Ejapókena umi kámbio ejevautisa hag̃ua

1. a) ¿Mbaʼe iporãvapa jahupyty jajevautisávo? b) ¿Mbaʼépa jahecháta ko artíkulope?

¿NDÉPA reñemeʼẽma raʼe Jehovápe ha rejevautisa? Oimérõ upéicha, upéva haʼe kuri pe desisión iporãvéva. Nde rehechauka kuri rejerure hague Jehovápe oñeperdona hag̃ua nde pekadokuéra ha omeʼẽ hag̃ua ndéve oportunida reservi hag̃ua chupe (1 Ped. 3:21). Rejevautisávo avei remoĩ ehémplo porã umi neʼĩravape gueteri ojevautisáva. Péro ikatu oime neʼĩra gueteri rejevautisa. Nde ningo rehayhu Jehovápe, reservise chupe ha reikuaa porã tekotevẽha rejevautisa oñeperdona hag̃ua nde pekadokuéra ha Jehová ndeguerohory hag̃ua (Hech. 2:​38-40). Reikuaáramo jepe koʼã mbaʼe ikatu hína ijetuʼu ndéve rejevautisa hag̃ua. ¿Mbaʼépa ikatu nepytyvõ? Ko artíkulope jahecháta 1) mbaʼérepa algúnope ijetuʼu ojevautisa, 2) mbaʼérepa iñimportánte ereko enkuénta pe fin hiʼag̃uimbaitemaha, ha 3) mbaʼe iporãvapa rehupytýta reñehaʼãmbaitéramo rejevautisa eperdeʼỹre tiémpo.

¿MBAʼÉREPA ALGÚNOPE IJETUʼU OJEVAUTISA?

2. ¿Mbaʼérepa algúnope ijetuʼu ojevautisa?

² Algúno ningo okyhyje ojevautisa hag̃ua. Por ehémplo oĩ oserviséva Jehovápe péro opensa Ñandejára núnka ndaikatumoʼãiha oguerohory chupe. Oimérõ nde reñeñandu upéicha, ¿mbaʼépa ikatu rejapo? Ikatu reheka umi téxto bíblico nepytyvõtava rehechakuaa hag̃ua Jehová nohaʼarõiha ndeperfékto, síno ovyʼaha nde remeʼẽvo chupe la iporãvéva (Sal. 103:​13, 14; Col. 3:23). Ikatu oime avei nde rekyhyje oĩrõ g̃uarã oñemoĩva nderehe rejevautisa rire. Oimérõ upéicha ikatu rejerure Jehovápe tanepytyvõ reñeñandu hag̃ua pe salmísta oñeñandu haguéicha. Haʼe heʼi vaʼekue: “Ndakyhyjemoʼãi asy pórke Jehová oĩ che ykére, ¿mbaʼe piko ojapóta cherehe peteĩ persóna cheichagua?” (Sal. 118:6).

3. ¿Mbaʼérepa algúno avei ohaʼarõsevénte ojevautisa hag̃ua? (Ehecha pe taʼanga).

³ Algúno ohaʼarõsevénte ojevautisa hag̃ua openságui ndoikuaaiha heta mbaʼe la Bíbliagui. ¿Péro legálmente piko tekotevẽ reikuaa entéro mbaʼe oĩva la Bíbliape rejevautisa hag̃ua? Nahániri, ñapensamína peteĩ ehémplo oĩvare la Bíbliape. Peteĩ pyharépe Pablo ha Silas oĩ kuri kárselpe ha Jehová ojapo peteĩ milágro haʼekuéra osẽ hag̃ua upégui, upérõ oiko kuri peteĩ terremóto tuichaitereíva ha omboryryipaite pe kársel. Oiko rire upéva Pablo ha Silas oreko kuri oportunida opredika hag̃ua pe guardiakárselpe ha ihentekuérape. Upe kuimbaʼe ha hogayguakuéra ohechakuaa vaʼekue Ñandejára ojapo hague upe milágro. Haʼekuéra upe pyharépe oaprende hetaiterei mbaʼe Jehová ha Jesúsgui. ¿Mbaʼépa oiko raʼe upe rire? Pe kuimbaʼe ha hogayguakuéra “pyaʼe porã voi ojevautisa” (Hech. 16:​25-33). Nde avei ikatu oime reikuaáma Jehovápe, rehayhu chupe nde pyʼaite guive, reikuaáma unas kuánta kósa oĩva la Bíbliape, reñarrepentíma nde pekadokuéragui ha redesidíma neñeʼẽrendutaha Jehovápe. Oimérõ upéicha, nde reĩma hína preparádo rejevautisa hag̃ua (Mar. 12:30).

