ટેબલ કે ટ્રૉલી દ્વારા કઈ રીતે પ્રચાર કરી શકાય

આપણે ટેબલ કે ટ્રૉલી દ્વારા અસરકારક રીતે નમ્ર દિલના લોકોને પ્રચાર કરી શકીએ છીએ. (યોહા. ૬:૪૪) તેથી, વધુ અવરજવર હોય એવા વિસ્તારમાં જાહેરમાં સાક્ષી આપવાની ગોઠવણ કરવાનું વડીલોને ઉત્તેજન આપવામાં આવ્યું છે. ટેબલ કે ટ્રૉલી એક જ જગ્યાએ રાખી મૂકતા ન હોવાથી અધિકારીઓ પાસે પરવાનગી લેવાની જરૂર નથી. એમાં કોણ ભાગ લઈ શકે? એવાં ભાઈ-બહેનો જેઓ સમજી-વિચારીને અને માનથી વર્તતાં હોય અને સારી રીતે વાત કરતાં હોય. શું કરવું જોઈએ અને ન કરવું જોઈએ એ માટે નીચે આપેલાં સૂચનો ભાઈ-બહેનોને સફળ થવા મદદ કરશે.

શું કરવું જોઈએ?

મળતાવડા બનીએ. પસાર થતા લોકોને આવકારીએ અને મદદ કરીએ. અમુક ભાઈ-બહેનો સ્માઈલ આપે છે અને ‘કેમ છો’ કહે છે. જો કોઈ પસાર થતી વ્યક્તિ ટ્રૉલી સામે નજર કરે, તો કદાચ કહી શકો: “તમને ગમે એ સાહિત્ય લઈ શકો છો.”
ટ્રૉલીથી યોગ્ય અંતરે ઊભા રહો. અમુક જગ્યાએ ટ્રૉલી પાસે ઊભા રહેવાથી ભાઈ-બહેનોને સારાં પરિણામ મળ્યાં છે. જ્યારે કે, બીજા અમુકને લાગે છે કે, એનાથી પસાર થતા લોકો ટ્રૉલી પાસે આવતા અચકાય છે. તેથી, તેઓ ટ્રૉલીથી થોડા દૂર ઊભા રહે છે. અને ટ્રૉલી પાસે કોઈ આવીને ઊભા રહે એની રાહ જુએ છે. વ્યક્તિ ટ્રૉલી પાસે આવે ત્યારે તેની સાથે વાત શરૂ કરવાની કોશિશ કરે છે. અને કદાચ પૂછે છે: “શું તમે આ સવાલ પર પહેલાં કદી વિચાર્યું છે?”
બાઇબલનો બને એટલો વધારે ઉપયોગ કરો.
જો કોઈ વ્યક્તિ આપણે અભ્યાસ ચલાવીએ છીએ એવું સાહિત્ય લે જેમ કે, બાઇબલ શીખવે છે પુસ્તક. એ વખતે તેમને બાઇબલ અભ્યાસ કઈ રીતે થાય છે એ બતાવો. તેમ જ, તમારી પાસે મોબાઇલ કે ટેબ્લેટ હોય તો, એના પર બાઇબલમાંથી કેમ શીખવું જોઈએ? વીડિયો પણ બતાવો.
શક્ય હોય તો રસ ધરાવતી વ્યક્તિનું નામ અને સરનામું લઈ લો. જો તે તમારા વિસ્તારમાં રહેતી ન હોય, તો પ્લીઝ ફૉલો-અપ (S-૪૩) ફૉર્મ ભરીને બને એટલું જલદી તમારા સેક્રેટરીને આપી દો.
સાવચેત રહો અને ધ્યાન આપો કે કોઈ મુશ્કેલી ઊભી ન થાય. જો કોઈ ગુસ્સે થઈને આપણા કામનો વિરોધ કરે, તો સારું રહેશે કે ત્યાંથી જતા રહો.

શું ન કરવું જોઈએ?

ગુસ્સે ન થઈએ અને સાહિત્ય લેવા આગ્રહ ન કરીએ. તેમ જ, ચોકીદારની જેમ આપણે ટ્રૉલી પાસે પહેરો ન ભરીએ.
આ પ્રકારના પ્રચારને ફક્ત સાહિત્ય આપવાની રીત ન ગણવી જોઈએ. આપણો ધ્યેય બાઇબલ અભ્યાસ ચલાવવાનો છે. એટલે, વ્યક્તિ જોડે વાતચીત કરવાનો પ્રયત્ન કરવો જોઈએ.
ટ્રૉલી દેખાય જ નહિ એ રીતે ઊભા ન રહીએ અથવા આપણા સાથી જોડે વાત કરવામાં વ્યસ્ત ન થઈ જઈએ. જો કોઈ કારણોસર ફોન વાપરવાની જરૂર પડે, તો ટ્રૉલીથી થોડા દૂર જઈને વાત કરીએ એ સારું રહેશે.
કોઈ વિરોધ કરે તો, તેની સાથે ચર્ચામાં ન ઊતરીએ. જો તે બૂમબરાડા પાડે તો બીજી જગ્યાએ જતા રહેવું સારું હોઈ શકે.