¿Mbaʼéichapa ikatu jasegi ñandefiél ijetuʼu jave?

1, 2. ¿Mbaʼépa oiko vaʼekue Jesús omboʼérõ guare Capernaúmpe?

PETEĨ vuéltape Jesús omboʼe hína kuri umi héntepe Capernaúmpe, ha heʼi chupekuéra: “Ndapeʼúiramo pe Yvypóra Raʼy roʼo ha ndapeʼúiramo huguy, ndaikatumoʼãi peikove”. Avei heʼi: “Pe hoʼúva che roʼo ha hoʼúva che ruguy ohupytýta jeikove opaveʼỹva, ha che amoingove jeýta chupe pe ára pahápe” (Juan 6:​53, 54). Heta disípulope ndogustái vaʼekue la Jesús heʼíva ha heʼi voi hikuái: “Koʼã mbaʼe heʼíva ningo ivaieterei, ¿máva piko ohenduséta chupe?” (Juan 6:60).

² Umi héntepe ndogustaiete vaʼekue la Jesús heʼíva ha upévare nomoirũvéi chupe. ¿Serápa la ndojeroviaiete vaʼekue hikuái Jesúsre? Amalisia oĩ vaʼekue umi ojeroviáva Jesúsre pórke ndaʼareguasúinte kuri haʼekuéra ohecha la Jesús ojapo vaʼekue ha heʼi: “Añetehápe kóva hína pe proféta ojeʼe vaʼekue outaha ko múndope” (Juan 6:14). Upéicharõ, umi disípulo ndahaʼéi vaʼekue la ndojeroviaietéva Jesúsre, péro ijetuʼúrõ guare la situasión umi disípulo ndosegivéima ifiél.

3. ¿Mbaʼépa ojapo vaʼekue umi apostolkuéra ha mbaʼérepa? (Ehecha pe taʼanga).

³ ¿Mbaʼépa ojapo vaʼekue umi apostolkuéra? Haʼekuéra osegi ifiél Jesúspe. Jesús oporandu vaʼekue chupekuéra ohopátapa avei hikuái umi ótroicha. Péro Pedro okontesta Jesúspe: “Che Ruvicha, ¿máva rendápe piko rohóta? Ne ñeʼẽ ningo omeʼẽ jeikove opaveʼỹva. Ha ore roguerovia ha roikuaa nde haʼeha pe ipotĩetéva, upe Ñandejára ombou vaʼekue” (Juan 6:​68, 69). Ikatu oime Pedro ha umi ótro apóstol nontendepái rakaʼe mbaʼépa la Jesús heʼise vaʼekue heʼírõ guare hoʼu vaʼerãha hikuái hoʼo ha huguy. Upéicharamo jepe, umi apóstol odesidi vaʼekue osegitaha ifiél Jesúspe. ¿Mbaʼérepa? Pórke haʼekuéra ndodudái vaʼekue Jesús haʼeha “Cristo, upe Ñandejára ombou vaʼekue” (Luc. 9:​20, 35).

4. ¿Mbaʼeichagua situasiónpepa ikatu ijetuʼu ñandéve jasegi ñandefiél Jehovápe?

⁴ Ikatu oñepresenta heta situasión ijetuʼuhápe ñandéve jasegi ñandefiél Jehovápe, jahechamína unos kuánto ehémplo. Ñapensamíntena mbaʼéichapa ñarreaksiona ñane organisasión okambiaʼimi jave ñantende lája peteĩ téxto bíblico térã japredika lája. Ikatu oime ijetuʼu avei ñandéve ñantende mbaʼérepa Jehová oheja oiko ñanderehe peteĩ mbaʼe ivaietereíva. Sapyʼánte ikatu avei peteĩ ñane amigoite ojapo álgo hasýva ñandéve, térã peteĩ ermáno jarrespetáva haʼetévaicha ojapóva peteĩ inhustísia ñanderehe. ¿Mbaʼépa jajapo koʼã kásope?

