¿Mbaʼépa heʼise jajevautisa ha mbaʼérepa upéva iñimportánte?

1. ¿Mbaʼérepa jaʼekuaa pe vautísmo iñimportantetereiha?

¡AJÉPA ningo javyʼaite oĩ jave ojevautisa ramóva! Upéva ningo iñimportanteterei ymaite guive voi. ¿Mbaʼérepa? Por ehémplo yma umi oĩva pe primera kongregasión kristiánape ovyʼaiterei vaʼekue avei, pórke upérõ guare hetaiterei persóna ojevautisa kuri pe Pentekostés áño 33-pe. Upérõ avei apóstol Pedro ojapo kuri peteĩ diskúrso oexplika hag̃ua mbaʼérepa iñimportantete jajevautisa (Hech. 2:​38, 40, 41). Tiémpo rire, apóstol Pablo heʼi vaʼekue “pe enseñánsa oñeʼẽva umi vautísmore” haʼeha peteĩva umi “enseñánsa primeroite oñemboʼéva Crístogui” (Heb. 6:​1, 2). Ikatu oime ñapensa ndahasyieteha ñantende hag̃ua mbaʼépa heʼise pe vautísmo, péro legálmente iñimportánte hína hesakã porã ñandéve ko téma. ¿Mbaʼérepa? Jahechamína.

2. ¿Mbaʼérepa iñimportánte ñantende porã mbaʼépa heʼise pe vautísmo?

² Jaikuaaháicha, peteĩ simiénto imbaretéva oipytyvõ peteĩ ógape ani hag̃ua hoʼa. Upéicha avei iñimportánte ñantende porã mbaʼépa heʼise pe vautísmo, pórke upéva ojogua hína pe simiénto oipytyvõvape ñande jerovia imbarete hag̃ua. Oimérõ ejevautisáta hína térã oimérõ ojapóma unos kuánto áño rejevautisa hague, lomímonte iñimportánte rentende porã mbaʼépa hína heʼise pe vautísmo. Upévare ko artíkulope ñambohováita koʼã porandu: ¿Mbaʼépa heʼise jajevautisa? ¿Mbaʼéichapa ojejapo vaʼerã upéva? ¿Ha mbaʼérepa jajevautisa vaʼerã pe Túa, pe Taʼýra ha pe espíritu sánto rérape?

¿MBAʼÉPA HEʼISE JAJEVAUTISA HA MBAʼÉREPA UPÉVA IÑIMPORTÁNTE?

3. ¿Mbaʼe mbaʼépa jahechauka jajevautisávo?

³ ¿Mbaʼe mbaʼépa nde rehechauka la héntepe rejevautisávo? Primeroite voi ehechauka regueroviaha entéro umi mbaʼe reaprende vaʼekue Jehová ha Jesúsgui. Segundo, reñarrepentiha umi nde pekadokuéragui. Tercero, rejapo hague umi kámbio tekotevẽva reservi hag̃ua Jehovápe. Cuarto, rehechauka rentendeha Jehová ojevale hague Jesús rehe ndesalva hag̃ua pekádo ha ñemano poguýgui. Ha quinto, rehechauka reprometéma hague Jehovápe peteĩ ñemboʼe rupive, rejapotaha ivolunta ha reservitaha chupe iñorganisasión ndive. Reñemeʼẽvo Jehovápe ha rejevautisa haʼete voi ku rejagarráva peteĩ tape ndegueraháva jeikove opaveʼỹvape.

4. ¿Mbaʼépa heʼise jaike ha ñasẽ pe ýgui? (Ehecha pe taʼanga).

⁴ Rejevautisa vove reikepaite voi pe ýpe ha upéi resẽ upégui,a haʼete voi ku reñeñotỹva péro upéi reikove jeýva (ekompara Colosenses 2:12 heʼívare). ¿Mbaʼérepa jaʼekuaa upeichaha? Reikepaitévo pe ýpe rehechaukáma ndereikomoʼãveimaha anteve guaréicha. Upéi resẽvo pe ýgui ehechauka reñepyrũtaha reservi Jehovápe ha rejapotaha ivolunta ha upéva haʼetaha la iñimportantevéva nde rekovépe.

5. Oimérõ rejeprepara hína rejevautisa hag̃ua, ¿mbaʼéichapa upéva ojogua pe traváho Noé ojapo vaʼekuépe? (1 Pedro 3:​18-21).

