Oñeporandúva jepi

¿Arakaʼépa umi nasión oanunsiáta ‘jaikomaha pyʼaguapýpe ha segúro porã’?

Ramoiténte pe rrevísta Ñemañahaa oexplika Jehová koʼẽrõitéma omoĩtaha umi goviernokuéra akãme peteĩ plan. Umi goviérno polítiko haʼéva hína umi “10 hatĩ” omeʼẽta ijautorida ha ipodér pe ‘animál salváhe pytãitévape’. Upéva haʼe hína pe Naciones Unidas, chupe oñehenói avei ‘pe animál salváhe raʼanga’ (Apoc. 13:​14, 15; 17:​3, 16, 17). Upe rire umi “10 hatĩ” ha “pe animál salváhe” oipurúta pe podér oñemeʼẽ ramoitéva chupe, ha oñondive ohundipaitéta hikuái umi rrelihión japu oĩva ko múndope. Upéicharõ, ¿arakaʼépa umi nasión oanunsiáta: “¡Jaikóma pyʼaguapýpe ha segúro porã!”?b ¿Ojapótapa upéva hikuái oñehundi mboyve umi rrelihión japu, térãpa upe riréma? (1 Tes. 5:3).

Koʼág̃a ndajaikuaaporãi gueteri arakaʼépa umi nasión oanunsiáta hína ‘jaikomaha pyʼaguapýpe ha segúro porã’. Jaikuaárire upéva, natekotevẽmoʼãi kuri ñañatende porã ha ñaime preparádo. Péro Jesús heʼi jey jey vaʼekue isegidorkuérape: “Peñatende porãke siémpre” (Mat. 24:42; 25:13; 26:41). Jahechamína koʼág̃a la apóstol Pablo oskrivi vaʼekue espíritu sánto rupive pe kárta omondo vaʼekuépe umi Tesalonicaguápe.

Apóstol Pablo oskrivi vaʼekue: “Ág̃a umi hénte heʼi vove: ‘¡Jaikóma pyʼaguapýpe ha segúro porã!’, upepete oñeimoʼãʼỹve jave oñehundíta hikuái” (1 Tes. 5:​2, 3). La Pablo oskrivi vaʼekue pyʼỹinte ojeexplikámi vaʼekue ñane puvlikasiónpe péicha: Umi nasión heʼíta ‘jaikomaha pyʼaguapýpe ha segúro porã’ oñepyrũ mboyvemi pe “jehasa asy guasu”. Upéva oñepyrũta ág̃a oñehundi vove Babilonia Guasu, haʼéva hína entéro umi rrelihión japu oĩva ko múndope. Avei ojeʼévo ‘jaikomaha pyʼaguapýpe ha segúro porã’, jaikuaátama avei oñepyrũtamaha pe jehasa asy guasu.

Péro oñeanalisa porã rire ko téma, ojehecha ikatuha hína ojeʼe ‘jaikomaha pyʼaguapýpe ha segúro porã’ oñehundi rire umi rrelihión japu. ¿Mbaʼérepa jaʼe upéva? Jahechamína koʼã porandu.

¿Oñentremetépa umi rrelihión japu umi gérra oikóvare ko múndope? La Biblia heʼi Babilonia Guasúpe oñehenóiva avei pe “kuña rekovai sy”, ojetopa hague “entéro umi ojejuka vaʼekue ko yvy ape ári ruguy” (Apoc. 17:​1, 5; 18:24). Hetaiterei tiémporema umi rrelihión japu oñentremete umi gérrape. Heta vése ikausakuérare voi oiko umi gérra ha avei ojejuka hetaiterei héntepe. Upévare ikatu jaʼe umi rrelihión japu ndogueruiha pyʼaguapy, síno gérra ha violénsia. Upéicharõ, ¿ojapótapa umi goviérno pe anúnsio ‘jaikomaha pyʼaguapýpe ha segúro porã’ ohundi rire hikuái Babilonia Guasúpe? Provávlemente, péro ndaikatúi jaaseguraite.

¿Mbaʼépa oikóta umi goviérno oanunsia rire ‘jaikomaha pyʼaguapýpe ha segúro porã’? Apóstol Pablo heʼi: “Upepete oñeimoʼãʼỹve jave oñehundíta hikuái” (1 Tes. 5:3). Umi goviérno polítiko ohundívo umi rrelihión japúpe ha upéi heʼíramo ‘jaikomaha pyʼaguapýpe ha segúro porã’, jaʼekuaa upéi ndohasamoʼãiha heta tiémpo oñehundi hag̃ua degolpete umi nasionkuérape.

¿Mbaʼépa ojapóta Jehová siervokuéra? Apóstol Pablo heʼi: “Peẽ che ermanokuéra napeiméi pytũmbýpe, upévare upe día nog̃uahẽmoʼãi pende ári peimoʼãʼỹve jave, koʼẽmbaháicha umi mondahágui derrepentete oimoʼãʼỹve jave” (1 Tes. 5:4). Epensamína ko mbaʼére: Primero oñehundíramo umi rrelihión japúpe ha upéi ojejapo pe anúnsio ‘jaikomaha pyʼaguapýpe ha segúro porã’, ñande Jehová siervokuéra japillátama umi nasionkuéra oñehunditamaha. Péro umi nasionkuéra ojapo vaʼekue pe anúnsio tuichaiterei oñesorprendéta, pórke pe ñehundi oúta hiʼarikuéra peteĩ mondaháicha oavisaʼỹetére chupekuéra.

Upéicharõ, ¿mbaʼépa ikatu ñahaʼarõ? Koʼẽrõite umi “10 hatĩ” pe “animál salváhe” reheve oipurúta pe podér oñemeʼẽ vaʼekue chupe ha ohundíta hikuái umi rrelihión japúpe. Péicha oñepyrũta hína pe jehasa asy guasu. Jaikuaa avei peteĩ moméntope umi nasionkuéra ojapóta pe anúnsio ‘jaikomaha pyʼaguapýpe ha segúro porã’. ¿Arakaʼetépa ojapóta hikuái upéva? Jahecháma kuri oĩha 2 posivilida. Primero: Umi goviérno ikatu heʼi ‘jaikomaha pyʼaguapýpe ha segúro porã’ oñehundi mboyve umi rrelihión japu. Segundo: Pe anúnsio ‘jaikomaha pyʼaguapýpe ha segúro porã’ ikatu ojapo hikuái ág̃a ohundi rire umi rrelihión japu. Péro ñahaʼarõmante vaʼerã jaikuaa hag̃ua mbaʼeichaitépa oikóta upéva. Umi profesía oĩva la Bíbliape pyʼỹinte oñentende porãve oñekumpli aja térã oñekumplipa rire (ekompara Juan 12: 16 heʼívare).

Koʼág̃a la iñimportantevéva ndahaʼéi hína arakaʼetépa oñeanunsiáta ‘jaikomaha pyʼaguapýpe ha segúro porã’, síno la iñimportánteva hína jasegi ñandefiél Jehovápe. Upévare “japyta japayhápe ha jasegi ñapensa hendaitépe”. Péicha jajapóramo, noimportamoʼãi mbaʼeichaitépa oñekumpli umi profesía, pórke ñaimétama preparádo jahecha hag̃ua ág̃a oñekumpli vove umíva (1 Tes. 5:6).