5. ¿Mbaʼérepa ñamombarete vaʼerã ñande jerovia? Emombeʼu peteĩ ehémplo. (Colosenses 1:23).

⁵ Jasegi hag̃ua ñandefiél Jehovápe ijetuʼu jave la situasión tekotevẽ ñandejerovia mbarete. Por ehémplo, ñamoĩ chupe oñemopuʼãha peteĩ edifísio peteĩ lugár pyʼỹinte oikohápe terremóto. Peichagua edifísio tekotevẽ isimiénto mbarete porã ani hag̃ua hoʼa. Péicha avei, umi pruéva ñañeʼẽ vaʼekuére pe ótro párrafope ojogua pe terremótope, ha jasegi hag̃ua jajepytaso mbarete Jehová ykére, ñande jerovia isimiénto porã vaʼerã. Iñimportanteterei jasegi ñamombarete ñande jerovia ikatu hag̃uáicha jaservi meme Jehovápe tou la oúva (1 Cor. 15:58; elee Colosenses 1:23).

6. ¿Mbaʼépa oipytyvõ vaʼekue umi apóstolpe osegi hag̃ua ifiél Jesúspe?

⁶ Jahecha haguéicha, oĩ vaʼekue umi disípulo ohejáva Jesúspe, ¿péro mbaʼépa oipytyvõ vaʼekue umi apóstolpe osegi hag̃ua ifiél Jesúspe? Umi apóstol oĩ vaʼekue konvensído oadora vaʼerãha hikuái Jehovápe pórke haʼe okrea entéro mbaʼe. Avei haʼekuéra ndodudái vaʼekue Jesús haʼeha Ñandejára Raʼy ha ‘iñeʼẽ omeʼẽha jeikove opaveʼỹva’. Umi apóstol oikuaa porã vaʼekue avei Jehová oguerohoryha Itaʼýra Jesús ojapóva. Koʼág̃a ndajahechamoʼãi entéro umi pruéva ikatúva jahasa, upéva rangue ñaanalisáta mbohapy enseñánsa ñanepytyvõtava jajepytaso mbarete hag̃ua tahaʼe haʼéva umi pruéva jahasáva. ¿Mbaʼe mbaʼépa hína umi enseñánsa? 1) Jehová hína entéro mbaʼe Apohare, 2) la Biblia ou Jehovágui, ha 3) testígo de Jehová haʼe hína Ñandejára puévlo. Jagueroviáramo koʼã enseñánsa jasegíta ñandefiél Jehovápe entéro situasiónpe.

JEHOVÁ HÍNA ÑANDE APOHARE

7. ¿Mbaʼe rehepa ñanemomanduʼa Apocalipsis 4:​11, péro mbaʼépa ikatu oiko jahasa asy jave?

⁷ (Elee Apocalipsis 4:11). Ko téxto ñanemomanduʼa Jehová ojapo hague entéro mbaʼe, upévarentema voi haʼe omerese jaadora chupe. Jajepyʼamongeta jave mbaʼeichaitépa Jehová ipoderóso, ñañekonvense haʼe ikatuha ñanepytyvõ oimehaichagua situasiónpe. Péro Satanás omosarambi opárupi ko múndope informasión japu ikatu hag̃uáicha la hénte oñepyrũ oduda oexistípa añete Ñandejára, oĩ voi umi sientífiko heʼíva ndaiporiha peteĩ ñande Apohare. Ñande ñañepyrũrõ jadudaʼimi ha ndajagueroviapái Jehová haʼeha ñande Kreadór ha ñanderayhuha, ¿mbaʼépa ikatu oiko? Jahasa asy jave ikatu hína ñañeporandu oexistípa Ñandejára ha añetehápepa ñanepytyvõta ñaneprovléma jave (Heb. 11:6).