4. ¿Mbaʼérepa avei algúnope ijetuʼu ojevautisa hag̃ua? (Ehecha pe taʼanga).

⁴ Algúno ningo oipota Ñandejára oguerohory chupe, péro opensa hetaiterei mbaʼe tekotevẽha osakrifika ojevautisa hag̃ua. Legálmente ningo oĩ porã la ñapensa porã jadesidi mboyve peteĩ mbaʼe (Luc. 14:​27-30). Péro algúno ningo ojepyʼapyeterei umi mbaʼe tekotevẽvare osakrifika Jehová rehehápe. Upéva la oiko vaʼekue ermána Candace rehe, haʼe imichĩ guive oikuaa porã la tekotevẽva ojapo Jehová oguerohory hag̃ua chupe, péro haʼe núnka ndojapói la oaprendéva. Tiémpo rire Candace oñepyrũ vaʼekue ostudia jey la Biblia. Haʼe heʼi: “Che ningo aikuaa vaʼekue la ajapo vaʼerã Jehová cheguerohory hag̃ua, péro avei chegustaiterei vaʼekue aiko lája múndope. Upévare aikuaa porã kuri ijetuʼuetereitaha chéve akambia hag̃ua”. Oĩ avei umi okyhyjéva ojevautisa hag̃ua openságui ndaikatumoʼãiha ojapo la Jehová ohaʼarõva chugui ojevautisa rire, haʼe oikuaa ojevautisáramo upéi ikatuha opeka ha upévare oñenohẽ chupe kongregasióngui. ¿Ndévepa avei ndepyʼapy koʼãichagua mbaʼe? Oimérõ upéicha, ¿mbaʼépa ikatu nepytyvõ?

5. ¿Mbaʼe rehepa epensa vaʼerã edesidi hag̃ua ejevautisátapa térã nahániri? (Mateo 13:​44-46).

⁵ Jajoguáta jave peteĩ mbaʼe ndahaʼéi sólamente ñapensáva mboýpa japagáta hese, síno avei ñapensa mbaʼeichaite pevépa ideprovéchota ñandéve pe jajoguátava. Jaikuaáramo upe mbaʼe ideprovechoitereitaha ñandéve katuete jajoguáta hepýramo jepe. Upéicha avei, repensa vove arakaʼépa rejevautisáta ndovaléi eñekonsentraiterei umi mbaʼe ijetuʼúvare ndéve ekambia hag̃ua, síno epensave vaʼerã mbaʼeichaitépa ideprovéchota ndéve ereko peteĩ amista Jehovándi. Jesús oipuru vaʼekue mokõi ehémplo omboʼe hag̃ua koʼã mbaʼe (elee Mateo 13:​44-46). Umi mokõi ehémplope oñemombeʼu peteĩ kuimbaʼe vyʼápe ovende hague entéro umi mbaʼerepy orekóva ojogua hag̃ua pe tesóro otopa vaʼekue. Nde avei koʼág̃a retopa peteĩ tesóro ivaliosoitereíva, upéva hína umi notísia porã oñeʼẽva Ñandejára Rréinore. Péro ikatu oime nde eñeporandu ovalépa la péna umi kámbio tekotevẽva rejapo ejevautisa hag̃ua. Oimérõ upéicha, ejepyʼamongetákena umi mokõi ehémplo Jesús oipuru vaʼekuére. Ikatu voi reñeporandu: “¿Aime piko legálmente konvensído atopa hague peteĩ tesóro ivaliosoitereíva? ¿Amombaʼépa pe amista aguerekóva Jehová ndive, pe esperánsa aikovetaha pára siémpre ha pe família arekóva Jehová organisasiónpe?”. Rembohovái lájare koʼã porandu rehechakuaáta mbaʼépepa ikatu emehora ejevautisa hag̃ua.

6. ¿Mbaʼépa nepytyvõta rejapo hag̃ua la reaprendéva?

⁶ Jesús oipurúrõ guare pe ehémplo omombeʼu oĩtaha umi ohendúva pe notísia porã, péro upéi ndojapói hikuái la ohendúva térã la oaprendéva. Péro Jesús heʼi vaʼekue avei oĩtaha umi persóna “isinsérova ha ipyʼapy porãva”, umichagua persóna ohendúvo pe notísia porã ojapo la oaprendéva (Luc. 8:​5-15). Oimérõ nde reduda repenságui ndaikatumoʼãiha rejapo la reaprendéva, aníkena reñentrega. Ñandejára ningo ikatu hína ‘ombopyahu ne korasõ’, upéva nepytyvõta neñeʼẽrenduse hag̃ua chupe. Ejerurékena Jehovápe ne ñemboʼépe tanepytyvõ ikatu hag̃uáicha remombaʼe umi mbaʼe reaprendéva ha rejapo hag̃ua umi kámbio tekotevẽva (Ezeq. 18:31; 36:26).

