Jarrespetákena Jehovápe, Abdías ojapo haguéicha

Abdías haʼe vaʼekue pe oñenkargáva rréi Acab palásiore. Ko rréi iñañaiterei vaʼekue ha omboliga entéro umi israelítape oadora hag̃ua Baálpe. Upéicharõ jepe, Abdías haʼe vaʼekue peteĩ kuimbaʼe orrespetáva Jehovápe ha okyhyjéva chugui ‘imitãite guive’ (1 Rey. 18:​1-13). Upévare rréina Jezabel omandárõ guare ojejukapa hag̃ua entéro umi Jehová profetakuérape, Abdías oikuaa ojapo vaʼerãha álgo ha upearã ipyʼaguasu vaʼerãha. Abdías oipytyvõramo peteĩ profétape jepe okañy hag̃ua ipeligrósoma kuri. Upéicharõ jepe haʼe oipytyvõ 100 profétape voi okañy hag̃ua. Haʼe nombofaltái umi kuimbaʼépe tembiʼu, jepe upérõ ndaiporivéima hiʼupy ha umi hénte iñembyahyipáma. Eñeimahinamína mbaʼeichaitépa ijetuʼúne raʼe Abdíaspe, pórke oĩ vaʼekue hetaiterei proféta japu oservíva pe rréi ha pe rréinape, ha haʼekuéra ikatu kuri opilla chupe (1 Rey. 18:19).

¿Mbaʼépa ikatu ñaaprende Abdías ehémplogui? Haʼe okyhyjéramo jepe rréi Acábgui, orrespetave Jehovápe ha okyhyjeve chugui. Upéva oipytyvõ vaʼekue chupe omeʼẽ hag̃ua hekove jepe iñermanokuéra rehehápe. Upéicha avei iñimportánte jarrespeta Jehovápe, koʼýte oimérõ jaiko peteĩ lugár ojeproivihápe ñandehegui jaadora chupe. Jakyhyje ha jarrespetáramo Jehovápe ñandepyʼaguasúta ñaipytyvõ hag̃ua umi ñane ermáno ha ermanakuérape ohasa jave hikuái umi situasión ijetuʼúva.