MITÃRUSUKUÉRA OÑEPORANDÚVA JEPI
¿Mbaʼépa heʼi la Biblia pe omosexualidáre?
“Chéve ijetuʼueterei vaʼekue chemitãvépe pórke chegusta kuri umi mitãkariaʼy. Che aimoʼã kuri upéva upéi ojehasataha chehegui, péro amo ipahápe koʼág̃a peve alucha vaʼerã upéva kóntrape” (David, orekóva 23 áño).
David ningo peteĩ kristiáno ombovyʼaséva Ñandejárape, ¿péro serápa haʼe ikatu ojapo upéva ogustáramo chupe hapicha kuimbaʼe? ¿Mbaʼépa Ñandejára opensa pe omosexualidáre?
¿Mbaʼépa heʼi la Biblia?
La oñepensáva pe omosexualidáre ningo okambia asegún la époka ha mbaʼe lugárpepa jaiko. Péro ñande kristianokuéra ndajajegiái umi mbaʼe opensávare umi hénte, ku jaharõguáicha yvytu oipejuha gotyonte (Efesios 4:14). Upéva rangue ñande jajegia la Biblia heʼívare, pórke upépe oĩmbaite mbaʼépa Ñandejára opensa pe omosexualidáre ha hetave mbaʼére.
Umi mbaʼe la Biblia heʼíva pe omosexualidáre ningo hesakã porãiterei. Por ehémplo, upépe heʼi:
“Ndereguerekói vaʼerã rrelasión sexuál nde rapicha kuimbaʼéndi reguerekoháicha avei rrelasión sexuál peteĩ kuñándi” (Levítico 18:22).
“Haʼekuéra ojapose chupekuéra ogustávante [...]. Upévare Ñandejára oheja oiko hikuái umi deséo sexuál ñanembojeguarúva poguýpe. Umi kuña ndorekosevéima rrelasión sexuál kuimbaʼéndi, síno orekose rrelasión sexuál hapicha kuñándi, Ñandejára ndojapóiramo jepe chupekuéra upearã” (Romanos 1:24, 26).
“Ani peñembotavy pendejupe. Umi hekovaíva, oadoráva taʼanga, oporomoakãratĩva, kuimbaʼe oikóva kuñáramo, kuimbaʼe orekóva rrelasión sexuál kuimbaʼéndi, omondáva, noñekontentáiva ha oipota potavéva, ikaʼúva, heʼíva japu hapicháre, ha ombotavýva hapichápe, ni peteĩva koʼãichagua persóna ndoikemoʼãi Ñandejára Rréinope” (1 Corintios 6:9, 10).
Ñandejára ningo ohaʼarõ enterovetéva ñakumpli umi mbaʼe haʼe heʼíva. Péro lastimósamente ñaneimperfékto rupi ñandestira umi mbaʼe Ñandejárape ndogustáiva. Upévare káda uno jajejokómante vaʼerã pono jajapo koʼãichagua mbaʼe (Colosenses 3:5).
¿Heʼisépa upéva...?
¿Heʼisépa upéva la Biblia heʼiha ndajachaʼéi vaʼerãha umi géi ha lesviánare?
¡Nahániri! La Bíbliape ndajatopamoʼãi ni peteĩ párte heʼíva ñandéve ndajachaʼéi vaʼerãha ñande rapicháre. Heʼi guei ñandéve ñañehaʼã vaʼerãha jajogueraha porã “enterovéndi”, tahaʼe haʼéva la oiko lája hikuái (Hebreos 12:14). Upévare ndovaléi ñañembohory, jaapoʼi ni ñamaltrata umi persóna haʼévape omosexuál.
¿Heʼisépa upéva umi kristiáno oñemoĩ vaʼerãha pe léi opermitívare pe matrimónio géi?