7, 8. ¿Mbaʼérepa algúno mitãrusúpe ijetuʼu ojevautisa hag̃ua? (Ehecha pe taʼanga).

⁷ Oĩ umi mitãrusu ha mitãkuña ohayhúva Jehovápe, péro ndojevautisái pórke openaiterei la hénte heʼívare chupekuéra. Por ehémplo koléhiope umi profesór omboliga jepi umi alúmnope oasepta hag̃ua umi kondúkta chupekuéra g̃uarã ndaivaíriva péro Jehovápe ndogustáiva. Umi osegíva koʼãichagua konsého upéi ikatu hína hetaiterei osufri (Sal. 1:​1, 2; Prov. 7:​1-5). Ani hag̃ua oiko nderehe upéva ikatu resegi pe salmísta ehémplo. Haʼe ningo heʼi vaʼekue Jehovápe: “Che ajepyʼamongeta umi mbaʼe erévare, upévare antende hetave mbaʼe entéro che mboʼeharakuéragui” (Sal. 119:99).

⁸ Provávlemente oĩ avei umi túa oñemeʼẽʼỹre enkuénta ojokóva ifamíliape ojevautisa hag̃ua. ¿Mbaʼéichapa ojapo upéva algúno tuakuéra? Por ehémplo oĩ umi oipotaitereíva ifamília oreko umi estúdio ijyvatéva ikatu hag̃uáicha upéi ombaʼapo porã. Avei oĩ tuakuéra hesaraietéva voi oipytyvõ vaʼerãha ifamíliape oreko hag̃ua umi méta omoag̃uítava chupe Jehováre. Nde mitãrusu, ¿reñandúpa hína nde tuakuéra ikatuha nepytyvõ porãve rejevautisa hag̃ua? ¿Mbaʼére piko nereñeʼẽi hendivekuéra upe témare? Nemanduʼákena ko mbaʼére, Jehová haʼe hag̃ua ne amígo noimportái hína mbaʼe edápa reguereko (Prov. 20:11).

9. ¿Mbaʼérepa algúno ohaʼarõ ojevautisa hag̃ua?

⁹ Oĩ ningo umi okumplipaitémava umi rrekisíto ojevautisa hag̃ua, péro ndojapói upéva ohaʼarõgui peteĩ ihénte ohayhúva térã peteĩ iñamígo ojevautisa hendive el mísmo día. Ndaivaíri ningo añete rehaʼarõ peteĩ rehayhúvape rejevautisa hag̃ua hendive, péro ndovaléi avei upéva ndejoko rejevautisa hag̃ua koʼág̃a. Nemanduʼákena káda uno opromete vaʼerãha Jehovápe oñemeʼẽtapa chupe, upévare ndovaléi redepende ótrore rejevautisa hag̃ua (Rom. 14:12).

¿MBAʼÉREPA JAREKO VAʼERÃ ENKUÉNTA PE FIN HIʼAG̃UIMBAITEMAHA?

10. ¿Mbaʼérepa avei algúno ndojapói umi kámbio tekotevẽva ojevautisa hag̃ua?

¹⁰ Ikatu oime algúno ndojapói umi kámbio tekotevẽva ojevautisa hag̃ua openságui ofaltaitiha unos kuánto pe fin ou hag̃ua. ¿Péro oĩ porã piko la ñapensa upéicha? Jesús heʼi vaʼekue idisipulokuérape: “Siémpre peime vaʼerã preparádo, pórke pe Yvypóra Raʼy oúta peteĩ óra peẽ peimoʼãʼỹvape” (Luc. 12:40).

11. Ohechaukaháicha Salmo 119:​60, ¿mbaʼe mbaʼépa ñañandu amáske jaikuaa Jehovápe?

¹¹ Ñande ningo ñañemeʼẽ Jehovápe ha jajevautisa jahayhúgui chupe. Amáske jaikuaa porãve Jehovápe jahecha mbaʼeichaitépa haʼe ñanderayhu ha umi mbaʼe haʼe omandáva ñandéve ñane venefisiorãnte, upévare pyaʼe voi ñaneñeʼẽrenduse chupe (elee Salmo 119:60). Pe disípulo Santiago heʼi vaʼekue avei mbaʼérepa iñimportánte pyaʼe porã ñaneñeʼẽrendu Jehovápe. La haʼe heʼi vaʼekuére jahechakuaa legálmente ndajaikuaaiha mbaʼépa koʼẽrõ ikatu ñaneraʼarõ. Ikatu hína ndajarekovéi ni un día mas jajapo hag̃ua la iporãva, upévare káda día iñimportánte jajapo la Jehová oipotáva (Sant. 4:​13-17).