⁵ (Elee 1 Pedro 3:​18-21). Tekotevẽ ningo rejeprepara rejevautisa hag̃ua ha upéva ojogua pe traváho Noé ojapo vaʼekuépe omopuʼã hag̃ua pe árka. ¿Mbaʼérepa jaʼekuaa upéva? Por ehémplo oimérõ reñepyrũ hína reikuaa Jehovápe, ikatu hína repensa ijetuʼuetereiha umi mbaʼe tekotevẽva rejapo rejevautisa hag̃ua. Ijetuʼu haguéicha Noépe ojapo hag̃ua peteĩ árka ndetuichapa jepéva, ikatu oime ndéve péicha avei ijetuʼu rejapo umi mbaʼe tekotevẽva rejevautisa hag̃ua. ¿Péro ovalépa la péna pe esfuérso rejapóva hína? Kláro ke si. Epensamíntena, Ñandejára ningo la heʼi vaʼekue Noépe mbaʼeichaitépa ojejapo vaʼerã kuri pe árka, Noé iñeʼẽrendu ha “ojapo opa mbaʼe omanda vaʼekue chupe Ñandejára”, upéicha rupi ikatu vaʼekue ojesalva hikuái pe dilúviope. Noé ojapo vaʼekue pe árka iñeʼẽrendu rupi ha ojeroviágui Jehováre, ha Jehová voi la oipytyvõ vaʼekue chupe upearã. Nde avei ikatu resegi Noé ehémplo ha rejapo opa mbaʼe Ñandejára omandáva ndéve (Gén. 6:22).

6. ¿Mbaʼe sentídopepa ikatu jaʼe pe vautísmo ñandesalvaha?

⁶ Primera de Pedro 3:​21-pe apóstol Pedro heʼi kuri pe vautísmo ‘ñandesalvaha’, péro upéva ndeʼiséi hína jaike haguérentema pe ýpe ikatutamaha jajesalva, térã oñeperdonatamaha ñandéve ñande pekadokuéra. Jesús ruguy añoite ningo la ikatúva ñanemopotĩ umi pekádogui (1 Juan 1:7). Upéicharõ, ¿mbaʼe sentídopepa la jajevautisáramo ikatúta ‘jajesalva’? Primeroite voi pórke upéva haʼe peteĩ mbaʼe Jehová voi ojerure vaʼekue ñandéve jajapo hag̃ua. Ha segundo, jajevautisávo ‘jajerure hína Ñandejárape jareko hag̃ua peteĩ konsiénsia potĩ’. Ha jaikuaaháicha Jehová siémpre vyʼápe omeʼẽ ñandéve la jajeruréva chupe.

¿MBAʼÉICHAPA OJEJAPO VAʼERÃ PE VAUTÍSMO?

7. ¿Mbaʼéichapa ojejapo vaʼerã pe vautísmo?

⁷ La Biblia rupive jaikuaa pe ojevautisáva oikepaite vaʼerãha ýpe, péro upéi nomeʼẽi ñandéve hetave detálle. Upéicharamo jepe la Biblia ñanepytyvõ jaikuaa hag̃ua mbaʼe mbaʼépa iporã ojejapo pe vautísmo aja. Por ehémplo umi konsého bíblico oipytyvõ pe ojevautisátavape oikuaa hag̃ua mbaʼéichapa oñemondéta, avei oipytyvõ umi ohechátava pe vautísmo oikuaa hag̃ua mbaʼéichapa oñekomporta vaʼerã (1 Cor. 14:40; 1 Tim. 2:9). Koʼág̃arupi normálmente umi ansiáno hína la oporovautisáva, péro ñande ndajaikomoʼãi ñamombaʼeguasueterei chupekuéra oreko haguére upe priviléhio (1 Cor. 1:​14, 15). Avei noimportái saʼi térã hetáramo umi persóna ohecháva pe vautísmo pórke tahaʼe haʼeháicha Jehovápe g̃uarã lomímonte ovale (Hech. 8:36).

8. ¿Mbaʼépa oñeporandu jepi umi ojevautisátavape ha mbaʼérepa? (Hechos 2:​38-42). (Ehecha pe taʼanga).

⁸ Ñande ñamombeʼu la héntepe pe mensáhe ndahaʼéi japredika javénte, síno avei koʼytevéntema pe jajevautisaha díape (Rom. 10:​9, 10). Upévare umi ojevautisátavape ojejapo jepi mokõi porandu. Peteĩva haʼe: “¿Reñarrepentímapa nde pekadokuéragui, reñemeʼẽmapa Jehovápe ha rejeroviápa haʼe oipuruha Jesúspe ñandesalva hag̃ua?”. Upe porandu ohechauka mbaʼépa pe persóna ojapóma kuri ojevautisa hag̃ua, ha ojogua la apóstol Pedro heʼi vaʼekuépe umi oñarrepenti ha ojevautisávape pe Pentekostéspe. Pe segundo porandu haʼe: “¿Rentendépa rejevautisávo rehechaukaha nde haʼemaha testígo de Jehová ha koʼág̃a guive reikemaha Ñandejára organisasiónpe?”. Ko porandu ohechauka mbaʼépa pe persóna ojapóta ojevautisa rire. Haʼe opromete osegitaha umi instruksión omeʼẽva Jehová organisasión ha oservitaha Jehovápe umi ermáno ha ermanakuérandi. Umi ojevautisa vaʼekue pe Pentekostéspe upeichaite ojapo vaʼekue avei (elee Hechos 2:​38-42). Entéro umi ipyʼaite guive ombohováiva “si” koʼã porandúpe ikatu ojevautisa.

