʼerã ñande servísiore. Javyʼaitereivéta ñañehaʼãmbaitéramo siémpre ñañemoag̃uive Jehováre, pórke haʼe ñandekrea vaʼekue voi upeicharãicha (elee Mateo 5:3). Ha ñañemoag̃uive hag̃ua Jehováre jalee ha jastudia vaʼerã Iñeʼẽ la Biblia, ha ñañehaʼãmbaite vaʼerã jajapo la ikatúva guive iservísiope. Upéicha jajapóramo, Jehová ovyʼáta ñandereheve ha jaipuru porãta ñane tiémpo (Prov. 23:15).

13. ¿Mbaʼéichapa ikatu ‘jaipuru porã ñane tiémpo’?

¹³ Ñande jaservíva Jehovápe jajedesidíma ‘jaipuru porãtaha ñane tiémpo’ (Efes. 5:​15, 16). Ko téxto noñeʼẽi sólamente umi mbaʼe jajapóvare káda día, síno ke ñanemomanduʼa avei iñimportanteha jaipuru porã ñane tiémpo Jehová ogueru mboyve pe fin. ¿Ha mbaʼéichapa ikatu jajapo upéva? Jaipurúramo hetaiterei tiémpo jahecha térã jalee hag̃ua umi notísia vai okorréva opárupi, ikatu jaju jajedistrae, ñañedesanima, ha nañanekyreʼỹvéi ñande servísiope. Upéicha rupi la iporãvéva ikatúva jajapo, haʼe ndajaikói jahechaiterei umíva. Péicha ikatúta voi ñanetiempove ha ñanekyreʼỹve jaservi hag̃ua Jehovápe. Oikoitéta avei ñapensáramo mbaʼépa ikatu jajapove predikasiónpe, por ehémplo ikatúpa jajapo hetave rrevisíta. Iñimportanteterei jaaprovecha entéro oportunida ikatu hag̃uáicha “opaichagua persóna ojesalva ha oikuaa porã pe añetegua” (1 Tim. 2:4).

14. ¿Mbaʼéichapa ñanepytyvõta ñanerembiapo hetáramo Jehová servísiope? (Ehecha pe taʼanga).

¹⁴ Ñanerembiapo hetáramo Jehová servísiope, ñanepytyvõta ñanemanduʼa hag̃ua mbaʼérepa oiko hetaite mbaʼe vai ko múndope. Oĩramo jepe heta hénte ivioléntova, imboriahúva, ha hetaiterei mbaʼasy, ñande nañañesorprendéi. Koʼã mbaʼe nañanemondýi, pórke jaikuaa ojeprofetisáma hague voi la Bíbliape. Upévare ndajaikói jakyhyje, upéva rangue ñaime segúro Jehová oguerutaha pe paraíso. Avei ñaime segúro haʼe ñanepytyvõtaha ñambohovái hag̃ua oimeraẽ mbaʼe oñepresentáva ñandéve koʼág̃a. Ha entéro koʼã mbaʼe ñanepytyvõ ñaime hag̃ua trankílo (Sal. 16:8; 112:​1, 6-8).

15. ¿Mbaʼéichapa ikatu ñanepytyvõ la heʼíva 1 Pedro 4:7?

¹⁵ Siémpre jareko vaʼerã enkuénta mbaʼépa la iñimportantevéva. Oĩ hetaiterei hénte oikóva umi diversión rapykuérinte, ha ni vy ndorekói enkuénta ko múndo aña oñehundi potaitemaha. Iñimportánte añete jajedivertiʼimi, péro ndovaléi jaheja ova ñanderehe la hénte opensa lája. Upévare iñimportantete ‘ñaneakãguapy’ (elee 1 Pedro 4:7). ¿Mbaʼépa heʼise ko téxto? Por ehémplo, ñaneakãguapýramo jahechakuaáta ndovaleiha jaiko umi diversión rapykuérinte voi, ha iñimportantetereiha jadesidi porã ko témape. Péicha jahechaukáta hína ñapensaha Jehová opensaháicha, ha japillaha mbaʼépa la iñimportantevéva (2 Tim. 1:7).

16. ¿Mbaʼépa siémpre ojapo vaʼekue Jesús?

¹⁶ Jesús siémpre oreko vaʼekue enkuénta mbaʼépa la iñimportantevéva, upéicha rupi ohasáramo jepe heta mbaʼe ijetuʼuetereíva omano mboyve, osegi vaʼekue ifiél Jehovápe ha okumpli ivolunta. Ikatu hag̃uáicha ojapo upéva, Jesús oñemboʼe vaʼekue kontinuadoite. Idisipulokuéra katu ndojapói vaʼekue upéva, síno ke opyta oke. Haʼekuéra ikaneʼõma kuri pórke “hetaitereíma oñembyasy” (Luc. 22:​39-46; Juan 19:30).

17. ¿Mbaʼérepa oĩ heta oipurúva Internet ha umi rred sosiál, péro mbaʼe pelígropa oĩ upépe? (Ehecha pe taʼanga).