8, 9. ¿Mbaʼépa rejapo vaʼerã reñepyrũrõ reduda Jehová haʼeha ñande Apohare? (Ehecha pe taʼanga).

⁸ Pyaʼékena ekuʼe oimérõ reñepyrũ hína reduda Jehovápa haʼe añete ñande Kreadór. ¿Mbaʼépa ikatu rejapo? Ikatu reheka informasión ñande puvlikasionkuérape ohechaukáva mbaʼérepa ikatu reguerovia Jehová ojapo hague entéro mbaʼe. Retopáta katuete hetaiterei informasión omombaretéva nde jerovia. Por ehémplo ikatu rehecha umi folléto hérava ¿Es la vida obra de un Creador?, ha El origen de la vida. Cinco cuestiones dignas de análisis. Avei ideprovéchota ndéve umi vidéo hérava “¿Oĩpa peteĩ Kreadór?”, osẽva jw.org-pe. Peteĩ ermána imitãva hérava Jessica oikóva Estados Unídospe heʼi: “Aleepa rire pe folléto El origen de la vida, añekonvense oĩha heta pruéva ohechaukáva jarekoha peteĩ ñande Apohare. Che aikuaáma voi kuri upéva, péro la heʼíva pe folléto chepytyvõ ani hag̃ua aduda ni michĩmi”. Avei heta ermánopema oipytyvõ pe lívro hérava ¿Existe un Creador que se interese por nosotros? Ikatu oime nde releepáma voi koʼã informasión, ¿péro mbaʼetekópa relee jeýramo?

⁹ Restudia jey vove neañoháme ikatu rehecha umi pruéva ohechaukáva Ñandejára oexistiha. Umi informasión nepytyvõta rejerovia mbareteve hag̃ua, péro ndahaʼéi upévante. Avei reikuaa porãvéta mbaʼeichaguápa hína Jehová (Rom. 1:20). Upéi ikatúta reipuru la reaprendéva reipytyvõ hag̃ua ótrope oimérõ oduda hína Ñandejára oexistiha. Legálmente Jehová omeʼẽ ñandéve hetaiterei pruéva ha upévare ndaikatúi ñanega haʼe oexistiha

Nebulosa: IAC/RGO/David Malin Images; pira ha áuto: Mercedes-Benz USA; avión: Kristen Bartlett/University of Florida

LA BIBLIA OU JEHOVÁGUI

10. ¿Mbaʼérepa la Biblia iñimportanteterei ñandéve g̃uarã? (2 Timoteo 3:​16, 17).

¹⁰ (Elee 2 Timoteo 3:​16, 17). La Bíbliape jatopa Jehová mensáhe ñandéve g̃uarã. Upépe oñekontesta heta pregúnta iñimportantetereíva. Por ehémplo, ¿mbaʼéichapa oñepyrũ rakaʼe la vída? ¿Mbaʼérepa jaikove? ¿Ha mbaʼépa Ñandejára oipota jajapo? La Biblia ou Jehovágui, upévare ko lívro iñimportanteterei ñandéve g̃uarã, upéicha rupi ñantende porãse la heʼíva ha ñañehaʼãmbaite jajapo la oĩva pype.

11. ¿Mbaʼérepa nde reguerovia la Biblia ouha Ñandejáragui?

