43 XOSÉ
Foi un pai valente
FAI falta valor para ser un bo pai. Pero Xosé, un carpinteiro de Nazaret, tivo que demostrar valor incluso antes de chegar a ser pai. María, a rapaza coa que ía casar, estaba embarazada e o neno non era del. Aínda que ela lle explicou como quedara embarazada, para el era moi difícil de crer e entender. Que faría?
A Biblia di que Xosé “era un home xusto” que obedecía a lei de Xehová. Tamén era amable e compasivo. Cando soubo que María estaba embarazada meditou ben no que debería facer. Para protexela e non humillala, pensou en divorciarse dela en segredo. Daquela un compromiso era tan serio coma o matrimonio. Así que se un home e unha muller que se comprometeran decidían non casar tiñan que divorciarse. Pero Xehová detívoo. Enviou un anxo para falarlle a Xosé nun soño. Este díxolle: “Non teñas medo de levar a María para a túa casa para que sexa a túa muller”. Tranquilizouno explicándolle que María lle dixera a verdade e que o neno que esperaba era fillo de Deus e chegaría a ser o Mesías.
Xosé tivo que cumprir cunha enorme responsabilidade: coidar do Fillo de Deus.
Xosé “fixo o que o anxo de Xehová lle mandara”. Foi valente e aceptou cumprir coa responsabilidade que Xehová lle asignara: coidar da súa querida muller e do neno máis importante que ía nacer xamais. Xosé necesitaría reunir todo o valor posible.
Uns meses despois, César Augusto decretou que se fixese un censo, así que Xosé tiña que viaxar a Belén para rexistrarse. Pode que a lei non esixise que María fose con el, pero ela foi igual. É probable que Xosé sentise que podía protexela mellor se permanecían xuntos. Así que fixeron esa longa viaxe a pesar de que “estaba a punto de ter o neno”. Alí, en Belén, María púxose de parto e deu a luz a Xesús nunha corte.
Xosé traballou duro para coidar da súa familia, pero non tiñan moitos cartos. Cando el e María foron presentar o neno ó templo de Xerusalén, ofreceron o sacrificio estipulado para os pobres. Tempo despois, cando xa vivían nunha casa en Belén, recibiron a visita duns astrólogos que probablemente viñan de Babilonia. Chegaran ata alí guiados por unha misteriosa “estrela” e déronlle á familia agasallos moi valiosos para o neno. Cando xa marcharan, o anxo de Xehová advertiu a Xosé de que o malvado rei Herodes quería matar a Xesús. Díxolle que fuxise a Exipto coa súa familia.
Xosé foi valente e obedeceu o anxo. Díxolle á súa muller que tiñan que escapar inmediatamente de Belén. Así que no medio da noite colleu a María e o seu pequeno e levounos a un lugar descoñecido lonxe de alí. E como coidaría deles en Exipto? Seguro que os regalos que recibiron dos astrólogos lle axudaron a pagar o que a familia necesitou alí. Tempo máis tarde, Xehová díxolle a Xosé que volvese coa súa familia ó seu país. Pero a zona de Belén estaba gobernada por un home moi cruel. Así que nun soño Xehová advertiulle que fose a Nazaret. E así o fixeron.
Alí, Xosé traballou duro como carpinteiro para darlles o necesario a María, Xesús e polo menos outros seis fillos. E o que é máis importante, Xosé coidou da súa familia en sentido espiritual. Tiñan o costume de ir á sinagoga regularmente para aprender de Xehová e tamén de viaxar xuntos a Xerusalén para asistir ás festas. A última vez que a Biblia menciona de forma directa a Xosé foi nunha destas festas. El e María pensaban que perderan a Xesús, que daquela tiña 12 anos. Imaxina o nervioso que debeu poñerse este bo pai! Pero Xesús estaba a salvo e “seguiu obedecendo os seus pais”.
A Biblia non di cantos anos tiña Xesús cando Xosé morreu. Pero parece que lle ensinou e o preparou para ser un bo carpinteiro. De feito, Xesús era coñecido como “o carpinteiro” e non só como “o fillo do carpinteiro”. Xosé foi un grande exemplo. Foi valente, leal e cariñoso. Ademais protexeu os seus, deulles o necesario e ensinoulles sobre Xehová. Está claro que cumpriu ben coa responsabilidade que Deus lle dera, xusto o que Xehová espera de tódolos pais.
Le o relato da Biblia:
Pensa nisto:
De que formas demostrou valor Xosé?
Afonda máis
1. Por que di Lucas 3:23 que Xosé era “fillo de Helí” se en realidade a filla de Helí era María? (w17.08 páx. 32 par. 4-wcgr).
2. Cal puido ser a razón pola que Xosé non tivo relacións sexuais con María antes do nacemento de Xesús? (w03 15/12 páx. 5 par. 5-wcgr).
3. Por que sabemos que Xosé traballou moi duro? (ia páxs. 166-167 pars. 15-18-wcgr). A
Imaxe A
4. Por que chegamos á conclusión de que Xosé probablemente morreu antes de que Xesús comezase o seu ministerio? (w17.07 páx. 13 par. 8, nota-wcgr).
Medita no que aprendiches
Que poden aprender de Xosé os cabezas de familia sobre obedecer a guía de Xehová, mesmo cando iso implica facer sacrificios? (Mat. 1:20, 24; 2:13-15, 19-21).
Que nos ensina Xosé sobre darlle prioridade a Xehová na nosa vida familiar? (Luc. 2:41). B
Imaxe B
De que outras maneiras podes imitar o valor de Xosé?
Analiza o cadro completo
Que me ensina este relato sobre Xehová?
Como se relaciona este relato co propósito de Xehová?
Que me gustaría preguntarlle a Xosé cando resucite?
Aprende máis
Neste vídeo, mira como Xosé foi obediente e fixo a vontade de Xehová.
Como podemos imitar a Xosé e a María cando o goberno dita unha lei que parece inxusta ou que nos complica a vida?
“Estás listo ‘para obedecer’?” (w23.10 páxs. 8-10 pars. 9-14)