¹⁷ Oiko haguéicha Jesús disipulokuérare, ñande avei sapyʼánte ñanekaneʼõ ha ñañembyasy. Por ehémplo, umi mbaʼe oikóva ko múndope ikatu ñandepyʼapy. Oĩ heta oñeñandu jave upéicha oñehaʼãva ojedespehaʼimi oipurúvo Internet, por ehémplo oipuru umi rred sosiál oñekomunika hag̃ua iñamigokuéra ha ihentekuérandi, okomparti hag̃ua umi notísia, fóto ha hetave mbaʼe. Ha oĩ avei umi oipurúva Internet ohecha hag̃ua umi vidéo térã ohuga hag̃ua umi videohuégo. Péro oĩ peteĩ pelígro, pórke umi ojapóva upéva ikatu hína amo ipahápe oipurúma hetaiterei tiémpo káda día ohecha hag̃ua koʼã mbaʼe. ¿Mbaʼépa ikatu jajapo pono oiko ñanderehe upéva? Iñimportantetereíta ñapensáramo koʼã pregúntare: “¿Mbaʼéichapa añeñandu jepi aipuru rire Internet térã umi rred sosiál? ¿Chekyreʼỹvépa apytávo? ¿Térãpa aipuruetereíma hína la che tiémpo umívape ha ambotapykueʼimíma hína umi mbaʼe iñimportantevéva?”.

18. ¿Mbaʼérepa iñimportantete jadesidi porã jajedivertíta jave?

¹⁸ Legálmente iñimportánte la jahasa porã ha jajedivertiʼimi jepi. Péro upéicha avei iñimportánte jaipuru porã la ñane akã ha ñañatende mbaʼépa la jahecháva télepe térã Internétpe. ¿Mbaʼérepa iñimportánte ñañatende jajapo jave koʼã mbaʼe? Pórke sapyʼánte jahecha jave umi vidéo Internétpe, opáre peteĩ osẽma ñandéve jahecha hag̃ua ótro, ha upéi osẽma jahecha hag̃ua ótro, ha péicha oho hese. Amo ipahápe umi vidéo apytépe ikatúma osẽ ñandéve umi ivioléntova térã itieʼỹva. Upéva ojehu vaʼekue peteĩ ermáno oikóvape Ásiape. Haʼe ohecha hína kuri umi vidéo mbykýva Internétpe, péro opárõ guare upéva osẽ chupe ótro, ha upéi osẽ jey chupe ótro, ha amo ipahápe osẽma chupe peteĩ itieʼỹva, ha ohecha avei upéva. Amo ipahápe ko ermáno oñepyrũma kuri ohecha pornografía. Ménos mal umi ansiáno ha iñamigokuéra oipytyvõ chupe ohejaite hag̃ua upéva, ko ermáno odesidi voi ovorra unos kuánto aplikasión orekóva iteléfonope ha omoĩ voi mboy tiémpopa oipurúta la iteléfono káda día. Ko experiénsia ohechauka ñandéve mbaʼeichaitépa iñimportánte jadesidi porã jajedivertíta jave.

19. ¿Mbaʼépa avei ikatu oiko ñañekonsentraitereíramo umi diversiónre?

¹⁹ Iñimportánte avei jadesidi porã jajedivertítaramo ótro hendáicha, por ehémplo jahátarõ de vakasión. Legálmente iñimportánte japytuʼuʼimi jepi ñande traváhogui, upéva ikatu voi ñanepytyvõ ñaneresãive hag̃ua. Péro ñañekonsentraitereíramo upévare ipahápe ikatu hína jaipuru hetaiterei tiémpo koʼã mbaʼépe ha ñambotapykuéma umi mbaʼe iñimportantevéva (Filip. 1:10). Káda únomante jadesidi vaʼerã mbaʼépa jajapóta ha mboy tiémpopa jaipurúta káda kósape. Péro jadesidi hag̃ua upéva, iñimportánte ñapensa koʼã pregúntare: “¿Mboy tiémpopa aipurúta ajediverti ha aha hag̃ua de vakasión? ¿Amotenondépa hína umi mbaʼe iñimportantevéva? ¿Ajepreparápa hína og̃uahẽ mboyve pe fin?”.

20. ¿Mbaʼépa jahupytýta ndajahejáiramo mbaʼeve ñandedistrae?

²⁰ Jahupytýta hetaiterei mbaʼe porã ndajahejáiramo mbaʼeve ñandedistrae ha ñañekonsentra ñande servísiore (Is. 48:17). Jajapóramo upéva Jehová ñanepytyvõta ñambohovái hag̃ua oimeraẽ mbaʼe oñepresentáva ñandéve, ndajaikomoʼãi ñañekevrantaiterei umi mbaʼe oikóvare ko múndope, ha ndajaikomoʼãi jaipurupaite ñane tiémpo umi diversión rapykuéri. Jajedesidíkena siémpre ñapensataha Jehová opensaháicha, jarekotaha heta mbaʼe jajapo vaʼerã iservísiope, ha siémpre jarekotaha enkuénta mbaʼépa la iñimportantevéva. Koʼã mbaʼe ñanepytyvõta ani hag̃ua mbaʼeve oĩva ko múndope ñandedistrae ha ñañakarama hatã hag̃ua “pe jeikove añetetévare” (1 Tim. 6:19).