¹¹ Oĩ hetaiterei mbaʼe ohechaukáva ñandéve ikatuha jaguerovia la Biblia ouha Jehovágui. Por ehémplo, la Biblia ndaijapúi omombeʼu jave umi mbaʼe oiko vaʼekue yma (Luc. 3:​1, 2). Avei ndojavýi ni michĩmi oñeʼẽ jave ñande yvýre ha pe naturalésare (Job 26:7). Ndaipóri ningo ótro lívro ojetradusíva ha oñemosarambíva oparupiete ko yvy ape ári la Bíbliaicha, hiʼarive Satanás heta oñehaʼã vaʼekue ohundi hag̃ua Ñandejára Ñeʼẽ. Avei ikatu jareko enkuénta la Biblia oskrivi hague 40 kuimbaʼérupi diferénte tiémpope ha oñetermina 1.600 áñorupi, upéicharõ jepe osegi el mísmo téma oñepyrũ guive opa peve. Umi konsého oĩva Ñandejára Ñeʼẽme koʼág̃a peve ideprovécho ñandéve ha hetaiterei héntepema oipytyvõ (Prov. 13:20; 15:21; Mat. 7:12). La Bíbliape oĩ hetaiterei profesía oñekumplímava, upévare avei ñakonfia la Biblia heʼívare (Jos. 23:14). Jahechapa rire koʼã mbaʼe ni michĩmi ndajadudái la Biblia ouha Ñandejáragui.

12. ¿Mbaʼépa jajapo vaʼerã jadudáramo la Biblia ouha Ñandejáragui?

¹² ¿Mbaʼépa jajapo vaʼerã ñañepyrũrõ ñañeporandu oúpa añete Ñandejáragui la Biblia? Ñañemboʼe vaʼerã ha ñamombeʼu Jehovápe la ñañandúva, jajerure chupe tañanepytyvõ ha jaheka informasión. Jahechamína la heʼíva peteĩ ermáno imitãva hérava Jordan. Ituakuéra ningo omboʼe vaʼekue chupe la Biblia imitã guive. Haʼe heʼi: “Che ndahaʼéi ku ensegída aroviapáva la ojeʼéva chéve, síno ajasegura vaʼerã siértopa hína la ojeʼéva. Sinséramente sapyʼánte ndahaʼéi la chekonvensepáva umi mbaʼe ahendúva térã aleéva, péicha jave aheka informasión ñane puvlikasionkuérape akontesta hag̃ua umi mbaʼe añeporandúva”. Upéicharõ jasegíkena jajapo tekotevẽva guive jaguerovia hag̃ua la Biblia ouha Jehovágui, péicha ñande jerovia imbaretevéta (1 Cor. 3:​12, 13).

TESTÍGO DE JEHOVÁ HAʼE HÍNA ÑANDEJÁRA PUÉVLO

13. Jadudáramo Jehová ojevaleha Testigokuérare ojapo hag̃ua ivolunta, ¿mbaʼépa jajapo vaʼerã?

¹³ Peichaháguinte ikatu ñapensa: “¿Añete piko Jehová ojevale umi Testigokuérare ojapo hag̃ua ivolunta koʼág̃arupi?”. Ñapensa sapyʼárõ upéicha, aníkena jaheja reínte upéva, síno pyaʼékena jajapo álgo. Por ehémplo ikatu ñañeporandu: “¿Máva mávapa hína umi oñehaʼãmbaitéva ojapo la Biblia heʼíva? ¿Mbaʼe organisasiónpa oguerovia umi enseñánsa oĩva la Bíbliape añoite? ¿Mávapa ojapo koʼág̃arupi Jehová volunta?” (Mat. 7:​20, 21; 2 Tim. 4:​3, 4).

14. ¿Mbaʼéichapa Jehová ojevale Testigokuérare oñekumpli hag̃ua la heʼíva Mateo 24:14?

¹⁴ Ñande jaikuaa Ñandejára oipotaha oñemombeʼu umi notísia porã opárupi ou mboyve pe fin. Upévare ikatu ñañeporandu: “¿Mávapa hína umi omombeʼúva ‘umi notísia porã’ koʼág̃arupi?” (Mat. 24:14). Jaikuaa porãiterei ningo la rrespuésta. Jehová ojevale hína Testigokuérare okumpli hag̃ua ivolunta ha péicha ojepredika opárupi. Testígo de Jehová añoite ningo opredika umi notísia porã oñeʼẽva Ñandejára Rréinore mas de 240 país ha territóriorupi. Ñande jajapo jaikóvo ko traváho mas de 100 áñorema, péicha jahecha ymaite guive ñandéve g̃uarã iñimportantetereiha japredika ha ñamboʼe umi héntepe, ndaipóri voi ótra kósa iñimportantevéva upévagui (Mat. 28:​19, 20).