12. ¿Mbaʼépa ñaaprende pe ehémplo oñeʼẽvare pe parraltýre?

¹² Peteĩ ehémplope Jesús omombeʼu oĩ hague unos kuánto kuimbaʼe ombaʼapóva peteĩ parraltýpe. Haʼe heʼi oĩ hague umi ombaʼapóva una órante, péro oĩ vaʼekue avei umi ombaʼapóva tódo el día. Péro enterovévape ojepaga vaʼekue lo mísmo. Umi ombaʼapo vaʼekue una órante omombeʼu mbaʼérepa noñepyrũi raʼe hikuái ombaʼapo voive. Haʼekuéra heʼi: “Avave ningo nomeʼẽi oréve traváho”. Upéicharõ umi kuimbaʼe ningo ndahaʼéi la iñateʼỹva, síno haʼekuéra ndohóinte kuri ombaʼapo avave nohenói rupi chupekuéra. Upévare oñehenóirõ guare chupekuéra, pyaʼe porã voi oho hikuái ombaʼapo pe parraltýpe (Mat. 20:​1-16). Koʼág̃a avei Jesús ñanerenói ñamoirũ hag̃ua chupe ha japredika hag̃ua pe mensáhe oñeʼẽva Ñandejára Rréinore, upévare pyaʼe porã voi tekotevẽ jajapo la Jesús ojeruréva ñandéve.

13. ¿Mbaʼépa ñaaprende Lot rembirekógui?

¹³ Oĩ ningo umi ohaʼarõva ojevautisa hag̃ua openságui ikatutaha ojapo umi kámbio pe fin og̃uahẽ mboyvemi, péro amáske haʼekuéra ohaʼarõ ijetuʼuvéta chupekuéra ojapo umi kámbio oservi hag̃ua Jehovápe. Jesús ningo oikuaa porã vaʼekue upéva siertoha. Upévare heʼi kuri idisipulokuérape: “Penemanduʼákena mbaʼépa oiko Lot rembirekóre” (Luc. 17:​31-35). Lot rembireko oikuaa porã vaʼekue Sodoma ha Gomorra oñehundi potaitemaha, péro upérõ ijetuʼu vaʼekue chupe oheja hag̃ua tapykuépe umi mbaʼerepy oguerekóva (Gén. 19:​23-26). ¿Mbaʼépa ñaaprende ko ehémplogui? Upéva ñanemomanduʼa un tiémporente Jehová omeʼẽha oportunida la héntepe ojapo hag̃ua umi kámbio tekotevẽva oservi hag̃ua chupe, péro upe tiémpo opa vove tardetereítama ojapo hag̃ua hikuái la iporãva (Luc. 13:​24, 25).

14. Rehechávo mbaʼéichapa oñekumpli umi profesía oñeʼẽva pe ára paháre, ¿mbaʼéichapa upéva ikatu nepytyvõ?

¹⁴ Umi mbaʼe oikóvare ko múndope káda día jahechakuaa oñekumplipaitemaha umi profesía oĩva la Bíbliape oñeʼẽva umi ára paháre. Ikatu hína algúno umi mbaʼe la Biblia heʼíva ndoikói pe reikohápe, péro oiko hína heta lugár ko múndope. Upéva nemomýi vaʼerã rejapo hag̃ua umi kámbio tekotevẽva ensegídama voi rejevautisa hag̃ua. Jahechamína la apóstol Pedro heʼi vaʼekue unos kuánto kristiánope. Haʼe omokyreʼỹ kuri chupekuéra ‘oĩ hag̃ua preparádo’ térã oñatende ha opáy hag̃ua pórke “hiʼag̃uimbaitéma entéro mbaʼe oñemohuʼã hag̃ua” (1 Ped. 4:​7, nóta). Apóstol Pedro heʼírõ guare ‘hiʼag̃uimbaitemaha entéro mbaʼe oñemohuʼã hag̃ua’ heʼise kuri Jerusalén ha pe témplo oñehunditaha. Haʼe ningo oskrivi vaʼekue ko kárta umi oikóvape mombyry Jerusaléngui, upévare haʼekuéra noĩri kuri upe siuda oñehundírõ guare (1 Ped. 1:1). Péro umi kristiáno ikatúta kuri ohecha mbaʼéichapa oñekumpli pe profesía, ha upéva oipytyvõta kuri chupekuéra ojeroviave hag̃ua entéro umi ótra promésa Jehová ojapóvare. Koʼág̃a avei iñimportánte reñatende rehecha hag̃ua mbaʼéichapa oñekumpli umi profesía oñeʼẽva pe ára paháre, upéva nemomýita rejapo hag̃ua pyaʼe porã umi kámbio tekotevẽva rejevautisa hag̃ua.