9. ¿Mbaʼe mbaʼépa enterovéva tekotevẽ jajapo Ñandejára ñandeguerohory hag̃ua?

⁹ Ñamoĩ chupe nde reikuaa mboyvéma voi pe añetegua oĩva la Bíbliape reñehaʼãmbaitéma hague rejapo hag̃ua iporãva ha nderejapói hague voi mbaʼeve ivaietereíva. Avei ikatu oime nde tuakuéra haʼe Testígo ha nepytyvõ hikuái rehayhu hag̃ua Jehovápe. Péicha jave, ¿lomímontepa tekotevẽ reñarrepenti ha rejevautisa Ñandejára ndeguerohory hag̃ua? Si, pórke enterovéva ñanaséma vaʼekue voi pekadór ha upéicha rupi Jehová ndaikatúi kuri haʼe ñane amígo (Sal. 51:5). Péro amedída ke jaikuaa jahávo Jehovápe jadesidi jajapotaha la haʼe oipotáva ha ndahaʼéi la ñande jaipotávante. Upe rire ñañarrepentíma oimeraẽ mbaʼe vai jajapo vaʼekuégui ha ndajajapovéima voi umi mbaʼe ndogustáiva Jehovápe, síno ñañepyrũ jaiko Jehová oipotaháicha. Jajapo rire entéro koʼã mbaʼe ikatúma jajevautisa (Hech. 3:19).

10. Oimérõ rejevautisáma raʼe reĩrõ guare ótro rrelihiónpe, ¿mbaʼépa lomímonte tekotevẽ rejapo?

¹⁰ Ikatu oime nde reĩrõ guare ótro rrelihiónpe rejevautisáma raʼe, péicha jave lomímonte tekotevẽ rejevautisa oiko hag̃ua ndehegui testígo de Jehová. ¿Mbaʼérepa? Pórke upérõ guare nde ndereikuaaporãiti kuri Jehovápe ni Jesúspe. Avei ikatu oime nde reñemeʼẽma raʼe Ñandejárape peteĩ ñemboʼépe, péro upérõ nerentendeporãiti kuri mbaʼépa hína Ñandejára volunta. Peteĩ vuéltape apóstol Pablo ojotopa kuri unos kuánto kuimbaʼéndi Éfesope. Umi kuimbaʼe ningo ojevautisáma vaʼekue, jepe ndoikuaaporãi kuri hikuái la Jesús omboʼéva, péro upéi umi kuimbaʼe ohechakuaa tekotevẽha ojevautisa jey (Hech. 19:​1-5).b Koʼág̃a avei pe ojevautisátava ontende porã vaʼerã mbaʼépa la Jehová oipotáva haʼe ojapo, ha upéicharõ añoite ikatúta ojevautisa.

“PE TÚA, PE TAʼÝRA HA PE ESPÍRITU SÁNTO RÉRAPE”

11. ¿Mbaʼépa heʼise jajevautisaha “pe Túa, pe Taʼýra ha pe espíritu sánto rérape”? (Mateo 28:​18-20).

¹¹ Jesús heʼi vaʼekue umi disípulo pyahu ojevautisa vaʼerãha “pe Túa, pe Taʼýra ha pe espíritu sánto rérape” (elee Mateo 28:​18-20). ¿Mbaʼépa heʼise jajevautisa Jehová ha Jesús “rérape”? Upéva heʼise jaikuaa porãha haʼekuéra orekoha pe derécho ha pe podér heʼi hag̃ua ñandéve mbaʼépa la jajapo vaʼerã. ¿Ha mbaʼépa heʼise jajevautisaha pe espíritu sánto rérape? Heʼise jasegitaha pe gía omeʼẽva ñandéve pe espíritu sánto. Upévare jahechamína koʼág̃a mbaʼéichapa ikatu jajapo koʼã mbaʼe.

12. ¿Mbaʼépa heʼise jajevautisaha pe Túa rérape? (Apocalipsis 4:11). (Ehecha pe taʼanga).