15. ¿Mbaʼéichapa testígo de Jehová ombotuicha Ñandejára réra? (Mateo 6:9; Isaías 43:10).

¹⁵ (Elee Mateo 6:9 ha Isaías 43:10). Tuichaite mbaʼe ñandéve g̃uarã ñañehenói testígo de Jehová. Javyʼaite la hénte ñandekuaa haguére Ñandejára réra teérupi. Ko múndope oĩ heta hénte ndoikuaáiva Ñandejára heraha Jehová, péro Jehová organisasión ombaʼapo jejopy onohẽ hag̃ua peteĩ Biblia oipurúva Ñandejára réra umi téxto oĩ haguépe voi pe idióma orihinálpe. Ñandejára réra oĩ mas de 7.000 vése pe Traducción del Nuevo Múndope.

16. ¿Mbaʼérepa ikatu jaʼe testígo de Jehová ojapoha la heʼíva Juan 13:​34, 35? (Ehecha pe taʼanga).

¹⁶ (Elee Juan 13:​34, 35). Ko múndope la hénte ndochaʼéi ojuehe ha ojotrata vai, péro Jehová siervokuéra idiferentete, haʼekuéra ojoayhu añete ha oĩ unído. Testigokuéra ningo ndahaʼéi el mísmo paisgua ha káda uno idiferénte la isituasión, péro enterovéva oñehaʼã oiko hag̃ua pyʼaguapýpe ha mborayhúpe. ¿Ehómapa raʼe evisita peteĩ kongregasión oĩva ótro lugárpe? Oimérõ upéicha, katuete rehecháne raʼe mbaʼéichapa ñane ermáno ha ermanakuéra toĩ oĩháme ojoayhu ha oiko peteĩ ñeʼẽme. Upéva ohechauka Jehová ojevaleha Testigokuérare okumpli hag̃ua ivolunta. Ñanemanduʼa meméramo upévare, ifasilvéta ñandéve jasegi hag̃ua ñandefiél Jehovápe jahasa jave umi situasión ijetuʼúva.

ANÍKENA NÚNKA JAHEJA JEHOVÁPE

17, 18. ¿Mbaʼeichagua situasión ijetuʼúvapa ikatu ñambohovái, péro mbaʼépa ñande avei ikatu jaʼe?

¹⁷ Koʼã ára pahápe pe situasión ijetuʼu ha ipeligróso enterovépe g̃uarã (2 Tim. 3:​1, 13). Ikatu oime oñepresenta hetave mbaʼe ijetuʼúva ñandéve. Ñandejára organisasión ikatu odesidi peteĩ mbaʼe nañantendepáiva. Avei ikatu ñapensa peteĩ ermáno nañanentendeiha ha nañandetrataporãiha. Koʼã kásope sapyʼánte ndaikatúi ñasolusiona pyaʼe umi provléma térã jasegi ndajapillapái mbaʼérepa oñekambia álgo ñane organisasiónpe.

¹⁸ Jahasa asýramo jepe ñambohovái jave peteĩ situasión ijetuʼúva, lomímonte siémpre ikatu ñandefiél Jehovápe ñaĩramo konvensído koʼã mbohapy mbaʼégui: 1) Jehová haʼeha ñande Kreadór, 2) la Biblia ouha Ñandejáragui ha 3) umi testígo de Jehová haʼeha Ñandejára puévlo. Apóstol Pedro heʼi haguéicha Jesúspe, ñande avei ikatu jaʼe Jehovápe: “¿Máva rendápe piko rohóta? Ne ñeʼẽ ningo omeʼẽ jeikove opaveʼỹva”.