La Biblia ohechauka Ñandejára ojapo hague pe matrimónio oĩ hag̃uáicha oñondive peteĩ kuimbaʼe ha peteĩ kuña (Mateo 19:4-6). Upéicharõ jepe, ore ni ndoroapojái ni noroñemoĩri umi léi opermitívare pe matrimónio géi, pórke upéva haʼe hína peteĩ téma polítiko. Ha la Biblia heʼi porã kristianokuérape ani hag̃ua oñentremete polítikare (Juan 18:36).
¿Péro mbaʼépa oikóta...?
¿Péro mbaʼépa oikóta peteĩ persóna oñentremetéramo hapicha kuimbaʼére térã hapicha kuñáre? ¿Ikatúpa okambia peichagua persóna?
¡Si ikatu! Ha la Biblia ohechauka porã upeichaha. Apóstol Pablo oskrivi vaʼekue peteĩ kárta peteĩ kongregasiónpe, ha upépe heʼi chupekuéra umi kuimbaʼe orekóva rrelasión sexuál kuimbaʼéndi ndoikemoʼãiha Ñandejára Rréinope. Péro upe riremi heʼi avei chupekuéra: “Pende apytépe oĩ umi yma oiko vaʼekue péicha” (1 Corintios 6:11).
¿Heʼisépa upéva umi anteve oñentremete vaʼekue hapicha kuimbaʼére térã hapicha kuñáre koʼág̃a ndostiramoʼãveimaha chupekuéra upéva? Nahániri. La Biblia heʼi porã: “Pemonde pendejehe peteĩ aóicha pe kondúkta pyahu, upéva Ñandejára omeʼẽ ñandéve jaikuaa porãramo chupe. Upéva penepytyvõta pembopyahu hag̃ua pene kondúkta ikatu hag̃uáicha ojoguave Ñandejárape” (Colosenses 3:10). Upéicharõ, peteĩ persóna okambia hag̃ua ha ojoguave hag̃ua Ñandejárape oikotevẽ heta tiémpo, ndahaʼéi ikoʼẽtantemava upéicha.
¿Péro mbaʼépa oikóta peteĩ persóna ombovyʼaséramo Ñandejárape, péro orekóiti umi deséo omosexuál?
Enterove persóna orekóva peteĩ deséo vai ningo olucha vaʼerã upéva kóntrape ha odesidi ndojapomoʼãiha pe mbaʼe vai ostiráva chupe. Ha upeichaite avei ojapo vaʼerã umi orekóva umi deséo omosexuál. ¿Péro mbaʼéichapa ikatu ipuʼaka hikuái upe deséore? La Biblia heʼi: “Pesegíkena peiko pe espíritu poguýpe ha péicha ni mbaʼevéicharõ ndapejapomoʼãi umi mbaʼe vai ogustáva pende rete imperféktope” (Gálatas 5:16).
Ko versíkulo ndeʼíri pe persóna ndorekomoʼãveimaha pe deséo vai. Upéva rangue heʼi ikatuha ipuʼaka umi deséore ha ndojapói pe ostiráva chupe oikóramo pe espíritu poguýpe, ha upéva ohupytýta ostudiáramo la Biblia ha oñemboʼéramo.
David, pe mitãkariaʼy ñamensiona vaʼekue iñepyrũme, ojapo vaʼekue upéva, haʼe ipuʼaka kuri umi deséo vai orekóvare. Ha chupe tuichaiterei oipytyvõ kuri omombeʼúrõ guare ituakuérape la ilúcha. Haʼe heʼi: “Haʼete voi ku ojeíva che árigui peteĩ kárga ipohyietereíva. Ambyasy antevéma voi nañeʼẽi hague hendivekuéra. La upéicharire ifasilvéta kuri chéve heta mbaʼe”.
Upéicharõ ñañehaʼãkena jajapo la Ñandejára heʼíva, pórke upéicha katuete javyʼaitereivéta. Ikatu ñaime segúro la haʼe omandáva guive ‘oĩ porãha ha ñanembopyʼaroryha’, ha ñakumplíramo umíva jahupytýta “hetaiterei mbaʼe porã” (Salmo 19:8, 11).