¹² Jajevautisa pe Túa rérape. Ñande ningo jaikuaa porã Jehová haʼeha ñande Ru yvagapegua ha haʼe rupive jaikoveha. Avei jaikuaa haʼeha pe Todopoderóso ha opa mbaʼe Apohare (elee Apocalipsis 4:11). Jaikuaa porã avei Jehová ohenduha umi hénte ñemboʼe, ha jaipuru voi la héra ñañemboʼe jave chupe ha ñañeʼẽ jave la héntepe hese (Sal. 65:2). Péro jajevautisa pe Túa rérape heʼise avei ótra kósa. Umi ojevautisa vaʼekue pe Pentekostéspe oikuaáma voi kuri Jehovápe, péro lomímonte haʼekuéra tekotevẽ kuri ontende porã Jehová omeʼẽha pe jeikove opaveʼỹva Jesús rupive (Rom. 5:8).

13. ¿Mbaʼépa heʼise jajevautisaha pe Taʼýra rérape? (Ehecha pe taʼanga).

¹³ Jajevautisa pe Taʼýra rérape. Ñande jaikuaa porã Jesús haʼeha Ñandejára Raʼy. Haʼe ningo “pe tape” ñanepytyvõva jareko hag̃ua peteĩ amista iporãva Jehová ndive ha haʼe rupive añoite ikatu jahupyty upéva (Juan 14:6). Avei Jesús omano rupi ñanderehehápe ikatu jareko pe jeikove opaveʼỹva. Koʼã mbaʼe ningo ñanemomýi voi káda día jasegi hag̃ua Jesús ehémplo ha ndahaʼéi sólamente pe jajevautisaha díapente (1 Juan 2:6). Upévare kyreʼỹme voi japredika haʼe ojapo haguéicha ha ndajahejái mbaʼevete ñandejoko (Luc. 4:43). Avei oĩramo jepe ñandepersegíva ñande ikatu ñaaguanta jasegígui Jesús ehémplo ha ñandefiélgui Jehovápe (2 Tim. 3:12). Ñande ningo jarrespeta Jesúspe pórke haʼe hína la ‘omoakãva pe kongregasión’, ha haʼe voi omoĩ unos kuánto kuimbaʼépe ogia ha oñangareko hag̃ua umi oĩvare kongregasiónpe. Jesús ningo ojeroviaiterei koʼã kuimbaʼére ha ñande vyʼápe jasegi umi instruksión omeʼẽva ñandéve hikuái (Efes. 4:​8, 11, 12; 5:23).

14. a) ¿Mbaʼépa heʼise jajevautisaha pe espíritu sánto rérape? (Ehecha pe taʼanga). b) ¿Mbaʼe ótro vautísmopa ojapo avei umi unhído? (Ehecha pe rrekuádro “¿Mbaʼe sentídopepa avei umi unhído ojevautisa?”).

¹⁴ Jajevautisa pe espíritu sánto rérape. Ñande ningo jaikuaa porã mbaʼépa añetehápe hína pe espíritu sánto. Upéva ningo ndahaʼéi peteĩ persóna ha avei jaikuaa porã de ke pe Túa, pe Taʼýra ha pe espíritu sánto ndahaʼeiha peteĩnte, síno upéva haʼeha pe fuérsa Ñandejára orekóva ojapo hag̃ua opa mbaʼe. La Biblia rupive ñantende porã Jehová ojevale hague ijespíritu sántore oipytyvõ hag̃ua iprofetakuérape ha umi eskritór de la Bíbliape oikuaa hag̃ua hikuái mbaʼépa heʼi vaʼerã. Upéicha rupi ñande ikatu jajerovia la Biblia heʼívare ha jajapo la oĩva pype (2 Ped. 1:​20, 21). Avei ñañehaʼãmbaite ani hag̃ua jajapo umi mbaʼe ivaietereíva, jaikuaágui oikóramo upéva Jehová ikatuha oipeʼa ñandehegui ijespíritu sánto ha ndahaʼéi voi upévante, hiʼarive upéva káusare ikatu voi ijespíritu sánto ombaʼapo asy hína ikongregasiónpe (Efes. 4:30).

15. ¿Mbaʼe rehepa resegi vaʼerã nemanduʼa?

¹⁵ Oiméramo jepe nde rejevautisáma raʼe, lomímonte esegi vaʼerã nemanduʼa mbaʼérepa pe vautísmo iñimportantete.c Avei ekumplíkena la repromete vaʼekue Jehovápe reñemeʼẽ ha rejevautisárõ guare. Péro ikatu oime nde neʼĩra gueteri ejevautisa, ¿oĩpa hína álgo ndejokóva upearã? Pe artíkulo oúvape jahecháta mbaʼe mbaʼépa ikatu rejapo rehupyty hag̃ua upéva.