15. ¿Mbaʼéichapa ikatu ñaime preparádo Jehová árape g̃uarã? (2 Pedro 3:​10-13).

¹⁵ Isegúnda kártape Pedro omombeʼu mbaʼéichapa ikatu ñaĩ preparádo Jehová árape g̃uarã. Haʼe oñeʼẽ kuri Jehová árare umi kristiáno oiko vaʼekuépe síglo primérope, péro haʼekuéra upérõ opensa ofaltaha gueteri heta tiémpo upe día og̃uahẽ hag̃ua. Upéicharõ jepe apóstol Pedro heʼi umi kristiánope ‘imanduʼa meme’ hag̃ua Jehová árare térã ‘oipotaiterei’ vaʼerãha hikuái upe día og̃uahẽ (elee 2 Pedro 3:​10-13, nóta). ¿Mbaʼéichapa ñande koʼág̃a ikatu jahechauka ñanemanduʼa memeha Jehová árare ha jaipotaitereiha upe día og̃uahẽ? Jajapóta upéva jajepreparávo. Upearã ‘ñanekondúkta potĩ vaʼerã ha jaadora vaʼerã Ñandejárape ñande pyʼaite guive’. Epensamíntena mbaʼeichaitépa Jehová ovyʼa ohecha jave rejapoha la chupe ogustáva. Péicha avei haʼe ovyʼaitereíta redesidíramo reñemeʼẽ chupe ha rejevautisa.

EJEVAUTISÁKENA EPERDEʼỸRE TIÉMPO

16. ¿Mbaʼe moméntope iporãve rejevautisa? (2 Corintios 6:​1, 2). (Ehecha pe taʼanga).

¹⁶ Koʼág̃a hína pe moménto iporãvéva rejevautisa hag̃ua (elee 2 Corintios 6:​1, 2). Ñapensamína pe ofisiál etíope ehémplore. Felipe ojotopárõ guare hendive opredika kuri chupe, ha pe etíope oikuaárõ guare pe añetegua ha ohechárõ guare peteĩ lugár ikatutahápe ojevautisa, upepetéma voi odesidi ojapo vaʼerãha upéva. Haʼe ningo nopensái vaʼekue: “Tahaʼarõmiéntena aaprende hag̃ua hetave mbaʼe umi notísia porãgui. Ikatu hína amo gotyomie atopánte avei peteĩ lugár ikatuhápe ajevautisa”. Upéva rangue pe etíope oporandu Felípepe: “¿Mbaʼéiko chejoko ajevautisa hag̃ua?” (Hech. 8:​26, 27, 35-39). ¡Ajépa ningo iporãite la iñehémplo! Haʼe ningo upepetéma voi ojevautisa ha upéi osegi hape vyʼapópe.

17. ¿Mbaʼéguipa ikatu ñaĩ segúro?

¹⁷ Oĩramo álgo ndejokóva rejevautisa hag̃ua, aníkena reduda Jehová nepytyvõtaha katuete ereko hag̃ua peteĩ amista iporãva hendive (Rom. 2:4). Jehová ningo nepytyvõta oimérõ ekyhyje, oimérõ oĩ álgo ijetuʼuetereíva tekotevẽva rekambia, térã oĩramo jepe umi nanepytyvõietéva voi rejevautisa hag̃ua. Nde rejevautisáramo reguerekótama peteĩ konsiénsia ipotĩva Jehová renondépe ha péicha ifasilvétama ndéve nderesarái hag̃ua umi mbaʼe ‘opyta vaʼekuégui tapykuépe’ (Filip. 3:​8, 13). Avei ikatútama rejesareko umi mbaʼe oĩvare ne renonderãme, umíva hína mbaʼéichapa oñekumplíta umi promésa Jehová ojapóva umi oñemeʼẽvape chupe ha ojevautisáva (Hech. 3:19).